'டம்ளர்' பூனை... 'ஈ' வவ்வால்... 'இஞ்ச்' ஓணான்!

சிறுசு என்றாலும் பெருசு என்றாலும் விலங்கு அழகுதான். உலகின் மிகச் சிறிய, பெரிய விலங்கினங்களின் லிஸ்ட் இதோ...

புரூகேசியா மினிமா கேமலோன்: உலகின் மிகச் சிறிய ஓணான் வகை. இதன் நீளம் கூட்டிக் கழித்துப் பார்த்தால், ஒரே ஒரு இஞ்ச். மடகாஸ்கர் பகுதியில் காணப்படுகிறது!

கொமோடோ டிராகன்: 'என்து பெருசு' என்று ஆளவந்தானில் கமல் சொல்வதுபோல இது பெருசு. 'ஐயோ! இதென்ன கொடிய விலங்கு!' என்று இதை முதலில் பார்த்தவர்கள் அலறி ஓடினார்கள். இது கொமோடோ எனும் இந்தோனேஷியத் தீவு ஒன்றில் கண்டுபிடிக்கப்பட்டது. கிடைத்ததைப் பிடித்து மிருகக் காட்சி சாலையில் போட, மக்கள் கூட்டம் கூட்டமாக வந்து பார்த்தனர். 1933-ல் 'கிங்காங்'படத்தில் கொமோடோ டிராகன்தான் ஸ்பெஷல். 3 மீட்டர் நீளமும், 80 கிலோ எடையும் கொண்ட இது செத்த விலங்குகளையும் விஷப் பாம்புகளையும் சாப்பிடக்கூடியது. கண்டதையும் தின்பதால், இதன் வாயில் கொடிய விஷத்தன்மையுள்ள பாக்டீரியாக்கள் நிரம்பி வழியும். இதன் எச்சில் உடலில் பட்டால் நோய் சர்வ நிச்சயம்.

5,000-க்கும் குறைவான எண்ணிக்கையில்தான் இப்போது இருக்கின்றன. அதிலும் 350 பெண் டிராகன்கள்தான் இனப்பெருக்கம் செய்யும் நிலையில் இருக்கின்றன. இந்த இனத்தைக் காப்பதற்கு என்றே கொமோடோ நேஷனல் பார்க் ஒன்று உருவாக்கப்பட்டு இருக்கிறது. டிராகன் பிரியர்கள் ஒருமுறை டிராவல் பண்ணலாம் கொமோடோவுக்கு!

டங்கா கொர்டாக்: உலகின் மிகச் சிறிய குட்டி நாய் எனும் கின்னஸ் சாதனைக்குச் சொந்தக்காரன். சிக்குவாகுவா எனும் நாய் இனமே மிகச் சிறியதுதான். அதிலேயே மிகச் சின்னது இது. 5.4 இஞ்ச் உயரம், 7.4 இஞ்ச் நீளம், அவ்வளவுதான் இந்த நாயின் அளவு!

மிஸ்டர் பீபிள்ஸ்: உலகின் மிகச் சிறிய பூனை. நீளம் 19.2 இஞ்ச், உயரம் 6.1 இஞ்ச். ஒரு சின்ன டம்ளருக்குள் செட்டிலாகிவிடும் அளவுக்குச் சின்னது. 2004-ம் ஆண்டின் கின்னஸ் ரெக்கார்டு ஹோல்டர்!

தும்பெலினா: இது உலகிலேயே மிகச் சிறிய குதிரை. இதன் நீளம் வெறும் 17 இஞ்ச். எடை 26 கிலோ. மிகச் சிறிய குதிரை என கின்னஸ் புத்தகத்திலும் இடம்பெற்றிருக்கிறது. இந்தக் குதிரையில் எந்த ராசகுமாரன் பவனி வருவானோ?!

பம்பிள் பீ வவ்வால்: ஏதோ கொஞ்சம் பெரிய சைஸ் ஈ போல இருக்கும் மிகச் சிறிய வவ்வால். உலகின் மிகச் சிறிய பாலூட்டி. ஒண்ணே கால் இஞ்ச் நீளம். எடை வெறும் இரண்டு கிராம். 1974-ல் இந்த வவ்வால் கண்டுபிடிக்கப்பட்டது. தாய்லாந்தின் கிட்டி தோங்லோன்கியா என்பவர் இதைக் கண்டு பிடித்ததால் இதற்கு கிட்டி பன்றி மூக்கு வவ்வால் எனும் பெயரும் உண்டு!