Published:Updated:

`46,000 தனித் தமிழ்ப் பெயர்கள் கொண்ட நூல்!' - சிகாகோ தமிழாராய்ச்சி மாநாட்டில் வெளியீடு

சிகாகோவில் நடைபெறும் பெட்னா மாநாட்டில் தமிழியக்கம் பதிப்பித்த தமிழ்ப் பெயர்களின் நூலை தமிழ்வளர்ச்சித்துறை அமைச்சர் மாஃபா பாண்டியராஜன் வெளியிட்டார்.

புத்தக வெளியீட்டு விழா
புத்தக வெளியீட்டு விழா

பத்தாவது உலகத் தமிழாராய்ச்சி மாநாடு, அமெரிக்கத் தமிழ்ச்சங்கப் பேரவையின் 32-வது தமிழ்விழா மற்றும் சிகாகோ தமிழ்ச் சங்கத்தின் வெள்ளிவிழா ஆகியவை, அமெரிக்காவின் சிகாகோ நகரில் நடந்துவருகிறது. நான்கு நாள்கள் நடைபெறும் நிகழ்ச்சியின் இரண்டாம் நாளான இன்று, தமிழியக்கத்தின் தலைவர் கோ.விசுவநாதன் உருவாகியுள்ள "சூட்டி மகிழ்வோம் தூய தமிழ்ப்பெயர்கள்" என்ற நூல் வெளியிடப்பட்டது.

சூட்டி மகிழ்வோம் தூய தமிழ்ப் பெயர்கள்
சூட்டி மகிழ்வோம் தூய தமிழ்ப் பெயர்கள்

46,000 தனித் தமிழ்ப் பெயர்களைக் கொண்ட இந்த நூலை தமிழ் வளர்ச்சித்துறை மற்றும் தொல்லியல்துறை அமைச்சர் பாண்டியராஜன் வெளியிட, முதல் பிரதியை வட அமெரிக்கத் தமிழ்ச்சங்கப் பேரவை (பெட்னா) தலைவர் சுந்தர் குப்புசாமி, நாடாளுமன்ற உறுப்பினர் சு.வெங்கடேசன், தொழிலதிபர் பால் பாண்டியன், ஹார்வார்டு தமிழ் இருக்கை மருத்துவர் சு. சம்பந்தம், வி.ஐ.டி துணைத்தலைவர் கோ.வி.செல்வம், செய்தி வாசிப்பாளர் நிர்மலா பெரியசாமி, எழுத்தாளர் லேனா தமிழ்வாணன் மற்றும் முன்னாள் சட்டமன்ற உறுப்பினர் விடியல் சேகர் உள்ளிட்டோர் பெற்றுக்கொண்டனர்.

விழாவில் பேசிய தமிழியக்கத்தின் தலைவர் டாக்டர் கோ.விசுவநாதன், ``இன்றைய இளம் பெற்றோர்கள், தங்கள் பிள்ளைகளுக்கு தமிழில் பெயர் சூட்டுவதைவிட பிற மொழிப் பெயர்களை அதிகம் பயன்படுத்துகிறார்கள் என்பது மிகவும் கவலையளிக்கும் செயலாகும். ஒருவரது பெயர் என்பது அந்த மனிதனின் பொருள்பொதிந்த அவரது தனித்துவமான அடையாளமாகும். பிறமொழியில் பொருளற்ற பெயர்களை வைப்பது அடையாளத்தைத் தொலைத்து நிற்கும் நிலையை ஏற்படுத்துகிறது. இந்த அவலத்தைப் போக்க இந்நூல் பெரிதும் உதவும்" என்று குறிப்பிட்டார்.

சூட்டி மகிழ்வோம் தூய தமிழ்ப் பெயர்கள்
சூட்டி மகிழ்வோம் தூய தமிழ்ப் பெயர்கள்

விழாவில் பேசிய நூலின் தொகுப்பாளர் ச.பார்த்தசாரதி, ``ஒரு தனி மனிதனின் அல்லது ஒரு இனத்தின் வரலாறு, அவர்களின் பெயரிலிருந்து தொடங்குகிறது. உலகின் வேறு எந்த இனமும் தனக்கு சிறிதும் தொடர்பில்லாத, பொருள் தெரியாத ஒரு சொல்லை தன் பெயராக வைப்பதில்லை. கடந்த 15, 20 ஆண்டுகளில் நிகழ்ந்த இந்த அவலம், இளம் பெற்றோர்களை நாகரிகம் என்ற பெயரில் வாயில் நுழையாத, பொருளற்ற, பிறமொழிப் பெயர்களை வைக்கும் நிலை உள்ளது. சங்க இலக்கியங்களிலிருந்தும், நம் பண்பாட்டை எடுத்தியம்பும் ஒரு நல்ல தமிழ்ப் பெயரை நம் பிள்ளைகளுக்கு சூட்ட இந்த நூல் பெரிதும் பயனளிக்கும். திருக்குறள் போன்று ஒவ்வொரு தமிழர் வீடுகளிலும் , தமிழ் நூலகங்களிலும் இருக்கவேண்டிய நூல் இது'' என்று குறிப்பிட்டார்.