Published:Updated:

கரும்பு... இனிப்பா... கசப்பா?

ஆட்சியாளர்கள் + அதிகாரிகள் கூட்டு சூழ்ச்சி... காசி. வேம்பையன்

கரும்பு... இனிப்பா... கசப்பா?

ஆட்சியாளர்கள் + அதிகாரிகள் கூட்டு சூழ்ச்சி... காசி. வேம்பையன்

Published:Updated:

 பார்வை

 அதிகாரிகள், ஆலைக்காரர்களால் அப்பாவி விவசாயிகள் எப்படியெல்லாம் ஏமாற்றப்படுகிறார்கள் என்பது பற்றி தொடர்ந்து பார்த்து வருகிறோம். அந்த வகையில், ஆட்சியாளர்கள், விவசாயிகளை எப்படி எப்படி ஏமாற்றுகிறார்கள் என்பது பற்றி இங்கே பேசுகிறார், திருஆரூரான் கரும்பு உற்பத்தியாளர் நலச்சங்கத்தின் பொருளாளர், பரணி.

''சர்க்கரைத் தொழில் நலிவுற்றுப் போனதற்கு காரணம் ஆட்சியாளர்களா... சர்க்கரை ஆலை முதலாளிகளா?’ என்று தலைப்பில் பட்டிமன்றமே நடத்தும் அளவுக்கு இரு தரப்பினரும், பல்வேறு சூழ்ச்சிகளைச் செய்து வருகிறார்கள். 2004-ம் ஆண்டு, மாநில அரசின் பரிந்துரை விலை அறிவிப்பது தொடர்பாக உச்ச நீதிமன்றத்தில் ஒரு வழக்கு நடைபெற்றது. இதில் உத்தரப் பிரதேச மாநில விவசாய சங்கங்களுக்காக வாதாடிய முன்னாள் நிதி அமைச்சர் ப. சிதம்பரம், 'கரும்புக்கான விலையை நிர்ணயம் செய்யும்போது, உற்பத்திச் செலவு, மாற்றுப் பயிர் மூலம் கிடைக்கும் வருமானம், நுகர்வோருக்குக் கிடைக்கும் நியாயமான விலை போன்றவற்றை மத்திய அரசு கருத்தில் கொள்ளவேண்டும். ஆனால், இதையெல்லாம் கண்டுகொள்ளாமல் வேண்டுமென்றே மிகக்குறைவான விலையைத்தான் நிர்ணயம் செய்கிறது. சர்க்கரை ஆலைகள், அதிகப்படியான லாபத்தை எடுத்தாலும், சொற்பமான தொகையைத்தான், 'கூடுதல் தொகை’ என்கிற பெயரில் விவசாயிகளுக்கு வழங்குகின்றன.

ஒட்டுமொத்த விகடனுக்கும் ஒரே ஷார்ட்கட்!

கரும்பு... இனிப்பா... கசப்பா?

நெல், கடலை, பருத்தி மாதிரியான பயிர்களைக் காட்டிலும், கரும்பின் வளர்ச்சி காலம் அதிகம். ஆண்டுக்கு ஒரு முறை (சில மாநிலங்களில் 16 மாதங்கள்) மட்டும்தான் கரும்பு அறுவடை செய்யப்படுகிறது. கரும்புக்கான உற்பத்திச் செலவையும், உற்பத்தி செய்வதில் உள்ள கஷ்டங்களையும் கருத்தில் கொள்ளாமல், நிர்ணயிக்கப்படும் குறைந்தபட்ச ஆதார விலை, விவசாயிகளுக்குக் கண்டிப்பாக ஏற்ற விலையில்லை. கட்டுபடியாகும் விலையை நிர்ணயிக்க... மாநில அரசுக்கு அதிகாரம் அளிக்க வேண்டும். கரும்பு விவசாயிகள், ஆலை முதலாளிகள், விவசாய சங்கங்களோடு கலந்துபேசி, கட்டுபடியாகும் விலையை மாநில அரசுகள் நிர்ணயம் செய்ய வேண்டும்’ என்று நீதிமன்றத்தில் பேசினார்.

அந்த வழக்கில், 'மாநில அரசு பரிந்துரை விலை அளிக்கலாம்’ என்று உச்ச நீதிமன்றம் தீர்ப்பு வழங்கியது. ஆனால், அதன் பிறகு அமைச்சராக பதவியேற்ற சிதம்பரம், கரும்புக்கான ரெக்கவரி புள்ளியை 8.5% என்பதிலிருந்து 9.5% என்று உயர்த்தியது; செப்டம்பர் மாதம் முதல் மார்ச் மாதம் வரையில் அரவை செய்யப்பட்ட கரும்புகளின் அடிப்படையில் கணக்கிடப்பட்ட ரெக்கவரியை ஆண்டு முழுவதும் அரைக்கப்படும் கரும்புக்கு என மாற்றியது; கரும்புக்கான கூடுதல் விலை கொடுப்பதற்காக உருவாக்கப்பட்ட 5(ஏ) விதியை நீக்கம் செய்தது என பல பாதகங்களைச் செய்த அப்போதைய வேளாண்மைத்துறை அமைச்சர் சரத் பவாருக்கு துணைப் போனார்.

கரும்பு... இனிப்பா... கசப்பா?

இதுவும் சூழ்ச்சியே... 'மகாராஷ்டிரா மாநில கரும்பு விவசாயிகள் நலமாக இருக்க வேண்டும்’ என்று நினைத்த சரத் பவார், தமிழகம் உள்ளிட்ட மற்ற மாநிலங்களைப் பற்றிக் கவலைப்படவில்லை. கரும்புக்கு பகல் நேர வெப்பம் அதிகமாகவும், இரவு நேர வெப்பம் குறைவாகவும் இருந்தால், சர்க்கரைக் கட்டுமானம் அதிகம் கிடைக்கும். இது மகாராஷ்டிரா மாநிலத்துக்குப் பொருத்தமாக இருக்கிறது. அதாவது, தென்மேற்குப் பருவமழை முடிந்தவுடன் மகாராஷ்டிராவில் கரும்பு அரவை ஆரம்பமாகும். ஜனவரி மாதம் வரை சர்க்கரை ஆலைகள் இயங்கும். ஆகையால், சர்க்கரைக் கட்டுமானம் 12.5% தொடங்கி 13%  வரை இருக்கும். மேலும், நிலத்திலேயே கரும்பு கொள்முதல் செய்யப்படுவதும், கூடுதல் விலை கிடைப்பதும் அம்மாநில விவசாயிகளை லாபகரமாக வைத்திருக்கிறது. ஆனால், தமிழ்நாட்டில் வடகிழக்குப் பருவமழை முடிந்த பிறகும், அதாவது ஜனவரி மாதம் முதல் ஏப்ரல் மாதம் வரை ஆலைகள் இயங்கி வந்தன. தற்போது ஆண்டு முழுவதும் அரவை செய்த அடிப்படையில் விலை நிர்ணயம் என்றவுடன், ஆலை அதிபர்கள் பேராசையில் ஆண்டு முழுவதும் இயக்குவதற்காக... பதிவு செய்த கரும்பையும், முதிர்ச்சி அடையாத, பதிவு செய்யாத கரும்புகளையும் சேர்த்து அரைக்கிறார்கள். அதனால், சர்க்கரைக் கட்டுமானம் 8.5% கீழாகச் சென்று

கரும்பு... இனிப்பா... கசப்பா?

விடுவதால், தமிழகக் கரும்பு விவசாயிகளுக்கு வருமானம் கிடைப்பதில்லை'' என்று எதார்த்தத்தைச் சொல்லும் பரணி,

''கரும்பு விவசாயிகளுக்குக் கைகொடுக்கும் இன்னொரு விஷயம், கரும்பு மூலமாகக் கிடைக்கும் எத்தனால். நம்நாட்டில் ஒரு நாளுக்கு 3 லட்சம் பீப்பாய்கள் கச்சா எண்ணெய் இறக்குமதி செய்யப்படுகிறது. இதில், சுத்திகரிக்கப்பட்ட பெட்ரோல் டீசலில்... 25 சதவிகிதம் முதல் 40 சதவிகிதம் வரை, எத்தனால் கலப்பதன் மூலம் மிகப்பெரிய அளவில் அன்னிய செலவாணி மிச்சப்படும். இதனால் டாலருக்கு நிகரான இந்திய ரூபாயின் மதிப்பு அதிகமாவதற்கான வாய்ப்புகள் உள்ளன. ஆனால், பெட்ரோல், டீசலில் எத்தனால் கலப்பதை அரசியல்வாதிகளும், பெரும் முதலாளிகளும் பலவிதமான சூழ்ச்சிகள் செய்து தடுத்து விடுகிறார்கள்' என்று வருத்தத்தையும் பதிவு செய்கிறார்.

ஒவ்வொரு தனியார் ஆலையும் கோடிக்கணக்கான ரூபாய்கள் பாக்கி வைத்திருப்பது, விவசாயிகள் வயிற்றில் நெருப்பை எரிய வைக்கிறது. இதுவரையில் அமைச்சர்களும், உயர்மட்ட அதிகாரிகளும் போட்ட உத்தரவுகள் அனைத்தும் கிணற்றில் போட்ட கல்லாகவே இருக்கின்றன. இதுநாள் வரை அமைச்சர்களும், அதிகாரிகளும் சுவைக்கும் ஒவ்வொரு துளி தேநீரிலும், விவசாயிகளின் வியர்வைத் துளியும் கரைந்திருக்கிறது என்பது நினைவுக்கு வராமல் இருந்திருக்கலாம். இனியாவது, நினைத்துப் பார்த்தால் விவசாயிகளுக்கு சந்தோஷமே!

- முற்றும்

 ஆலைக்குப் பூட்டுப் போடுவோம்!

பாரதிய கிஷான் சங்கத்தின் கரும்புப் பிரிவுத் தலைவர் கோவிந்தராஜ், ''எங்கள் சங்கத்தின் சார்பில் நடத்தப்பட்ட கூட்டத்தின் முடிவில்... 2013-2014-ம் ஆண்டு கரும்புப் பருவத்தில் அரவை செய்யப்பட்ட கரும்புக் கான பாக்கித் தொகையை, அக்டோபர் 10-ம் தேதிக்குள் வழங்காவிட்டால், 15-ம் தேதியன்று சர்க்கரை ஆலைகளுக்குப் பூட்டுப்போடும் போராட்டம் நடத்துவோம்'' என்று அறிவித் துள்ளார்.

'மாவட்ட ஆட்சியர்கள் நடவடிக்கை எடுப்பார்கள்!'

விவசாயிகளுக்கு பணம் பாக்கி வைத்திருக்கும் தனியார் ஆலைகள் மீது என்னவிதமான நடவடிக்கை எடுக்கப்பட்டுள்ளது என்பதுபற்றி சர்க்கரைத்துறை இயக்குநர் மகேசன் காசிராஜனிடம் கேட்டதற்கு, ''ஏற்கெனவே, மாவட்ட ஆட்சித் தலைவர்கள் மூலம் நடவடிக்கை எடுக்கச் சொல்லி இருக்கிறோம். மீண்டும் இதை வலியுறுத்துவோம்'' என்று சொன்னார்.

சர்க்கரை ஆலை மீது வழக்கு!

நெல்லிக்குப்பம் ஈ.ஐ.டி பாரி கரும்பு உற்பத்தியாளர்கள் சங்கம் மற்றும் நெல்லிக்குப்பம் கரும்பு நிவாரணக்குழு ஆகிய இரண்டு சங்கங்களும் இணைந்து, சென்னை உயர் நீதிமன்றத்தில் ஈ.ஐ.டி பாரி சர்க்கரை ஆலை மீது வழக்கு தொடர்ந்துள்ளன.

இது தொடர்பாகப் பேசிய ஈ.ஐ.டி பாரி கரும்பு உற்பத்தியாளர்கள் சங்கத் தலைவர் ரவிக்குமார், ''இந்த ஆலை, 2013-2014-ம் ஆண்டு கரும்பு அரவைப் பருவத்தில் சுமார் 14 லட்சம் டன் கரும்பு அரவை செய்துள்ளது. இந்தக் கரும்புக்கு 45 கோடி ரூபாய் பாக்கி வைத்திருக்கிறது. இதனை வழங்கக்கோரிதான் வழக்கு தாக்கல் செய்துள்ளோம். இதில், சர்க்கரைத்துறை இயக்குநர், கடலூர் மாவட்ட ஆட்சியர், ஈ.ஐ.டி பாரி சர்க்கரை ஆலை ஆகியோரை, வாதியாக சேர்த்திருக்கிறோம். வழக்கு கூடிய விரைவில் விசாரணைக்கு வரும்'' என்றார்.