Published:Updated:

சாதனை-13 : பணத்தைக் காப்பாற்றிய பசுமை விகடன்!

சுபி.தளபதி
பிரீமியம் ஸ்டோரி
News
சுபி.தளபதி

முடிவுக்கு வந்த காட்டாமணக்கு, ஈமு கோழிகள் - சுபி.தளபதி, தடப்பள்ளி-அரக்கன்கோட்டைபாசன விவசாயிகள் சங்கத் தலைவர்

காட்டாமணக்கு ஒப்பந்த சாகுபடி, ஈமு கோழி வளர்ப்பு, அகர் மரம் வளர்ப்பு எனச் சில ஆண்டுகளுக்கு முன்பாகத் தமிழக விவசாயிகளை ஏமாற்றிப் பிழைக்க ஒரு கூட்டமே அலைந்தது.

அந்த நேரத்தில் விவசாயிகளுக்குப் பாதுகாவலனாக, அந்த மோசடி திட்டங்களின் உண்மைத் தன்மையை விவசாயிகளுக்குப் புரிய வைத்தது பசுமை விகடன். காட்டாமணக்குச் சாகுபடி செய்யச் சொல்லி அரசாங்கமே சொல்லியது. அரசு ஆதரவுடன் சில தனியார் நிறுவனங்கள் காட்டாமணக்கு ஒப்பந்த சாகுபடியில் இறங்கின. நாற்று மற்றும் பராமரிப்புக்காக ஒரு ஏக்கர் நிலத்திற்கு 18,500 ரூபாய் விவசாயிகள் பெயரில் வங்கியில் கடன் வாங்கிக்கொண்டன. ஆனால், செடி வளர்ந்து மகசூல் கொடுக்கும்போது, நிறுவனத்தினர் சொன்னபடி மகசூல் கிடைக்கவில்லை. என்ன செய்வதென விவசாயிகள் கையைப் பிசைந்துகொண்டு நிற்கும்போது கடனை கட்டச் சொல்லி விவசாயிகளுக்கு நோட்டீஸ் அனுப்பின வங்கிகள். அந்த நேரத்தில் காட்டாமணக்குச் சாகுபடி செய்த நிலங்களுக்கு நேரடியாகச் சென்ற பசுமை விகடன் குழுவினர், உண்மை நிலையை உலகுக்கு வெளிச்சமிட்டுக் காட்டினார்கள். அதன் பிறகுதான் விவசாயிகளுக்கு அதிலிருந்து விடுதலை கிடைத்தது.

அதே போல ஈமுக்கோழி வளர்த்தால் கோடீஸ்வரன் ஆகலாம் எனச் சில நிறுவனங்கள் கிளம்பின. சினிமா நடிகர்கள் முதல் அதை ஆதரித்து விளம்பரங்கள் செய்ததால் அப்பாவி மக்கள் நம்பி முதலீடு செய்தனர். கிட்டத்தட்ட 500 கோடி ரூபாய் வரை முதலீடு செய்யப்பட்டது. அப்போது அதிலுள்ள மோசடி குறித்துக் கோபி பகுதியில் நாங்கள் குரல் கொடுத்து வந்தோம். ஆனால் எங்கள் குரல் உள்ளூரைத் தாண்டி வெளியே போகவில்லை. அதே நேரம் அந்தத் தொழிலுள்ள சாதக, பாதக அம்சங்கள் தொடர்பாகப் பசுமை விகடன் தொடர்ந்து கட்டுரைகள் வெளியிட்டு வந்தது. பெரும்பாலான ஊடகங்களில் கோடிக்கணக்கில் விளம்பரங்கள் கொடுத்துக்கொண்டிருந்தன ஈமுகோழி நிறுவனங்கள். ஆனால், அந்த நேரத்தில் விவசாயிகளுக்கு ஆதரவாக இருந்த ஒரே ஊடகம் பசுமை விகடன்தான். நாங்கள் பசுமை விகடனை அணுகினோம். உடனடியாக ஈமு கோழி விளம்பரங்கள் வெளியிடுவதை அவர்கள் நிறுத்தினார்கள்.மேலும் மேலும் விவசாயிகள் ஏமாறுவதைத் தடுப்பதற்காக விழிப்புணர்வு ஏற்படுத்த வேண்டும் என்றோம். அடுத்தகட்டமாக, ஈமு கோழி வளர்ப்பில் இருக்கும் மோசடிகள்குறித்து கோபிசெட்டிப்பாளையத்தில் விழிப்புணர்வு கூட்டத்திற்கு ஏற்பாடு செய்தது பசுமை விகடன்.

சாதனை-13 : பணத்தைக் காப்பாற்றிய பசுமை விகடன்!

ஒரு வாரத்துக்கு முன்பிருந்தே இதற்கான விரிவான ஏற்பாடுகள் செய்யப்பட்டன. அந்த நேரத்தில் பிரபல தனியார் தொலைக்காட்சி ஒன்று என்னிடம் விலை பேசியது. ‘ஈமு தொடர்பாகப் பிரச்னை செய்யாமல் அமைதியாக இருங்கள்’ என்றார்கள். அப்போதுதான் அவர்களது உண்மையான வியாபார முகம் தெரிந்தது. அதன் பிறகு எங்கள் எதிர்ப்பை அதிகமாக்கினோம். கூட்டம் நடந்த அன்று அனைத்துத் தினசரிகளிலும் 70 லட்ச ரூபாய்க்கு மேல் விளம்பரம் செய்யப்பட்டது. கோபிசெட்டிப்பாளையம் முத்து மஹாலில் பசுமை விகடன் நடத்திய விழிப்புணர்வு கூட்டத்தில் தமிழகம் முழுவதுமிருந்து ஆயிரத்துக்கும் மேற்பட்ட விவசாயிகள் கலந்துகொண்டார்கள். ஒருபக்கம் கூட்டம் நடந்துகொண்டிருக்கும்போதே, அன்றைய தினமே ஈமுக்கோழி நிறுவனமொன்றின் அதிபர் தலைமறைவானார். அதைத்தொடர்ந்து, ஆங்காங்கே வியவசாயிகள் போராட்டங்களில் ஈடுபட்டனர். பசுமை விகடனும் விடாமல் செய்திகளைப் பதிவு செய்து வந்தது. அதன்பிறகே அரசுத் தரப்பிலிருந்து நடவடிக்கைகள் எடுக்க ஆரம்பித்தனர். அந்தவகையில், மக்கள் ஏமாறாமல் தங்கள் பணத்தைக் காப்பாற்றிக்கொள்ள காரணமாக இருந்தது பசுமை விகடன். அதற்காகப் பசுமை விகடனுக்கு காலம் முழுக்க நன்றி சொல்லக் கடமைபட்டுள்ளோம்.