Published:Updated:

உங்கள் போர்ட்ஃபோலியோவில் எத்தனை ஃபண்டுகள் இருக்கலாம்?

மியூச்சுவல் ஃபண்ட்
பிரீமியம் ஸ்டோரி
மியூச்சுவல் ஃபண்ட்

மியூச்சுவல் ஃபண்ட்

உங்கள் போர்ட்ஃபோலியோவில் எத்தனை ஃபண்டுகள் இருக்கலாம்?

மியூச்சுவல் ஃபண்ட்

Published:Updated:
மியூச்சுவல் ஃபண்ட்
பிரீமியம் ஸ்டோரி
மியூச்சுவல் ஃபண்ட்

மியூச்சுவல் ஃபண்ட் முதலீட்டாளர்கள், நிதி ஆலோசகர்களிடம் அடிக்கடி கேட்கும் கேள்வி, “மியூச்சுவல் ஃபண்ட் முதலீட்டுக் கலவையில் அதிகபட்சம் எத்தனை ஃபண்டுகள் வைத்துகொள்ளலாம்” என்பதாக இருக்கிறது. மியூச்சுவல் ஃபண்ட் முதலீட் டாளர்கள் பிரபல ஃபண்டுகள், அதிக நட்சத்திரக் குறியீடு கொண்ட ஃபண்டுகள், புதிய ஃபண்டுகள் என அவ்வப்போது பல ஃபண்டுகளில் முதலீடு செய்வது மூலம் தங்களின் முதலீட்டுக் கலவையில் ஃபண்ட் திட்டங்களின் எண்ணிக்கையை அதிகரித்து வருகிறார்கள். இது தவிர, நண்பர்கள் முதலீடு செய்திருக்கும் ஃபண்ட், அலுவலகத்தில் உடன் பணிபுரிபவர் முதலீடு செய்திருக்கும் ஃபண்ட் என ஃபண்டுகளின் எண்ணிக்கையை அதிகரித்துக்கொண்டே இருக்கிறார்கள்.

ஹசன் அலி 
ஆலோசகர், 
Siptiger.com
ஹசன் அலி ஆலோசகர், Siptiger.com

இப்படியே அவர்களின் மியூச்சுவல் ஃபண்ட் முதலீட்டுக் கலவையில் 25, 30 ஃபண்டுகள் சேர்ந்துவிடுகிறது. ஒரு சிலர் 40, 50 ஃபண்டுகளில் கூட முதலீடு செய்திருப்பதைப் பார்க்க முடிகிறது. ஒரு நிலையில், இந்த அதிக எண்ணிக்கையிலான ஃபண்டுகளின் வருமான செயல்பாட்டைக் கவனிக்க முடியாமல் போய் விடுகிறது. சில நேரங்களில் எதிர்பார்த்த வருமானம் கிடைப்பதில்லை. இதனால், இழப்பில் இருக்கும் ஃபண்டுகளை விற்று, நஷ்டம் அடைகிறார்கள். இதைத் தவிர்க்க மியூச்சுவல் ஃபண்ட் முதலீட்டுக் கலவையில் நிர்வகிக்க முடிகிற அளவுக்கு சரியான எண்ணிக்கையில் வைத்திருப்பது மிக முக்கியம்.

பல நேரங்களில் அதிக ஃபண்டுகள் போர்ட் ஃபோலியோவில் இருப்பதால், கூடுதல் லாபம் எதுவும் இருக்காது. மேலும், முதலீட்டுக் கலவையின் ரிஸ்க்கையும் குறைக்காது. உதாரணமாக, ஒருவர் நான்கைந்து ஸ்மால் கேப் ஃபண்டுகளில் முதலீடு செய்திருக்கிறார். இந்த அனைத்து ஸ்மால்கேப் ஃபண்டுகளிலும் இடம்பெற்றிருக்கும் பங்குகள் கிட்டத்தட்ட 75% ஒரேமாதிரிதான் இருக்கும். இந்த நிலையில் ரிஸ்க் என்பது குறையாது.

ஃபண்டுகள் பராமரிப்பு

பல மியூச்சுவல் ஃபண்டுகளில் முதலீடு செய்வதால், ஏகப்பட்ட ஃபோலியோ கணக்கு களுக்கு ஏகப்பட்ட ஸ்டேட்மென்ட்டுகள் இருக்கும். இவற்றைக் குறித்து வைத்து பராமரிப்பதே பெரிய விஷயமாக இருக்கும். அப்படிப்பட்ட நிலையில், டீமேட் கணக்கு ஆரம்பித்து, அனைத்து ஃபண்டுகளையும் அதற்கு மாற்றிவிட்டால், ஒரே இடத்தில் அனைத்து ஃபண்டுகளின் முதலீட்டு விவரமும் வந்து சேர்ந்துவிடும். அப்போது அவற்றின் வருமான செயல்பாட்டைக் கவனிப்பதும் சுலபமாக இருக்கும். பொதுவாக, முதலீட்டுக் கலவையை லாபகரமாக வைத்திருக்க குறைவான எண்ணிக்கை யிலான ஃபண்டுகளே போதும். இலக்கு தொகையை அடைய, செல்வத்தை உருவாக்க, தொகுப்பு நிதியை அடைய சரியான எண்ணிக்கையில் ஃபண்டு களில் முதலீடு செய்தால் போதும்.

துறை சார்ந்த ஃபண்டுகள் தவிர, அனைத்து பங்குச் சந்தை சார்ந்த ஃபண்டுகள், கடன் ஃபண்டுகள், ஹைபிரிட் ஃபண்டுகள் அனைத்துமே கிட்டத்தட்ட நன்றாகப் பரவ லாக்கப்பட்ட முதலீட்டுக் கலவையைத்தான் (Well-diversified portfolio) கொண்டிருக்கின்றன.

எத்தனை ஃபண்டுகளில் முதலீடு செய்யலாம்?

ஒருவரின் மியூச்சுவல் ஃபண்ட் முதலீட்டுக் கலவையில் முதலீட்டுக் காலம் மற்றும் தேவையின் அடிப்படையில் கடன் ஃபண்ட், ஹைபிரிட் ஃபண்ட், ஈக்விட்டி ஃபண்ட், கோல்டு ஃபண்ட் மற்றும் வரி சேமிப்பை வழங்கும் இ.எல்.எஸ்.எஸ் ஃபண்டுகளில் முதலீடு செய்யலாம். ஒருவரின் முதலீட்டுத் தொகைக்கேற்ப 5 முதல் 10 மியூச்சுவல் ஃபண்ட் திட்டங்களில் முதலீடு செய்தால் போதும்.

குறுகிய காலத் தேவைக்கு கடன் ஃபண்டுகள், நடுத்தரக் கால தேவைக்கு ஹைபிரிட் ஃபண்டுகள், நீண்ட காலத் தேவைக்கு ஈக்விட்டி ஃபண்டுகள், வரி சேமிப்புக்கு இ.எல்.எஸ்.எஸ் ஃபண்டுகள் எனப் பிரித்து முதலீடு செய்யலாம்.

உங்கள் போர்ட்ஃபோலியோவில் 
எத்தனை ஃபண்டுகள் இருக்கலாம்?

ஒரே பிரிவில் அதிக ஃபண்டுகள் வேண்டாம்...

ஒருவரின் முதலீட்டுக் கலவையில் அதிக ஃபண்டுகள் இருந்தால் அவற்றை எப்படிக் குறைப்பது?

செபி அமைப்பு மியூச்சுவல் ஃபண்ட் திட்டங்களை முதலீட்டாளர்களிடமிருந்து திரட்டப்படும் நிதி முதலீடு செய்யப்படுவதன் அடிப்படையில் பல வகையாக பிரித் துள்ளது. உதாரணமாக, இந்தியப் பங்குச் சந்தைகளில் (என்.எஸ்.இ மற்றும் பி.எஸ்.இ) பங்குச் சந்தையின் அடிப்படையில் முதல் 100 நிறுவனப் பங்குகளில் தேர்ந் தெடுத்த பங்குகளில் முதலீடு செய்வது லார்ஜ்கேப் ஃபண்ட் ஆகும். சிலரின் மியூச்சுவல் ஃபண்ட் போர்ட்ஃபோலியோவில் ஆறு அல்லது ஏழு லார்ஜ்கேப் ஃபண்டுகள் இருக்கும். இந்த ஃபண்டுகள் கிட்டத்தட்ட ஒரேமாதிரிதான் வருமானம் தரும்.

மேலும், ரிஸ்க் நிலையும் ஒரேமாதிரிதான் இருக்கும். இந்த நிலையில், மிகவும் நன்றாகச் செயல்படக்கூடிய இரண்டு லார்ஜ்கேப் ஃபண்டுகளை மட்டும் வைத்துக்கொண்டு மீதியை விற்றுப் பணமாக்கி, அந்த இரண்டு ஃபண்டுகளில் முதலீடு செய்துவிடலாம். இதேபோல், மிட்கேப் மற்றும் ஸ்மால்கேப் ஃபண்டுகளிலும் செய்யலாம்.

சிலர் கோல்டு சேவிங்ஸ் ஃபண்ட், கோல்டு இ.டி.எஃப் களில் நான்கைந்து திட்டங்களில் முதலீடு செய்து வருகிறார்கள். தங்கம் சார்ந்த ஃபண்டுகள் என்கிறபோது, அதன் வருமானம் தங்கத்தைச் சார்ந்துதான் இருக்கும் என்பதால், காகிதத் தங்கம் சார்ந்த ஒரு கோல்டு சேவிங்ஸ் ஃபண்ட் அல்லது ஒரே ஒரு இ.டி.எஃப் திட்டத்தில் முதலீடு செய்தால் போதும்.

தொடர்ந்து சிறப்பாகச் செயல்படாத ஃபண்டுகளை நீக்கிவிடலாம்...

கடன் ஃபண்டுகளில் 5-6%, ஹைபிரிட் ஃபண்டுகளில் 7-8%, ஹைபிரிட் ஃபண்டுகளில் 9-10%, ஈக்விட்டி ஃபண்டுகளில் 11-12 சதவிகிதத்துக்கும் குறைவாக தொடர்ந்து வருமானம் தந்து வரும் ஃபண்டுகளை நமது முதலீட்டுக் கலவையிலிருந்து வெளியேற்றிவிடலாம்.

மேலும், ஒருவர் முதலீடு செய் திருக்கும் ஃபண்ட் தொடர்ந்து அதன் ஃபண்ட் பிரிவின் சராசரி வருமானம் மற்றும் அதன் பெஞ்ச்மார்க் வருமானத்தை விடக் குறைவாக லாபம் கொடுத்தாலும் அதிலிருந்து வெளியேறி, ஃபண்ட் சராசரி மற்றும் பெஞ்ச்மார்க்கைவிட அதிக வருமானம் தரும் ஃபண்டு களுக்கு முதலீட்டை மாற்றி விடலாம்.

இப்படிச் செய்யும்போது குறுகிய கால வருமானச் செயல் பாடுகளின் அடிப்படையில் முதலீட்டு முடிவை எடுக்கக் கூடாது. கடன் ஃபண்டுகள் எனில், குறைந்தது 6 முதல் 12 மாதங்கள் வரையும், ஹைபிரிட் ஃபண்ட் எனில், 12 முதல் 18 மாதங்கள் வரையும், ஈக்விட்டி ஃபண்டுகள் எனில், 18 முதல் 24 மாதங்களுக்கு மேலும் சரியாகச் செயல்படவில்லை எனில், அந்த ஃபண்டுகளின் யூனிட்டுகளை விற்றுவிட்டு வெளியேறுவது பற்றி யோசிக்கலாம்.

மேலும், கடன் சந்தை மற்றும் பங்குச் சந்தையின் போக்கை அனுசரிந்து இந்த முடிவை எடுப்பது அவசியம். நல்ல ஈக்விட்டி ஃபண்ட் என்கிறபோது பங்குச் சந்தை விழும்போது, அதைவிடக் குறைவாக வீழ்ச்சி காணும்; சந்தை ஏறும்போது அதைவிட வேகமாக ஏற்றம் காணும்.

துறை சார்ந்த ஃபண்டுகளில் கவனம்...

சிலர், ஒரு குறிப்பிட்ட துறை சார்ந்த ஃபண்டுகள் நன்றாக வருமானம் கொடுத்து வருவதைப் பார்த்து, அந்தப் பிரிவில் உள்ள பல ஃபண்டுகளில் அதிக முதலீடு செய்கிறார்கள். துறை சார்ந்த பார்மா, ஐ.டி ஃபண்டுகளில் முதலீடு செய்யும்போதும் இப்படி ஓரிரு ஃபண்டுகளில் மட்டும் முதலீடு செய்தால் போதும். அதுவும் மொத்த முதலீட்டுத் தொகையில் சுமார் 15 - 20 சத விகிதத்துக்கு மேல் செல்லாமல் பார்த்துக்கொள்வது நல்லது.

புதிய ஃபண்ட் வெளியீடு...

நம்மில் பலருக்கு முகமதிப்பு ரூ.10-ல் யூனிட் கிடைக்கிறது என்ப தற்காகவும் முதலீட்டு ஆலோசகர் சொல்கிறார் என்பதற்காகவும் கவர்ச்சிகரமான விளம்பரத்தாலும் புதிய ஃபண்டுகளில் தொடர்ந்து முதலீடு செய்து வருகிறார்கள். இதைத் தவறு என்று சொல்ல முடியாது. ஆனால், இந்தப் புதிய ஃபண்ட் இதுவரைக்கும் இல்லாத புதிய கருத்தின் அடிப்படையில் வருகிறது எனில், அதில் முதலீடு செய்யலாம். உதாரணமாக, அண்மையில் வெள்ளியில் முதலீடு செய்யும் சில்வர் சேவிங்ஸ் ஃபண்ட் (ஃபண்ட் ஆஃப் ஃபண்ட்), சில்வர் இ.டி.எஃப் வந்திருக்கிறது. அதன் என்.எஃப்.ஓவில் முதலீடு செய்வதில் தவறு இல்லை.

உங்களிடம் ஏற்கெனவே இரண்டு லார்ஜ்கேப் ஃபண்ட் முதலீடு இருக்கும் நிலையில், புதிதாக வேறு ஒரு மியூச்சுவல் ஃபண்ட் நிறுவனம் லார்ஜ் கேப் ஃபண்ட் பிரிவில் புதிய ஃபண்டை கொண்டு வருகிறது என்பதற்காக அதில் முதலீடு செய்ய வேண்டும் என்கிற அவசியம் இல்லை.

தேவையில்லாத ஃபண்டுகளை போர்ட்ஃபோலியோவில் இருந்து வெளியேற்றும்போது வெளியேறும் கட்டணம் இருக்கிறதா, குறுகிய கால மூலதன ஆதாயம் அதிகமாக கட்ட வேண்டியிருக்குமா என்பதையெல்லாம் கவனித்து நிதானமாக அந்த முடிவை எடுப்பது அவசியம்.

ஒருவர், ஒரு பிரிவுக்கு வேறுபட்ட போர்ட்ஃபோலியோவை கொண்ட இரண்டு ஃபண்டுகள் வீதம் கடன் ஃபண்டுகள், ஹைபிரிட் ஃபண்டுகள், ஈக்விட்டி ஃபண்டுகள், செக்டார் ஃபண்டுகள், வேல்யூ ஃபண்டுகள், இ.எல்.எஸ்.எஸ் ஃபண்டுகள் என ஒருவர் 10 - 12 ஃபண்டுகளில் முதலீடு செய்யலாம். அதுவும் ஒரு ஃபண்டில் மாத எஸ்.ஐ.பி முதலீடு 5,000 ரூபாயைத் தாண்டும் போதுதான். முதலீட்டுத் தொகை குறைவாக இருந்தால் ஃபண்டுகளின் எண்ணிக்கையையும் குறைத்துக்கொள்ளலாம்.

மியூச்சுவல் ஃபண்ட் முதலீட்டுக் கலவையில் ஃபண்டு களின் எண்ணிக்கையைக் குறைத்து நல்ல லாபம் ஈட்ட, தேவைப்பட்டால் நிதி ஆலோசகரின் உதவியை நாடலாம். அதிக எண்ணிக்கையிலான ஃபண்ட் திட்டங்கள் வைத்திருந்தால் அதிக லாபம் சம்பாதிக்கலாம் என்கிற கருத்தை உடனே மாற்றிக்கொள்வது அவசியம்!

முதலீட்டுக் காலம்: எந்த ஃபண்டுகளில் முதலீடு செய்யலாம்?

கடன் ஃபண்டுகள் என்கிறபோது அவசரகால நிதியை லிக்விட் ஃபண்டில் முதலீடு செய்து வைக்கலாம். குறுகிய காலத் தேவைக்கு கடன் ஃபண்டுகளில் கார்ப்பரேட் பாண்ட் ஃபண்ட், பி.எஸ்.யூ பேங்கிங் & பி.எஸ்.யூ ஃபண்டுகளில் முதலீடு செய்யலாம். ஹைபிரிட் ஃபண்ட் என்கிறபோது பேலன்ஸ்டு அட்வான்டேஜ் ஃபண்டுகளில் முதலீடு செய்வது நல்லது. நடுத்தரக் காலத் தேவைக்கு இந்த ஃபண்ட் உதவும். நீண்ட காலத் தேவைக்கு 5, 10 ஆண்டுகளுக்கான இலக்குகளுக்கு ஃப்ளெக்ஸிகேப் ஃபண்ட், லார்ஜ்கேப் ஃபண்டுகளையும் 15, 20 ஆண்டுகள் என்கிறபோது மிட்கேப் ஃபண்டுகளையும் கவனிக்கலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism