Published:Updated:

வரிச் சலுகை + லாபம்... ஒரே கல்லில் 2 மாம்பழம் தரும் இ.எல்.எஸ்.எஸ்..!

இ.எல்.எஸ்.எஸ்
பிரீமியம் ஸ்டோரி
News
இ.எல்.எஸ்.எஸ்

FAQ - அடிக்கடி கேட்கப்படும் கேள்விகள்...

என்.விஜயகுமார், நிதி ஆலோசகர், Vbuildwealth.com

வரிச் சேமிப்பு மியூச்சுவல் ஃபண்ட் என்பது சுருக்கமாக இ.எல்.எஸ்.எஸ் (E.L.S.S - ஈக்விட்டி லிங்க்டு சேவிங்க்ஸ் ஸ்கீம்) எனப்படுகிறது. இதுபற்றி அடிக்கடி கேட்கப்படும் கேள்விகளின் தொகுப்பு இது.

என்.விஜயகுமார்
 நிதி ஆலோசகர், 
Vbuildwealth.com
என்.விஜயகுமார் நிதி ஆலோசகர், Vbuildwealth.com

இ.எல்.எஸ்.எஸ் ஃபண்டில் முதலீடு செய்வதன் மூலம் எப்படி வரிச் சேமிக்கப்படும்?

‘‘இந்திய வருமான வரிச் சட்டம் 1961-ன் பிரிவு 80சி-யின்கீழ், ஒரு நிதி ஆண்டில் (ஏப்ரல் 1 முதல் மார்ச் 31 வரை) இ.எல்.எஸ்.எஸ் ஃபண்ட் மூலம் செய்யப்படும் முதலீட்டுக்கு நிபந்தனைக்கு உட்பட்டு ரூ.1.5 லட்சம் வரை வரிவிலக்கு கிடைக்கும். அதாவது, இ.எல்.எஸ்.எஸ் திட்டத்தில் ஒரு முதலீட்டாளர் ரூ.1,50,000 முதலீடு செய்திருந்தால், அந்தத் தொகை அவரின் மொத்த வரிக்குரிய வருமானத்தில் இருந்து கழிக்கப்பட்டு, அவரின் வரிச்சுமை குறைக்கப்படும்.”

ஏதாவது முக்கிய நிபந்தனை இருக்கிறதா?

‘‘இந்தத் திட்டத்தில், யூனிட்டுகள் ஒதுக்கப்பட்ட தேதியிலிருந்து மூன்று வருடங்கள் லாக்-இன் கால கட்டத்தைக் கொண்டிருக்கும். லாக்-இன் காலகட்டம் முடிந்த பிறகுதான், யூனிட்டுகளைப் பணமாக்க முடியும்.”

இந்த வரிச் சலுகை யாருக்கு எல்லாம் கிடைக்கும்?

‘‘தனிநபர்கள், இந்துக் கூட்டுக் குடும்பத்தினருக்குக் கிடைக்கும்.’’

இ.எல்.எஸ்.எஸ் ஃபண்டில் வெளிநாட்டு வாழ் இந்தியர்கள் (என்.ஆர்.ஐ-கள்) முதலீடு செய்தால் அவர்களுக்கு வரிச் சலுகை கிடைக்குமா?

‘‘அவர்களுக்கு இந்தியாவில் வருமானம் இருந்து அதற்கு வரிக் கணக்குத் தாக்கல் செய்யும்பட்சத்தில் வரிச் சலுகை கிடைக்கும்.’’

இ.எல்.எஸ்.எஸ்
இ.எல்.எஸ்.எஸ்

இந்த ஃபண்டில் ரூ.1.5 லட்சம் முதலீடு செய்தால் முழுத் தொகைக்கும் வரிச் சலுகை கிடைக்குமா?

“கிடைக்காது. காரணம், 80சி பிரிவில் சுமார் 15-க்கும் மேற்பட்ட திட்டங்களில் செய்யப்படும் முதலீடு களுக்கு வரிச் சலுகை அளிக்கப் படுகிறது. இவை எல்லாம் சேர்ந்து அதிகபட்சம் ரூ.1.5 லட்சத்துக்குதான் வரிச் சலுகை அளிக்கப்படும். உதாரணத்துக்கு, ஒருவர் ஒரு நிதி ஆண்டில் பிராவிடன்ட் ஃபண்ட் கணக்கில் ரூ.60,000 செலுத்துகிறார்; ஆயுள் காப்பீடு பாலிசிக்கு ரூ.20,000 பிரீமியம் செலுத்தி வருகிறார் என்று வைத்துக்கொள்வோம். இந்த நிலையில், அவர் இ.எல்.எஸ்.எஸ் ஃபண்டில் நிதி ஆண்டில் ரூ.1.5 லட்சம் முதலீடு செய்தாலும் அவருக்கு ரூ.70,000-க்குதான் வரிச் சலுகை கிடைக்கும்.”

லாக்இன் காலம் மூன்றாண்டுகள் முடிந்ததும், இ.எல்.எஸ்.எஸ் ஃபண்டிலிருந்து பணத்தை வெளியே எடுத்துவிட வேண்டுமா?

‘‘அப்படி எடுக்கத் தேவையில்லை. நல்ல லாபத்தில் இருக்கும்பட்சத்தில் உங்களுக்குப் பணத் தேவை இருக்கிறது என்றால் மட்டுமே மூன்றாண்டுகள் கழித்ததும் யூனிட்டுகளை விற்றுப் பணமாக்க வேண்டும். அப்படி இல்லை என்றால், இந்த முதலீட்டை நீங்கள் எத்தனை ஆண்டுகளுக்கு மேலாகவும் வைத்துக் கொள்ளவும். இந்த ஃபண்டின் வருமானம் பங்குச் சந்தையுடன் நேரடித் தொடர்பைக் கொண்டிருப்ப தால், யூனிட்டுகளைப் பணமாக்கும் போது, சந்தையின் சூழலைக் கவனித்துச் செயல்படவும்.’’

மூன்றாண்டு லாக்இன் முடிந்ததும் இந்த ஃபண்டின் யூனிட்டுகளை வேறு திட்டங்களுக்கு மாற்ற (ஸ்விட்ச்) முடியுமா?

“முதலீட்டைத் தாராளமாக அதே மியூச்சுவல் ஃபண்ட் நிறுவனத்தின் வேறு திட்டங்களுக்கு மாற்றிக்கொள்ள முடியும்.”

இந்த ஃபண்டில் வருமானம் எப்படி கிடைக்கும்?

‘‘குரோத் மற்றும் டிவிடெண்ட் என்கிற இரண்டு ஆப்ஷன்கள் இருக்கின்றன. குரோத் என்பது ஃபண்டின் வளர்ச்சியைக் குறிக்கும். டிவிடெண்ட் என்பது லாபத்தைப் பிரித்துக் கொடுப்பதாகும். ஒரு காலத்தில் டிவிடெண்ட்டுக்கு வரி எதுவும் இல்லை என்பதால், அந்த ஆப்ஷனை அனைவரும் தேர்வு செய்தார்கள். பிறகு, டிவிடெண்ட் விநியோக வரி வந்தது. இப்போது டிவிடெண்ட் வருமானத்துக்கு முதலீட்டாளர் எந்த வருமான வரி வரம்பில் (5%, 20%, 30%) வருகிறாரோ, அதற்கேற்ப வரி கட்ட வேண்டும். எனவே, டிவிடெண்ட் ஆப்ஷனைத் தவிர்ப்பது நல்லது.”

குறைந்தபட்ச முதலீடு எவ்வளவு?

‘‘மொத்த முதலீடு மற்றும் சிஸ்ட மேட்டிக் இன்வெஸ்ட்மென்ட் பிளான் (SIP) முறையில் முதலீடு செய்ய ரூ.500 ஆகும்.”

டைரக்ட் பிளான், ரெகுலர் பிளான் இரண்டு முறையிலும் இ.எல்.எஸ்.எஸ் ஃபண்டில் முதலீடு செய்ய முடியுமா?

‘‘டைரக்ட் பிளான் என்பது முதலீட்டாளர் நேரடியாக மியூச்சுவல் ஃபண்ட் நிறுவனத்தின் கிளை அல்லது மியூச்சுவல் ஃபண்ட் நிறுவனத்தின் இணையதளம் அல்லது மியூச்சுவல் ஃபண்ட் முதலீட்டு வசதியை ஏற்படுத்திக் கொடுத்திருக்கும் நிறுவனங்கள் மூலம் செய்வதாகும். ரெகுலர் பிளான் என்பது மியூச்சுவல் ஃபண்ட் ஏஜென்ட் மூலம் முதலீடு செய்வதாகும். டைரக்ட் பிளானில் ஏஜென்ட் கமிஷன் கிடையாது என்பதால் வருமானத்தில் சுமார் 0.5-1.5% அதிகமாகக் கிடைக்க வாய்ப்புண்டு.’’

எல்லா இ.எல்.எஸ்.எஸ் ஃபண்டுகளும் ஒரே மாதிரியான ரிஸ்க் இருக்குமா, ஒரே மாதிரியான வருமானம் கொடுக்குமா?

‘‘இல்லை. காரணம், ஒவ்வொரு ஃபண்டும் வெவ்வேறான நிறுவனப் பங்குகளில் முதலீடு செய்திருக்கும். அவை கொடுக்கும் வருமானத்துக்கேற்ப ஃபண்டின் வருமானம் இருக்கும்.’’

வரிச் சலுகை தேவை என்றால் மட்டுமே இ.எல்.எஸ்.எஸ் ஃபண்டில் முதலீடு செய்ய வேண்டுமா?

‘‘அப்படி இல்லை. அடிப்படையில் இது பல்வேறு துறைகளைச் சார்ந்த பல நிறுவனப் பங்குகளில் முதலீட்டைப் பிரித்து மேற்கொள்ளும் டைவர்சிஃபைட் ஃபண்ட் ஆகும். முதலீட்டை மூன்று ஆண்டுகள் எடுக்க முடியாமல் இருக்கும் என்பதால், இடைப்பட்டக் காலத்தில் பங்குச் சந்தை இறக்கம் கண்டால் யூனிட்டுகளை விற்றுவிட்டு வெளியேவர முடியாது.

இ.எல்.எஸ்.எஸ் ஃபண்டில் இடையே அதிகமாக முதலீட்டை வெளியே எடுப்பது இருக்காது என்பதால், நல்ல வருமானம் ஈட்ட வாய்ப்புள்ளது. அந்த வகையில், ஈக்விட்டி மியூச்சுவல் ஃபண்டுகளில் புதிதாக முதலீடு செய்பவர்கள் இ.எல்.எஸ்.எஸ். ஃபண்டுகளில் முதலீட்டை ஆரம்பிக்கலாம்.’’

இதர வரிச் சேமிப்பு திட்டங்களைவிட இ.எல்.எஸ்.எஸ் ஃபண்ட் எந்த வகையில் சிறப்பானது?

‘‘இருக்கிற வரிச் சேமிப்பு திட்டங்களிலேயே குறைவான, மூன்றாண்டு லாக்-இன் பிரீமியம் கொண்ட முதலீட்டுத் திட்டம் இதுவாகும். அடுத்து இதர வரிச் சேமிப்புத் திட்டங்களைவிட நீண்டகாலத்தில் அதிக வருமானத்தைக் கொடுக்கக் கூடியது. கடந்த மூன்றாண்டு காலத்தில் சராசரியாக 10% வருமானத்தைத் தந்திருக்கிறது. இதுவே ஐந்தாண்டுகளில் 16%, பத்தாண்டுகளில் 14% வருமானம் கொடுத்திருக்கிறது.

முன்னணி வரிச் சேமிப்புத் திட்டங்களான பி.எஃப் (5 ஆண்டு லாக்-இன் – ஆண்டுக்கு 8.5% வட்டி வருமானம்), பி.பி.எஃப் (15 ஆண்டுகள், 7.10%), தேசிய சேமிப்புச் சான்றிதழ் (5 ஆண்டு, 6.8%) ஆகியவற்றுடன் ஒப்பிடும் போது, இ.எல்.எஸ்.எஸ் ஃபண்ட் சிறப்பானதாக இருக்கிறது. ஆனால், கடந்தகால வருமானம் எதிர்காலத்திலும் கிடைக்கும் என்பதற்கு எந்த உத்தரவாதமும் கிடையாது.”

இந்த ஃபண்டில் நீண்டகால மூலதன ஆதாயத்துக்கு எப்படி வருமான வரி கட்ட வேண்டும்?

‘‘லாக்இன் பிரீயட் முடிந்து யூனிட்டுகளை விற்றுப் பணமாக் கும்போது நிபந்தனைக்கு உட்பட்டு, மூலதன ஆதாயத்தில் ரூ.1 லட்சத்துக்கு வரி கிடையாது. அதற்கு மேலான ஆதாயத்துக்கு 10% வரி கட்ட வேண்டும்.

இதை ஓர் உதாரணம் மூலம் பார்த்தால், எளிதில் விளங்கும். ஒருவர் மொத்தமாக ரூ.1.5 லட்சத்தை இ.எல்.எஸ்.எஸ் ஃபண்ட் ஒன்றில் முதலீடு செய்திருக்கிறார். இது மூன்று ஆண்டுகளில் ரூ.3 லட்சமாக அதிகரிக்கிறது எனில், நீண்ட கால மூலதன ஆதாயம் ரூ.1.5 லட்சம். இதில் ரூ.1 லட்சத்துக்கு வரி கிடையாது. மீதியுள்ள ரூ.50,000-க்கு 10% வரி என்றால், ரூ.5,000 வரி கட்ட வேண்டும். அதாவது, ரூ.1.5 லட்சம் லாபத்துக்கு சுமார் ரூ.5,000 வரி கட்டினால் போதும்.”

ரூ.1.5 லட்சம் இந்த ஃபண்டில் முதலீடு செய்தால் ஒருவருக்கு எவ்வளவு வரி மிச்சமாகும்?

‘‘ரூ.1.5 லட்சத்தை ஒருவர் அவரின் மொத்த வருமானத் திலிருந்து கழித்துக்கொள்வது மூலம் வரிச்சுமை குறையும். அடுத்து ஒருவர் எந்த வருமான வரி வரம்பில் வருகிறார் என்பதைப் பொறுத்து வரி மிச்சமாகும். உதாரணத்துக்கு, ஒருவர் 30% வரி வரம்பில் (கல்வி மற்றும் ஆரோக்கியத் தீர்வை 4% சேர்த்து 31.2%) வந்தால், ரூ.46,800 மிச்சமாகும். இதுவே 5.2% வரி வரம்பு என்றால், ரூ.7,800, 20.8% வரி வரம்பு என்றால் ரூ.31,200 வரி மிச்சமாகும். இந்தக் கணக்கு நிதி ஆண்டில் 80சி பிரிவில் வேறு எந்த வரிச் சலுகை திட்டத்திலும் முதலீடு செய்யவில்லை; இ.எல்.எஸ்.எஸ் ஃபண்டில் மட்டுமே ரூ.1.5 லட்சம் முதலீடு செய்து வரிச் சலுகை பெறும் பட்சத்தில்தான்.’’

ரிஸ்க்கோ மீட்டர்படி இ.எல்.எஸ்.எஸ் ஃபண்டின் ரிஸ்க் அளவு எவ்வளவு?

‘‘டாக்ஸ் சேவர் ஃபண்டின் ரிஸ்க் அளவு என்பது புதிய ரிஸ்க்கோ மீட்டர் படி, மிக அதிக ரிஸ்க் (Very High) கொண்டதாக உள்ளது. இதற்கு முந்தைய ரிஸ்க்கோ மீட்டரில் நடுத்தர அளவு அதிகம் (Moderately high) என்பதாக இருந்தது.’’

எதன் அடிப்படையில் ஒரு இ.எல்.எஸ்.எஸ் ஃபண்டைத் தேர்வு செய்ய வேண்டும்?

‘‘பொதுவாக, ஃபண்டின் கடந்தகால வரலாறு (குறைந்தது 5, 10 ஆண்டுகள்), செலவு விகிதம். ஃபண்ட் மேனேஜரின் திறமை ஆகியவற்றைப் பார்க்க வேண்டும். மேலும், இதை நீண்டகால முதலீடாகப் பார்க்க வேண்டும். குறைந்தது 5, 10 ஆண்டுகளுக்கு முதலீட்டைத் தொடர்ந் தால் நல்ல லாபம் கிடைக்க வாய்ப் பிருக்கிறது.’’

இந்த ஃபண்டில் வரிச் சேமிப்புக்காக முதலீடு செய்துவரும் ஒருவர் லாக்இன் காலம் மூன்றாண்டு களுக்கு முன்னால் இறந்துவிட்டால், இந்த ஃபண்டில் உள்ள பணம் நாமினி / வாரிசு களுக்கு எப்படிக் கிடைக்கும்?

‘‘முதலீட்டாளர் இறக்கும்பட்சத்தில் முதலீட்டை ஆரம்பித்த ஓராண்டுக்குப் பிறகு நாமினி/வாரிசுகள் தகுந்த ஆவணங்களைச் சமர்பித்து பணத்தைப் பெற்றுக்கொள்ள முடியும்.”

மிக முக்கிய சிறப்பு அம்சம் என்ன?

‘‘இந்த ஃபண்ட் வருமான வரியை மிச்சப்படுத்துவதோடு, நீண்டகாலத்தில் முதலீட்டாளர்களுக்கு செல்வத்தை உருவாக்கி கொடுப்பதாக இருக்கிறது.’’

பிட்ஸ்

ன்லைன் கல்வி நிறுவனமான பைஜூ, தனது போட்டி நிறுவனமான டாப்பர் டெக்னாலஜீஸ் நிறுவனத்தை 150 மில்லியன் டாலர் தந்து வாங்கி இருக்கிறது. பைஜுவின் சந்தை மதிப்பு 11 பில்லியன் டாலரை எட்டி இருக்கிறது!