Published:Updated:

பூச்சிகளும் நம் நண்பர்களே..! - 2.0 - பூச்சிகள் பலவிதம்... ஒவ்வொன்றும் ஒருவிதம்!

பூச்சிகளும் நம் நண்பர்களே..! - 2.0 - பூச்சிகள் பலவிதம்... ஒவ்வொன்றும் ஒருவிதம்!
பிரீமியம் ஸ்டோரி
News
பூச்சிகளும் நம் நண்பர்களே..! - 2.0 - பூச்சிகள் பலவிதம்... ஒவ்வொன்றும் ஒருவிதம்!

பூச்சி மேலாண்மை - 7

ன்மை செய்யும் பூச்சிகள், தீமை செய்யும் பூச்சிகள் என இரண்டு வகைப் பூச்சிகள் இருக்கின்றன என்பது அனைவருக்கும் தெரியும். பொதுவாக, தீமை செய்யும் பூச்சிகளைச் சாப்பிடும் அசைவ உண்ணிகள் மட்டும்தான் நன்மை செய்யும் பூச்சிகள் என்று நாம் நினைக்கிறோம். ஆனால், பயிர்களுக்கு வேறு வகையில் நன்மை செய்யக்கூடிய பூச்சிகளும் உண்டு. பல பூச்சிகள் பொதுவாகப் பார்க்கும்போது ஒரே மாதிரியான தோற்றத்தில் இருக்கும். உதாரணமாக வண்ணத்துப்பூச்சி மற்றும் அந்துப்பூச்சி ஆகியவற்றை எடுத்துக்கொள்வோம். பயிர்களுக்குத் தீமையை மட்டும் செய்பவை அந்துப்பூச்சிகள். பயிர்களின் மகரந்தச் சேர்க்கைக்கு உதவி, மகசூலைப் பெருக்க உதவுபவை, வண்ணத்துப்பூச்சிகள்.

பூச்சிகளும் நம் நண்பர்களே..! - 2.0 - பூச்சிகள் பலவிதம்... ஒவ்வொன்றும் ஒருவிதம்!

வண்ணத்துப்பூச்சிகள் பகல் நேரத்தில் மட்டுமே பறக்கும். இவை அமரும்போது இறக்கைகளை நீட்டி வைத்திருக்கும். இவற்றின் வயிறு இறக்கையோடு ஒட்டிக்கொண்டு மெல்லியதாக இருக்கும். உடம்பு ஒல்லியாக இருக்கும். இவற்றின் உணர்கொம்பு கதாயுதம் போல இருக்கும். குச்சிபோல வந்து மேற்பகுதி உருண்டையாக இருக்கும். இவற்றின் புழு, மொழுமொழுவென இருக்கும். கூட்டுப் புழுவின் மீது, கூடு இருக்காது.

அந்துப்பூச்சிகள் பகல், இரவு என எந்த நேரத்திலும் பறக்கும். அந்துப்பூச்சி அமரும்போது, இறக்கையை மேலே தூக்கிக் கூம்புபோல வைத்திருக்கும். வயிற்றுப் பகுதி கனமாக இருக்கும். உடம்பு குண்டாக இருக்கும். இவற்றுக்கு விதவிதமான வடிவங்களில் உணர்கொம்புகள் இருக்கும். அந்துப்பூச்சிகளின் உணர்கொம்புகள் 15 விதமான வடிவங்களில் இருக்கின்றன. அந்துப்பூச்சிகளின் புழுக்கள் உடம்பு முழுக்க முட்களுடன் கம்பளிப் பூச்சியைப்போல வெவ்வேறு வடிவங்களில் இருக்கும். கூட்டுப் புழுமீது, கூடு இருக்கும். மண், ரோமங்கள் என எதாவது ஒரு பொருளால் இந்தக் கூடுகள் அமைக்கப்பட்டிருக்கும். கூட்டுப்புழுப் பருவத்தில் புழுக்களின் மீது கூடு போன்ற பாதுகாப்பு வளையம் இருந்தாலே, அவை அந்துப்பூச்சிகள் என்பதைப் புரிந்துகொள்ள வேண்டும். பட்டுப்பூச்சியின் கூட்டுப் புழுவின் மேல் பகுதியில் கூடு இருக்கும். எனவே இது அந்துப்பூச்சி வகையில் சேரும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
பூச்சிகளும் நம் நண்பர்களே..! - 2.0 - பூச்சிகள் பலவிதம்... ஒவ்வொன்றும் ஒருவிதம்!

நெல் வயலில் இலைச்சுருட்டுப் புழு, குருத்துப்பூச்சி, கூண்டுப்புழு ஆகியவை இருக்கும். இவை அந்துப்பூச்சிகள். இரவுநேரங்களில், நெல்வயலில் இவற்றின் நடமாட்டம் அதிகமாக இருக்கும். அதற்காகத்தான் விளக்குப்பொறி வைத்து இவற்றைக் கட்டுப்படுத்த சொல்கிறார்கள். அந்துப்பூச்சிகளைக் கட்டுப்படுத்தும் முக்கியமான ஆயுதம் விளக்குப்பொறி. பெரும்பான்மையான பூச்சிகளுக்கு வெளிச்சத்தை நோக்கிப் பாயும் குணம் உண்டு. பூச்சிகளின் இந்தக் குணத்தை வைத்து ஆய்வு செய்துதான் அவற்றின் எண்ணிக்கை குறைந்துள்ளது என ஐரோப்பாவில் கண்டறிந்தார்கள்.

முன்பெல்லாம் மாலை 6 மணிக்கு மேல் இருசக்கர வாகனத்தில் முகப்பு விளக்கைப் போட்டுக்கொண்டு வயல்வெளிப் பக்கம் போனால், பூச்சிகள் படையெடுத்து வந்து முகத்தில் மோதும். ஆனால், தற்போது அவற்றின் எண்ணிக்கை பாதியாகக் குறைந்து விட்டது. இப்போது விளக்குப் போட்டுக் கொண்டு போனாலும், அத்தனை பூச்சிகள் மோதுவதில்லை.

பூச்சி இனங்களில் முக்கியமானது, கூன் வண்டு. தென்னையில் காண்டாமிருக வண்டு, கூன்வண்டு என இரண்டு வண்டுகள் இருக்கும். வண்டுகளுக்கு மேல் இறக்கை கடினமாக ஓடுபோல இருக்கும். ஆனால், உள் இறக்கை பறப்பதற்கு ஏற்றவாறு மெல்லியதாக இருக்கும். பறக்கும்போது மேல் ஓடு தூக்கிக்கொள்ளும். உள் இறக்கையை விரித்து இவை பறக்கின்றன.

பூச்சிகளும் நம் நண்பர்களே..! - 2.0 - பூச்சிகள் பலவிதம்... ஒவ்வொன்றும் ஒருவிதம்!

கூன்வண்டின் வாய்ப்பகுதி, கூம்பு வடிவில் கவிழ்த்து வைத்த கோன் ஐஸ் போல இருக்கும். கத்திரி, தக்காளிப் போன்ற காய்கறிப் பயிர்களில், இலைகளின் ஓரத்தை மட்டும் அரிக்கக்கூடிய கூன் வண்டுகள் உள்ளன. இவை வெள்ளை அல்லது பழுப்பு நிறத்தில் காணப்படும். இவை அதிக அளவு ஆபத்தான பூச்சி இல்லை. ஆனால், தென்னை மரத்தைத் தாக்கும் தண்டு கூன்வண்டு மற்றும் பருத்தியின் தண்டுப்பகுதி, வேரும் தண்டும் இணையும் பகுதியைச் சேதப்படுத்தும் பருத்தி தண்டு கூன்வண்டு போன்றவை அதிக மகசூல் இழப்பை ஏற்படுத்துபவை.

தென்னைக்குத் தண்டு கூன் வண்டுகளை அழைப்பவை, காண்டாமிருக வண்டுகள்தான். மரத்தின் நுனியில் அமர்ந்து காண்டாமிருக வண்டுகள் குருத்தை உண்ணும். அப்படி உண்ணும்போது வெளியே தள்ளும் துகள்களின் வாசனைதான் தண்டு கூன் வண்டுகளை ஈர்க்கிறது. தேங்காயை வெட்டியவுடன் அரிவாளை பெரும்பாலும் தென்னை மரத்தில்தான் கொத்தி வைப்போம்.

இப்படித் தென்னை மரத்தில் காயம் ஏற்படுத்தும்போது, ஒருவிதமான வாசனை வெளிப்படும். அந்த வாசம்தான் தண்டு கூன் வண்டை வெற்றிலை பாக்கு வைத்து வரவேற்கும்.

காண்டாமிருக வண்டு புழுப்பருவத்தின்போது மாட்டுச் சாணியில்தான் இருக்கும். மாடுகளைத் தென்னை மரத்தில் கட்டும்போது, மாடு சாணி போடும். அந்தச் சாண வாசனையால் ஈர்க்கப்பட்டு மரத்தின் மேலே இருக்கும் காண்டாமிருக வண்டுகள் கீழே வந்து இனப்பெருக்கம் செய்து அடுத்த தலைமுறையை உருவாக்கும். அதனால், தென்னந் தோப்புக்குள் மாடுகளை மேய்ப்பது, கட்டுவது, பசுஞ்சாணங்களைக் கொட்டி வைப்பது போன்றவற்றைத் தவிர்க்க வேண்டும். எருக்குழியையும் தென்னந் தோப்புக்கு அருகில் அமைக்கக் கூடாது.

ஏற்கெனவே, தோப்புக்குள் எருக்குழி வைத்திருப்பவர்கள், காண்டாமிருக வண்டின் புழுக்களை அழிப்பதற்கும் ஒரு வழி இருக்கிறது. மெட்டாரைசியம் என்ற ஓர் உயிர் பூஞ்சணக்கொல்லி இருக்கிறது. எருக்குழியில் ஒரு சதுர மீட்டர் அளவில் ஒரு குழித் தோண்டி, அதற்குள் 10 கிராம் மெட்டாரைசியத்தை 2 லிட்டர் தண்ணீரில் கலந்து, இரண்டு மில்லி ஒட்டும் திரவம் (காதி சோப் கரைசல் போன்றவை) சேர்த்துக் கலக்கி குழிகளுக்குள் ஊற்ற வேண்டும்.

இந்தப் பூஞ்சணம் உள் பகுதியில் அதிகம் உற்பத்தியாகிக் காண்டாமிருக வண்டின் புழுக்களை அழிக்கும். இந்த வகையில் எருக் குழியிலேயே காண்டாமிருக வண்டுகளை அழித்துவிட முடியும்.

ஒவ்வொரு வகையான பூச்சிக்கும் ஒவ்வொரு எதிரி உண்டு. இந்த எதிரிகளிடமிருந்து, தப்பிக்கச் சில வழிமுறைகளைப் பூச்சிகள் கையாள்கின்றன. பூச்சிகளுக்கு நான்கு விதமான பாதுகாப்பு ஏற்பாடுகளை உருவாக்கிக் கொடுத்திருக்கிறது, இயற்கை. பூச்சிகளின் பழக்கவழக்கங்கள், உடல் அமைப்பு, உடம்பில் உருவாகும் வேதிப்பொருள்கள், உடல் நிறம் ஆகியவைதான் அந்தப் பாதுகாப்பு ஏற்பாடுகள்.

பழக்க வழக்கங்கள் மூலம் தப்பிக்கும் பூச்சிகள்

சில பூச்சிகளைத் தொட்டால் அப்படியே இறந்து போனதைப் போலப் படுத்துவிடும். உதாரணம் பொன்வண்டு. அதைத் தொட்டால் அப்படியே அசையாமல் இருக்கும். சில புழுக்களைத் தொட்டால், அமர்ந்திருக்கும் இடத்திலிருந்து நூல்போல உருவாக்கி, சர்ரெனக் கீழே போய்த் தொங்கும். இன்னும் சில பூச்சிகளைத்தொட்டால் பயமுறுத்தும். இவை பழக்கவழக்கத்தின் மூலம் தப்பிக்கும் முறை. வளர்ந்த பூச்சிகளில் மட்டுமல்லாது, முட்டை, புழு, கூட்டுப் புழுக்களில்கூட, இந்தப் பாதுகாப்பு ஏற்பாடுகள் இருக்கின்றன.

பச்சைக் கண்ணாடி இறக்கைப் பூச்சி, முட்டைகளையே பாதுகாப்பாகத்தான் இடும். மற்ற பூச்சிகள் இலையின்மீது முட்டை வைக்கும். ஆனால், இந்தப் பூச்சி, இலைக்கு மேலே ஒரு கொம்பை உருவாக்கி, அதற்கு மேலே முட்டையை வைக்கும். இலையைச் சாப்பிடும் எதிரிகள், இந்த முட்டையைத் தொடக்கூட முடியாது.

புழுவில் ஒருவகை இருக்கிறது. வீடுகளில் கூடப் பார்க்கலாம். சின்னச் சின்னக் குச்சிகளை உருண்டையாகக் கட்டி சுவரில் தொங்கிக் கொண்டிருக்கும். அதற்குள் புழு இருக்கும். இதேபோலச் சில புழுக்கள் விதவிதமான முறையில் பாதுகாத்துக் கொள்கின்றன. கூட்டுப் புழுக்களைச் சுற்றி பஞ்சுபோல இலைகள், குப்பை கூளங்கள் மூடப்பட்டு இருக்கும். அதுவே அவற்றுக்கான பாதுகாப்பு.

உடல் அமைப்பு மூலம் தப்பிக்கும் பூச்சிகள்

உடல் அமைப்பை வைத்துத் தப்பிக்கும் முறையைக் கொண்டிருக்கும் பூச்சிகளுக்கு உதாரணம், எள்ளில் இருக்கும் புழு. அதன் உடலில் உள்ள கொம்பை வைத்துப் பயமுறுத்தித் தப்பிக்கும். இடுக்கி வால் பூச்சிக்குப் பின் பகுதியில் கொடுக்கு போன்று இருக்கும்.

அந்தக் கொடுக்கை முன்னும், பின்னும் ஆட்டி எதிரிகளைப் பயமுறுத்தித் தப்பிக்கும். கும்பிடு பூச்சி என்ற பெருமாள் பூச்சி, ரம்பம் போன்ற முன்னங்காலை ஆட்டித் தப்பிக்கும். கம்பளிப் பூச்சியின் உடலில் இருக்கும் ரோமம் அதற்குப் பாதுகாப்பு. அதைத் தொட்டவுடன் சிலிர்த்துக் கொண்டு நிற்கும். கம்பளிப் பூச்சி கடித்தால் உடலில் அரிப்பு ஏற்படும்.

சில பூச்சிகளுக்கு உள் இறக்கைகள் இருக்கும். அந்த இறக்கைகளை உள்ளே மறைத்து வைத்திருக்கும். எதிரிகள் அருகே வரும்போது, உள் இறக்கையை விரித்துக் காட்டும். அந்த இறக்கையில் ஆந்தை கண் போன்ற அமைப்பு இருக்கும். அதைப் பார்த்து எதிரிகள் மிரண்டு ஓடி விடுவார்கள். இப்படி உடல் அமைப்புமூலம் தப்பிக்கும் பூச்சிகள் பல உண்டு.

உடலில் சுரக்கும் வேதிப்பொருள்கள் மூலம் தப்பிக்கும் பூச்சிகள்

சில பூச்சிகளின் உடம்புகளில் இயற்கையாகவே ரசாயனங்கள் உற்பத்தியாகும். உதாரணமாக, தேனீ, எறும்பு, குளவி ஆகியவற்றின் உடலில் உள்ள ரசாயனம் காரணமாக, அவை கடித்தவுடன் எதிரியின் உடலில் தடிப்பு ஏற்படும். இதற்குப் பயந்துகொண்டே பல எதிரிகள் இவர்களிடம் வம்பு வைத்துக்கொள்ளமாட்டார்கள். சில பூச்சிகளின் உடம்பில் உள்ள ரசாயனம், ஒருவிதமான கெட்ட வாடையை உருவாக்கும். அதற்கு உதாரணம் கதிர் நாவாய்ப் பூச்சி. நெல்லில் வரும் கதிர் நாவாய்ப் பூச்சியைத் தொட்டாலே கெட்ட வாடை அடிக்கும். ‘தி.மு.க வண்டு’ எனச் சொல்லப்படும் ஒருவகை வண்டைத் தொட்டால், அதன் பின்புறம் மஞ்சள் நிறத்தில் ஒரு திரவம் வரும். அந்தத் திரவம் நம் கையில் பட்டால் கையில் கொப்புளம் உருவாகும்.

உடல் நிறத்தை வைத்துத் தப்பிக்கும் பூச்சிகள்

சில பூச்சிகள் என்னைத் தொட்டாலே ஆபத்து என்பதுபோல, நல்ல பிரகாசமான நிறத்தில் இருக்கும். சூரிய ஒளியில் அதன் உடல் மின்னும். பெருமாள் பூச்சி, பச்சை மற்றும் பழுப்பு நிறத்தில் இருக்கும். பச்சை நிறப் பூச்சி இலையின் மீது அமர்ந்து இருந்தால், இலைக்கும் பூச்சிக்கும் வித்தியாசமே தெரியாது. பழுப்பு நிறத்தில் இருக்கும் பெருமாள் பூச்சி மரப்பட்டையிலிருந்தால் வித்தியாசம் தெரியாது. சீமைக்கருவேல மரத்தில் ‘மாடு’ எனப்படும் இரண்டு கொம்புள்ள சிறிய பூச்சி இருக்கும். பக்கத்தில் போய்ப் பார்த்தால்தான் அதைப் பார்க்க முடியும்.

பெருமாள் பூச்சி போலவே குச்சிப்பூச்சி என ஒரு பூச்சி இருக்கிறது. பெருமாள் பூச்சிக்கு முன்னால் இருக்கும் ரம்பக் கால் இதற்கு இருக்காது. இது காய்ந்துபோன குச்சியைப் போன்ற நிறத்திலேயே இருக்கும். உருவத்திலும் நிறத்திலும் ஒரேமாதிரி இருப்பதால் எதிரிகளிடமிருந்து சுலபமாகத் தப்பித்துக்கொள்ளும்.

இத்தனை எதிரிகளிடமிருந்தும் தப்பித்து, பூச்சிகள் மகசூலுக்கு வேட்டு வைக்கின்றன. ஆனால், நாம் சும்மா இருப்போமா... பயிர்களை அழிக்கும் பூச்சிகளை அழிக்க நாம்தான் பூச்சிக்கொல்லி வைத்திருக்கிறோமே... அடித்துக் காலி செய்துவிட மாட்டோமா என்றுதான் நினைத்துக்கொண்டிருந்தோம். ஆனால், அந்த எண்ணத்துக்கும் ஆப்பு வைத்துவிட்டன, பூச்சிகள். பூச்சிக்கொல்லிகளிடமிருந்தும் தப்பிப்பதற்கான எதிர்ப்புச் சக்தியைப் பூச்சிகள் உருவாக்கிக் கொண்டன. அதைப்பற்றி அடுத்த இதழில் விரிவாகப் பார்ப்போம்.

-அறிவோம்

நீ.செல்வம், தொகுப்பு: ஆர்.குமரேசன்

பூச்சிகளும் நம் நண்பர்களே..! - 2.0 - பூச்சிகள் பலவிதம்... ஒவ்வொன்றும் ஒருவிதம்!
பூச்சிகளும் நம் நண்பர்களே..! - 2.0 - பூச்சிகள் பலவிதம்... ஒவ்வொன்றும் ஒருவிதம்!

திருச்சியில் ஓடும் ‘இயற்கை’ ஆட்டோ!

மோ
ட்டார் பைக்கோ, காரோ, ஆட்டோவோ எதுவாக இருந்தாலும் வெயிலின் அனல் உள்ளே தகிக்கிறது. ஆனால், திருச்சியில் ஒரு ஆட்டோக்காரர் தன்னுடைய ஆட்டோவுக்குள் குளுமையை உருவாக்கிக் கொண்டு பறந்து கொண்டிருக்கிறார். இவரின் ஆட்டோவில் பயணிப்பவர்களைவிட, புகைப்படம் எடுத்துக் கொள்பவர்களின் எண்ணிக்கை பெருகி வருகிறது. திருச்சி, கே.சாத்தனூரைச் சேர்ந்த அந்த ஆட்டோ ஓட்டுநர் சைமன் ராஜிடம் பேசினோம்.

‘‘இந்த வருஷம் கோடை வெயில் ஆரம்பமாவதற்கு முன்பாகவே, வெயிலின் தாக்கம் கொஞ்சம் கூடுதலாகவே இருந்தது. பல விஷயங்களை யோசனை செய்து, தென்னங்கீற்று வாங்கி ஆட்டோவில் கூரை வேய்வதைப்போல் அமைத்து, மேலே வழக்கமான ஆட்டோவில் உள்ளதுபோல் சீட் பொருத்திவிட்டோம். அந்த ஐடியா கைகொடுத்தது. வழக்கத்தைவிட ஆட்டோவுக்குள் குளுகுளுவென உள்ளது. ஏற்கெனவே எனக்குக் கீற்று பின்னத்தெரியும் என்பதால் கீற்றுக்கு மட்டும் 200 ரூபாய் செலவானது.

வழக்கமாகச் சவாரி புக் ஆனதும், நான் ஆட்டோவில் வைத்திருக்கும், ஸ்பிரே பாட்டில் மூலம் தண்ணீரைத் தென்னங்கீற்றில் ஸ்பிரே செய்துவிடுவேன். பயணிகள் ஆட்டோவில் ஏறும்போது வழக்கத்தைவிடக் குளிர்ச்சியாக இருக்கும். இதை உணரும் பயணிகளும் வெளியில் இருப்பதைவிட ஆட்டோவில் குளுமையாக இருக்கிறது என்று மகிழ்ச்சியோடு பாராட்டிச் செல்கிறார்கள்’’ எனச் சிரிக்கிறார் சைமன்.

-சி.ய.ஆனந்தகுமார் படம்: என்.ஜி.மணிகண்டன்