தங்கம், ரியல் எஸ்டேட்: இப்போது லாபம் கிடைக்காது!

ங்கத்திலும் ரியல் எஸ்டேட்டிலும் இப்போது முதலீடு செய்தால், பல ஆண்டு காலம் கழித்தே லாபம் கிடைக்கும் என்று சொன்னால் நீங்கள் நம்புவீர்களா... நம்பித்தான் ஆக வேண்டும் என்கிறார் பங்குச் சந்தை நிபுணர் வி.நாகப்பன். அவர் இப்படி சொல்வதற்கான காரணங்களை ஆணித்தரமாக எடுத்து வைக்கிறார்.

தங்கம் தந்த லாபம்!

‘‘தங்கத்தின் மோகம் இந்தியாவை இன்னும் விட்ட பாடில்லை. வருடாவருடம் தங்கம் இறக்குமதி அதிகரித்துக் கொண்டேதான் இருக்கின்றது. இந்தியாவின் இறக்குமதியில் இரண்டாவது இடம் தங்கத்துக்குதான்.

கடந்த 100 வருடங்களில் தங்கம் எப்படிச் செயல்பட்டு இருக்கிறது என்பதைப் பார்த்தால், இனி தங்கம் வாங்கத்தான் வேண்டுமா என்று எல்லோரும் யோசிக்கத் தொடங்கிவிடுவார்கள்.

1920, ஜூலையில் ஒரு அவுன்ஸ் தங்கம் 236.71 அமெரிக்க டாலருக்கு வர்த்தகமானது. அடுத்த 14 வருடத்தில் (ஜூன் 1934) 632.80 டாலர் என்கிற புதிய உச்சத்தைத் தொட்டது. அதன்பின் 36 ஆண்டுகள் இறக்கம்தான். இறக்கத்தின் முடிவில் 1970, டிசம்பர் முடிவில் ஒரு அவுன்ஸ் தங்கம் 219.21 டாலருக்கு வர்த்தகமானது. இது ஜூன் 1920-ல் வர்த்தகமான 236.71 டாலரைவிடக் குறைவு.

இப்படி சீண்டுவார் இல்லாமல் கிடந்த தங்கம் 1980 ஜனவரியில் திடீரென ஆக்ரோஷமாக உயரத் தொடங்கி, 1980 பிப்ரவரியில் 2,080 டாலரை அடைந்தது. அதற்குப் பிறகு விலை இறங்கத் தொடங்கி, ஏப்ரல் 2001-ம் ஆண்டு 351.39 டாலருக்கு வர்த்தகமானது.

மீண்டும் 2007-ல் உயரத் தொடங்கி, 2011 ஆகஸ்ட்டில் 1,921.73 என்கிற உச்ச நிலையை எட்டி விட்டு, மீண்டும் சரியத் தொடங்கியது. இன்றைக்கு உலகச் சந்தை யில் ஒரு அவுன்ஸ் தங்கத்தின் விலை 1,136.10 டாலராக வர்த்தகமாகி வருகிறது.

ஏற்றம் 1, இறக்கம் 2

இந்த ஏற்ற இறக்கங்களில் நாம் கவனிக்க வேண்டியது, தங்கத்தின் விலையில் ஏற்ற, இறக்கத்துக்கு நீண்ட நாட்கள் ஆகிறது என்பதே. அதிலும் குறிப்பாக, தங்கத்தின் விலை ஏற்றம் அடையும் காலத்தைவிட, இறக்கம் அடையும் காலம் அதிகமாக இருக்கிறது. அதாவது, தங்கத்தின் விலையேற்ற காலம் 1 மடங்கு என்றால், இறங்கும் காலம் 2 மடங்காக இருக்கிறது. அதாவது, தங்கம் விலை கடந்த காலங்களில் சராசரியாக 11 ஆண்டுகள் ஏற்றத்திலும், அதனைத் தொடர்ந்து சராசரியாக 20 ஆண்டுகள் இறக்கத்திலும் வர்த்தகமாகி இருக்கிறது. ஒருவர் 1934-ல் ஒரு அவுன்ஸ் 632.80 என்கிற விலையில் முதலீடு செய்திருந்தால், அவர் போட்ட முதலீட்டை எடுக்க சுமாராக 1973, ஜூன் வரை காத்திருக்க வேண்டியிருக்கும். அதாவது, கொஞ்சநஞ்சமல்ல, 40 வருடங்கள்.

டாலர் மதிப்பு உயர்ந்ததால்..!

‘உலகச் சந்தையில் வேண்டு மானாலும் தங்கம் லாபம் தராமல் போயிருக்கலாம். ஆனால், நம் நாட்டில் அப்படி இல்லை. 2006-ல் ஒரு கிராம் தங்கம் விலை சுமார் 1,000 ரூபாய். இப்போது அதன் விலை ஒரு கிராமுக்கு சுமார் 2,500 ரூபாய். 150%  லாபம் கிடைத்திருக்கிறதே! அப்படி ஒரு லாபம் எதிர்காலத் திலும் கிடைக்காது என்று சொல்ல முடியுமா?’ என்று  நீங்கள் கேட்கலாம். நம் நாட்டைப் பொறுத்தவரை, நீங்கள் கேட்பது நிஜம்தான். ஆனால், தங்கத்தின் இந்த விலையேற்றம், தங்கம் விலை சர்வதேச சந்தையில் உயர்ந்ததால் வந்ததல்ல; மாறாக, டாலரின் மதிப்பு உயர்ந்த தால்தான். ஆக, டாலர் மதிப்பு உயர்ந்ததால் தங்கம் விலை பெரிய அளவில் உயர்ந்து நமக்கு அதிக லாபம் கிடைத்தமாதிரி யான ஒரு தோற்றம் கிடைக்கிறதே தவிர, உள்ளபடி பார்த்தால், தங்கம் பெரிய லாபம் எதுவும் தந்துவிடவில்லை.

இந்த அளவுக்கு ரிஸ்க் உள்ள உலோகத்தில்தான் நம் வருமானம், சேமிப்பு என்று கொட்டுகிறோம். இதில் உள்ள ரிஸ்க்கை நாம் இதுவரை உணராமலே அதில் பெரும் பணத்தைப் போட்டு முதலீடு செய்து வைத்திருக்கிறோம். தங்கம் எனக்குப் பிடித்திருக்கிறது. முதலீடு என்கிற நோக்கில் அல்லாமல், அதை அழகுக்காக வாங்க விரும்புகிறேன் என்றால், கொஞ்சம் தங்கத்தை தாராளமாக வாங்கலாம். ஆனால், தங்கத்தில் முதலீடு செய்கிறேன் என்று நினைத்து, அதில் காசைப் போட் டால், இப்போதைக்கு லாபம் கிடைக்காது. அதற்கு இன்னும் பல ஆண்டுகள் காத்திருக்க வேண்டும் என்பது நிச்சயம். 

ரியல் இல்லாத ரியல் எஸ்டேட்!

ரியல் எஸ்டேட்டில் கைடுலைன் மதிப்பு என்பது என்றுமே குறையாது. ஆனால், சந்தை மதிப்பு ஏறும், இறங்கும். வீடு அல்லது மனையை வாங்கும்போது கைடுலைன் மதிப்பு அல்லது சந்தை மதிப்பு எது கூடுதலோ, அந்த மதிப்புக்குத்தான் பத்திரப்பதிவு செய்ய வேண்டும்.

நாம் ஒரு ஏரியாவில் ஒரு வீட்டை வாங்க இருக்கிறோம். அதன் சந்தை மதிப்பை அதனைச் சுற்றி உள்ள பள்ளி, கல்லூரிகள், பெரிய நிறுவனங்கள், மருத்துவமனைகள் ஆகியவை தான் தீர்மானிக்கின்றன. நமக்கு அந்த வீடு பிடித்துப் போய்விட்டது என்று புரோக்கருக்கோ அல்லது வீட்டின் உரிமை யாளருக்கோ தெரிந்துவிட்டது என்றால் அவர்கள் வைத்ததுதான் விலை. உரிமையாளர் சொல்லும் விலை, சந்தை விலையைவிடக் கூடுதலாக இருக்க அதிக வாய்ப்பு கள் இருக்கின்றன.

தங்கத்தையாவது விரைவாக விற்றுப் பணமாக்கலாம். ஆனால், ரியல் எஸ்டேட்டை அவசரத்துக்கு விற்கவே முடி யாது. நாம் அவசரப்படுகிறோம் என்பது தெரிந்தால், அடிமாட்டு விலைக்குத்தான் விற்க நேரிடும். இதற்கு ஒரு சரியான விலை அளவுகளோ, கண்காணிப்பு குழுக்களோ, அமைப்புகளோ இல்லை என்பது  பிரச்னைக்கு வழிவகுக்கும் கூடுதல் அம்சங்கள். எனவே, ரியல் எஸ்டேட்டிலும் இப்போதைக்கு லாபம் கிடைக்காது. அதற்கும் நீண்ட காலம் காத்திருக்க வேண்டும் என்பதை சொல்ல வேண்டியதே இல்லை. 

கறுப்புப் பணத்தின் ஆதிக்கம்!

‘கடந்த சில ஆண்டுகளில் ரியல் எஸ்டேட் நல்ல லாபம் தந்ததே!’என்று நீங்கள் கேட்க லாம். உண்மைதான், இதற்கு முக்கியமான காரணம், பெருமள விலான கறுப்புப்பணம் ரியல் எஸ்டேட்டில் நுழைந்ததே. கணக்கில் வராத இந்த கறுப்புப் பணம்தான் ரியல் எஸ்டேட்களின் விலையைக் குறையவிடாமலே தடுத்து நிற்கின்றன. இந்தக் கறுப்புப்பணம் வலிமை இழக்கும் பட்சத்தில் அடுத்த சில ஆண்டு களில் ரியல் எஸ்டேட்களின் விலை இன்னும் குறையவே செய்யும். 

வாழ்வதற்கு ஒரு வீடு என்று வைத்துக்கொண்டால், எந்தப் பிரச்னையும் இல்லை. ஆனால், கையில் உள்ள காசை எல்லாம் ரியல் எஸ்டேட்டில் போட்டு வைப்பது மகா தவறு. இப்படி போடும் காசுக்கு என்ன வருமானம் கிடைக்கும், அது எத்தனை ஆண்டுகள் கழித்துக் கிடைக்கும் என்பது மிகப் பெரிய கேள்விக்குறி!

அள்ளித் தந்த சந்தை!

பங்குச் சந்தைக் குறியீடான சென்செக்ஸ் ஏப்ரல் 03, 1979 அன்று 124.15 புள்ளிகளில் வர்த்தக மானது. இன்றைய தேதியில் சந்தை 25,000 புள்ளிகளுக்கும் கூடுதலாக வர்த்தகமாகி வருகிறது. சுமாராகக் கடந்த 35 ஆண்டுகளில் சந்தை 200 மடங்கு லாபம் தந்திருக்கிறது. தவிர, சந்தையில் முதலீடு செய்த பணத்துக்கு ஒரு வருடத்துக்கு மேல் வருமான வரியும் கிடையாது. ஆனால், தங்கம், ரியல் எஸ்டேட் விற்று வரும் லாபத்துக்கு வருமான வரி உண்டு.

தவிர, பங்குச் சந்தையின் சுழற்சி என்பது தோராயமாக  எட்டு வருடங்களுக்குள் முடிந்துவிடுகிறது. ஒருவேளை சந்தையின் உச்சத்தில் முதலீடு செய்திருந்தால்கூட அதிகபட்ச மாக அடுத்த எட்டு ஆண்டுகளுக் குள் உச்சத்தைத் தாண்டி வர்த்தகமாகத் தொடங்கிவிடும். தங்கம், ரியல் எஸ்டேட், பங்குச் சந்தை ஆகிய மூன்று முதலீடு களில் அதிகபட்சம் நான்கு வருடங்களில் ரெக்கவரி ஆகி, ஏற்றத்தை நோக்கி பாயத் தொடங்கிவிடும் ஒரே முதலீடு பங்குச் சந்தைதான்.

ஆனால், பங்குச் சந்தையில் முதலீடு செய்ய பயமாக இருக்கிறது. எந்தப் பங்கு விலை ஏறும் அல்லது இறங்கும் என்று தெரியவில்லையே என்று நினைப்பவர்கள், சென்செக்ஸ் அல்லது நிஃப்டி இண்டெக்ஸ் ஃபண்டுகளில்(உதாரணம், நிஃப்டி பீஸ்) முதலீடு செய்தால் போதும், சந்தையின் வளர்ச்சிக் கேற்ப உங்களுக்கு லாபம் கிடைக்கும். இந்த ஃபண்டுகளில் முதலீடு செய்பவர்கள், அதிக ரிஸ்க் எடுத்து சந்தையைக் கண்காணிக்க வேண்டிய அவசியம் இல்லை என்பதால் நீண்ட காலத்தில் பணவீக்கத்தைத் தாண்டிய வருமானத்தைப் பார்க்க முடியும்” என்று கூறி முடித்தார் நாகப்பன்.

ஆக, மிகச் சிறந்த முதலீடு தங்கமும் ரியல் எஸ்டேட்டும் தான் என நினைக்காமல், பங்குச் சந்தையையும் கவனித்தால், எதிர்காலத்தில் நல்ல லாபம் பார்க்க முடியும்.

மு.சா.கெளதமன்

Do you like the story?

Please Appreciate the Author by clapping!

Editor’s Pick