எந்த ஆப் எதுவரை பாயலாம்?

மொபைலில் நாம் இன்ஸ்டால் செய்திருக்கும் எல்லா ஆப்களுக்கும் பொதுவான ஒரே நோக்கம், நம் டேட்டாவை சேகரிப்பதுதான். இது ஏற்கெனவே பலருக்கும் தெரிந்தவிஷயம்தான் என்றாலும் கேம்ப்ரிட்ஜ் அனலிடிகா - ஃபேஸ்புக் பிரச்னைக்கு பிறகு அதிகம் பேசப்படும் விஷயமாக மாறியிருக்கிறது. எந்தெந்த ஆப்கள் எந்தெந்த தகவல்களை சேகரிக்கின்றன, அவற்றை எதற்காகப் பயன்படுத்துகின்றன என்பது குறித்தெல்லாம் விவாதங்கள் எழுந்துள்ளன.

இந்த டேட்டா சேகரிப்பு என்பது ஏதோ மர்மமாக நடக்கும் ஒரு விஷயமல்ல; நம் அனுமதியுடனேயே நடக்கும் விஷயம்தான். இவற்றை அனுமதிக்கவும், தடுக்கவும் நமக்கு முழு உரிமை உண்டு. இந்த அதிகாரத்தை நமக்கு தெரிவது ஆப் பர்மிஷன் வசதி.

ஆப் பர்மிஷன் என்றால் என்ன?

ஆப் பர்மிஷன் என்பது ஒரு ஆப் அல்லது நமது மொபைலில் இருக்கும் தகவல்களையோ அல்லது செட்டிங்ஸ்களையோ பயன் படுத்துவதற்காக பிற ஆப்கள் கேட்கும் அனுமதி என்று வைத்துக் கொள்ளலாம். ஒரு ஆப், மொபைலில் இயங்குவதற்கு சில முக்கியத் தகவல்கள் தேவைப்படும். ஆண்ட்ராய்டு இயங்குதளம், பயன்பாட்டிற்கு வந்த தொடக்கத்தில் இருந்தே ஆப் பர்மிஷன் என்ற விஷயம் நடைமுறையில்தான் இருக்கிறது.

ஆனால் முன்னர் வெளியான பதிப்புகளில் இந்த அனுமதி கேட்கும் நடைமுறை மறைமுகமாகவே இருந்து வந்தது. ஆப்கள் ஓர் மொபைலில் என்னென்ன தகவல்களை அணுகுகின்றன என்பதைப் பரிசோதித்துத் தெரிந்துகொள்ளலாமே தவிர அதை மாற்ற முடியாது. இந்த நடைமுறையினால் ஆப்கள் தகவல் திருடுவது அதிகமாக நடைபெறுவதாக விமர்சனங்கள் எழுந்தன. அதைத் தொடர்ந்து கூகுள் நிறுவனம் ஆண்ட்ராய்டு மார்ஷ்மெல்லோ ( Marshmalllow) இயங்குதளத்திலிருந்து ஆப் பர்மிஷன் நடைமுறையை மாற்றியமைத்தது. இதன் மூலமாக ஒரு ஆண்ட்ராய்டு பயனாளர் ஒரு ஆப் எந்தத் தகவல்களை அணுக வேண்டும் என்பதை அவர்களாகவே முடிவுசெய்து கொள்ளலாம். அதன் பிறகு, இந்த ஆப் பர்மிஷன் வசதியை மேம்படுத்திக்கொண்டே வருகிறது கூகுள்.

 எந்த ஆப்க்கு என்ன பர்மிஷன்?

ஒரு ஆப்பை மொபைலில் இன்ஸ்டால் செய்து பயன்படுத்தும்போதே தகலவல்களை அணுகுவதற்கு அனுமதி கேட்கும். பலர் அதைப் படித்துப்பார்க்காமல் "Allow" என்பதைத் தேர்ந்தெடுப்பார்கள். இது தவறான விஷயம். ஒரு ஆப் பர்மிஷன் கேட்கும்போது அது எதை எதையெல்லாம் பயன்படுத்த அனுமதி கேட்கிறது என்பதைக் கவனிக்க வேண்டியது அவசியம். எடுத்துக்காட்டாக, மொபைலில் இருக்கும் மேப்ஸ் (Maps) ஆப் செயல்படுவதற்கு  Location என்ற பர்மிஷன் மட்டுமே போதுமானது, அதற்கு  Contact என்பதோ,  Telephone என்பதோ தேவையில்லாத  ஒன்றுதான். இது போல வாட்ஸ்அப் போன்ற ஆப்களுக்கு  Contact-டை அணுகக்கூடிய பர்மிஷன் நிச்சயம் தேவைப்படும். ஸ்மார்ட்போன்களில்  Location, Contacts, camera, storage, மற்றும்  microphone போன்றவை முக்கியமாக கவனிக்க வேண்டியவை. ஒரு ஆப்பிற்கு  Contacts-ஐ அணுக பர்மிஷன் தரப்படும்போது அந்த ஆப் மொபைலில் பதிவு செய்யப்பட்டிருக்கும் தொடர்பு எண்களை அதனால் ஆராய முடியும்.  microphone என்பதற்கு அனுமதி கொடுக்கப்பட்டால் மைக்கின் மூலமாக மொபைலைச் சுற்றிக் கேட்கும் ஒலிகளைப் பதிவு செய்ய முடியும். 

storage-க்கு கொடுக்கப்பட்டால் மொபைலில் பதிவுசெய்து வைத்திருக்கும் புகைப்படம், வீடியோ என அனைத்துத் தகவல்களையும் அந்த ஆப் அணுக முடியும். எனவே, ஒரு ஆப்பை இன்ஸ்டால் செய்து பயன்படுத்தும்போது அந்த ஆப் எதற்காக இன்ஸ்டால் செய்யப்பட்டிருக்கிறதோ அதற்கு மட்டும் முக்கியத்துவம் கொடுத்தால் போதுமானது. அதன் மூலமாகவே நமது தகவல்களை ஆப் சேகரிப்பதை தடுக்க முடியும். அப்படித் தேவையற்ற விஷயங்களை அணுக ஒரு ஆப் பர்மிஷன் கேட்கிறது என்றால், உஷாராக இருக்க வேண்டியது அவசியம்.

அதே வேளையில் சில பர்மிஷன்களைத் தராமல் போனால் ஆப்பின் செயல்பாட்டில் சிரமம் இருக்கலாம். எனவே, அதற்குத் தேவைப்படும் அடிப்படையான பர்மிஷன் அனுமதிக்கப்பட வேண்டும். பிரபல நிறுவனங்களின் ஆப்களில் இதுபோன்ற சிக்கல்கள் எதுவும் பெரிதாக இருக்காது. ஆனால், புதிய கேம்கள், அறிமுகமில்லாத ஆப்கள் போன்றவற்றை இன்ஸ்டால் செய்யும்போது இதனை நிச்சயம் கவனிக்கவேண்டும்.