Published:Updated:

மியூச்சுவல் ஃபண்ட் முதலீடு... சரியான திட்டங்களைத் தேர்வு செய்வது எப்படி?

சேமிப்பும் முதலீடும்
பிரீமியம் ஸ்டோரி
சேமிப்பும் முதலீடும்

சேமிப்பும் முதலீடும் - 23

மியூச்சுவல் ஃபண்ட் முதலீடு... சரியான திட்டங்களைத் தேர்வு செய்வது எப்படி?

சேமிப்பும் முதலீடும் - 23

Published:Updated:
சேமிப்பும் முதலீடும்
பிரீமியம் ஸ்டோரி
சேமிப்பும் முதலீடும்

இந்தியாவில் சுமார் 45 மியூச்சுவல் ஃபண்ட் நிறு வனங்கள் உள்ளன. ஒவ்வொரு மியூச்சுவல் ஃபண்ட் நிறுவனமும் நூற்றுக்கணக்கான திட்டங்களைக் கொண்டிருக்கின்றன. இவை எல்லாம் சேர்ந்தால் ஏகப்பட்ட திட்டங்கள் இருக்கின்றன. இவற்றில் தனக்குத் தேவையான திட்டத்தை எப்படித் தேர்வு செய்வது என முதலீட்டாளர் ஒருவருக்கு சந்தேகம், குழப்பம் ஏற்படுவது இயற்கையாகும்.

சிவகாசி மணிகண்டன் 
நிதி ஆலோசகர், 
Aismoney.com
சிவகாசி மணிகண்டன் நிதி ஆலோசகர், Aismoney.com

மியூச்சுவல் ஃபண்டில் மொத்த முதலீடோ, சிஸ்டமேட்டிக் இன்வெஸ்மென்ட் பிளான் முறையோ எதுவாக இருந்தாலும் சரியான ஃபண்டுகளைத் தேர்வு செய்வது மிக முக்கியம். அந்த வேலையைச் சரியாகச் செய்துவிட்டால் போதும், நிதி இலக்குகள் எல்லாம் சுலபமாக நிறைவேறிவிடும்.

நட்சத்திரக் குறியீடுகள், ஃபண்டுகளின் கடந்த கால செயல்பாடுகளின் அடிப்படையில் முதலீட்டுக்கு ஃபண்டுகளைத் தேர்வு செய்தாலும், தனிநபர்களின் முதலீட்டுக் காலம், ரிஸ்க் எடுக்கும் திறன், ஃபண்டுகளின் எதிர்காலச் செயல்பாடு, வருமான எதிர்பார்ப்பு போன்ற வற்றின் அடிப்படையில் தேர்வு செய்வதுதான் மிகச் சரியாக இருக்கும். அவை குறித்து விரிவாகப் பார்ப்போம்.

முதலீட்டுக் காலத்தின் அடிப்படையில் ஃபண்ட் தேர்வு..!

தனிநபர்களைப் பொறுத்தவரை, அவர்களின் ஒவ்வொரு நிதித் தேவைக்கும் எனக் குறிப்பிட்ட வகையான ஃபண்டுகள் இருக்கின்றன.

மூன்று முதல் ஆறு மாதத்துக்கு உட்பட்ட குறுகிய கால முதலீடு எனில், கடன் ஃபண்டில் ஒரு வகையான குறைவான ரிஸ்க் கொண்ட லிக்விட் ஃபண்டில் முதலீடு செய்துவரலாம். ஓராண்டுக்கு மேல் மூன்று ஆண்டுக்கு உட்பட்ட முதலீடு எனில், கடன் சந்தை சார்ந்த ஃபண்டு களில் முதலீடு செய்துவரலாம்.

மூன்று முதல் ஐந்து ஆண்டுக்கு உட்பட்ட முதலீட்டை நிறுவனப் பங்குகள் மற்றும் கடன் ஃபண்டுகளில் முதலீடு செய்யும் ஹைபிரிட் ஃபண்டுகளில் மேற்கொண்டு வரலாம்.

ஐந்து ஆண்டுகளுக்கு மேற்பட்ட முதலீட்டுக் காலம் என்கிறபோது, முழுக்க முழுக்க நிறுவனப் பங்குகளில் முதலீடு செய்யும் பங்குச் சந்தை சார்ந்த ஈக்விட்டி ஃபண்டுகளில் முதலீடு செய்து வரலாம்.

மியூச்சுவல் ஃபண்ட் முதலீடு... சரியான திட்டங்களைத் தேர்வு செய்வது எப்படி?

ரிஸ்க் எடுக்கும் திறன் அடிப்படையில்!

முதலீட்டாளரின் ரிஸ்க் எடுக்கும் திறனுக்கேற்ப திட்டங் களைத் தேர்வு செய்வது மிக அவசியமாகும்.

பிள்ளைகளின் உயர்கல்வி மற்றும் திருமணம் செலவுகள், சொந்த வீடு வாங்குதல், ஓய்வுக்கால முதலீடுகள் போன்ற வற்றுக்கு ஈக்விட்டி மியூச்சுவல் ஃபண்டுகளில் முதலீடு செய்துவரலாம். ஆனால், முதலீட்டாளர் அதிக ரிஸ்க் எடுக்கும் திறனைக் கொண்டிருப்பதுடன், முதலீட்டுக்கான கால வரம்பு குறைந்தபட்சம் 8 - 10 ஆண்டுகளுக்கு மேல் இருப்பது அவசியம்.

இவர்கள் மல்ட்டிகேப் ஃபண்ட், லார்ஜ்கேப், லார்ஜ் & மிட்கேப் ஃபண்ட், மிட் & ஸ்மால்கேப் ஃபண்டுகளில் முதலீடு செய்து வரலாம்.

ரிஸ்க் எடுக்கும் திறன் குறைவாகவும் முதலீட்டுக் காலம் குறைவாகவும் இருந்தால், கடன் சந்தை சார்ந்த ஃபண்டுகள் அல்லது கன்சர்வேட்டிவ் ஹைபிரிட் ஃபண்டுகளில் முதலீடு செய்துவருவது நல்லது. மேலே குறிப்பிட்ட நிதி இலக்குகளுக்கு நடுத்தர அளவு ரிஸ்க் எடுப்பவர்கள் எனில், அக்ரசிவ் ஹைபிரிட் ஃபண்ட், ஃபிளெக்ஸிகேப் ஃபண்ட், மல்ட்டிகேப் ஃபண்ட், லார்ஜ் கேப் ஃபண்ட் போன்ற ஃபண்ட் வகைகளை முதலீட்டுக்குக் கவனிக்கலாம்.

ஃபண்டின் செயல்பாட்டின் அடிப்படையில்..!

முதலீடு செய்ய தேர்ந் தெடுக்கும் ஃபண்டை நடத்தும் நிறுவனத்தின் நிர்வாகத்தின் திறமை மற்றும் நம்பிக்கை, ஃபண்டை நிர்வகிக்கும் ஃபண்ட் மேனேஜரின் திறமை, அந்த ஃபண்ட் கடந்த 5, 10 ஆண்டுகளில் எப்படி வருமானம் தந்திருக் கிறது போன்ற விஷயங்களைக் கவனிக்க வேண்டும். ஈக்விட்டி ஃபண்ட் எனில், பங்குச் சந்தையின் அதிக இறக்கத்தின் போது எப்படிச் செயல் பட்டுள்ளது என அலசி ஆராய வேண்டும். பொதுவாக, எந்த ஒரு ஈக்விட்டி ஃபண்ட் திடீர் ஏற்றத்தையோ, திடீர் வீழ்ச்சி யையோ சந்திக்காமல் இருக்கிறதோ அது சிறந்த ஃபண்ட் எனலாம். பொதுவாக, பங்குச் சந்தையின் இறக்கத்தைவிட குறைவாக இறங்கும் ஃபண்டுகள் நல்ல ஃபண்டுகளாகும்.

ஒரு ஃபண்ட் கடந்த காலத்தில் மிகச் சிறப்பாக வருமானம் தந்திருந்தாலும், எதிர்காலத்திலும் இதேபோன்ற வருமானத்தைக் கொடுக்குமா என்பதை ஆராய வேண்டும். அதற்கேற்ப ஃபண்டில் திரட்டப்பட்டிருக்கும் பணம் இப்போது எந்தெந்த நிறுவனப் பங்குகளில் முதலீடு செய்யப் பட்டிருக்கிறது என்பதைக் கவனிப்பது மிக அவசியம். ஒரு முதலீட்டாளரால் இதைச் செய்ய முடியவில்லை எனில், அவர் மியூச்சுவல் ஃபண்ட் விநியோ கஸ்தர் அல்லது நிதி ஆலோசகரின் உதவியை நாடலாம்.

வருமான செயல்பாடு அடிப்படையில்

மியூச்சுவல் ஃபண்ட் திட்டங் களில் முதலீடு செய்ய வரும் பலரும் ஒரு காலத்தில் ஆயுள் காப்பீடு எண்டோவ்மென்ட் பாலிசிகளை முதலீட்டுக்காக எடுத்தவர்கள் மற்றும் ஃபிக்ஸட் டெபாசிட் போட்டவர், வங்கி அல்லது தபால் அலுவலகம் போன்றவற்றில் தொடர் வைப்பு என்கிற ஆர்.டி திட்டத்தில் முதலீடு செய்து வந்தவர்களாக இருக்கிறார்கள். அவர்கள் அதிக ரிஸ்க் எடுக்க மாட்டார்கள். அது போன்றவர்கள் பணவீக்க விகிதத்தைவிட ஓரிரு சதவிகிதம் அதிக வருமானம் மற்றும் வருமான வரி அனுகூலத்தை எதிர்பார்ப்பார்கள். அது போன்றவர் களுக்கு கடன் ஃபண்டுகள் சரியானதாக இருக்கும். இதில் மூன்று ஆண்டுகளுக்கு மேல் முதலீடு செய்யும்போது ஃபிக்ஸட் டெபாசிட்டைவிட வரிக்கு பிந்தைய நிலையில் அதிக வருமானம் கிடைக்கும்.

ஓரளவுக்கு ரிஸ்க் எடுக்கத் தயராக இருப்பவர்கள் கன்சர்வேட்டிவ் ஹைபிரிட் ஃபண்டுகள் மற்றும் லார்ஜ்கேப் ஃபண்டுகளில் முதலீடு செய்துவரலாம். இந்த ஃபண்டுகளில் ரிஸ்க் மிக அதிகமாக இருக்காது.

மற்றபடி அதிக ரிஸ்க் எடுக்கத் தயாராக இருப்பவர்கள், அதிக வருமானம் எதிர்பார்ப்பவர்கள், முதலீட்டுக் காலம் சுமார் 10 ஆண்டுகளுக்கு மேல் இருக்கும்பட்சத்தில் மிட்கேப், ஸ்மால்கேப் ஃபண்டுகளைத் தேர்வு செய்யலாம்.

ஒரு மியூச்சுவல் ஃபண்ட் திட்டத்தில் முதலீடு செய்வதோடு, முதலீட்டாளரின் வேலை முடிந்துவிடுவதில்லை. குறைந்தது ஓராண்டுக்கு ஒரு முறையாவது ஃபண்டின் செயல்பாட்டைக் கவனிப்பது கட்டாயமாகும்.

(முதலீடு செய்வோம்)

முதலீட்டாளர்களின் தனிப்பட்ட விவரங்களில் மாறுதல் செய்வது எப்படி?

மியூச்சுவல் ஃபண்ட் நிறுவனம் சார்பாக முதலீட்டாளர்களுக்கு சேவை அளிக்கும், மூன்றாம் தரப்பு நிறுவனங்கள் பதிவாளர் மற்றும் பரிமாற்ற முகவர்கள் (Registrar & Transfer Agents - R&TAs) ஆகும். இவர்களின் மூலம் முதலீட்டாளரின் வங்கி மாற்றம், முகவரி மாற்றம், பெயர் மாற்றம், நாமினி மாற்றம், முதலீடு செய்தல், பணம் எடுத்தல், பரிமாற்ற அறிக்கைகள் பெறுதல், விண்ணப்பப் படிவங்கள் பெறுதல் போன்ற பல்வேறு சேவைகளைப் பெற முடியும். இந்தச் சேவைகளுக்கு கட்டணம் எதுவும் செலுத்தத் தேவையில்லை

செபியின் விதிமுறைபடி, மியூச்சுவல் ஃபண்ட் நிறுவனங்கள், ஆர்.டி.ஏ-யை சொந்தமாக வைத்துக்கொள்ளலாம் அல்லது வேறு ஒரு நிறுவனத்துக்கு அந்தப் பணியைக் கொடுக்கலாம். சுந்தரம் மியூச்சுவல் ஃபண்ட், டாயிச் மியூச்சுவல் ஃபண்ட் ஆகிய மியூச்சுவல் ஃபண்டுகள் சொந்தமாக ஆர்.டி.ஏ-களைக் கொண்டிருக்கின்றன. பிற மியூச்சுவல் ஃபண்ட் நிறுவனங்கள் கம்ப்யூட்டர் ஏஜ் மேனேஜ்மென்ட் சர்வீசஸ் (கேம்ஸ்), கே ஃபின் டெக் போன்ற நிறுவனங்களில் ஆர்.டி.ஏ பணியைக் கொடுத்திருக்கின்றன.

மியூச்சுவல் ஃபண்ட் பிரச்னை... எப்படி சரி செய்வது?

மியூச்சுவல் ஃபண்ட் முதலீடு தொடர்பான பிரச்னைகளை சிலர் உடனடியாக செபி அமைப்புக்கு அனுப்பிவிடுகிறார்கள். அது தவறான செயல் ஆகும்.

முதலில் தொடர்புடைய மியூச்சுவல் ஃபண்ட் நிறுவனத்தின் கிளை அலுவலகத்தில் புகார் கொடுக்க வேண்டும். பிரச்னைக்குத் தீர்வு கிடைக்கவில்லை என்றால், அந்த நிறுவனத்தின் உயர் அதிகாரிக்கு புகார் செய்ய வேண்டும். அவரிடமிருந்தும் திருப்திகரமான தீர்வு கிடைக்கவில்லை என்றால் மியூச்சுவல் ஃபண்ட் முதலீட்டாளர்கள் செபி அமைப்பிடம் புகார் தெரிவிக்க வேண்டும்.

செபி அமைப்பின் முதலீட்டாளர் குறை தீர்ப்பு அமைப்பு ஸ்கோர்ஸ் (SCORES) எனப்படுகிறது. SCORES என்பதன் விரிவாக்கம் Sebi COmplaints REdress System ஆகும்.

https://scores.gov.in/scores/userRegistration.html இந்த இணையதள முகவரிக்குச் சென்று முதலீட்டாளர் தன்னை பற்றிய விவரங்களைப் பதிவு செய்து புகாரை பதிவு செய்யலாம். அந்த இணையதளத்திலேயே புகாரின் நிலையைப் பற்றியும் தெரிந்துகொள்ளலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism