சூப்பர் ஹீரோஸ்!

ஆறறிவுகள் எல்லாம் ஐந்தறிவுகளை அழித்துக்கொண்டு இருக்க, சில ஐந்தறிவுகள் ஆறறிவுகளைக் காப்பாற்றிய கதைகள்...

பிண்டி ஜூவா

சிகாகோ ப்ரூக்ஃபீல்டு வனவிலங்குக் காப்பகம். 96-ம் வருடம் ஜூவைப் பார்க்க வந்த ஒரு சிறுவன் 18 அடிக் குழிக்குள் மயங்கி விழுந்துவிட்டான். பையனின் அம்மா அலற, பக்கத்தில் நின்றிருந்த பிண்டி ஜூவா என்கிற கொரில்லா, சரசரவெனக் குழிக்குள் இறங்கியது. ஒரு தாயைப் போல அரவணைத்து சிறுவனைத்

தூக்கிக் கொண்டுவந்து ஜூ காப்பாளரிடம் ஒப்படைத்தது. அடுத்த நாள் தலைப்புச் செய்திகளில் ஆரம்பித்து, இன்று வரை சிகாகோவில் பிண்டி ஒரு ஹீரோயின்!

பிரிசில்லா

பிரிசில்லா, ஓர் அழகான பன்றிக்குட்டி. டெக்ஸாஸில் வசிக்கும் கரோல் புர்க் என்கிற பெண்ணின் செல்லப் பிராணி. ஒருநாள் ஏரியில் நீந்தச் சென்ற கரோல், கூடவே பிரிசில்லாவையும், மன வளர்ச்சி குன்றிய தன் மகன் அந்தோணியையும் அழைத்துச் சென்றார். பையன் மீது கவனம் பிசகிய நேரத்தில், அவன் ஏரியில் மூழ்கித் தத்தளிக்க ஆரம்பித்தான். கரோல் துடித்துக் கதற, படாரென ஏரிக்குள் பாய்ந்தது பிரிசில்லா. அந்தோணியின் சட்டையை வாயால் கவ்வி, இழுத்துக் கரை சேர்த்தது. டெக்ஸாஸ் மாகாணத்தில் பன்றியின் வீரத்தைப் பாராட்டி, அன்றைய நாளை 'பிரிசில்லா டே'வாகக் கொண்டாடுகிறார்கள்!

சிங்க ராஜா

2005-ம் ஆண்டு எத்தியோப்பியா நாட்டைச் சேர்ந்த ஒரு ரௌடிக் கும்பல், ஒரு சிறுமியைக் கடத்திச் சென்றது. காட்டுக்குள் அடைத்து ஏழு நாட்களாகக் கடும் சித்ரவதை செய்தார்கள். சிறுமி யின் அழுகுரலும், அலறல் சத்தமும் மனிதர்களை எட்டியதோ, இல்லையோ சிங்கத்துக்கு எட்டியிருக்கிறது. கர்ஜித்தபடி வந்த சிங்கக் கூட்டம் ரௌடிகளைத் துரத்தியடித்து, சிறுமியைச் சுற்றி அரண் போல் நின்றுகொண்டது. மீட்புக் குழு வந்த பிறகுதான் சிறுமியைவிட்டு விலகிச் சென்றது. ''சிறுமியின் கூக்குரல் தங்கள் குட்டிகளின் குரல் போலவே சிங்கங்களுக்குக் கேட்டிருக்கலாம்'' என்கிறார், சிங்க ஆராய்ச்சியாளர் டூவர்ட்.

என்ன இருந்தாலும் காட்டு ராஜால்ல!