சின்ன எஸ்யுவி அதிக மைலேஜ்! | Honda BR-V - First Drive - Motor Vikatan | மோட்டார் விகடன்

சின்ன எஸ்யுவி அதிக மைலேஜ்!

ஃபர்ஸ்ட் டிரைவ் / ஹோண்டா BR-V தொகுப்பு : ர.ராஜா ராமமூர்த்தி

காம்பேக்ட் எஸ்யுவி செக்மென்ட்டில் ஹாட் எஸ்யுவியாகக் களமிறங்கியுள்ளது ஹோண்டா BR-V. சிக்கலான செக்மென்ட் இது. விலை, டிஸைன், வசதிகள் என சிறந்த பேக்கேஜ் கொண்ட காரே ஜெயிக்கும். இங்கே BR-V பின்னியெடுக்குமா?

டிஸைன்

ஹோண்டா BR-V காரின் முன்பக்கம் நிச்சயம் எல்லோருக்கும் பிடிக்கும். ஹெட்லைட்ஸ் டிஸைன் செம்ம ஹாட். இன்னொரு பக்கம் ஏகத்துக்கும் பயன்படுத்தப்பட்டிருக்கும் க்ரோம், டாலடிக்கிறது. கரடுமுரடான தோற்றத்துக்கு ஸ்கஃப் பிளேட்ஸ் சேர்க்கப் பட்டுள்ளன. ஆனால், காரின் பக்கவாட்டு டிஸைன் பக்காவாக இல்லை. பிளாஸ்டிக் வீல் ஆர்ச்சுகள், பார்க்க கெத்தான தோற்றத்தை காருக்குத் தரவில்லை. கதவுகளும் ஜன்னல்களும், மொபிலியோவில் இருப்பவைதான். காரின் டெயில், பின்பக்கக் கதவுகளுக்கு அருகில் இல்லாமல் தள்ளி இருப்பதால், இந்த எஸ்யுவி சில கோணங்களில் பார்க்க எம்பிவிபோல இருக்கிறது.

BR-V காரில் 210 மிமீ கிரவுண்ட் கிளியரன்ஸ் இருந்தாலும், பின்னாளில் ஆல்-வீல் டிரைவ் சேர்க்கும் திட்டம் ஹோண்டாவிடம் இல்லை. BR-V எப்போதும் ஃப்ரன்ட்-வீல் டிரைவ்தான்.

உள்ளே...

4,456 மிமீ நீளத்துடன் இந்தியாவில் உள்ள காம்பேக்ட் எஸ்யுவிகளிலேயே BR-Vதான் நீளமான கார். இதனால், காருக்குள் ஹோண்டா புகுந்து விளையாடியிருக்கிறது. இதன் போட்டி கார்களில் இல்லாத ஒரே வசதியாக, மூன்றாவது வரிசை இருக்கை BR-Vயில்தான் உள்ளது. இந்த இருக்கை பயன்படுத்தும் அளவில் இருப்பதைக் குறிப்பிட்டே ஆக வேண்டும். கடைசி வரிசையை அடைவதும் எதிர்பார்த்ததைவிட எளிதாகவே இருக்க, கால்களுக்கு இடவசதியை, நடுவரிசையை முன்னே தள்ளிக்கொள்வதன் மூலம் அதிகரித்துக்கொள்ளலாம். கடைசி வரிசையில் சீட்டிங் பொசிஷன் அவ்வளவு சிறப்பாக இல்லையென்றாலும், பெரும்பாலான 7-சீட்டர் கார்கள் இப்படித்தான் இருக்கும். நடுவரிசை இருக்கை சொகுசாக உள்ளது. பேக்ரெஸ்ட் ஆங்கிளையும் மாற்றிக்கொள்ளலாம். ஆனால், அகலம் குறைவான கார் என்பதால், நடுவரிசையில் மூன்று பேர் சொகுசாக அமர்ந்து பயணிப்பது கடினம்தான்.

Do you like the story?

Please Appreciate the Author by clapping!

Editor’s Pick