Published:Updated:

சாதனை-6: வேளாண் மன்றச் சட்டம்

வேளாண் மன்றச் சட்டம்
பிரீமியம் ஸ்டோரி
News
வேளாண் மன்றச் சட்டம்

விரட்டியடிக்கப்பட்ட தமிழ்நாடு வேளாண் மன்றச் சட்டம்! - ‘இயற்கை’க்கு வந்த ஆபத்து... தடுத்து நிறுத்திய ‘பசுமை!’

‘அறச்சலூர்’ ரா.செல்வம், மாநில ஒருங்கிணைப்பாளர், தமிழ்நாடு இயற்கை விவசாயிகள் கூட்டமைப்பு

தமிழ்நாடு மாநில வேளாண்மை மன்றச் சட்டம் ஒன்றை இயற்றுவதாக, 2009-ம் ஆண்டு, அறிவித்தது அன்றைய தி.மு.க அரசு. வேளாண் படிப்பு முடித்துப் பதிவு பெற்றவர் மட்டும்தான் வேளாண்மை ஆலோசனை சொல்லலாம் என அந்தச் சட்டம் நிபந்தனை விதித்தது.

‘பதிவு பெற்றவர்களைத் தவிர மற்றவர்கள் யாரும் பயிர் வளர்ப்பு, இயற்கை தொழில்நுட்பம், விதைத் தொழில்நுட்பம், மண் பரிசோதனை, நீர்ப் பரிசோதனை பற்றி ஆலோசனைகள் வழங்கக்கூடாது. பதிவு பெறாதவர்கள் ஆலோசனை அல்லது பரிந்துரை வழங்கினால் அது தண்டனைக்குரிய குற்றமாகக் கருதப்படும். சிறைத்தண்டனை வழங்கப்படும்’ என்று மிரட்டியது. இயற்கை விவசாய வழி முறையைத் தடை செய்வதற்காகவே கொண்டு வந்த கறுப்புச் சட்ட மசோதா அது. இதன் எதிர் விளைவுகள் பற்றி முதலில் குரல் கொடுத்தது பசுமை விகடன்தான். அந்தக் கொடிய மசோதாவை எதிர்த்து எங்களைப் போன்ற பல விவசாய அமைப்புகள், வேளாண் விஞ்ஞானி நம்மாழ்வார், அன்றைய எதிர்க்கட்சியினர் உள்படப் பலரும், பசுமை விகடன் குரலுக்கு வலு சேர்த்தோம். பிறகு, அந்த சட்ட மசோதா சட்டமாக நிறைவேற்றப்படாமல் தடுக்கப்பட்டது.

சாதனை-6: வேளாண் மன்றச் சட்டம்

சி.நல்லா கவுண்டர், தேசிய ஒருங்கிணைப்பாளர், தமிழக விவசாயிகள் சங்கம்

இந்தச் சட்ட மசோதா மட்டும் நடைமுறைக்கு வந்திருந்தால், ஒருவருக்கு ஒருவர் இயற்கை விவசாய கருத்துகளைக்கூட பகிர்ந்திருக்க முடியாது. கொடூரமான சிந்தனை கொண்ட மற்றும் பன்னாட்டு கைக்கூலிகளாகச் செயல்பட்ட சிலபல அதிகாரிகள் மற்றும் வேளாண் பல்கலைக்கழகத்தில் பணியாற்றும் பன்னாட்டு கைக்கூலிகள் கூடி உருவாக்கியதுதான் இந்தச் சட்ட மசோதா. இந்த உண்மையை முழுமையாக அறியாமல் அன்றைய கருணாநிதி அரசு, அதிரடியாக இந்தச் சட்ட மசோதாவைத் தாக்கல் செய்தது. பசுமை விகடன் முதல் குரல் கொடுக்க, அடுத்தடுத்து எழுந்த போர்க்குரல்களால் அதிர்ந்து போன கருணாநிதி, அப்போதைக்கு சட்ட மசோதாவை நிறுத்தி மட்டும் வைத்தார். ஆனால், பசுமை விகடனும் விவசாயிகளும் கடுமையாகத் தொடர்ந்து போராட்டம் நடத்தியதையடுத்து, 2011-ல் ஆட்சிக்கு வந்த ஜெயலலிதா, அந்த சட்ட மசோதாவை வாபஸ் பெற்றார்.

இந்தச் சட்டம் மட்டும் அமலுக்கு வந்திருந்தால், இன்றைக்கு இயற்கை விவசாயம் என்கிற சொல்லையே யாரும் பயன்படுத்த முடியாத நிலை உருவாகியிருக்கும். ஏன், பசுமை விகடன் என்கிற ஒரு இதழே இல்லாமல் போயிருக்கக்கூடும். இப்படிபட்ட சோதனைகளையெல்லாம் கடந்துதான் சாதனை பாதையில் பசுமை விகடன் நடைபோட்டு வருகிறது.