Published:Updated:

'அந்தப் பசிதான் சர்வைவலின் தொடக்கமே!' சிங்கங்களின் சர்வைவல் கதை - பகுதி 2

ஜார்ஜ் அந்தோணி

வலி, காயம், தழும்பு, தகவமைப்பு குறித்து கவலைப்படுகிற எந்த உயிரும் சர்வைவலில் ஜெயித்ததாக வரலாறு இல்லை. 

'அந்தப் பசிதான் சர்வைவலின் தொடக்கமே!' சிங்கங்களின் சர்வைவல் கதை - பகுதி 2
'அந்தப் பசிதான் சர்வைவலின் தொடக்கமே!' சிங்கங்களின் சர்வைவல் கதை - பகுதி 2

ர்வைவல் எப்போதும் பசியை நினைவுபடுத்திக்கொண்டே இருக்கும். பசி தனக்கான இரையைத் தேடிக்கொண்டே இருக்கும். இது அனைத்து உயிரினங்களுக்குமான இயற்கையின் விதி. தப்பிப் பிழைக்க முன்னெடுக்கிற எல்லாச் செயல்களுமே சர்வைவலை அடிப்படையாகக் கொண்டவையே. 

தனித்து விடப்படுகிற குட்டி சிங்கம் சுற்றியிருக்கிற எல்லோருடனும் முட்டி மோதியாக வேண்டும். காயங்களையும், வலிகளையும் பார்த்தால் சர்வைவ் ஆகவே முடியாது என்பது பசியில் இருக்கிற குட்டி சிங்கம் உணர்ந்தே இருந்தது. குட்டி சிங்கத்தோடு இருக்கிற மூத்த சிங்கங்கள் அபாயகரமானவை. அவற்றால் குட்டி சிங்கத்திற்கு எப்போது வேண்டுமானாலும் ஆபத்து நேரலாம். சர்வைவலுக்கும் பசிக்கும் நெருங்கிய தொடர்பு இருக்கிறது. குட்டியாக இருக்கிற சிங்கத்திற்கு இளம் வயதில் சர்வைவல் என்பது `சாப்பிடுவது' மட்டும்தான். தாயிடம் பால் இல்லை, இப்போதைக்கு உணவுக்கும் வழியில்லை. இனி நமக்காக உதவி செய்ய யாரும் இல்லை என்கிற நிலையில் ஆனது ஆகட்டும் எனத் தனிமையில் பயணத்தைத் தொடங்கியாக வேண்டும். 

அன்றைய தினம் எல்லாச் சிங்கங்களும் ஓய்வெடுத்த பிறகு வனத்திற்குள் திரும்புகின்றன. அவற்றோடு சேர்ந்து குட்டி சிங்கமும் செல்கிறது. தாய் சிங்கத்தின் நடையே அதன் உடல் நிலை சீராக இல்லை என்பதைக் காட்டிக்கொடுக்கிறது. வனத்திற்குள் செல்கிற சிங்கத்தின் தலைவன் வனத்திற்குள் வந்ததும் தனது எல்லையில் ரோந்து செல்ல ஆரம்பிக்கிறது. அப்படியான நேரங்களில் குழுவில் இருக்கிற மற்ற இளம் சிங்கங்களுக்கு எப்படி வேட்டையாடுவது என்பது கற்றுக்கொடுக்கப்படுகிறது. எப்படி வேட்டையின் போது மற்ற சிங்கங்களுக்கு உதவி செய்யவேண்டும் என்கிற அடிப்படை விதியை அவை கற்றுக் கொடுக்கின்றன. 

ஒரு சில நொடிகளில் சிங்கம் இரண்டு காட்டுப்பன்றிகள் ஓய்வெடுப்பதைப் பார்த்து விடுகிறது. வேட்டையாட சரியான சமயம் பார்த்து காத்துக் கொண்டிருக்கும் பொழுது பன்றிகள் தப்பித்து ஓடிவிடுகின்றன. பன்றிகளை வேட்டையாடுவதற்குச் சிங்கங்கள் அதிக சிரத்தை எடுத்துக் கொள்வதில்லை. இப்படியான ஒரு நாளுக்கத்தான் குட்டி சிங்கமும் காத்திருந்தது. இரண்டு பன்றிகளையும் 16 சிங்கங்களும் சேர்ந்து வேட்டையாடி விடுகின்றன. இப்போது இன்னொரு சிக்கல் இருக்கிறது எருதை வேட்டையாடினால் 16 சிங்கங்களுக்குப் போதுமானதாக இருக்கும். ஆனால், 2 பன்றிகளின் இரை 16 சிங்கங்களுக்கு போதுமானதாக இருக்கப் போவதில்லை. ஒன்றுக்கொன்று தங்களுக்குள் சண்டைபோட்டுக் கொள்கின்றன. இதில் குட்டி சிங்கத்தை மற்ற சிங்கங்கள் கணக்கில் எடுத்துக் கொள்ளவே இல்லை. குட்டி சிங்கமும் அவற்றோடு சேர்ந்து உணவுக்காக முட்டி மோதுகின்றது. 

சிங்கங்கள் வேட்டையாடியதைக் கழுதைப்புலிகள் எப்படியோ கண்டுபிடித்தது சம்பவ இடத்திற்குக் குழுவாக வந்துவிடுகின்றன. ஏனெனில் சிங்கங்களைப் பின்தொடர்வதுதான் கழுதைப்புலிகளின் முக்கிய வேலையே. சிங்கம் வேட்டையாடிய இரையை சூழ்ச்சிசெய்து அபகரிப்பதுதான் அவற்றின் முக்கிய வேலையே. சிங்கங்கள் இருக்கிற இடத்திற்கே வந்து அவற்றிடமிருந்து உணவைப் பிடுங்க முயல்கின்றன. 16 சிங்கங்கள் இருக்கிற இடத்தில் ஒரு சிங்கத்தின் வாலைக் கடித்து இழுக்கும் அளவிற்குக் கழுதைப்புலிகள் குருட்டு தைரியம் கொண்டவை. ஆனால், சிங்கங்கள் எதிர்த்தாக்குதல் தொடுக்கவும் சிறிது பின் வாங்குகின்றன. சிங்கங்களுக்குப் பின்னால் நின்று கத்திக்கொண்டேயிருக்கின்றன. ஆனால், சிங்கங்கள் கழுதைப்புலிகளின் ஓலத்தை ஒரு பொருட்டாக எடுத்துக் கொள்வதேயில்லை. இந்த நேரத்தில் பன்றியின் இடது காலை பிய்த்து எடுக்கிற குட்டி சிங்கம் அதைத் தனியாக எடுத்துச் சென்று சாப்பிட அங்கிருந்து நகர ஆரம்பித்தது. இப்படியான ஒரு சந்தர்ப்பத்திற்காகத்தான் இதுவரை கழுதைப்புலிகள் காத்திருந்தன. குட்டி சிங்கத்தை நோக்கி மொத்த கழுதைப்புலிகளும் ஓடுகின்றன.

இரவு நேரம் என்பதாலும் சிங்கக் கூட்டம் இரையை உண்பதில் கவனமாக இருந்ததாலும் பின்னணியில் நடக்கும் விபரீதத்தை உணராமல் போகின்றன. சிங்கங்களை விடக் கழுதைப்புலிகள் இரவு நேரத்தில் ஆக்டிவாக இருக்கக்கூடியவை. ஐந்து திடமான கழுதைப்புலிகள் ஒரு வயதான குட்டி சிங்கத்தைச் சுற்றி வளைத்து அதை உணவாக்கிக் கொள்ள சண்டையிடுகின்றன. குட்டியிடமிருந்த இரையைப் பிடுங்கிய ஒரு கழுதைப்புலி அங்கிருந்து நழுவி ஓடுகிறது. மற்ற கழுதைப்புலிகள் குட்டியைத் தாக்க தொடங்குகின்றன. குட்டி சிங்கம் அவற்றை எதிர்த்துச் சண்டையிட முயல்கிறது. ஆனால் கழுதைப்புலிகள் விடுவதாயில்லை. நல்ல வேளையாகச் சிங்கம் ஒன்று இதைக் கவனித்து கழுதைப்புலிகளைத் தாக்கி குட்டியைக் காப்பாற்றுகிறது. இப்போது சந்தர்ப்பம் குட்டிக்கு ஆதரவாக இருந்ததால் குட்டியை சிங்கம் காப்பாற்றிவிட்டது. ஆனால், மீண்டும் இப்படி ஒரு சந்தர்ப்பம் நேர்ந்தால் குட்டியால் தப்பிப் பிழைப்பது சாத்தியமில்லை. ஏனெனில் வனத்தில், சிங்கத்திற்கு இருக்கிற பெரிய பிரச்னை கழுதைப்புலிகள்தான். சிங்கத்தின் குட்டிகளை பெண் சிங்கம் எப்படிப் பாதுகாத்தாலும் ஏதோ ஒருவேளையில் கழுதைப்புலிகள் தூக்கிச்சென்றுவிடும். இதேநிலைதான் கழுதைப்புலிகளுக்கும்.

குட்டி சிங்கத்திற்கு நடந்த சம்பவம் ஒரு பாடம். இனி தகுதி வரும்வரை தனித்திருப்பது ஆபத்து என்பதை உணர்கிறது. கூட்டத்தில் இருக்கிற இன்னொரு குட்டி சிங்கத்துடன் நட்பு பாராட்டத் தொடங்குகிறது. அதோடு இணைந்து விளையாடுகிறது. தூங்குகிறது. தனக்கென ஒரு துணையை உருவாக்கிவிட்டால் தைரியம் தானாக வருவது இயற்கையே. இரண்டு குட்டி சிங்கங்களும் ஆக்டிவாக மாற ஆரம்பிக்கின்றன. கூட்டத்தில் இருந்தாலும் தனித்தே களம் காண ஆரம்பிக்கின்றன. எந்த விலங்கு இரையாகச் சிக்கினாலும் முதலில் விழுகிற அடி குட்டி சிங்கங்களுடையதாக இருக்கிறது. வேகமும் கோபமும் ஒரு சேர, சிக்குகிற எல்லா விலங்குகளையும் மிரட்டி ஓட வைக்கின்றன. சில சமயங்களில் இவற்றின் வேகத்தைப் பார்த்து வயதில் மூத்த சிங்கங்கள் கூட விலகிச் செல்ல ஆரம்பிக்கின்றன. சேர்ந்திருப்பதுதான் விவேகம் என்பதை இரண்டும் உணர்ந்தே செயல்பட்டன. ஒரு கட்டத்தில்  இரண்டு குட்டிகளும் முழுமையான  சிங்கமாக மாறுகின்றன.  தகுதி வரும் வரை கூட்டத்தில் இருந்த இரண்டு குட்டிகளும் ஒரு கட்டத்தில்  கூட்டத்தை விட்டுப்  பிரிகின்றன. தங்களுக்கென ஓர் எல்லையை உருவாக்குகின்றன. ``இது எங்க ஏரியா" என்கிற அடையாளங்களை தங்களின் எல்லா இடங்களிலும் விட்டுச் செல்கின்றன. துணிந்து முடிவெடுத்துச் செயல்படுத்துகிற எல்லா உயிரினங்களுமே சர்வைவ் ஆகி விடுகின்றன. வலி, காயம், தழும்பு, தகவமைப்பு குறித்து கவலைப்படுகிற எந்த உயிரும் சர்வைவலில் ஜெயித்ததாக வரலாறு இல்லை. 

மற்ற விலங்குகளைப் போல இல்லை சிங்கம். தான் எப்போதும் சிங்கம் என்பதை உணர்த்திக்கொண்டே இருக்கவேண்டும். அந்த பயத்தை தக்கவைத்திருப்பதால்தான் ராஜாவாக இருக்கிறது. கழுதைப்புலிகள் சூழ்ச்சிக்குப் பேர்போனவை. சிங்கம் வீரத்திற்குப் பேர் போனவை. ஆனால் சிறுத்தை வேகத்திற்குப் பேர் போனவை. சர்வைவல் விஷயத்தில் ஒவ்வோர் உயிரினமும் ஒரு ரகம். அதில் சிறுத்தை தனி ரகம்.

அடுத்த பகுதியில்...