படிப்பறை

ஓமந்தூரார் ஆட்சிக்காலத்தில், கும்பகோணத்துக்கு அருகிலிருக்கும் இந்தளூர் என்ற கிராமத்தில் வசித்த சேதுக்காளிங்கராயரின் ஏகபோக மிராசு வாழ்க்கையில் தொடங்கி, ஜெயலலிதா ஆட்சிக்காலம் வரையிலான அவரது சந்ததியின் பேரிடர் வாழ்க்கை வரை நீள்கிறது இந்த நாவல். மிராசுகளின் ஆண்டைத்தனம், அடிமைபோல காலுக்குச் செருப்புகூடப் போட முடியாமல் கப்பி ரஸ்தாவில் நடந்தே கால்பெயர்ந்த கார்வாரிகளின் துயரங்கள், குருணிக்கும் மரக்காலுக்கும் ஆண்டை வயலில் உழைத்தே உயிர் தேய்ந்த பண்ணையாட்களின் நிலை என நாவல், கீழத்தஞ்சை மாவட்டத்தின் வேளாண் குடி வாழ்க்கைமுறையை எந்தக் கலப்புமில்லாமல் ஆவணமாக்குகிறது.

மிராசு, அவ்வளவு வட்டாரத்தன்மையோடு, காவிரிப்படுகையின் வரலாறு, புவியியல், கணிதம், அறிவியல் அனைத்தையும் பதிவு செய்திருக்கிறது. எழுத்தாளர் சா.கந்தசாமி சொல்வதுபோல, இந்தியாவில் டாப்-25 நாவல்களை நேர்மையாக வரிசைப்படுத்தினால், `மிராசு’வும் அதில் அடங்கும். அந்த அளவுக்குக் காலத்தை உண்மைக்கு நெருக்கமாக, தன்மைசிதையாமல் அழகியலோடும் ரசனையோடும் காட்சிப்படுத்தியிருக்கிறது!

மிராசு சி.எம்.முத்து

வெளியீடு: அனன்யா, 8/37, பி.ஏ.ஒய். நகர், குழந்தை இயேசு கோயில் அருகில், புதுக்கோட்டை சாலை, தஞ்சாவூர்-613005

தொடர்புக்கு- 9442346504

விலை: ரூ.780 பக்கங்கள்: 849