சொல்வனம்

ஒரு பெருநகரத்தோடு

மல்லுக்கட்டுவதென்பது அவ்வளவு எளிதல்ல

குறைந்த விலையிலான

நல்ல உணவகத்தைத் 

தேடிக் கண்டுபிடிக்க வேண்டும்

வரையறுக்கப்பட்ட சட்டதிட்டங்களை மீறாமல்

கிடைத்த அறையில்

வாழப் பழகிக்கொள்ள வேண்டும்

இத்தனை மணிக்குள் எனக் காலத்தையும்

இத்தனை அளவு எனத் தண்ணீரையும்

நமக்காக யாரோ நிர்ணயிப்பதற்குள்

நம்மைச் சுருக்கிக்கொள்ள வேண்டும்

கூட்டமாக வருகிறதே என்றெல்லாம்

கவலைப்படாது

தவறவிடாது பேருந்தில் பயணித்து

அலுவலகம் சென்று

வருகையை நேரம் கடந்துபோகுமுன்

பதிந்திட வேண்டும்

மின்சாரமற்ற நாளில்

இருட்டிய அறைக்குள்

நான்கு சுவர்களோடு 

வாழ்வைப் பேசிக்கொண்டு

அமர்ந்திருக்க வேண்டும்

அத்துமீறும் அதிகாரங்களுக்குப்

பணிந்து பணிந்து

சுயத்தைத் தொலைத்துவிட்டு

உதடுகளுக்குச் சிரிக்கவும் புன்னகைக்கவும் மட்டுமே பழக்கிக்கொள்ள வேண்டும்

வணிக வளாகத்தின் 70 MM அகலத்திரையுடைய திரையரங்குகளில்

முன்வரிசையில் அமர்ந்து

படம் பார்க்கப் பழகிக்கொள்ள வேண்டும் வேலைநேரம் முடிந்தும்

வழங்கப்படுகின்ற வேலைகளைச்

செய்ய

உடலையும் மனதையும்

எப்போதும் தயார்நிலையிலேயே

வைத்திருக்க வேண்டும்

உன் வானத்தை

உன் பறவைகளை

உன் மேகங்களை

உன் மழையை

உன் இசையை

உன் வீதிகளை

எல்லாவற்றையும் மறந்துவிட்டு

சிரிக்கத் தெரிந்திருக்க வேண்டும்

ஏமாற்றப்படுகிறோமெனத் தெரிந்தே

பொருள்களை

அதிக விலை கொடுத்து

புன்னகை மாறாமல் வாங்கப்

பழகிக்கொள்ள வேண்டும்

கத்தியில்லாமலே முதுகில் குத்தும்

வலிகளை

ஜீரணித்துக்கொள்ள வேண்டும்

ஒரு பெருநகரத்தோடு

மல்லுக்கட்டுவதென்பது அவ்வளவு எளிதல்ல

வந்தேறியொருவனுக்கு.

- சௌவி

சகலரையும் முகமூடி அணியவைத்திருக்கிறார்

எங்கள் மன்னர்

அவற்றின் மீது அரசருக்கு

எப்போதுமே ஓர் அலாதி பிரியம் உண்டு

எப்போது எந்த முகமூடி பொருத்தமானதாக இருக்கும் என்பதில் கைதேர்ந்தவர் அவர்

இயல்பான நாள்களிலும்

அவர் அதையே

அணிந்துகொள்வதால் என்னவோ

எங்களுக்கு முகமூடிகள் புதிதாகத் தெரியவில்லை

இப்பொழுது அணிந்துகொள்கிறோம் 

கையில் கிடைப்பதை

மன்னன் எவ்வழி நாங்களும் அவ்வழியென்று

வேறு வழி இன்றியும்

நம்மை வைரஸ்களிடமிருந்து

முகமூடிகூட காக்கலாம்.

ஆனால் மன்னர்களிடமிருந்து...?

- நேசன் மகதி