'பெரிய புறா'ணம்!

அந்தக் கால அரசர்களுக்கு போஸ்ட்மேன் வேலை பார்த்த பறவை, புறா.

பந்தயப் புறா: கண்களைக் கட்டி சித்தூர் பார்டரைத் தாண்டி விட்டுவிட்டால் என்ன செய்வீர்கள்? யாரையாவது போய் வழி கேட்டுத் திருதிருவென முழித்துக்கொண்டு நிற்பீர்கள். ஆனால், பந்தயப் புறாவை சித்தூரில் அல்ல... பீஹார் பார்டரில் விட்டாலும் சில நிமிடங்கள்

அதே இடத்தில் ஹெலிகாப்டரைப் போல ரவுண்ட் அடித்துவிட்டு, புறப்பட்ட இடத்துக்கே வழி தேடி வந்துவிடும். (அதனால்தான் 'புறா'னு பேர் வந்துச்சோ?) பந்தயப் புறாக்கள் பெல்ஜியம், ஜெர்மனி போன்ற நாடுகளில் இருந்து இறக்குமதி செய்யப்படுபவை. நீண்ட தூரம் பறக்கக்கூடிய அந்த நாட்டுப் புறாக்களின் முட்டைகளை இங்கு கொண்டுவந்து குஞ்சு பொறிக்க வைக்கிறார்கள். பெல்ஜியம், ஜெர்மனியில் ஒரு ஜோடிப் புறா முட்டை 25 ஆயிரத்தில் இருந்து 1 லட்ச ரூபாய் வரை விலை போகின்றனவாம். வெளிநாட்டுப் புறாக்களுடன் நம் லோக்கல் புறாவை 'க்ராஸ்' செய்து உருவாக்கப்படும் புறா நீண்ட தூரம் நான்-ஸ்டாப்பாகப் பறக்கிறதாம்.

ஃபேன்ஸி புறா: கண்ணைக் கட்டாமல் மதுரை ஆரப்பாளையத்தில் விட்டால் மாட்டுத்தாவணிக்குக்கூட வரத் தெரியாது. அந்த அளவுக்கு அநியாயத்துக்கு சோம்பேறிப் புறா. வீடு, ஹால், கிச்சன், தோட்டம் இதைத் தாண்டி எங்கும் போகாது. துட்டு உள்ளவர்களின் சாய்ஸ். விதவித வண்ணங்களில் கிடைக்கும் இவற்றின் பூர்வீகம், பெல்ஜியம். இந்திய ஃபேன்ஸி புறாக்கள் பெரும்பாலும் சாம்பல் நிறம் உடையவை.

காட்டுப் புறா: இந்தப் புறாக்கள் யாருக்கும் கட்டுப்படாது. காட்டில் இரை தேடும். பொழுது சாய்ந்தால், ஏதாவது கோயில் மாடங்களிலோ கட்டடங்களின் சாளரத்திலோ செட்டில் ஆகிவிடும். வேட்டைக்குப் போகும் ஆட் களின் வலைகளில் சிக்கி சிக்ஸ்டி ஃபைவ்வாகவும், குழம்பாகவும் கொதிப்பது இந்தப் புறாக்கள்தான்.

பச்சைப் புறா: கிட்டத்தட்ட கிளியைப் போலவே இருக்கும். அடர்ந்த காடுகளில் மட்டுமே பார்க்க முடியும். நரம்பு சம்பந்தப்பட்ட நோய் வந்தவர்கள் பச்சைப் புறாவின் ரத்தம் குடித்தால் நோய் பறந்துவிடும் என்பது கிராமத்து வைத்தியம். அதனால் பச்சைப் புறாவுக்கு ஏக மவுசு. ஒரு ஜோடிப் புறா 1,000 ரூபாய் வரை விலை போகும்!