படிப்பறை

குழந்தை வளர்ப்புப் புத்தகங்கள் பெரும்பாலும் இயல்பான குழந்தைகளுக்காகவே எழுதப்படுகின்றன. சிறப்புக்குழந்தைகள் பற்றி நுட்பமாகக் கூறப்படுவதில்லை. ஆட்டிசக் குழந்தைகள் பற்றிய நூல்கள் வரத்தொடங்கியிருந்தாலும், அவற்றுள் லக்ஷ்மி பாலகிருஷ்ணனின் ‘எழுதாப் பயணம்’ நூல் தனித்துவமானது.

தன் மகன் கனிவதமுனுக்கு ஆட்டிசம் என்று தெரிந்ததும் அவனுடைய ஒன்றரை வயதில் இருந்து பத்து வயது வரை, தெரபிஸ்ட், இசை, சிறப்பு ஆசிரியர்கள் என்று, தான் முயற்சி செய்த அத்தனை விஷயங்களையும் நூலாக எழுதியிருக்கிறார் ஆசிரியர்.

மகன் சுயமாக வாழ்வதற்கான வழிகளைத் தேட ஆரம்பித்தது, சிறப்புக்குழந்தைகளுக்கு உதவி செய்ய வேண்டியவர்களாலேயே தானும் தன் சிறு மகனும் பட்ட கஷ்டங்கள், ‘நூறு சதவிகிதம் ஆட்டிசத்தைக் குணமாக்கிவிடுவோம்’ என்கிற பொய் விளம்பர மோசடிகள், இவற்றின் எதிரொலியாகத் தன் குடும்பத்தில் ஏற்பட்ட மன வருத்தங்கள், பாலைவனத்தில் கண்ட நீர்நிலைபோலத் தன் மகனுக்குக் கிடைத்த தெரபிஸ்ட், சிறப்புக் குழந்தைகளுக்கான ஆசிரியர், ஆட்டிசம் தொடர்பாகத் தான் பத்திரிகைகளில் எழுதிய கட்டுரைகள் என்று தன் அனுபவங்களை, வாசிப்பவர்களிடம் பகிர்ந்தபடியே நகர்கிறார் லக்ஷ்மி பாலகிருஷ்ணன். அவருடைய எளிமையான எழுத்து நடை அவற்றை உணர்வுபூர்வமாகக் கடத்த உதவுகிறது.

எழுதாப் பயணம்

லக்ஷ்மி பாலகிருஷ்ணன்

வெளியீடு : கனி புக்ஸ்

84/1, ஐஸ்வர்யா தெரு, ஷீலா நகர், மடிப்பாக்கம், சென்னை - 91

தொடர்பு : 9940203132

விலை: ரூ.100

பக்கங்கள் : 112