அன்பு வணக்கம்!

மதிப்புக்குரிய வாசகப் பெருமக்களே...

முதன்முதலில் டாடா இண்டிகா 1998-ம் ஆண்டு ஆட்டோ எக்ஸ்போவில் அறிமுகப்படுத்தப்பட்டபோது, அதைக் காண கூட்டம் அலைமோதியது. டிரக், பஸ் என்று தனி டிராக்கில் பயணம் செய்துகொண்டிருந்த டாடா, முதன்முதலாக கார் மார்க்கெட்டில் இறங்கியது என்பதால் ஏற்பட்ட ஆர்வமே இதற்குக் காரணம். டெலிவரி ஆரம்பிக்கப்படுவதற்கு முன்பே, ‘இண்டிகா வேண்டும்’ என்று ஒரு லட்சத்துக்கும் மேற்பட்டவர்கள் முன்பணம் செலுத்தினார்கள். இண்டிகா அறிமுகமாகி 20 ஆண்டுகள் முடிவடையும் இந்தத் தருணத்தில், இண்டிகா மற்றும் இண்டிகோ கார்களின் தயாரிப்பை நிறுத்தும் பணியை ஆரம்பித்துவிட்டதாக, அதிகாரப்பூர்வமாக அறிவித்திருக்கிறது டாடா. இந்த அறிவிப்பு இண்டிகா பற்றிய நினைவுகளையும், அது கார் மார்க்கெட்டில் ஏற்படுத்திய தாக்கங்கள் குறித்தும் அசை போட வைத்திருக்கிறது. என்னதான் போட்டியாளர்களாக இருந்தாலும், ஆனந்த் மஹிந்திரா போன்றவர்களைக்கூட டாடாவின் இந்த அறிவிப்பு பழைய நினைவுகளில் நீந்த வைத்துவிட்டது. உள்நாட்டு கார் வடிவமைப்பில் புதிய சிந்தனைக் கதவுகளைத் திறந்துவைத்த பெருமை, டாடா இண்டிகாவையே சேரும். அதனால்தான் அவரைப் போன்ற கார் பிரியர்கள் பலரும் இண்டிகாவுக்காக இப்படி உருகுகிறார்கள்.

சுமோ மற்றும் சஃபாரி போன்ற எஸ்யூவிகளைத் தயாரித்ததன் மூலம், டாடா பயணிகள் கார் சந்தையில் தனக்கென்று ஏற்கெனவே ஓர் இடத்தை ஏற்படுத்திக்கொண்டிருந்தது என்றாலும், இண்டிகாவின் வருகைக்குப் பிறகுதான்  டாடா இந்தச் சந்தையில் ஆழமாகவும் அழுத்தமாகவும் காலூன்றியது. பயணிகள் கார் சந்தையில் மூன்றாவது இடத்தை டாடா பிடிக்க இண்டிகாதான் காரணமாக இருந்தது. இண்டிகாவில் ஆரம்பித்த வெற்றிப் பயணம்... இண்டிகோ செடான், அதை அடுத்து நான்கு மீட்டருக்கு உட்பட்ட டாடா இண்டிகோ CS என்று அடுத்தடுத்து வெற்றிப்படிகளில் ஏறியது. சின்ன கார்; சின்ன கார்களில் முதன்முதலாக வந்த டீசல் கார் என்பதாலும், இந்த கார்கள் அனைத்துமே விசாலமாக இருந்தன என்பதாலும் டாக்ஸி செக்மென்ட்டின் செல்ல கார்களாகவும் மாறின.

இண்டிகாவின் வருகைக்கு முன்பு வரை தன்னிகரில்லாத காராக இருந்தது மாருதி 800. ஆனால், இண்டிகாவின் வருகையால் மாருதி 800 காரின் விலையைக் குறைக்க வேண்டிய சூழ்நிலைக்குத் தள்ளப்பட்டது என்பதெல்லாம் இண்டிகாவின் வெற்றி வரலாறு. இண்டிகா இருந்த இடத்தை நிரப்புவதற்காக இப்போது போல்ட், ஹெக்ஸா, டிகோர், டியாகோ ஆகியவை வந்துவிட்டன. ஜாகுவார் மற்றும் லேண்ட்ரோவர் கூட்டணியால் டாடாவின் கார்கள் புதிய உயரங்களைத் தொட்டுக்கொண்டிருக்கின்றன.

போய் வா இண்டிகா!

அன்புடன்
ஆசிரியர்



 

Do you like the story?

Please Appreciate the Author by clapping!

Editor’s Pick

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்