கவிதைகள்
கால்களுக்கு மட்டும் குற்ற உணர்வேதும் தோன்றுவதேயில்லை!
சிறப்புப் பரிசு தவா
பாதை
முட்கள் நிறைந்த பாதைகள்
என்னவோ மிகக் கவனமாகத்தான்
கடக்கப்படுகின்றன...
பூக்களை மிதித்துச் செல்லும்
கால்களுக்கு மட்டும்
குற்ற உணர்வேதும்
தோன்றுவதேயில்லை!
- கி.சரஸ்வதி, ஈரோடு.
****
பரிசு ரூ.300
உண(ர்)வு
பசு மாட்டுக்கு வாழைப்பழம், அகத்திக்கீரை,
மொட்டை மாடி சுவரில் இலை போட்டு
வடை, அப்பத்துடன் காக்காவுக்கு சாதம்,
புரோகிதருக்கு பணத்துடன் பை நிறைய அரிசி, காய்கறிகள்,
ஆதரவற்றோர் இல்லத்திலிருப்பவர்களுக்கு
அறுசுவை விருந்து எல்லாம் முடிந்தது...
மருத்துவமனையில் பத்து நாட்களுக்கு மேலாக
அன்னம், தண்ணியின்றி சலைன் மட்டுமே ஏற்றியும்
காப்பாற்ற முடியாத அம்மாவுக்கு
இன்னிக்கு திவசம்.
- ஷாந்தினி, மதுரை-9
பரிசு ரூ.300
கரையும் காலங்கள்
செல்லமாகக் கொஞ்சுவதற்கு பெர்சியன் பூனை
எம்மைச்சுற்றி எப்போதும் வாலாட்டி நிற்பதற்கு
வெள்ளை பொமரேனியன் நாய்
கூண்டுக்குள்ளேயே சிறகடித்து
எங்களையும் பறக்க வைப்பதற்கு
ஆப்பிரிக்கன் காதல் பறவைகள்
காணாமல்போன நதிகளைத் தினமும் நினைவூட்டுவதற்கு
கண்ணாடித் தொட்டியில் அலங்கார மீன்கள்
குறுகிய மனம் படைத்த மனிதர்களால்
வரவேற்பறையில் சிறுத்துப்போன போன்சாய் மரங்கள்
எல்லாம் இருக்கிற தொகுப்பக வீட்டில்
நேரத்தை மட்டும் வேகமாக தின்று செரிக்கிறது
ஆளுக்கொரு தொடுதிரை அலைபேசி.
- ஃபைஹா, அவூர்.
கவிதை படைப்பவரா நீங்கள்..?
உங்கள் எண்ணங்களை வார்த்தை வண்ணங்களாக்கி,
`இது என்னுடைய சொந்தப் படைப்பு. வேறு எந்த ஒரு பத்திரிகை நிறுவனம், இணையதள மீடியா, சமூகஊடகங்களுக்கு இதை நான் இதுவரையில் அனுப்பவில்லை' என்கிற உறுதிமொழியுடன் உங்கள் படைப்புகளை அனுப்பி வைக்கவும்.
பிரசுரமாகும் கவிதைகளுக்குக் காத்திருக்கிறது ரொக்கப் பரிசு! சிறந்த கவிதைக்கு சிறப்புப் பரிசு!
அனுப்ப வேண்டிய முகவரி: கவிதைகள், அவள் விகடன், 757, அண்ணாசாலை, சென்னை-600 002.
மின்னஞ்சல் முகவரி: avalvikatan@vikatan.com