மாஸ்க் மங்காத்தா!

பொதுவாக, சூதாடுபவர்களுக்கு எந்தக் கணக்கு வழக்கும் கிடையாது. அவர்களுக்கு எல்லாமே சூதுதான். ஆனால், உலகத்தையே அலற வைத்துக்கொண்டு இருக்கும் பன்றிக் காய்ச்சலை வைத்து யாராவது சூதாடுவார்களா? நம்புங்கள் சாமி, இப்போது உலகம் முழுக்கப் பரபர பயங்கர சூதாட்டத்தின் மையப் புள்ளி பன்றிக் காய்ச்சல்!

அயர்லாந்தில் இருக்கும் ப¤ரபல சூதாட்ட நிறுவனமான 'பேடி பவர்' (Paddy Power) பன்றிக் காய்ச்சல் சூதாட்டத்தில் ரொம்ப ஆர்வமாக இருக்கிறது. 'எந்த ஐரோப்பிய நாட்டை முதலில் பன்றிக் காய்ச்சல் தாக்கும்' என்பதுதான் இவர்களின் முதல் பெட்டிங். அதில் ஸ்காட்லாந்துக்கு முதலிடம் தந்தார்கள்.

இது இப்படியே வளர்ந்து எத்தனை நாட்களுக்குள் நோயாளிகளின் எண்ணிக்கை நூறைத் தொடும், முதல் பலி எப்போது என்றெல்லாம் போனது. இப்போது பன்றிக் காய்ச்சலுக்கு எந்தக் கம்பெனி முதலில் மருந்து கண்டுபிடிக்கும், எத்தனை நாட்களுக்குள் கண்டுபிடிப்பார்கள்¢ என சகட்டுமேனிக்கு பெட்டிங் போய்க்கொண்டு இருக்கிறது.

இது போதாதென்று இன்டர்நெட்டிலும், ஐ-போனிலும் பன்றிக் காய்ச்சலை அடிப்படையாக வைத்து, எக்கச்சக்க சூதாட்ட வெப்சைட்டுகள் கிளம்பிவிட்டன. அதில் கொஞ்சம் வித்தியாசமானவையும் உண்டு. குறிப்பிட்ட ஒரு நகரத்தைக் குறிப்பிட்டு 'இந்த ஊரில் இப்போது பன்றிக் காய்ச்சல் பரவிவிட்டது. எப்படித் தடுப்பது?' என்று 'நல்லவிதமாக' சூதாட ஆரம்பிப்பார்கள். அவர்கள் கட்டும் பணத்துக்கு தகுந்தாற்போல தடுப்பு மருந்துகள் தரப்படும். அதற்குள் அந்த நகரத்தில் பன்றிக் காய்ச்சல் வைரஸ்கள் பரபரவென பரவ ஆரம்பிக்கும். இவர்கள் தங்களிடம் இருக்கும் தடுப்பு மருந்தைக் கொண்டு அவற்றை அழிக்க வேண்டும். அதற்கு ஏற்றாற்போல பாயின்ட்கள் கூடும். மருந்து தீர்ந்துவிட்டால் பணம் கட்டி புதிதாக வாங்கிக்கொள்ள வேண்டும். நிறைய வைரஸ்களை அழித்து, அந்த நகரத்தைப் பன்றிக் காய்ச்சல் அபாயத்தில் இருந்து காப்பாற்றிவிட்டால் உங்களுக்குத் துட்டு கொட்டும். 'நாங்கள் விளையாடுறது சூதாட்டம்தான். ஆனால், இதன்மூலம் பன்றிக் காய்ச்சலை எதிர்கொள்ளும் மனநிலையை உருவாக்குகிறோம்' என்று பீற்றிக்கொள்கிறது, இதை நடத்தும் நிறுவனம்!