பி/இ விகிதம்: பங்கு முதலீட்டில் லாபம் தரும் சூட்சுமம்!

வி.கோபாலகிருஷ்ணன், நிறுவனர், மணி அவென்யூஸ் (Money Avenues)

ங்குச் சந்தை முதலீட்டாளர்கள் பங்குகளை நீண்ட கால முதலீட்டுக்கு வாங்குவதற்கு அடிப்படை ஆராய்ச்சி உத்திகளை அவசியம் தெரிந்து வைத்திருக்க வேண்டும். அப்படி தெரிந்துகொண்டு பங்குகளை வாங்கும்போது முதலீட்டாளர்களுக்கு லாபகரமாக அமைய வாய்ப்புள்ளது. அதுபோன்ற அடிப்படை ஆராய்ச்சி உத்திகள் பல இருந்தாலும், வெற்றிகரமான முதலீட்டாளர்கள் பி/இ விகிதம் (P/E ratio) என்ற உத்தியை கவனித்து அதன் அடிப்படையில் பங்குகளை வாங்குவார்கள். பார்ப்பதற்கு ஒரு எளிமையான, சாதாரணமான உத்தியாக இருந்தாலும், பங்குகளின் மதிப்பை அறிய தேவைப்படும் ஒரு வலுவான உத்திதான் இந்த பி/இ விகிதம்.

பி/இ என்றால்...?

பி/இ விகிதங்களுக்கான அடிப்படை விளக்கம் இதுதான்.

உதாரணமாக, ஒரு பங்கின் தற்போதைய சந்தை விலை ரூ.100 என்று எடுத்துக்கொள்வோம். அதனுடைய ஒரு பங்கு ஆதாயம் (Earnings per share - EPS)  கடந்த 12 மாதங்களுக்கு ரூ.10 ருபாய் எனில், அந்தப் பங்கின் பி/இ விகிதமானது 100/10=10 என்று வழங்கப்படும்.

பி/இ விகிதங்கள் பல்வேறு கோணங்களில் ஆராயப்படும். உதாரணத்துக்கு, ட்ரைலிங்  பி/இ (Trailing P/E) என்றால் ஒரு பங்கு ஆதாயம் (EPS) என்பது நிலுவையில் இருக்கும் பங்குகளின் எண்ணிக்கையால் வகுக்கப்படுகிற நிறுவனத்தின் கடந்த 12 மாத காலத்துக்கான மொத்த வருமானமாகும். தனிப்பட்ட நிறுவனங்களுக்கான மாதாந்திர ஆதாயக் கணக்கு கிடைப்பதில்லை. எனவே, அதற்கு முந்தைய நான்கு காலாண்டு ஆதாயங்களின் அறிக்கைகள் பயன்படுத்தப்படுகின்றன என்பதோடு ஒரு பங்கு ஆதாயம் காலாண்டுக்கு ஒருமுறை புதுப்பிக்கப்படுகிறது.

ஒரு பங்கின் பி/இ விகிதத்தை ஆராயும்போது, அந்தப் பங்கை மட்டும் கணக்கில் கொண்டு ஆராய்ந்தால், அதன் உண்மையான மதிப்பீடு காணமுடியாது. உதாரணத்துக்கு, நாம் சந்தைக்கு சென்று ஆப்பிள் வாங்குகி றோம் என்று வைத்துக்கொள்வோம். ஒரு கடையில் ஒரு ஆப்பிளின் விலை ரூபாய் 25. அதே ஆப்பிள் சில கடைகள் தள்ளி வாங்கினால், ஒரு ஆப்பிளின் விலை ரூபாய் 22 என்று இருந்தால், நாம் இரண்டாவது கடையில் வாங்கினால்தான் நமக்கு லாபம் ஏற்படும்.

இதில் முக்கியமாக கவனிக்கப்பட வேண்டியது, இரண்டு ஆப்பிள்களும் ஒரே தரம், ஒரே அளவு என்றால்தான் அந்த விலை ஒப்பீடு என்பது சரியாக இருக்கும். அதேமுறையில்தான் பங்குகளை வாங்கும்போதும் பி/இ விகிதத்தை ஒப்பிட வேண்டும். ஆனால், ஒரு துறையில் உள்ள எல்லா நிறுவனங்களும் ஒரே அளவிலோ, ஒரே தரத்திலோ இருக்காது என்பதையும் கவனத்தில் கொள்ள வேண்டும். அதனால் பங்குகளை ஆராயும்போது நிறுவனங்கள் கிட்டதட்ட ஒரே அளவில் இருந்தால் தான் அதன் உண்மையான மதிப்பீடு பி/இ விகிதம் மூலம் கண்டறியலாம்.

இந்தியச் சந்தைகளில் பி/இ விகிதம்!

கடந்த ஏழு ஆண்டுகளில் இந்தியப் பங்குச் சந்தைகள் கடுமையான ஏற்ற இறக்கத்தைச் சந்தித்து வந்துள்ளது. இந்தியச் சந்தையில் பி/இ விகிதமும் அதையொட்டியே ஏற்ற இறக்கத்துடன் காணப்பட்டது. தற்போது தேசியப் பங்குச் சந்தையின் நிஃப்டி குறியீட்டின் பி/இ விகிதம் 21 என்ற அளவில் இருக்கிறது. இது 2008-ல் 11 என்ற அளவில் இருந்தது. பிறகு ஏற்றம் பெற்ற பி/இ விகிதம் 2013-ல் சந்தைகள் கடுமையான நெருக்கடியில் சிக்கித் தவித்தபோது, 15 என்ற அளவை எட்டியது. இந்த ஆண்டு துவக்கத்தில் 23 என்ற அளவைத் தொட்ட பி/இ விகிதம் தற்போது 21 என்ற அளவில் உள்ளது குறிப்பிடத்தக்கது. பங்குகளின் விலை அதிக ஏற்ற இறக்கத்தில் இருக்கும்போது பி/இ விகிதமும் அதிக ஏற்ற இறக்கத்தில் காணப்பட்டதை கடந்த காலங்களின் மூலம் தெளிவாக நாம் அறியலாம்.

​2013-ல் கடுமையான வீழ்ச்சியை சந்தித்த இந்தியச் சந்தை, அதற்குபிறகு நாட்டில் ஏற்பட்ட அரசியல் மாற்றம் காரணமாக தொடர்ந்து உயர்ந்து வந்தது. முன்னேற்றமான பொருளாதார சூழல் மற்றும் கவர்ச்சிகரமான பங்கு மதிப்பீடுகள் அந்நிய முதலீட்டாளர்களை நமது சந்தைக்கு இழுத்துவந்தது. உள்நாட்டு பெரு முதலீட்டு நிறுவனங்களான மியூச்சுவல் ஃபண்டுகளும் தொடர்ந்து இந்தியப் பங்குகளில் முதலீடு செய்துவந்தன. அதன் காரணமாக இந்த ஆண்டு துவக்கத்தில் வரலாறு காணாத உச்சத்தை எட்டியது இந்தியப் பங்குச் சந்தை. அதன் காரணமாக பி/இ விகிதமும் அதிகரித்தது. இப்போது ஏற்பட்டுள்ள வீழ்ச்சி காரணமாக பி/இ விகிதமும் சற்று தணிந்திருக்கிறது.

ஆனாலும் வளரும் நாடுகளை ஒப்பிடும்போது, இந்தியச் சந்தையின் முன்னோக்கு பி/இ விகிதம் (Forward P/E) சற்று கூடுதலாகத்தான் உள்ளது என்று ஒப்பீட்டு ஆய்வுகள் தெரிவிக்கின்றன. இருந்தாலும் இந்தியாவின் பொருளாதார வளர்ச்சி, அரசியல் ஸ்திரத்தன்மை ஆகியவற்றை கருத்தில் கொள்ளும்போது நமது நாட்டின் பங்கு மதிப்பீடுகள் கவர்ச்சிகரமாகத்தான் உள்ளது.

சீனா போன்ற நாடுகளை ஒப்பிடும்போதும் வெளிநாட்ட வர்களுக்கு நம் மீது உள்ள நம்பிக்கை ஆதரவாகவே உள்ளது. இந்தியச் சந்தையின் பி/இ விகிதம் உயர்ந்து காணப்படுவதற்கு மூன்று துறைகளின் பி/இ விகிதம் அதிகரித்ததுதான் முக்கிய காரணம். அவை தொழில்நுட்பம், மருந்து மற்றும் எஃப்எம்சிஜி ஆகிய துறைகள்தான். அவற்றை நீக்கி விட்டுப் பார்த்தால், இந்தியச் சந்தையின் மதிப்பீடு அளவுக்கு அதிகமாக இல்லை.

முதலீட்டாளர்கள் பி/இ விகிதத்தை எவ்வாறு அணுகவேண்டும்?

முதலீட்டாளர்கள் பங்கின் சந்தை விலையை மட்டும் பார்த்து முதலீடு செய்யாமல், சற்று முயற்சி செய்து நிறுவனங்களின் பி/இ விகிதத்தை ஆராய்ந்து பார்த்து முதலீடு செய்வதுதான் சரியான முதலீட்டு உத்தியாக இருக்கும். அதுமட்டுமல்லாது, ஒரு பங்கின் பி/இ விகிதம் அதிகமாகவோ, குறைவாகவோ இருந்தால் மட்டும் அது முதலீட்டுக்கு உகந்ததாகவோ அல்லது உகந்தல்லாததாகவோ கருத முடியாது. தேர்ந்த முதலீட்டாளர்கள் பங்குகளை மதிப்பீடு செய்ய இந்த பி/இ விகிதத்தை மட்டுமே பார்த்து முடிவெடுக்காமல், வேறு பல உத்திகளையும் சேர்த்து ஆராயும்போது ஒரு தெளிவான முதலீட்டு முடிவு கிடைக்கும்.

உதாரணத்துக்கு, ஒரு நிறுவனத்தின் பி/இ விகிதம் அதிகமாகக் காணப்பட்டாலோ அல்லது வீழ்ச்சி அடைந்து காணப்பட்டாலோ வேறு சில விஷயங்களை, குறிப்பாக, வருமான வளர்ச்சி (earnings growth), புத்தக மதிப்பு (book value), பங்கு ஆதாயம் (EPS), கடன் நிலவரம் (debts), பணப் புழக்கம் (cash flows) போன்ற வேறு பல விஷயங்களை ஆராய்ந்தால், அது முதலீட்டுக்கு உகந்த பங்கா, இல்லையா என்ற ஒரு முடிவுக்கு வரமுடியம். ஆகவே, முதலீட்டாளர்கள் பி/இ விகிதத்தை பற்றியும் அறிந்துகொண்டு, வேறு பல விஷயங்களையும் சேர்த்து ஒரு பங்கின் முதலீட்டு மதிப்பை கணக்கிட்டால், நிச்சயம் நீண்ட காலத்தில் அந்த உத்தி வெற்றியைக் கொடுக்கும்.

விரிவான கட்டுரையைப் படிக்க:  http://bit.ly/1MoPPwP

Do you like the story?

Please Appreciate the Author by clapping!

Editor’s Pick