காதலிக்குப் பேனா... நண்பனுக்குக் கத்தி!

காதலில் எக்கச்சக்க சென்டிமென்ட்ஸ் உண்டு. இதோ சில உலகக் காதல் சென்டிமென்ட் கள்...

காதலிக்கு ஊரில் உள்ளதையெல்லாம் பரிசாகக் கொடுப்பார்கள். ஆனால், பேனா மட்டும் நோ... நோ! பேனாவைப் பரிசளித்தால் காதல் பணால் ஆகிவிடுமாம். ஒருவேளை காதலி மொக்கை கவிதை எழுதுவாள் என்கிற பயமோ? காதலர்களுக்கு பேனா போல, நண்பர்களுக்குக் கத்தி. நண்பனுக்குக் கத்தியைப் பரிசாகக் கொடுத்தால், நட்பு 'சதக்' ஆகிவிடுமாம்.

கொரியாவில் ஷூ சென்டிமென்ட். ஷூவைப் பரிசாகக் கொடுத்தால் காதல் காலாவதி ஆகி விடுமாம். நைஸாகக் கழற்றிவிட நினைக்கும் காதலர்களுக்கு இதுதான் பிரிவு சிம்பல். ஒரு ஜோடி ஷூவைப் பார்சல் பண்ணிவிடுவார்கள். அப்புறம்... அழுது புலம்ப வேண்டியதுதான்!

சீனாவில் ஒரு பெண்ணை வசியம் பண்ண வேண்டுமா? ரொம்ப சிம்பிள்... உங்கள் கால் நகத்தை வெட்டித் தூளாக்கி, ஏதாவது ஒரு ஜூஸில் கலந்து அவளுக்குக் கொடுங்கள். குடித்ததும் மந்திரித்த கோழி மாதிரி அவள் உங்களையே சுற்றிச் சுற்றி வருவாளாம்!

ஸ்பெயினில் எர்மிடா டி சான் இஸிட்ரோ எனும் கோயில் இருக்கிறது. இங்கே ஒவ்வொரு வருடமும் மே 15-ம் தேதி பெண்களின் கூட்டம் கும்மிஅடிக்கும். எல்லாருடைய கையிலும் ஊசி இருக்கும். விரலில் ஊசியால் ஒரு குத்து குத்தி ரத்தம் வர வைப்பார்கள். ஒரு சொட்டு ரத்தம் கோயில் தரையில் விழுந்தால் லவ் சக்சஸ்!

கனவில் பாம்பு வந்து சுற்றிக்கொள்வதாக இளசுகள் கனவு கண்டால் லவ்வாலஜி என்று அர்த்தம். இது இங்கே இல்லை... தாய்லாந்தில். அதனால், இளம் பெண்கள் கனவில் பாம்பு வர இஷ்ட தெய்வத்தை வேண்டிக்கொள்கிறார்கள். இளம் பெண்கள் சமைக்கும்போது பாட்டுப் பாடினால் பல் போன கிழட்டு மாப்பிள்ளைதான்

கிடைப்பானாம். அதனால் யாரும் சாம்பிள் டேஸ்ட் பார்க்கக்கூட கிச்சனில் வாயைத் திறப்பதில்லை!

ஐஸ்லாந்தில் திருமணம் ஆகாத இளம் பெண்கள் ஓரமாக இருக்கும் மேஜையில் உட்கார மாட்டார்கள். அப்படி உட்கார்ந்தால் ஏழு வருடங்களுக்கு அவர்களுக்குத் திருமணம் நடக்காது என்பது சென்டிமென்ட்.

ஸ்பெயின், பிரேசில், கொலம்பியா போன்ற நாடுகளில் திருமண நாளன்று பெண் உடுத்தப்போகும் ஆடையை மணமகனின் கண்ணில் காட்டவே மாட்டார்கள். ஒருவேளை பார்த்துவிட்டால் திருமண வாழ்க்கை கசந்துவிடும் என்பது அவர்களின் சென்டிமென்ட்!

கொரியாவில் கல்யாணத்தின்போது பெண்கள் அதிகம் சிரிக்க மாட்டார்கள். அதிகம் சிரித்தால் பெண் குழந்தை பிறக்குமாம். உம்மென்று இருந்தால், ஆண் குழந்தை. பெண் குழந்தை தேவைப்படும் பெண்கள் கல்யாண விழாவில் மொக்கை ஜோக்குக்குக்கூட சிரித்துத் தள்ளுவார்கள்.

நைஜீரியத் தம்பதிகளிடம் ஒரு சென்டிமென்ட் உண்டு. காற்று வடக்கில் இருந்து வீசும்போது 'அது' நடந்தால் அவர்களுக்கு ஆண் குழந்தை பிறக்கும். பெண் குழந்தை வேண்டுமா? தெற்கில் இருந்து காற்று வீசும் நேரத்துக்காகக் காத்திருக்க வேண்டியதுதான். நைஜீரியாவின் பல பகுதிகளில் இந்த சென்டிமென்ட் காற்று பலமாகவே வீசிக்கொண்டு இருக்கிறது.

'கல்யாணமே ஆக மாட்டேங்குது' என்று புலம்புகிறவரா நீங்கள்..? உங்களுக்காகவே ஸ்பெயின் சென்டிமென்ட் இருக்கிறது. கோட், சூட் போட்டு டை கட்டிக்கொள்ளுங்கள். உங்கள் உயிர் நண்பனைக் கூப்பிட்டு டையில் ஏதாவது ஒரு பகுதியைக் கட் பண்ணச் சொல்லுங்கள். சட்டுபுட்டென்று உங்களுக்கு கெட்டி மேளச்சத்தம் கேட்கும்.

பார்ட்டி உண்டுல்ல!