டீன் கொஸ்டீன் - சொந்தத்தில் கல்யாணம் சுகப்படுமா?

கே.ஆனந்தன், டெல்லி.

''எனக்கும் என் அக்கா பெண்ணுக்கும் திருமணம் நிச்சயிக்க இருக்கிறார்கள். எனக்கும் அவளுக்கும் 15 வயது வித்தியாசம். நெருங்கிய உறவு, இத்தனை வயது வித்தியாசம்... எங்களுக்குப் பிறக்கும் குழந்தை ஆரோக்கியமாக இருக்குமா? முன்னெச்சரிக்கை சிகிச்சைகள் மூலம் நேரவிருக்கும் சிக்கல்களைத் தவிர்க்க முடியுமா? இல்லாவிட்டால், சேஃப்ட்டியாக வேறு பெண்ணைத் திருமணம் செய்து கொள்ளவா?''

டாக்டர் கிருஷ்ணபிரியா
மகப்பேறு மருத்துவர்.

''நெருங்கிய உறவுகளுக்குள் திருமணம் செய்தால், 100 சதவிகிதம் பிரச்னை வரும் என்றோ, 100 சதவிகிதம் பிரச்னை வராது என்றோ நிச்சயமாகக் கூற முடியாது. முன்கூட்டியே பரிசோதித்து வரவிருக்கும் பிரச்னைகளுக்கான சிகிச்சை எடுப்பதும் சாத்தியம் இல்லாதது. இது

போன்ற சூழல்களில் சில பொதுவான பிரச்னைகள் குறித்து வேண்டுமானால் பரிசோதித்து முன்னெச்சரிக்கை நடவடிக்கை எடுக்கலாம். உங்கள் உடலில் பலவித ஜீன்கள் உள்ளன. அதில் எங்கே பிரச்னை வரும் என்று யாராலும் கணித்தோ கண்டுபிடித்தோ சொல்ல முடியாது. உங்கள் பரம்பரையில் இதற்கு முன் நடந்த திருமணங்கள் மூலம் ஏதேனும் பிரச்னை வந்து உள்ளதா என்று 'ஃபேமிலி ஹிஸ்டரி' பார்க்க வேண்டும். அதில் எந்தப் பிரச்னையும் பதிவாகாவிட்டால், ரிஸ்க் குறைவுதான். பொதுவாக, மருத்துவர்களைக் கேட்டால், நெருங்கிய உறவுகளில் திருமணம் செய்வதைத் தவிர்க்கத்தான் சொல்வார்கள். ஆனால், உங்கள் குடும்பச் சூழல் குறித்து அலசி ஆராய்ந்து இறுதி முடிவு எடுக்க வேண்டியது நீங்கள்தான்!''

''சில மாதங்களாக என்னால் மற்றவர்கள் பேசுவதைக் கூர்ந்து கவனிக்க முடியவில்லை. மனதில் இனம்புரியாத பயம், பதற்றம். ஏன் இப்படி? மற்றவர்கள் பேசும்போது தைரியமாக அவர்கள் முகம் நோக்குவது எப்படி?''

கே.செந்தில்வேலன்
மனநல மருத்துவர்.

''நீங்கள் குறிப்பிடும் அறிகுறி எல்லா மன வியாதிகளுக்குமான அறிகுறி. உங்கள் வார்த்தைகளை வைத்துப் பார்க்கையில், உங்களுடையது மனப் பதற்ற நோயாக (Anxiety Disorder) இருக்கலாமோ என்று தோன்றுகிறது. இனம்புரியாத பயம், ஓய்வு எடுக்க முடியாத மனநிலை, எப்போதும் ஏதோ ஒரு வேலை மிச்சம் இருப் பது போன்ற உணர்வு இருந்து கொண்டே இருக்கும். கவனம் இன்மை, ஞாபக மறதி, எதிர்மறை எண்ணங்கள், எரிச்சல், பதற்றம் போன்றவை அறிகுறிகள். இதயத் துடிப்பு அதிகமாக இருக்கும். கை நடுக்கம், உள்ளங்கை குளிர்ச்சியாவது, நாக்கு வறட்சி, தலைசுற்றல், அதிக வியர்வை, போன்றவற்றையும் உணரலாம். அடிப்படையிலேயே கூச்ச உணர்வு இருந்தாலும், சோஷியல் ஃபோபியா இருந்தாலும் பிறர் கண்களைப் பார்த்துப் பேசுவதில் தயக்கம் இருக்கும். யாரும் கவனிக்காத சமயம் சிறப்பாகச் செய்து முடிக்கும் வேலையை யாரேனும் கவனித்தால் சரியாகச் செய்ய முடியாது. கவலைப் படாதீர்கள். இதை எளிதாகச் சரி செய்துவிடலாம். தினமும் வீட்டிலேயே யோகாசனம், மனதை ரிலாக்ஸ் ஆக்கும் பயிற்சிகள், தியானம், உடற்பயிற்சி போன்றவற்றைச் செய்தால் நல்ல முன்னேற்றம் இருக்கும். உடனே, ஒரு மனநல மருத்துவரை அணுகித் தக்க ஆலோசனை பெறுங்கள்!''

''எனக்கு 21 வயது. என் பற்கள் எடுப்பாக இருப்பதால், 'க்ளிப் மாட்டிக்கொள்' என்கிறார்கள் என் தோழிகள். இந்த வயதில் க்ளிப் போடலாமா? க்ளிப் போட்டால் பலன் இருக்குமா? சிரிக்கும்போது வெளியே தெரியும் ஈறையும் க்ளிப் மூலம் மறைக்க முடியுமா?''

டி.தீபலட்சுமி
பல் மருத்துவர்.

''21 வயதில் தாராளமாக பல்லுக்கு க்ளிப் போட்டுக்கொள் ளலாம். வெளிநாடுகளில் சில நவீன சிகிச்சை முறைகள் மூலம் 40 வயதுக்கு மேல்கூட க்ளிப் அணிகிறார்கள். ஆனால், அந்த வயதில் க்ளிப்பின் அழுத்தத்துக்கு தாடை எலும்புகள் அடங்குவதற்குச் சிறிது தாமதமாகும். உங்களுக்கு அந்தப் பிரச்னையும் இல்லை. க்ளிப் போடுவதற்கு முன் உங்கள் தாடைப் பகுதியை எக்ஸ்-ரே எடுப்பார்கள். அதன் மூலம் பற்களே எடுப்பாக இருக்கிறதா அல்லது எலும்பு எடுப்பாக இருக்கிறதா என்பதைத் தீர்மானிப்பார்கள். பற்கள்தான் எடுப்பாக இருக்கிறது என்றால் அதை க்ளிப் போட்டு உள்ளே தள்ளிவிடலாம். எலும்பே வெளியே இருந்தால் அதற்கு அறுவை சிகிச்சை மூலம்தான் தீர்வு காண வேண்டியிருக்கும். அந்த அறுவை சிகிச்சையைத் தாடை அறுவை சிகிச்சை என்பார்கள். அறுவை சிகிச்சைக்குப் பிறகு க்ளிப் போட்டு பற்களை உள்ளே தள்ளிவிடலாம். அந்த அறுவை சிகிச்சை மூலமே துருத்திக்கொண்டு இருக்கும் ஈறுகளையும் ஓர் அளவு வரை உள்ளே அடங்கச் செய்யலாம். 'எனக்கு ஈறு இன்னமும் உள்ளே அடங்கியிருக்க வேண்டும்' என்று நீங்கள் விரும்பினால், அதையும் 'லிப் ரீ-பொசிஷனிங்' சிகிச்சை மூலம் சாத்தியப்படுத்தலாம்!''

''என் மொபைல் போன் தொலைந்துவிட்டது. மொபைல் வாங்கும்போதே எனது மொபைலை இன்ஷூரன்ஸ்செய்து இருந்தேன். இப்போது அந்த இன்ஷூரன்ஸ் மூலம் நான் க்ளைம் செய்ய முடியுமா? தொலைந்துபோன மாடலிலேயே புது மொபைல் கிடைக்குமா?''

சி.ராஜகோபால்
சி.ஓ.ஓ, யுனிவர்செல்.

''மொபைல் இன்ஷூரன்சும் பைக் இன்ஷூரன்ஸ் போலத் தான். ஒவ்வொரு ஆண்டும் புதுப்பித்திருக்க வேண்டும். மொபைல் தொலைந்த உடனேயே செல்போன் ஆபரேட்டருக்கு சிம்கார்டுடன் உங்கள் மொபைல் போன் தொலைந்ததைத் தெரியப்படுத்தி, உங்கள் நம்பருக்கான சேவையைத் துண்டிக்கச் சொல்லுங்கள். பிறகு, அந்த விவரங்களை ஒரு கடிதமாக அவர்களிடம் கொடுத்து, அதற்கான அத்தாட்சியைப் பெற்றுக்கொள்ளுங்கள். அடுத்து போலீஸில் புகார் செய்து, புகார் அளித்ததற்கான அத்தாட்சியை (எஃப்.ஐ.ஆர். அல்ல. அத்தாட்சி ரசீதுதான்!) பெற்றுக்கொள்ளுங்கள். உங்கள் பெயரில் இருக்கும் மொபைல் போனின் பில்லைப் பூர்த்தி செய்த இன்ஷூரன்ஸ் அப்ளிகேஷனு டன் இணைத்து இன்ஷூரன்ஸ் நிறுவனத்தில் அளியுங்கள். விண்ணப்பத்தைப் பரிசீலித்து, மொபைல் பயன்பாட்டுக்கு ஏற்ற தொகையை வவுச்சராக நேரடியாக உங்களுக்கே அனுப்புவார்கள். அதை செல்போன் விற்பனை நிலையத்தில் கொடுத்து அந்தத் தொகைக்கு ஏற்ப செல்போன் வாங்கிக்கொள்ளலாம். தொலைந்துபோன புது மொபைலையே தர மாட்டார்கள்!''

''சொந்த ஊரில் இருந்து சென்னை வந்து தங்கி வேலை பார்க்கிறேன் நான். இங்கு உப்புத் தண்ணீரில் தலைக்குக் குளிக்கப் பழகிவிட்டேன். வெளியூருக்கு வேலை விஷயமாகச் செல்லும்போதும், சொந்த ஊருக்குச் செல்லும்போதும் அங்கு நல்ல தண்ணீரில் தலை குளித்தால், முடி அதிகமாகக் கொட்டுகிறது. இதை எப்படித் தடுப்பது?''

வீணா
அழகுக் கலை நிபுணர்.

''சிலருக்கு குளிக்கும் தண்ணீர் மாறும்போது முடிகொட்டும். இது தற்காலிகமான ஒன்றுதான். முடி அந்த தண்ணீருக்குப் பழகியதும் முடி உதிர்வது நின்றுவிடும். உங்களுக்குத் தண்ணீர்தான் பிரச்னை என்றால் தண்ணீரை மாற்றிக் குளிக்கலாம். அல்லது செரிவுமிக்க ஷாம்பு பயன்படுத்துவதற்குப் பதிலாக சாஃப்ட் ஷாம்புக்களைப் பயன்படுத்தலாம். தண்ணீர் மாற்றத்தால் முடிகொட்டுவது தற்காலிகமானது. மீண்டும் வளர்ந்து விடும். கவலை வேண்டாம் லீலா!''