சிறுதானிய மகத்துவ மையம் பல்கலைக்கழகத்தின் பலே முயற்சி!

வழிகாட்டி

. சிறுதானியங்கள் பற்றி அதிகரித்து வரும் விழிப்பு உணர்வைத் தொடர்ந்து... நெல், பருத்தி, மக்காச்சோளம், கரும்பு போன்ற பயிர்களுக்குக் கொடுப்பதுபோல, சிறுதானியங்களுக்கும் முக்கியத்துவம் கொடுக்கத் தொடங்கியுள்ளது, தமிழக அரசு. அதற்காக, 'சிறுதானிய மகத்துவ மையம்’ ஒன்றை திருவண்ணாமலை அருகேயுள்ள அத்தியந்தல் கிராமத்தில் அமைத்திருக்கிறது, தமிழ்நாடு வேளாண்மைப் பல்கலைக்கழகம்!

. மையத்தின் தலைவர் மற்றும் பேராசிரியர் ஜெயச்சந்திரனைச் சந்தித்தபோது, ''தமிழகத்தில் 77 லட்சம் பேருக்கும் நீரிழிவுக் குறைபாடு (சர்க்கரை நோய்) இருப்பதாக ஆய்வுகள் சொல்கின்றன. அதாவது, 10 பேரில், ஒருவருக்கு இந்தப் பிரச்னை இருக்கிறது என்கிறார்கள். சமவெளிப் பகுதியில் இருக்கும் மக்களில் பலரும் கண்ணாடி அணிந்தும், முதுகு வளைந்தும், பலவிதமான வியாதிகளோடுதான் இருக்கிறார்கள். மலைப்பகுதிகளில் வசிக்கும் மக்களிடம் இதெல்லாம் இல்லை. காரணம்... சிறுதானிய உணவுகள்தான். இதை உணர்ந்த நகர்ப்பகுதி மக்கள், தற்போது இதில் கவனம் செலுத்த ஆரம்பித்துள்ளனர். அதனால், 'சிறுதானியத்தை மக்களிடம் கொண்டு சேர்க்க வேண்டும்’ என்ற எண்ணத்தில் இந்த மையத்தைத் துவங்கி இருக்கிறோம். இதற்காக, ஒரு கோடி ரூபாய் நிதியோடு, 30.4 ஏக்கர் நிலத்தையும் ஒதுக்கியிருக்கிறது தமிழக அரசு'' என்ற ஜெயச்சந்திரன், தொடர்ந்தார்.

. ''தமிழ்நாட்டில் அதிகளவு சாமை சாகுபடி நடப்பது, திருவண்ணாமலை மாவட்டத்தில்தான். சோளம், கம்பு, கேழ்வரகு, வரகு மாதிரியான சிறுதானியங்கள் திருவண்ணாமலையைச் சுற்றியுள்ள வேலூர்,

. தர்மபுரி, கிருஷ்ணகிரி, சேலம் போன்ற மாவட்டங்களில் அதிக அள வில் சாகுபடி செய்யப்படுகின்றன. அதனால்தான் இந்த மையம், இங்கே ஆரம்பிக்கப்பட்டுள்ளது. கம்பு தானியத்தைத் தவிர மற்ற சிறுதானிய ரகங்களில் உயர்விளைச்சல் ரகங்கள் இதுவரை உருவாக்கப்படவில்லை. இவற்றுக்கான ஆராய்ச்சி இங்கு நடக்கும். தட்பவெட்பநிலையைச் சமாளித்து அதிக மகசூல் கொடுக்கும் ரகங்கள், அதிக விளைச்சல் கொடுக்கும் தொழில்நுட்பங்கள், எளியக் கருவிகள், மதிப்புக்கூட்டல் தொழில்நுட்பங்கள்... பற்றிய ஆராய்ச்சிகளையும் மேற்கொள்ள இருக்கிறோம். நஞ்சில்லா உணவு தானியங்களை உற்பத்தி செய்ய... அங்கக வேளாண்முறையில் அதிக விளைச்சலைப் பெறுவதற்கான தொழில்நுட்பங்கள் குறித்த ஆராய்ச்சிகளும் நடக்கும்.

. சிறுதானிய சாகுபடித் தொழில்நுட்பங்கள், பூச்சி-நோய் கட்டுப்பாட்டு முறைகள் பற்றிய ஆலோசனைகள் தேவைப்படும் விவசாயிகள் எங்கள் மையத்தைத் தொடர்பு கொள்ளலாம். திருவண்ணாமலை மாவட்டத்தில் இருக்கும் விவசாயிகளுக்கு, எல்லாவிதமான பயிர்களையும் சாகுபடி செய்யத் தேவையான அனைத்துத் தொழில்நுட்பங்களையும் வழங்கத் தயாராக இருக்கிறோம்'' என்று சொன்னார் ஜெயச்சந்திரன்!

. தொடர்புக்கு, ஜெயச்சந்திரன், செல்போன்: 94434-22461

சிறுதானிய மகத்துவ மையம் பல்கலைக்கழகத்தின் பலே முயற்சி!

Vikatan Correspondent