Published:Updated:

பூச்சிகளும் நம் நண்பர்களே..! - 2.0 - பயிர் நோய்களைப் பரப்பும் சாறு உறிஞ்சும் பூச்சிகள்!

பூச்சிகளும் நம் நண்பர்களே..! - 2.0 - பயிர் நோய்களைப் பரப்பும் சாறு உறிஞ்சும் பூச்சிகள்!
பிரீமியம் ஸ்டோரி
News
பூச்சிகளும் நம் நண்பர்களே..! - 2.0 - பயிர் நோய்களைப் பரப்பும் சாறு உறிஞ்சும் பூச்சிகள்!

பூச்சி மேலாண்மை - 5

பூச்சிகளை... தாவர உண்ணிகள், ஊன் உண்ணிகள், மட்கு உண்ணிகள் என மூன்று வகையாகப் பிரிக்கலாம். பொதுவாக, நாம் பிரச்னைக்கு உரியவை என நினைப்பது தாவர உண்ணி வகைப் பூச்சிகளைத்தான். இந்த வகைப் பூச்சிகள், செடியின் எந்தப்பகுதியைச் சாப்பிடுகின்றன என்று கவனிக்க வேண்டியது அவசியம். பூச்சிகளின் வாயின் அமைப்பை வைத்து அவை செடியின் எந்தப்பகுதியைச் சாப்பிடுபவை என்று அறிய முடியும். இலைகளை மென்று தின்னும் பூச்சிகளில் ஒன்று வெட்டுக்கிளி. வாயிலுள்ள குழலை, செடிக்குள் செலுத்தி சாற்றை உறிஞ்சுபவை சாறு உறிஞ்சும் பூச்சிகள். அசுவினி, வெள்ளை ஈ, மாவுப்பூச்சி போன்றவை சாறு உறிஞ்சும் பூச்சி வகையைச் சேர்ந்தவை. தேனீ போன்ற சில பூச்சிகள் நக்கிச் சாப்பிடக் கூடியவை. இலைப்பேன் போன்ற சில பூச்சிகள் இலைகளின் நரம்புகளுக்கிடையே உள்ள திசுக்களை அறுத்துச் சாப்பிடக் கூடியவை. வண்ணத்துப்பூச்சிகள் மற்றும் அந்துப்பூச்சிகள் ஆகியவை உறிஞ்சிச் சாப்பிடும் பூச்சிகள். வீடுகளில் மொய்க்கும் ஈக்கள், இரை இருக்கும் பகுதியை வாய்மூலம் துடைத்து உண்ணும் பூச்சிகள்.

பூச்சிகளும் நம் நண்பர்களே..! - 2.0 - பயிர் நோய்களைப் பரப்பும் சாறு உறிஞ்சும் பூச்சிகள்!

இப்படிச் சாப்பிடும் உணவுகளுக்கேற்ப பூச்சிகளின் வாய் அமைப்பு இருக்கும். சில தாவர உண்ணிகள், தாவரங்களின் சில பாகங்களை மட்டுமே விரும்பி உண்ணும் பழக்கமுடையவை. இவை குறிப்பிட்ட பயிரை, குறிப்பிட்ட காலகட்டத்தில் மட்டுமே தாக்குபவை. இந்த வகைக்கு உதாரணமாக நெல்லைத்தாக்கும் குருத்துப்பூச்சியைச் சொல்லலாம். இது வேறு எந்தப்பயிரையும் சாப்பிடாது. சில பூச்சிகள் எது கிடைத்தாலும் உண்ணக்கூடியவை. இதற்கு உதாரணமாக, மக்காச்சோளப் படைப்புழுவைச் சொல்லலாம். இது 80 வகையான தாவரங்களை உண்ணக்கூடியது.

சாறு உறிஞ்சும் பூச்சிகளின் வாயில், கொடுக்கு போன்ற இரண்டு உறிஞ்சுக் குழாய்கள் இருக்கும். கொசுவின் வாய் அமைப்பும், சாறு உறிஞ்சும் பூச்சிகளின் வாய் அமைப்பும் கிட்டத்தட்ட ஒரே மாதிரி இருக்கும். கொசு, மனித உடலின் மேல் அமர்ந்து ரத்தத்தை உறிஞ்சுபவை. சாறு உறிஞ்சும் பூச்சிகள் இலையின் அடிப்பகுதியிலோ அல்லது தாவரத்தின் வளர்ச்சி நிலையில் உள்ள நுனிப்பகுதியிலோ அமர்ந்து உறிஞ்சு குழாய்களை உள்ளே செருகி, தாவரத்தில் உள்ள சத்துகளை உறிஞ்சும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

இங்கே ஒரு விஷயத்தைத் தெரிந்துகொள்ள வேண்டும். தாவரங்களில் இரண்டு வகையான குழாய்கள் இருக்கும். ஒரு குழாய் மண்ணிலிருந்து தண்ணீரையும், தாவரத்துக்குத் தேவையான சத்துகளையும் மேலே கடத்தக்கூடியது. அதற்குப் பெயர் சைலம். இலையில் ஒளிச்சேர்க்கை மூலம் உருவாக்கப்படும் சத்துகளைச் செடியின் அனைத்துப் பகுதிகளுக்கும் எடுத்துச்செல்வது, இன்னொரு குழாய். அதற்குப் பெயர் புலோயம். சாறு உறிஞ்சும் பூச்சிகள், புலோயம் குழாய்களைத்தாக்கி, அதனுள் சர்க்கரை வடிவில் இருக்கும் சத்துகளை உறிஞ்சுகின்றன. அதே நேரத்தில் சைலம் குழாய்களையும் தாக்கும் சில பூச்சிகளும் வண்டுகளும் உள்ளன.

வண்ணத்துப்பூச்சிகள், அந்துப்பூச்சிகள் ஆகியவை புழுப்பருவத்தில் இருக்கும்போது... இலையின் மேல் பகுதியைச் சாப்பிடுகின்றன. அந்தவகையில்... இலையின் நடுப்பகுதியைச் சாப்பிட்டு ஓட்டை ஏற்படுத்தும் பூச்சிகள், இலையின் ஓரத்தை மட்டும் கடித்துச் சாப்பிடும் பூச்சிகள், முழு இலையையும் சாப்பிடும் பூச்சிகள் போன்றவற்றைக் கண்டறிவதில் எந்தப் பிரச்னையும் இருக்காது.

பூச்சிகளும் நம் நண்பர்களே..! - 2.0 - பயிர் நோய்களைப் பரப்பும் சாறு உறிஞ்சும் பூச்சிகள்!

இலையின் பின்புறம் அமர்ந்து இலை நரம்புகளை ஒட்டியுள்ள சத்துக்களைச் சுரண்டிச்சாப்பிடும் பூச்சிகளும் உண்டு. இலையின் மேற்பரப்பில் வெள்ளை நிறம் அல்லது மஞ்சள் நிறத்தில் திட்டுக்கள் இருப்பதை வைத்து இத்தகைய பூச்சிகளை அறியலாம். சில பூச்சிகள் இலையின் பின்புறம் இருந்துகொண்டு இலை நரம்புகளில் துளையிட்டுச் சத்துக்களை உறிஞ்சுகின்றன. இதனால், இலைகள் மடங்கிக் காணப்படும். இப்படிப்பட்ட அறிகுறிகளை வைத்துப் பூச்சித்தாக்குதலையும், தாக்கியிருக்கும் பூச்சியின் வகையையும் கண்டுபிடிக்க முடியும்.

இலைகளை மட்டும்தானே சாப்பிடுகின்றன. அதனால் என்ன பிரச்னை வந்து விடப்போகிறது எனச் சிலர் நினைக்கக்கூடும். இலைகள்தாம், முழுச் செடிக்குமான சத்துகளைத் தயாரிக்கும் சமையலறை. இலைகளைப் பாதுகாத்தால்தான் தாவரம் ஆரோக்கியமாக இருக்கும். அதுபோல, பூக்கள், வேர்கள், தண்டுகள் என அனைத்துமே ஒரு செடிக்கு முக்கியமானவை. இப்பகுதிகளைப் பூச்சிகளின் தாக்குதலிலிருந்து காப்பாற்றினால்தான், முழு மகசூல் எடுக்க முடியும். அதனால், எந்தப்பூச்சி, எந்தப்பருவத்தில், செடியின் எந்தப்பகுதியைத் தாக்கும் என்பதைத் தெரிந்து கொண்டால்தான், முன்னெச்சரிக்கையாகப் பாதுகாப்பு நடவடிக்கைகளை எடுக்க முடியும்.

விவசாயத்தில் பெரும் சிக்கலை உருவாக்கும் சாறு உறிஞ்சும் பூச்சிகளைப் பற்றிப் பார்ப்போம். வெள்ளை ஈ, மாவுப்பூச்சி, அசுவினி, செதில் பூச்சி போன்றவை சாறு உறிஞ்சும் பூச்சிகள். இவற்றின் வாயில் இரண்டு உறிஞ்சுக் குழாய்கள் இருக்கும் எனப் பார்த்தோம். 

பூச்சிகளும் நம் நண்பர்களே..! - 2.0 - பயிர் நோய்களைப் பரப்பும் சாறு உறிஞ்சும் பூச்சிகள்!

இப்பூச்சி தனது வாயிலுள்ள குழாய் மூலமாகத் தனது எச்சில் மற்றும் என்சைம் வடிவில் உள்ள சில நச்சுப் பொருள்களையும் செடியின் புலோயம் குழாய்க்குள் அனுப்பும். இந்த என்சைம்களால் தாவரத்திசுக்கள் சிதைக்கப்படும். இதனால், செடியின் வளர்ச்சி குறையத் தொடங்கி, இலைகள் தொங்கிவிடும். இலைக்குப் பின்புறம் அமர்ந்து உறிஞ்ச ஆரம்பித்தால், இலை கீழ்நோக்கித் தொங்கும். இரண்டு நரம்புகளுக்கு இடையில் உறியத் தொடங்கினால் இலைமேல் நோக்கி மடங்கும்.

இலையில் உள்ள சாற்றை உறிஞ்சுவதோடு, பூஞ்சணங்கள், வைரஸ், பாக்டீரியா, மைக்கோ பிளாஸ்மா போன்ற சில நோய்க்கிருமிகளையும் செடிகளுக்குள் செலுத்துகின்றன. இதனால், தாவரங்களுக்கு நோய்களும் வருகின்றன. பயறுவகைப் பயிர்கள் மற்றும் வெண்டை போன்றவற்றைத் தாக்கும் மஞ்சள் தேமல் நோய், சாறு உறிஞ்சும் பூச்சிகளால் வரும் நோய்களில் ஒன்றுதான். இந்நோய் தாக்கினால், செடியில் ஓர் இலை மட்டும் முதலில் மஞ்சளாக மாறும். அடுத்த மூன்றே நாள்களில் வயல் முழுவதும் இலைகள் மஞ்சளாக மாறிவிடும். இந்நோய் தாக்க முக்கியமான காரணம் சாறு உறிஞ்சும் பூச்சியான வெள்ளை ஈதான். இது இலைக்குப் பின்புறம் அமர்ந்து சாற்றை உறிஞ்சும்போதே மஞ்சள் தேமல் நோயை உருவாக்கும் வைரஸையும் உட்செலுத்தி விடுகிறது.

பூச்சிகளும் நம் நண்பர்களே..! - 2.0 - பயிர் நோய்களைப் பரப்பும் சாறு உறிஞ்சும் பூச்சிகள்!

நச்சுயிரியெனச் சொல்லப்படும் வைரஸ், உயிருள்ள பொருளில்தான் இனப் பெருக்கமாகும். வைரஸ் தாக்கியுள்ள இலையில் சாறு உறிஞ்சும் பூச்சி, சாற்றை உறிஞ்சும்போது, வைரஸும் பூச்சியின் உடம்புக்குள் போகும். பூச்சியின் உடம்புக்குள் வந்த வைரஸ், இரண்டு மூன்று மணி நேரத்தில் லட்சக்கணக்கில் பெருகிவிடும். மீண்டும் இதே பூச்சிகள் வேறு செடியின் இலைகளுக்குள் சாறு உறிஞ்ச எச்சிலை அனுப்பும்போது, இந்த வைரஸ்களும் எச்சிலோடு சேர்ந்து செடிக்குள் சென்று விடுகின்றன. சில வைரஸ்கள் இரண்டு மூன்று நாள்களில் இறந்துவிடுகின்றன. சில வைரஸ்கள், பூச்சியின் வாழ்நாள் முழுவதும் பூச்சிகளின் உடலில் இருக்கின்றன.

பாக்டீரியா, வைரஸ், நூற்புழுக்கள், பூஞ்சணங்கள் தாக்கிய தாவரங்களின் மீது பூச்சிகள் நடந்து செல்லும் போதும், அவற்றின் கால்களில் ‘ஸ்போர்’ ஒட்டிக்கொள்ளும். இந்த ஸ்போர்கள் மூலமாக அடுத்தச் செடிகளிலும் நோய்கள் உருவாகும். இப்படிப் பூச்சிகள் மூலமாகத் தாவரங்களுக்கு நோய்களும் பரவுகின்றன. அதனால், நோய்களைக் கட்டுப்படுத்த பூச்சித்தாக்குதலைக் கட்டுப்படுத்த வேண்டும். நோய்க்கான மருந்துகள் வேறு. பூச்சிக்கொல்லிகள் வேறு. நோய்க்காக நாம் தெளிக்கும் மருந்துகள் பூச்சிகளில் எந்தப் பாதிப்பையும் ஏற்படுத்துவதில்லை. பூச்சிக்கொல்லிகள்தாம் பூச்சிகளை அழிக்கக்கூடியவை. அதேபோல், பாக்டீரியா மற்றும் பூஞ்சணங்களுக்கு மருந்துகள் கண்டுபிடிக்கப்பட்டுள்ளன. ஆனால், வைரஸுக்கு இன்னும் மருந்து கண்டுபிடிக்கப்படவில்லை. அதனால், வைரஸ்களைப் பரப்பும் பூச்சிகளை அழிப்பதன் மூலம்தான் வைரஸினால் பரவும் நோய்களைத் தடுக்க முடியும்.

பப்பாளி, பருத்தி மற்றும் தக்காளிப் போன்ற பயிர்களில் வெள்ளை ஈ மூலமாக இலைச்சுருட்டு நோய் தாக்கும். நெல், மக்காச்சோளத்தில் பச்சைத் தத்துப்பூச்சி மூலம் குட்டை வைரஸ் நோய் தாக்கும். அசுவினி மூலம் வாழையில் முடிக்கொத்து நோய் தாக்கும். அதனால், எந்த நோய், எந்தப் பூச்சியால் பரவுகிறது என்பதையும் தெரிந்துகொள்ள வேண்டும்.

-அறிவோம்.

நீ.செல்வம், தொகுப்பு: ஆர்.குமரேசன்  

பூச்சிகளும் நம் நண்பர்களே..! - 2.0 - பயிர் நோய்களைப் பரப்பும் சாறு உறிஞ்சும் பூச்சிகள்!