சொல்வனம்

நீ பேருந்திலேறி

பயணித்து இறங்கும்

இருபது நிமிடங்களுக்குள்

நிகழ்ந்துவிடுகின்றன

அத்தனை பருவகால மாற்றங்களும்

நீ பேருந்திலேறுகையில் மழைக்காலம்

நீ எனைப் பார்க்கையில் இளவேனிற்காலம்

நீ புன்னகைக்கையில் வசந்தகாலம்

நீ பேருந்தை விட்டு இறங்குகையில்

இலையுதிர்காலம்

நீ இறங்கிப்போன பிறகு கோடைக்காலம்.

- சௌவி

உனக்காய் நான்

கோயிலுக்கும்

எனக்காய்

நீ மசூதிக்கும்

செல்கிறோம்

எத்தனையோ

இடையூறுகளுக்கு இடையே

இடைவெளியின்றிப்

பயணிக்கிறது...

மதக்குறியீடுகளின்றி

மனக்குறிகளோடு

நம் காதல்!

- மு.முபாரக்

உன் மௌனம்

என்னுள்

ஓராயிரம் வார்த்தைகளை

உதிர்க்கின்றன

எதுவுமே பேசமுடியாமல்

என்னையும் உன்னைப்போல்

நிற்கவைக்கிறாய் நீ

நம் மௌனம்

என்னென்ன வார்த்தைகளைக்கொண்டு

நிரப்பிக்கொள்ளப்போகிறதோ!

- அய்யாறு. ச.புகழேந்தி

புத்தம் புதிய

ரோஜாவைக்காட்டிலும்

பத்திரப்படுத்தப்பட்ட

காய்ந்த ரோஜாக்களிலேயே

பெரும்பாலும்

பசுமையாய் வாசம் வீசிக்கொண்டிருக்கிறது

காதல்.

- கௌந்தி மு

என் காதலை அறைந்த

சிலுவையின் முன்பே அமர்ந்து

பிரார்த்திக்கிறாய் சர்ச்சில்

பிதா உன்னை மன்னிப்பாராக...

அடிக்கடி தொலைத்துவிடுகிறேன்

என் பெயரை

ஒருமுறை அழைக்கிறாயா...

இன்னொரு முறை பிறக்கட்டுமா...

- வே.புகழேந்தி