எண்களால் ஆனவள்... கவிதை

சுங்கச்சாவடியில் பணிபுரியும் பெண்

வாகன எண்களால் நிரம்பிவழிகிறாள்

எங்கேயோ பார்த்த நினைவில்

பெயரை விசாரித்தேன்

TN 09 VA 5437 என்று

கண்சுருக்கி

நாக்கைக் கடித்துக்கொள்கிறாள்

கீழே விழுந்த

கைக்குட்டையை எடுத்து உதறுகிறாள்

அதிலிருந்தும் உதிர்கின்றன

சில வாகன எண்கள்

தனக்கு முன்னால் கணினித்திரையில்

ஒரு வாகன எண்ணைச் சரிபார்த்தபடி

தண்ணீர் குடிக்கிறாள்

அவள் உண்ணுவதும்கூட

எண்ணும் எழுத்தும்தான்போல

மார்பில் பச்சைகுத்தப்பட்ட எண்களை

அழிக்க நினைத்தபோது

ரத்தம் கசிய

கனவுகளிலிருந்து

அவள் திடுக்கிட்டு எழுந்த இரவுகள்

அச்சமூட்டுபவை

நின்று நின்று நகர்வது

அவளா வாகனமா

தெரியாத ஒரு தோற்றப்பிழை

எரியும் சிவப்புவிளக்குக்கும்

பச்சைவிளக்குக்கும் இடையில்

எல்லாமும் தற்செயலாக நடக்கிறது

பணிநேரம் முடிந்து

அவள் கூண்டுக்குள்ளிருந்து

வெளிவருகிறாள்

இன்னும் பதியப்படாத

ஒரு எண் பலகையாக.