Published:Updated:

தங்கப் பத்திர முதலீடு... முதிர்வுத் தொகையைப் பெறுவது எப்படி? நிபுணரின் பதில்

கேள்வி - பதில் Q & A

பிரீமியம் ஸ்டோரி

கமலாவதி, திருவாரூர்

தங்கப் பத்திர (கோல்டு பாண்ட்) முதலீட்டில் முதிர்வுத் தொகையை எப்படித் தருவார்கள்?

ஷியாம் சுந்தர், கமாடிட்டி நிபுணர்

“முதிர்வுத் தேதிக்கு ஒரு மாதத்துக்கு முன்பாகவே தங்கப் பத்திரங்களின் முதிர்வு பற்றி முதலீட்டாளருக்குத் தகவல் தெரிவிக்கப்படும். முதிர்வுத் தேதியில், ஏற்கெனவே முதலீட்டாள ரால் கொடுக்கப்பட்டுள்ள வங்கிக் கணக்குகளில் முழுத் தொகைகளையும் வரவு வைத்துவிடுவார்கள்.

இடைப்பட்ட காலத்தில், முதலீட்டாளர் வங்கிக் கணக்குகள் மற்றும் மின்னஞ்சல்களை மாற்றி இருந்தால், எங்கு தங்கப் பத்திரங்களை விண்ணப்பித்திருந்தோமோ அங்கு அதற்கான ஆதாரங்களை உடனடி யாகச் சமர்ப்பித்து மாற்றிக்கொள்ள வேண்டும்.”

ஷியாம் சுந்தர், ஸ்ரீகாந்த் மீனாட்சி, வி.எஸ்.சரண்சுந்தர், வி.தியாகராஜன், அசோகன் ஆர்.ராஜா
ஷியாம் சுந்தர், ஸ்ரீகாந்த் மீனாட்சி, வி.எஸ்.சரண்சுந்தர், வி.தியாகராஜன், அசோகன் ஆர்.ராஜா

கே.அரவிந்தன், விழுப்புரம்

நான் வருமான வரியைச் சேமிக்க ரூ.1 லட்சம் ரூபாயை பங்குச் சந்தை சார்ந்த சேமிப்புத் திட்டமான இ.எல்.எஸ்.எஸ் ஃபண்டில் முதலீடு செய்ய விரும்புகிறேன். எனக்கேற்ற ஃபண்டுகளைக் குறிப்பிடவும். ஒரே நேரத்தில் முதலீடு செய்யலாமா, பிப்ரவரி, மார்ச் மாதங்களில் 10, 15 நாள் களுக்கு ஒருமுறை முதலீடு செய்யலாமா?

ஶ்ரீகாந்த் மீனாட்சி, இணை நிறுவனர், Primeinvestor.in

“வருமான வரிச் சுமையைக் குறைக்க வரிச் சேமிப்பு ஃபண்டுகளில் முதலீடு செய்வது சிறந்த வழி. நீங்கள் மிரே அஸெட் டாக்ஸ் சேவர் ஃபண்ட் மற்றும் ஆக்ஸிஸ் லாங்க் டேர்ம் ஈக்விட்டி ஃபண்டுகளில் முதலீடு செய்யலாம். உங்கள் முதலீட்டை இரண்டாகப் (சம பாதி) பிரித்து, பிப்ரவரி மாதம் ஒரு ஃபண்டிலும், மார்ச் மாதம் ஒரு ஃபண்டிலும் முதலீடு செய்வது சரியாக இருக்கும்.”

கே.ராமதாஸ், இ-மெயில் மூலம்

பங்குச் சந்தை முதலீட்டின் மூலம் ஏற்படும் இழப்பை நமது வருமானத்தில் எத்தனை வருடங்களுக்கு ஈடுகட்ட முடியும். வருமானத்துக்கு அதிகமாக இழப்பு இருந்தால் என்ன செய்வது? அப்போதும் வரிக் கணக்கு தாக்கல் செய்ய வேண்டுமா?

வி.எஸ்.சரண்சுந்தர், ஆடிட்டர்

“பங்குகளில் செய்யப்பட்ட நீண்டகால முதலீட்டில் (பங்கு வர்த்தக வணிகம் தவிர) விற்று இழப்பு ஏற்பட்டால், வரிக் கணக்கு தாக்கல் செய்யப்பட வேண்டும். அப்போதுதான், அந்த இழப்பை, அடுத்த எட்டு ஆண்டுகளுக்கு எடுத்துச் சென்று ஈடு கட்ட முடியும். இந்த இழப்பை நிறுவனப் பங்குகள் அல்லது பிற சொத்துகள் மூலம் கிடைக்கும் நீண்டகால மூலதன ஆதாயத்தில் ஈடுகட்டி வருமானத்துக்கு வரிக் கட்டுவதைத் தவிர்க்கலாம்.

பங்குகளில் செய்யப்பட்ட முதலீட்டில் 12 மாதங் களுக்குள் இழப்பு (குறுகியகால மூலதன இழப்பு) ஏற்பட்டாலும் வரிக் கணக்கு தாக்கல் செய்யப்பட வேண்டும். அப்போதுதான், அந்த இழப்பை அடுத்த எட்டு ஆண்டுகளுக்கு எடுத்துச் சென்று ஈடு கட்ட முடியும். இந்த இழப்பை நிறுவனப் பங்குகள் அல்லது பிற சொத்துகள் மூலம் கிடைக்கும் குறுகிய காலம் மற்றும் நீண்டகால மூலதன ஆதாயத்தில் ஈடுகட்டி வருமானத்துக்கு வரிக் கட்டுவதைத் தவிர்க்கலாம்.”

கலியமூர்த்தி, கோவை

நான் முதல் ஆண்டு பொறியியல் மாணவன். கல்விக் கடன் வாங்க உள்ளேன். படிப்பு முடிந்ததும் இதை எப்போது முதல் செலுத்தத் தொடங்க வேண்டும் என்பதை விளக்கிச் சொல்ல முடியுமா?

வி.தியாகராஜன், ஆடிட்டர்

“கல்விக் கடன் என்பது இந்தியா மற்றும் வெளிநாடுகளில் கல்வி சார்ந்த எந்த மேற்படிப்புக்கும் வழங்கப்படுவதாகும். இந்தக் கடன் தொகை கல்வி கட்டணத்தைப் பொறுத்து நிர்ணயிக்கப்படுகிறது. பொதுவாக, ரூ.4 லட்சம் வரை எந்தவித உத்தரவாதம் மற்றும் அடமானம் இல்லாமல் இந்தக் கல்விக் கடன் வங்கிகளில் கொடுக்கப்படுகிறது.

ரூ.7.5 லட்சம் வரை உத்தரவாதத்துடன் கொடுக்கப்படுகிறது. அதற்கும் மேற்பட்ட தொகை சொத்து அடமானம் பெறப்பட்டு கொடுக்கப் படுகிறது. இந்தக் கல்விக் கடன் எந்தெந்த வங்கிகளில், என்னென்ன விதிமுறைகளுடன், என்ன வட்டி சதவிகிதத்துக்கு கொடுக்கிறார்கள் என்பன போன்ற விவரங்களை அறிய மத்திய கல்வித் துறை நடத்தும் www.vidyalakhsmi.co.in என்ற வலைத்தளம் முகவரிக்குச் சென்று அறிந்து கொள்ளலாம்.

மேலும், இந்த வலைதளத்தின் மூலம் மூன்று வங்கிகளில் கல்விக் கடன் பெற விண்ணப்பிக்கலாம். பொதுவாக, இந்தக் கல்விக்கடன் 10 ஆண்டுகள் வரை வழங்கப்படுகிறது. கடன் தொகை பெரிதாக இருக்குமானால் 15 ஆண்டுகள் வரையும் வழங்கப் படுகிறது.

கல்விக் காலம் முடியும் வரையிலும், கல்விக் காலம் முடிந்து ஆறு மாதங்கள் அல்லது ஒரு வருடம் வரையிலும் இந்தக் கடனைத் திருப்பிச் செலுத்துவதில் விடுமுறை (Holiday Period) அளிக்கப் படுகிறது.

இந்த விடுமுறைக் காலத்தில் கல்விக்கடனுக்கான வட்டி மட்டும் கணக்கிடப்பட்டு அது அந்தக் கடன் தொகையுடன் சேர்க்கப்பட்டுவிடும். கல்விக் காலம் முடிந்து ஆறு மாதங்கள் அல்லது ஒரு வருடத்துக்குப் பிறகு, இந்தக் கடன் தொகையை வட்டியுடன் சேர்த்து செலுத்த வேண்டியதிருக்கும்.”

சிலம்பரசன் சிவக்குமார் இ-மெயில் மூலம்

நான் தேங்காய் ஏற்றுமதி செய்ய விருப்பமாக உள்ளேன். அதற்கு அடிப்படை தகுதி என்ன வேண்டும்?

அசோகன் ஆர்.ராஜா, முன்னாள் துணை டைரக்டர் ஜெனரல், ஃபியோ (FIEO)

“தேங்காய் பற்றி நன்றாக அறிந்திருப்பது நல்லது. தேர்ந்த கொள்முதல் திறன் தேவை. பொதுவாக ஏற்றுமதி செய்வதற்கு முழுவதும் உறிக்கப்படாத (Semi Husked) நன்கு முதிர்ந்த பிரவுன் நிறமுள்ள 13 இன்ச்சுக்கு மேல் விட்டமும் 500 கிராம் முதல் 650 கிராம் வரை எடை கொண்ட தேங்காய் விரும்பப்படுகிறது. இதை 25 எண்ணிக்கை கொண்ட மூட்டைகளாக ஒரு கன்டயனரில் சுமார் 1,800 மூட்டை வரை ஏற்றுமதி செய்யலாம்.”

கேள்விகளை அனுப்புபவர்கள் தங்கள் செல்போன் எண்ணையும் குறிப்பிடவும்.

அனுப்ப வேண்டிய முகவரி: கேள்வி-பதில் பகுதி, நாணயம் விகடன், 757, அண்ணாசாலை, சென்னை-2. navdesk@vikatan.com

பிட்ஸ்

ருத்துவத் துறைக்கு மத்திய அரசாங்கம் 2015-16-ம் ஆண்டில் ரூ.33,121 கோடியை ஒதுக்கியது; ஆனால், 21-22-ம் ஆண்டு பட்ஜெட்டில் ரூ.71,269 கோடி ஒதுக்கப்பட்டு உள்ளது!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு