|
"எந்த ஒரு விஷயத்திலும் நம்மால இது முடியுமா, முடியாதான்னு பார்க்காம முழு
மனசோட, அர்ப்பணிப்பு உணர்வோட உழைச்சோம்னா, நிச்சயமா நாம வெச்சகுறி தப்பாதுங்க!"- துப்பாக்கி முனையில் தத்துவம் சொல்கிறார் ஆர்த்தி பிலோ. தமிழகத்தின் பெண் 'அபினவ் பிந்த்ரா' ஆகும் கனவு நனவாக உழைத்துக்கொண்டு இருப்பவர். சமீபத்தில் கோவையில் நடந்த மாநில அளவிலான துப்பாக்கி சுடும் போட்டியில் 13 பதக்கங்களைச் சுட்டவர்!
"எட்டாவது படிக்கிறப்போ, சும்மா 15 நாள் கோச்சிங் கேம்ப்னு கோவை ரைஃபிள் கிளப்புக்கு வந்தேன். பயிற்சி முடிந்ததும் நடந்த போட்டியில் அட, நான் சாம்பியன்! குபீர்னு ஒரு நம்பிக்கை வந்துச்சு. அப்புறம் தினமும் தீவிர பயிற்சி ஆரம்பிச்சேன். அந்த வருஷமே நான் தேசிய அளவிலான போட்டிகளில் கலந்துகிட்டேன். நான் எங்கே இருக்கேன், இன்னும் எவ்வளவு தூரம் போகணும்னு ஒரு தெளிவு கிடைச்சுது. அடுத்தடுத்து கலந்துகிட்ட மாநில அளவிலான போட்டிகளில் வெற்றிகள் குவிந்தன. தேசிய அளவிலும் பளிச் முன்னேற்றம். மூணாவது முறை நான் கலந்துகிட்ட தேசிய அளவிலான போட்டியில் டீம் கேட்டகரி ஏர் ரைஃபிள் பிரிவில் வெண் கலப் பதக்கம் ஜெயிச்சேன். கோவையில் நடை பெற்ற மாநிலப் போட்டிகளில் 9 தங்கம், 3 வெள்ளி, 1 வெண்கலம் ஜெயிச்சேன். இப்போ என் அதிகபட்ச ஸ்கோர் 387. இந்த மாதம் நடக்க உள்ள தேசிய அளவிலான தகுதிச் சுற்றுக்கு என்னைத் தயார்படுத்திக்கிட்டு இருக்கேன்.
| 
