Published:Updated:

பெரம்பலூரில் முயல் வேட்டை திருவிழாவுக்கு தடை

பெரம்பலூரில் முயல் வேட்டை திருவிழாவுக்கு தடை
பெரம்பலூரில் முயல் வேட்டை திருவிழாவுக்கு தடை

பெரம்பலூர்: முயல் வேட்டை காரணமாக இரு தரப்பினருக்கு இடையே ஏற்பட்ட மோதலைத் தொடர்ந்து, முயல் வேட்டைக்கு வனத்துறை தடை விதித்துள்ளது.

ஒவ்வொரு வருடமும் சித்திரை மாதம் முயல் வேட்டை திருவிழா பெரம்பலூர் மாவட்டத்தில் உள்ள கிராமங்களில் வெகுவிமரிசையாக கொண்டாடப்படுவது வழக்கம். இந்த வருடம் சித்திரை மாதம் முதல் நாளான தமிழ்வருடப்பிறப்பு அன்று முயல் வேட்டை சென்ற லாடபுரம் கிராமத்தினருக்கும், பாளையம் கிராமத்தினருக்கும் இடையே தகறாறு ஏற்ப்பட்டது. அது கோஷ்டி பூசல், வீடுகளுக்கு  தீ வைப்பு என பெரிய கலவரமாக வெடித்தது. இந்நிலையில் முயல் வேட்டை திருவிழாவிற்கு மாவட்ட வனத்துறை தடை விதித்துள்ளது.

இதுகுறித்து பெரம்பலூர் மாவட்ட வன அலுவலர் வடிவேல் வெளியிட்டுள்ள அறிக்கையில், 'பெரம்பலூர் மாவட்டத்தில் பல ஊர்களில் நடைபெறும் கோயில் திருவிழாக்களை முன்னிட்டு பாரம்பரிய முயல் வேட்டை திருவிழா என்ற பெயரில், இயற்கை சூழலில் வாழ்ந்து வரும் முயல்களை வேட்டையாடுவது தொடர்கிறது. இது குற்றமாகும்.
 

##~~##
முயல்கள் தனியாருக்கு சொந்தமான பட்டா நிலங்கள், வனப்பகுதி என ஆங்காங்கே வாழ்ந்து வருகின்றன. அவை புல், இலை, தழைகளை மட்டுமே சாப்பிட்டு உயிர்வாழ்ந்து வருகின்றன. முயல்களால் இயற்கை சுற்றுச்சூழல் பாதுகாக்கப்பட்டு பல்லுயிர் பெருக்கம் பராமரிக்கப்படுகிறது. அவைகளால் மனித உயிர்களுக்கோ அல்லது விவசாயப் பயிர்களுக்கோ எந்த சேதமும், தீங்கும் ஏற்படுவதில்லை.
அப்படிப்பட்ட முயல்களை, முயல் வேட்டை திருவிழா என்ற பெயரில் வேட்டையாட முயற்சிப்பதும், வேட்டையாடுதலும் வன உயிரின பாதுகாப்புச் சட்டம் 1972 பிரிவு 9ன்படி தடை செய்யப்பட்ட செயலாகும். இந்த சட்டத்தின் பிரிவு 51ன்படி தண்டனைக்குரிய குற்றமாகும். முயல்களை வேட்டையாட முயற்சிக்கும் நபர்கள் மீது வன உயிரின பாதுகாப்புச் சட்டம் 1972ன்படி கைது செய்யப்படுவார்கள். மேலும் சம்மந்தப்பட்ட நபர் மீது வன உயிரின குற்ற வழக்கு பதிவு செய்யப்பட்டு நீதிமன்ற நடவடிக்கை மேற்கொள்ளப்படும் அல்லது அபராதம் விதிக்கப்படும்' எச்சரிக்கை விடுத்துள்ளார்.
இதனால் பெரம்பலூர் மாவட்ட மக்கள் அதிர்ச்சியடைந்துள்ளனர்.
-சி.ஆனந்தகுமார்