Published:Updated:

``இந்தப் பழங்குடிகள் போராட்டம் காடுகளின் நலனுக்காக!” - பாதுகாக்கப்பட வேண்டியவர்களின் கதை

உலகின் பல்லுயிர்ச்சூழல் மிகுந்த 80 சதவிகிதம் காடுகளில் பழங்குடிகள் வாழ்கிறார்கள். அவர்களின் பாதுகாப்புதான் நம் எதிர்காலத் தலைமுறைகளிடம் வனங்களையும் வளங்களையும் பத்திரமாகக் கொடுப்பதற்கு இருக்கும் ஒரே வழி.

``இந்தப் பழங்குடிகள் போராட்டம் காடுகளின் நலனுக்காக!” - பாதுகாக்கப்பட வேண்டியவர்களின் கதை
``இந்தப் பழங்குடிகள் போராட்டம் காடுகளின் நலனுக்காக!” - பாதுகாக்கப்பட வேண்டியவர்களின் கதை

பழங்குடிகள் இல்லையேல் காடு இல்லை
பழங்குடிகள் இல்லையேல் இயற்கை இல்லை
பழங்குடிகள் இல்லையேல் எதிர்காலமே இல்லை
இதையுணர்ந்து நாம் செயல்படுகிறோமா என்றால் அதுவும் இல்லை

உலகின் பல்லுயிர்ச் சூழல் மிகுந்த 80 சதவிகிதம் காடுகளில் பழங்குடிகள் வாழ்கிறார்கள். தங்கள் நிலத்தில் யானை மந்தைகள் உலவிக் கொண்டிருக்கும். புலிகள் வந்துபோகும். மான்கள் மேய்ந்து கொண்டிருக்கும். குரங்குகள் விளையாடிக்கொண்டிருக்கும். பறவைகள் கொஞ்சிக் கொண்டிருக்கும். காட்டு மாடுகள் இளைப்பாறிக் கொண்டிருக்கும். அவற்றோடு அவர்களும் வாழ்ந்துகொண்டிருப்பார்கள்.

தாழ்த்தப்பட்டவர்கள் என்ற பட்டியலில் அவர்களை வைத்துள்ளோம். உண்மையைச் சொல்லப்போனால் உழைக்கும் சமூகங்களும், உழைப்போடு செறிவான இயல் அறிவுக் களஞ்சியத்தையும் ஆயிரமாண்டுகால வரலாற்றையும் கொண்ட பழங்குடிச் சமூகங்களும்தான் உயர்ந்தவர்களாகப் பார்க்கப்பட வேண்டியவர்கள். அந்த இரண்டு சமூகங்களும் இல்லையேல் இந்தப் பூமியின் மனித இனத்தின் இயக்கமே அவ்வளவு ஏன் இருப்பே இல்லாமல் போய்விடும். சரக்குகளில் தேவைகளுக்கு ஏற்ப அதிக மதிப்பளிக்கும் நாம், மனிதச் சமூகத்தின் நலனுக்கும் இயற்கைப் பாதுகாப்புக்கும் தவிர்க்கமுடியாமல் தேவைப்படும் இவர்களுக்கு மதிப்பளிக்கத் தவறிவிட்டோம்.

இந்தியாவில் மட்டுமே 227 இனங்களைச் சேர்ந்த 6 கோடியே 80 லட்சம் பழங்குடிகள் வாழ்கிறார்கள். அனைவரும் பல்வேறு வகையான காடுகளைச் சார்ந்து வாழ்ந்தவர்கள். அவற்றோடும் அவற்றில் வாழ்ந்த உயிர்களோடும் இசைவோடு வாழ்ந்து இன்புற்றிருந்தவர்கள். அவர்களை அப்படியே இன்புற்றிருக்க விடாமல் துரத்திக்கொண்டிருக்கிறோம்.

இந்தியா. 45,000 வகைத் தாவரங்களைப் பெற்ற நாடு. அதில் 9,500 நிலவியல் முக்கியத்துவம் வாய்ந்த தாவரங்கள். 7,500 மருத்துவ முக்கியத்துவம் வாய்ந்தவை. 3,900 வகைகள் பழங்குடி மக்களின் உணவு மற்றும் வாழ்வியலில் பங்கு வகித்தவை. 700 வகையான தாவரங்கள் அம்மக்களின் கலாசார முக்கியத்துவம் வாய்ந்தவை. அதோடு நார்ப் பொருள்களுக்கும் நார்ச்சத்துக்கும் உதவும் 525 வகைகளும், விலங்குகளுக்குத் தீவனங்களாகப் பயன்படும் 400 வகைகளும், வேதிமத் தயாரிப்பில் பயன்படும் 300 வகைகளும், இயற்கை உரங்களுக்கு உதவும் 300 வகைகளும், பசைகள், பிசின்கள், நறுமணத் தைலங்கள் போன்றவற்றைக் கொடுக்கும் 300 வகைத் தாவரங்களும் அடக்கம். அவர்களின் இடத்தில் மட்டுமே காணக்கூடிய தாவரங்களை மரங்களைத் தெய்வங்களாக வழிபட்டார்கள். அதன்மூலம் அதைப் பாதுகாத்தார்கள். நம் மொழியில் சொல்ல வேண்டுமென்றால் உலகிலேயே குறிப்பிட்ட பகுதியில் மட்டுமே பார்க்கக்கூடிய எண்டெமிக் உயிரினங்கள் மற்றும் தாவரங்கள். இந்த அனைத்து விவரங்களையும் முழுமையாக நமக்குக் கொடுத்தவர்கள் பழங்குடிகள். அவர்களோடு ஏற்பட்ட உறவே பல ஆராய்ச்சியாளர்களின் கண்டுபிடிப்புகளுக்கு உதவியது. இன்றளவும் அவர்களின் உதவியை நாடிச் செல்லும் ஆய்வாளர்கள் பலரும் உண்டு. இவ்வுலகின் அரும்பெரும் தாவரவியலாளர்களை உயிரியலாளர்களை நாம் இழந்துகொண்டிருக்கிறோம். அவர்களை அழிப்பது மட்டும் அழிவல்ல. அவர்களின் கலாசாரத்தை அதன்மூலம் அவர்களின் அறிவுப் புதையல்களை அழிப்பதும் இன அழிப்புதான். ஓர் இனத்தை அழிக்க வேண்டுமென்றால் அதன் மொழியில் உள்ள புத்தகங்களை அழிக்கவேண்டும். ஹிட்லரும், இலங்கையும் அதையே செய்தன. இவர்களின் நூலகம் இந்தக் காடுகளே. அதைவிட்டுத் துரத்துவதும் அவர்களை அழிப்பதும் ஒன்றுதான்.

`சுற்றுச்சூழல் பாதுகாப்பு', `பல்லுயிர்ச் சூழல் மற்றும் உயிரினங்கள் பாதுகாப்பு' போன்றவற்றை நாம் இப்போது பேசிக் கொண்டிருக்கிறோம். ஆண்டாண்டு காலமாக அதைச் செயலில் காட்டிக் கொண்டிருந்தவர்கள் பழங்குடிகள். அவர்கள் சூழலின் செறிவையும் வளத்தையும் பாதுகாக்கப் பல நுட்பமான முயற்சிகளைச் செய்தவர்கள். அதீத வேட்டையைத் தடுக்கவும், பல்லுயிர்ச்சூழலைப் பாதுகாக்கவும் அவர்களிடம் பல அனுபவபூர்வமான திட்டங்கள் உள்ளன. நாம் அதை ஏற்றுக்கொள்ளத் தவறிவிட்டோம். காரணம், நாம் அவர்களைவிட அறிவிலும் நாகரிகத்திலும் உயர்ந்தவர்கள் என்ற ஆணவம். ஆங்கிலேயர்களிடமிருந்து தொற்றிக்கொண்ட கர்வம். நாம் ஒவ்வொருவருமே அந்தக் கர்வத்தையும் ஆணவத்தையும் தூக்கியெறிந்து அவர்களிடம் சென்று அறிவுப்பிச்சைக் கேட்டு நிற்கவேண்டியவர்கள்.

``ஒரு மரத்தின் மொழியைப் புரிந்துகொள்ளும் திறன்வாய்ந்த பழங்குடிகளைவிட, தேவைக்குமேல் எடுக்கக் கூடாது என்ற பக்குவமுடைய பூர்வகுடிகளைவிட நாம் எந்த வகையில் அறிவார்ந்த சமூகமானோம்? தன்னோடு வாழும் மனிதனற்ற ஒவ்வோர் உயிரையும் மதித்து வாழப் பழகிய அவர்களைவிட நாம் எந்த வகையில் நாகரிகமடைந்தவர்கள்?"

Photo Courtesy: Survival International

நாம் `காடு' என்று எதைச் சொல்கிறோமோ அதைத்தான் பல்லாயிரம் ஆண்டுகளாக அவர்கள் ஊராக, கிராமங்களாகப் பார்க்கிறார்கள். அடர்ந்த மரங்களையும் சில பாம்புகளையும், பறவைகளையும் பார்த்துவிட்டாலே அதைக் காடென்று சொல்லும் அற்பமான நமக்கு அவர்கள் காட்டுவாசிகள்தான். இயற்கைக்குச் செல்லப்பிள்ளைகளும் அந்தக் காட்டுவாசிகள்தான். அதையும் மறந்துவிடாதீர்கள். உலகின் அடர்ந்த காடுகளாக நாம் பார்க்கும் அமேசான், செரெங்கெட்டி, நம் நாட்டின் மேற்குத்தொடர்ச்சி மலை போன்றவற்றில்கூட ஆயிரக்கணக்கான பூர்வகுடிக் கிராமங்கள் இருந்தன. அவர்கள் அந்தக் காட்டை அதில் வாழ்ந்த உயிர்களைப் பல்லாயிரம் ஆண்டுகளாக, பல தலைமுறைகளாகப் பாதுகாத்து வந்தார்கள். இன்று அவர்களுடைய சந்ததிகளுக்குக் காடு அந்நியமாகிக் கொண்டிருக்கிறது. அதற்குக் காரணம், முன்னேற்றம் என்ற பெயரில் அவர்கள் காட்டைவிட்டு வெளியேற்றப் படுவதுதான். இன்னும் ஒருபடி மேலே போய் சட்டரீதியாகவே பல இடங்களில் அவர்களை வெளியேற்றுகிறார்கள். அதற்கு அரசு சொல்லும் காரணம் வனப்பாதுகாப்பு. தாம் வாழும் காட்டைப் பற்றிய மொத்தத் தரவுகளையும் தன்னுள் வைத்திருக்கும் அந்தப் பொக்கிஷங்களை விடவா உங்களால் காட்டைச் செழுமையாகப் பார்த்துக்கொள்ள முடியும்?

உலகம் முழுவதுமுள்ள முப்பது கோடி பழங்குடிகளில் பாதிப்பேர் ஆசியாவில்தான் வாழ்கிறார்கள். மத்திய மற்றும் தென்னமெரிக்காவில் மூன்று கோடி மக்கள் வாழ்கிறார்கள். அதுபோக ஆப்பிரிக்கா, ஆஸ்திரேலியா, ஐரோப்பா, நியூசிலாந்து போன்றவற்றில் பலர் வாழ்கிறார்கள். அவர்களில் கிட்டத்தட்ட அனைவருமே இதுபோன்ற இடப்பெயர்வுகளுக்கு ஆளாகிறார்கள். இல்லை தம் வீடுகளிலிருந்து தூக்கி வீசப்படுகிறார்கள். பணம் கொடுத்துவிட்டு ரகசியமாக வேட்டையாடிச் செல்பவர்கள் இருந்து கொண்டேயிருக்க, இவர்களில் பலரும் வேட்டை போன்ற குற்றச்சாட்டுகள் சுமத்தப்பட்டுக் குற்றவாளிகள் ஆக்கப்படுகிறார்கள். எதிர்த்துப் போராடுபவர்கள் தடியடிக்கும், சித்ரவதைகளுக்கும் ஆளாகிறார்கள். பலரும் கொல்லப்படுகிறார்கள். ஜார்கண்டில் கொல்லப்பட்ட அமித் டோப்னோ, கனடாவில் கொல்லப்பட்ட அந்நாட்டின் பழங்குடிச் சமூகத்தைச் சேர்ந்த கிரிஸ்டினா கில்டி என்று அந்தப் பட்டியல் நீண்டுகொண்டே போகும்.

கேமரூனில் பாக்கா என்ற பழங்குடிகள் காட்டுக்குள் சென்றனர். உலகக் காட்டுயிர்கள் பாதுகாப்பு அமைப்பைச் (WWF) சேர்ந்த வேட்டைத்தடுப்புக் காவலர்கள் துன்புறுத்தி மிரட்டி இனி அங்கு வரவே கூடாதென்று அனுப்பி வைத்தனர். இந்தியாவில் புலிகள் சரணாலயங்கள் என்பதற்காகப் பழங்குடிக் கிராமங்களைக் காலிசெய்து ஊருக்குள் அனுப்பினார்கள். அதேசமயம், சூழலியல் சுற்றுலா என்ற பெயரில் ஊர் மக்களிடம் காசு வாங்கிக்கொண்டு காட்டுக்குள் அனுப்பிக் கொண்டிருக்கிறார்கள். நாம் என்னதான் செய்து கொண்டிருக்கிறோம்? புலிகள் சரணாலயங்களாக, பாதுகாக்கப்பட்ட மண்டலங்களாக இவை மாற்றப்பட்டது சமீபத்தில்தான். பல நூறு ஆண்டுகளாக அங்கு புலிகள்ஆயிரக்கணக்கில் இருந்தன. அப்போதெல்லாம் அந்த மக்கள் அங்குதானே வாழ்ந்தார்கள்! இயற்கையின் வழியில் நாம் செல்வதில்லை. அவளை அவளின் பிள்ளைகளை நம் வழிக்கு இழுத்துக் கொண்டிருக்கிறோம். இதுதான் நாம் செய்யும் பாதுகாப்பு நடவடிக்கைகளா!

உலகளவில் வாழும் பூர்வகுடி மக்கள் கொஞ்சம் கொஞ்சமாகத் தங்கள் வாழ்வியலைவிட்டு காட்டைவிட்டு வெளியேறிக் கொண்டிருக்கின்றனர். அவர்களின் வாழ்வு காட்டுக்கும் அதன் பாதுகாப்புக்கும் விரோதமாக மாறிக் கொண்டிருக்கிறது. அடர்த்தியான பல்லுயிர்ச்சூழல் மிகுந்த காடுகளைப் பாதுகாத்து வாழ்ந்த மக்களை அதற்கு எதிராகவே வாழவைத்துக் கொண்டிருக்கிறோம். இதுதான் நம் சுற்றுச்சூழல் பாதுகாப்பு முறை. ஒரு நாட்டில்கூடப் பழங்குடிகள் நிம்மதியாக வாழவில்லை. அதுதான் நிதர்சனம். அதை நாம் ஏற்றுக் கொள்ளத்தான் வேண்டும். அந்தக் குற்றங்களுக்குக் காரணமும் நாம்தான். அவர்களுக்கு எதிராக நடக்கும் கொடுமைகளை எதிர்த்துக் கேள்வி கேட்காத நாம்தான் குற்றவாளிகள். 

Photo Courtesy: Superchilum

ஜனநாயகத்தின் முக்கியமான கடமை அதிகாரிகளிடமோ அரசுகளிடமோ இல்லை. அது மக்களிடம் உள்ளது. அரசை, அரசு நிர்வாகத்தை எதிர்த்துக் கேள்வி கேட்கும் உரிமை. அதைச் செய்யத் தவறியதே இந்தக் குற்றங்களுக்குக் காரணம். எனில் குற்றவாளிகள் நாமே.

சுற்றுச்சூழல் பாதுகாப்பில், வனப் பாதுகாப்பு மற்றும் மேலாண்மையில் நிபுணர்களான பழங்குடிகளிடம் நன்றியுணர்வோடு நடந்துகொள்ள மறுத்துவிட்டோம். எனில் நாம்தான் குற்றவாளிகள்.

நீங்கள் அவர்களின் நிலத்தைக் கேட்கிறீர்கள். அது வெறும் நிலமாக, காடாகத் தானே தெரிகிறது! ஆனால், அவர்களைப் பொறுத்தவரை அதுதான் அவர்களின் அம்மா. அங்கு வாழும் அனைத்துமே அவளுக்குப் பிறந்தவைதாம். அந்த அனைத்தையுமே காக்கும் பொறுப்பு அவளின் மூத்த பிள்ளைகளான அவர்களுடையதே என்று நினைப்பவர்கள். நீங்கள் அவர்களின் நிலத்தைக் கேட்கிறீர்கள். அம்மாவிடம் இருந்து பிரிந்துவிடுமாறு பிள்ளைகளிடம் கேட்கிறீர்கள். எதற்காக? அம்மாவாக நினைக்கும் அந்த நிலத்தை வைத்துச் சுற்றுலா, தொழிற்சாலைகள் போன்றவற்றால் காசுபார்க்க நினைக்கிறீர்கள். அவர்களின் அம்மாவை வைத்துக் காசு பார்க்க நினைக்கிறீர்கள். அதை அவர்கள் அருவருப்பாகத்தான் பார்ப்பார்கள். அதை எதிர்த்துப் போராடத்தான் செய்வார்கள். நன்றியுள்ள எந்த மனிதனும் அந்தப் போராட்டத்தை ஆதரிக்கவும் உடன் நிற்கவுமே செய்வான்.