கல்வி-கேள்வி + அம்மாவுக்குத் தெரியாத ரகசியம்

'அப்பா...
ஒரு கதை சொல்லு'
ஓடி வந்தாள்
ஒன்றாம் வகுப்பு மீனாட்சி.
ஆர்வத்துடன் ஆரம்பித்தேன்
'முயலுக்கும் ஆமைக்கும்
ஓட்டப் பந்தயம்
முயல் உறங்க
ஆமை வென்றது'
அபிநயத்துடன்
அரங்கேற்றினேன்.
'போப்பா!
தப்புத் தப்பா சொல்றே...
மெள்ள நகரும் ஆமைக்கும்
துள்ளி ஓடும் முயலுக்கும்
போட்டி என்பது நியாயமா?'
ஒன்றாம் வகுப்பின்
கேள்வியால்
நூற்றாண்டுத் தத்துவம்
நொடியில் உடைந்தது.
கேள்வியே கல்வி என்று
இப்போது புரிந்தது.
ம்...ம்... பள்ளிக்குப்
போக வேண்டியது
மீனாட்சியல்ல!

- அமிர்தநேயன்

அம்மாவுக்குத் தெரியாத ரகசியம்

நிறைய
அம்மாக்களுக்குத்
தெரிவதே இல்லை
தன் மகன்களின்
வங்கிக் கணக்கிலிருந்து...
வலைப்பூ வரை
அவள் பெயர்தான்
கடவுச் சொல் என்று!

- வித்யாசாகர்

சுயராஜ்யம்

எல்லோரும்
அடிமைகளாக இருந்தனர்
விடுதலை வந்தது.
எல்லோரும்
சுதந்திரமாக இயங்கினர்
சிறைகள் வந்தன
இன்னும்!

- ஜனகப்பிரியா

பார்வை

ரயில்
பயணத்தில்
புல்லாங்குழல்
வாசிக்கும்
குருட்டு பிச்சைக்காரன்
தடுக்கி விழுகையில்
வந்து விழுகிறது
வார்த்தை
'பார்த்துப் போ!'

- ப்ரியன்

அரசு மரத்துவர்

அருளழுக அமரவைத்த
அரசு மருத்துவர்
நோய் குறித்த அத்தனையும்
கருணை சொட்டக் கேட்டு
குருதி, சிறுநீர்
சோதனைக்குப் பின்
வகை வகையான மாத்திரைகளை
உட்கொள்ளும்
ஆலோசனை வழங்கி
மூன்றாம் நாள்
திரும்பவும் வரச்சொல்லி
வாஞ்சையுடன் அனுப்பிவைத்தார்
அவருடைய கிளினிக்கில்!

- பி.செழியரசு

ரெண்டு பிஸ்கட் பாக்கெட்

ரஞ்சனிக்கு
ஆபரேஷன் முடிந்துவிட்டது
ரவிக்கு வண்டியில்
போகும்போது விபத்தாம்
பெரியகோயிலைத்
தரிசித்து வரலாம்
ரஞ்சனியைப் பார்க்கச் சென்றால்
ரொம்ப நாள் ஆசை நிறைவேறும்
பார்த்து மாதங்களாகிவிட்ட மாயவரம் பெரியப்பாவையும்
கண்டு வர வேண்டும்
ரவியிடம் ஆறுதல் சொல்லித் திரும்பும்போது
ரஞ்சனிக்கு ஒரு ஹார்லிக்ஸ், பழங்கள்
ரவிக்கு ஒரு ஹார்லிக்ஸ், பழங்கள்,
கொஞ்சம் பணம்
பட்டியல் போட்டதில்
இயலாமை அறிவிக்கும்
வங்கிச் சேமிப்பு
சகதர்மிணியிடம் பேசிய இரவில்
'ரெண்டு பிஸ்கட் பாக்கெட்டோடுதான் வந்தாங்க என் சிசேரியனுக்கு'
என்றாள் தீர்மானமாய்!

- கணேசகுமாரன்

எது பாவம்

இரவு ஒரு மணியாகியும்
ஏனோ உறக்கம் வரவில்லை
வலிந்து மூடிய இமைகளுக்குள்
திறந்து இருந்தன விழிகள்.
இன்றும் கூண்டுக்குள்
ஒரு எலி சிக்கிக்கொண்டது
எல்.கே.ஜி. பயிலும்
என் இளைய மகள்
எழுந்ததும் கேட்பாள்
இந்த எலிகளுக்கு
அறிவில்லையா என்று.
சிறுநீர் கழிக்கச் சென்ற
என்னை வெறுப்புடன் பார்த்தது
உருச் என்று முடிகளை
சிலிர்த்துக் காட்டியது
காலையில்
ஜல சமாதியாகும் வரை
ஒரே பிராண்டல் மயம்தான்.
அரைத் தூக்கத்தில்
கூட்டம் கூட்டமாய் எலிகள்
கூண்டைத் தூக்கிப்
போவது போலக் கனவு.
எலிகளைக் கொல்வது
பாவம் என
தோட்டி நாகராஜன்
சொன்னபோது
எலிகளிடமிருந்து
கார் ஏ.சி-யைக் காப்பாற்ற
வழி சொல்லு என
சண்டையிட்டதில் அவன்
மகாத்மாவாகிப் போனான்.
எப்போதாவது இரவில்
எலிகள் விழவில்லை எனில்
பகலில் பாவம்
அணில்கள் அதில்
மாட்டிக்கொள்ளும்.
இவையெல்லாம் இருப்பினும்
என் மனைவி கேட்ட கேள்வி
இடைவிடாமல்
என்னைத் துளைத்தது
கொல்வது பாவமென்றால்
அணில் என்ன?
எலி என்ன?

- வ.இராஜமாணிக்கம்