Published:Updated:

கடலில் சேரும் 650 கோடி கிலோ பிளாஸ்டிக் கழிவுகள்! - ஆய்வில் அதிர்ச்சி தகவல்

கடலில் சேரும் 650 கோடி கிலோ பிளாஸ்டிக் கழிவுகள்! - ஆய்வில் அதிர்ச்சி தகவல்
கடலில் சேரும் 650 கோடி கிலோ பிளாஸ்டிக் கழிவுகள்! - ஆய்வில் அதிர்ச்சி தகவல்

லகின் மிகப்பெரிய ரசாயனக் குப்பைத் தொட்டியாக மாறிவருகிறது கடல்.  பூமியில் வீசினால், 'அங்கே கொட்டாதே, இங்கே கொட்டாதே' என்று பிரச்னை வருகிறது. அதனால், அழிக்க முடியாத குப்பைகளை எல்லா நாடுகளும் சத்தமின்றி கடலில் வீசி வருகின்றன. அதிலும் ஒவ்வோர் ஆண்டும் 650 கோடி கிலோ பிளாஸ்டிக் கடலில் கொட்டப்படுகிறது என்பது அதிர்ச்சியான ஓர் உண்மை.

இப்படி உலகெங்கும் வீசப்படும் பிளாஸ்டிக் குப்பைகள், கலிஃபோர்னியா பகுதிக்கு மேற்கேயும்  ஹவாய் தீவுகளின் வடக்கேயும் பசிபிக் பெருங்கடலில் கடலில் மிதந்து கிடக்கின்றன. இதை, பசிபிக் கழிவு மண்டலம் என்றே அழைக்கிறார்கள். இதன் மொத்தப் பரப்பளவு, சுமார் 14 லட்சம் சதுர கிலோமீட்டர்கள் என்கிறார்கள். அதாவது, அமெரிக்காவின் டெக்சாஸ் மாநிலத்தைப்போல இரண்டு மடங்கு அதிகம். கடல் மேற்பரப்பிலிருந்து 300 அடி ஆழத்துக்கு நிறைந்துள்ளது என்பதும் ஆபத்தான விஷயம். பிளாஸ்டிக் மட்டுமன்றி, கடலில் மிதக்கும் ரசாயன விஷங்களால் கடல்வாழ் உயிரினங்கள் மட்டுமல்லாமல், பூமிக்குப் பெரும் தீங்கை விளைவிக்கும் என்பதும் ஆய்வாளர்களின் கவலை.

'கடலில் உள்ள பிளாஸ்டிக் கழிவுகளால் மட்டுமே ஆண்டுக்கு 10 லட்சம் பறவைகள், ஒரு லட்சம் பாலூட்டிகள், எண்ணற்ற கடல் ஆமைகள் போன்றவை இறந்துபோகின்றன' என்று ஐ.நா. சபை கூறுகிறது. மேலும், 'கடல் உணவை உட்கொள்ளும் மனிதர்களுக்கும் புற்றுநோய் உள்ளிட்ட நோய்கள் பெருகுவதையும் இனி தடுக்க முடியாது' என்று ஆய்வுகள் கூறுகின்றன. பூமியில் வீசப்படும் கழிவுகளே பெரும் ஆபத்துகள் என்றால், கடல் கழிவுகள் அதனினும் ஆபத்து என எச்சரிக்கை மணி அடிக்கின்றனர் ஆய்வாளர்கள்.