Published:Updated:

கசடு கழிவு நீர் மேலாண்மைத் திட்டம்! - கலக்கும் கருங்குழி பேரூராட்சி...

கசடு கழிவு நீர் மேலாண்மைத் திட்டம்! - கலக்கும் கருங்குழி பேரூராட்சி...
பிரீமியம் ஸ்டோரி
News
கசடு கழிவு நீர் மேலாண்மைத் திட்டம்! - கலக்கும் கருங்குழி பேரூராட்சி...

சுற்றுச்சூழல்

திறந்தவெளியில் மலம் கழிப்பதைத் தடுப்பதற்காக... தூய்மை இந்தியா திட்டத்தின் ஒரு பகுதியாக, கிராமந்தோறும் ‘செப்டிக் டேங்க்’ அமைத்துக் கழிப்பறைகள் கட்டித்தரப்படுகின்றன. இப்படி அதிகரித்து வரும் செப்டிக் டேங்க்களில் சேரும் கழிவுகளை முறையாக மேலாண்மை செய்யும் வகையில், ‘கசடு கழிவு நீர் மேலாண்மை’ என்ற புதிய திட்டத்தைச் செயல்படுத்தத் துவங்கியிருக்கிறது, தமிழக அரசு.

இத்திட்டம், காஞ்சிபுரம் மாவட்டம், மதுராந்தகம் ஒன்றியத்தில் உள்ள கருங்குழி பேரூராட்சியில் தொடங்கப்பட்டுள்ளது. இப்பேரூராட்சியில் இரண்டாண்டுகளுக்கு முன்பு பணிகள் தொடங்கப்பட்டு... கடந்த ஆண்டில், கசடு கழிவு நீர் மேலாண்மை திட்டம் செயல்பாட்டுக்கு வந்துள்ளது. பொதுவாக, கழிவு நீர் சுத்திகரிப்புக்குப் பெரிய அளவில் செலவு செய்ய வேண்டியிருக்கும். ஆனால், மிகவும் குறைவான செலவில் இங்கு கழிவு நீர் சுத்திகரிக்கப்படுகிறது.

கசடு கழிவு நீர் மேலாண்மைத் திட்டம்! - கலக்கும் கருங்குழி பேரூராட்சி...

இத்திட்டம் குறித்துக் கருங்குழி பேரூராட்சி செயல் அலுவலர் (பொறுப்பு) மா.கேசவனிடம் பேசினோம்.

“தமிழகத்தில் கசடு கழிவு நீர் மேலாண்மை திட்டம் என்பது புதுமையான திட்டம். மூன்று ஆண்டுகளுக்கு முன்பு பெங்களூருவில்  இந்தத் திட்டம் செயல்படுத்தப்பட்டது. அப்போதே தமிழகத்தில் செயல் படுத்துவதற்கான வேலைகளைத் தொடங்கியது, தமிழ்நாடு பேரூராட்சி இயக்ககம். முதல் கட்டமாக ஒரு லட்சத்துக்கும் குறைவான மக்கள் தொகை உள்ள பகுதிகளில் இத்திட்டத்தைச் செயல்படுத்தலாம் என முடிவெடுத்து, அதன்படி கருங்குழி பேரூராட்சியைத் தேர்வு செய்தது.

இத்திட்டத்துக்காக 4.93 கோடி ரூபாய் ஒதுக்கப்பட்டது. குடிநீர் வடிகால் வாரியம் மூலமாகவும், மாசுக் கட்டுப்பாட்டு வாரியம் மூலமாகவும் கழிவு நீரைப் பாதுகாப்பாக எடுப்பது குறித்து எங்களுக்குப் பயிற்சி கொடுக்கப்பட்டது. பயிற்சியின் மூலம் தெரிந்துகொண்ட விஷயங்களைச் செயல்படுத்தியுள்ளோம். இதை டெல்லியிலிருந்து அதிகாரிகள் அடிக்கடி வந்து பார்த்துச் செல்கிறார்கள். படிப்படியாகத் தமிழகம் முழுவதும் இத்திட்டம் விரிவுபடுத்தப்பட உள்ளது” என்ற கேசவன் திட்டம் செயல்படும் இடத்துக்கு நம்மை அழைத்துச் சென்று காட்டிய படியே பேச ஆரம்பித்தார்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
கசடு கழிவு நீர் மேலாண்மைத் திட்டம்! - கலக்கும் கருங்குழி பேரூராட்சி...

“கருங்குழிப் பேரூராட்சி மூலமாக... 6,000 லிட்டர் கொள்ளளவு உள்ள லாரிகளில் கழிவு நீரை எடுத்து வருவதற்கு 1,500 ரூபாய் மட்டுமே வசூல் செய்கிறோம். இத்தொகையைப் பேரூராட்சியில் செலுத்தினால், நாங்கள் லாரியை அனுப்பிக் கழிவு நீரை எடுத்து வந்து விடுவோம். தனியார் மூலம் கழிவுகளை அகற்ற விரும்பினால், 5,000 ரூபாய் வரை செலவு செய்ய வேண்டியிருக்கும். தனியார் லாரிகள் மூலமாகக் கொண்டு வரப்படும் கழிவுகளையும் நாங்கள் வாங்கிச் சுத்திகரிக்கிறோம். இதற்கு ஒரு லாரி கழிவு நீருக்கு 100 ரூபாய் எனக் கட்டணம் வசூலிக்கிறோம். மேலும், பொதுமக்கள் தங்கள் வீட்டின் செப்டிக் டேங்க் கழிவுநீரை அகற்ற மாதம் 66 ரூபாய் வீதம் கட்டும் அளவுக்குத் திட்டத்தை எளிமையாக்கி இருக்கிறோம்.

பணம் கட்ட ஆரம்பித்து 12 மாதங்கள் முடிவடைந்ததும் கழிவு நீர்த் தொட்டி சுத்திகரிக்கப் பணம் செலுத்தியவர்களுக்கு குறுஞ்செய்தி (எஸ்.எம்.எஸ்) அனுப்பிக் கழிவு நீரை எடுத்து வருகிறோம். இங்குள்ள சுத்திகரிப்பு மையத்தின் திறன் அதிகமாக இருப்பதால், அருகில் உள்ள ஊராட்சிகள், மதுராந்தகம் நகராட்சி உள்ளிட்ட சுற்றுவட்டாரப் பகுதிகளிலிருந்து கொண்டு வரப்படும் கழிவு நீரையும் வாங்கிச் சுத்திகரிக்கிறோம்” என்ற கேசவன், சுத்திகரிப்பு முறை குறித்துச் சொல்ல ஆரம்பித்தார்.

கசடு கழிவு நீர் மேலாண்மைத் திட்டம்! - கலக்கும் கருங்குழி பேரூராட்சி...

“இந்த வளாகத்தில் மொத்தம் 20 தொட்டிகள் அமைக்கப்பட்டிருக்கின்றன. தொட்டிகள் ஒவ்வொன்றும் சுமார் 23 ஆயிரம் லிட்டர் கொள்ளளவு கொண்டவை. ஒவ்வொரு தொட்டியிலும் 40 எம்.எம், 20 எம்.எம், 10 எம்.எம் என்ற அளவுகளில் அடுக்கடுக்காகக் கருங்கல் ஜல்லிகளைக் கொட்டி, அதன் மீது மணல் பரப்பப் பட்டிருக்கிறது.

இதில் கொட்டப்படும் கழிவு நீரில் கசடு மட்டும் மேலே தங்கிவிடும். தொட்டிகளிலிருந்து குழாய்கள் மூலம் புதைவடிகால் அமைப்பின் வழியாக இரண்டாவது சுத்திகரிப்பு பகுதிக்குக் கழிவு நீர் செல்லும். முதல் சுத்திகரிப்புத் தொட்டியில் சுமார் 80 சதவிகிதம் சுத்திகரிக்கப்பட்டுவிடும். இரண்டாவது அமைப்பில் உள்ள தொட்டிகளில் கூழாங்கற்கள் நிரப்பப்பட்டு, அவற்றின்மீது நாணல், கல்வாழை, வெட்டிவேர் போன்ற செடிகள் வளர்க்கப்படுகின்றன. இதன் வழியாகக் கழிவுநீர் மெதுவாகச் செல்லும். இந்தச் செடிகள் நீரில் உள்ள அழுக்குகளை உறிஞ்சும் தன்மை கொண்டவை. இங்கு 5 சதவிகித அளவு சுத்திகரிக்கப்படும். 

இரண்டாவது சுத்திகரிப்பு அமைப்பிலிருந்து மூன்றாவது சுத்திகரிப்புப் பகுதியான கான்கிரீட் தொட்டிக்கு வடிகட்டப்பட்ட நீர் சென்று சேரும். அங்கு சூரிய ஒளி மூலம் கிருமிகள், பாக்டீரியாக்கள் போன்றவை பெருமளவில் அழிக்கப்படுகின்றன. மூன்றாவது தொட்டியில் ஓரிரு நாள்கள் சேகரமான நீர் அங்கிருந்து நான்காவதாகக் கிணறுபோல அமைக்கப்பட்டிருக்கும் சேகரிப்புத் தொட்டிக்குச் சென்று சேரும். அங்கிருந்து மோட்டார் மூலமாகச் செடிகளுக்குப் பாய்ச்சி வருகிறோம்.

ரசாயனக் கழிவுகள் கலந்து விடக்கூடாது என்பதால் மக்கள் குடியிருப்புப் பகுதிகளிலிருந்து மட்டுமே கழிவு நீரை எடுக்கிறோம். கம்பெனிகளிலிருந்து கழிவு நீர் எடுக்கும்போது அதில் ரசாயனங்களின் அளவு அதிகமாக இருக்கும். வாரத்துக்கொருமுறை, இங்கு கொட்டப்படும் கழிவு நீரின் மாதிரிகளைச் சேமித்துக் குடிநீர் வடிகால் வாரியத்துக்கு அனுப்பி ஆய்வுக்குட்படுத்துகிறோம். அந்த ஆய்வறிக்கையின்படி கழிவு நீரில் இருக்கும் அமில கார சமநிலை அளவைச் சோதிக்கிறோம்.

கசடு கழிவு நீர் மேலாண்மைத் திட்டம்! - கலக்கும் கருங்குழி பேரூராட்சி...

முதல் நிலை சுத்திகரிப்புக்காக அமைக்கப்பட்டுள்ள தொட்டிகளில் உள்ள கசடு முற்றிலுமாக உலர்வதற்கு 20 நாள்கள் தேவைப்படும். அதனால்தான் 20 தொட்டிகள் அமைத்து ஒரு நாளைக்கு ஒரு தொட்டி எனப் பயன்படுத்துகிறோம். இந்தத் தொட்டிகளில் சேகரமாகும் கசடுகள் நன்கு உலர்ந்து வெடிப்பு வெடிப்பாக வண்டல் மண் போலக் காட்சியளிக்கும். அதை அப்படியே சேகரித்து வைக்கிறோம், இதில் எந்தத் துர்நாற்றமும் இருக்காது. கிருமிகளும் இருக்காது” என்று சொன்ன கேசவன் அந்த உலர்ந்த கசடுகளைக் கைகளில் எடுத்து முகர்ந்து பார்த்தப் பிறகு நமக்குக் காட்டினார்.

நிறைவாகப் பேசிய கேசவன், “இந்தக் கழிவு கசடுகளைத் தமிழ்நாடு குடிநீர் வடிகால் வாரியம் மூலமாகப் பரிசோதனை செய்தோம். சோதனை முடிவில், ‘இதைப் பயிர்களுக்கு உரமாகப் பயன்படுத்தலாம்’ எனச் சான்று கொடுக்கப்பட்டுள்ளது. இந்த உலர்ந்த கசடுகளை அனைத்துவிதமான பயிர்களுக்கும் இடுபொருளாகப் பயன்படுத்தலாம். இக்கசடு உரங்களை விவசாயிகளிடம் சேர்க்கும் வேலைகளை இனி செய்ய இருக்கிறோம். முதல் கட்டமாக இலவசமாகத் தர முடிவெடுத்திருக்கிறோம். எங்கள் பேருராட்சியில் திடக்கழிவு மேலாண்மைத் திட்டத்தின் கீழ் தயாரிக்கும் இயற்கை உரம் மற்றும் மண்புழு உரம் ஆகியவற்றுடன் இந்தக்கசடு உரத்தைக் கலந்து விநியோகம் செய்யத் திட்டமிட்டிருக்கிறோம். அதேபோலச் சுத்திகரிக்கப்பட்ட நீரை விவசாயிகளுக்கும் வழங்க இருக்கிறோம்” என்றார் உற்சாகத்துடன்.

தொடர்புக்கு

கேசவன், செல்போன்:
95247 43526.

- பா.ஜெயவேல்,  படங்கள்: சி.சுரேஷ்குமார்

இன்னும் 17 பேரூராட்சிகளில் செயல்படுத்தப்படும்! 

கசடு கழிவு நீர் மேலாண்மைத் திட்டம் குறித்து பேரூராட்சிகள் இயக்ககத்தின் இயக்குநர் பழனிச்சாமியிடம் பேசினோம். “கருங்குழிப் பேரூராட்சியைத் தொடர்ந்து இன்னும் 17 பேரூராட்சிகளில் இந்த திட்டத்தைச் செயல்படுத்த உள்ளோம். படிப்படியாகத் தமிழகம் முழுவதும் ஒரு லட்சத்திற்கும் குறைவான மக்கள் தொகை கொண்ட நகராட்சி மற்றும் பேரூராட்சிகளில் இந்த திட்டம் விரிவுபடுத்தப்படும். மக்களுக்குத் தரமான சேவையை அளிக்க வேண்டும். அதே நேரத்தில் சுற்றுப்புறமும் தூய்மையாக இருக்க வேண்டும் என்பதை மனதில் வைத்து இந்த திட்டத்தைச் செயல்படுத்தி வருகிறோம்” என்றார்.

கசடு கழிவு நீர் மேலாண்மைத் திட்டம்! - கலக்கும் கருங்குழி பேரூராட்சி...

துணை இயக்குநர் மலையமான் திருமுடிக்காரி பேசியபோது, “இந்தத் திட்டம் முழுக்க முழுக்க அரசு மானியத்தில் செயல்படுகிறது. இதற்காக 4.93 கோடி ரூபாய் ஒதுக்கப்பட்டுள்ளது. குடிநீர் வடிகால் வாரியம் மூலமாகவும், மாசுகட்டுப்பாட்டு வாரியம் மூலமாகவும் பாதுகாப்பாக எப்படிக் கழிவு நீரை எடுப்பது என பயிற்சி வழங்கப்பட்டுள்ளது. ரசாயன கழிவு கலந்துவிடக்கூடாது என்பதால் மக்கள் குடியிருப்பு பகுதிகளிலிருந்து மட்டுமே கழிவு நீரை எடுக்கிறோம்” என்றார்.