நீர்ப்பிடிப்புப் பகுதியில் வீட்டுமனை... எப்படிக் கண்டுபிடிப்பது?

நான் ஒரு வீட்டு மனை வாங்க இருக்கிறேன். அந்த வீட்டு மனை அமைந்துள்ள பகுதி, சுமார் 40 ஆண்டுகளுக்குமுன் நீர்ப்பிடிப்புப் பகுதியாக இருந்தது என்றும், அங்கே இடம் வாங்கினால் பிற்காலத்தில் சிக்கல் வரக்கூடும் என்றும் சொல்கிறார்கள். இது எந்தளவிற்கு உண்மையாக இருக்கும், நீர்ப்பிடிப்புப் பகுதியாக ஒரு காலத்தில் இருந்ததை எப்படி அறிந்துகொள்வது?

சரவணன், செங்குன்றம்

பார்த்தசாரதி, மதிப்பீட்டாளர், சார்ட்டர்ட்   இன்ஜினீயர்

‘‘வீட்டுமனை அமைந்துள்ள பகுதி, நீர்ப்பிடிப்புப் பகுதியாக இருக்குமா என்ற சந்தேகம், பெரும்பாலும் சென்னை போன்ற நகர்ப்பகுதியைச் சுற்றியுள்ள பகுதிகளில்தான் ஏற்படுகிறது. நீங்கள் வாங்கவிருக்கும் வீட்டுமனை சென்னை சி.எம்.டி.ஏ எல்லைக்குள் வருவதாக இருந்தால், அந்த அலுவலகத்திற்குச் சென்று உங்களுடைய வீட்டு மனை குறித்த விவரங்களைச் சொல்லுங்கள். நீங்கள் சொல்லும் பகுதி நீர்ப்பிடிப்புப் பகுதியா என அவர்களே ஆய்வு செய்து விவரத்தைச் சொல்லிவிடுவார்கள். அல்லது ஆன்லைனில் http://www.cmdachennai.gov.in என்ற இணைய தளத்திற்குள் சென்று, குறிப்பிட்ட வீட்டுமனைப் பகுதிக்கான வரைபடத்தைப் பார்க்கவும். அதில் நீர்ப்பிடிப்புப் பகுதி என்றால் பச்சை நிறத்தில் குறிக்கப்பட்டிருக்கும். நீங்கள் வாங்கும் மனை அந்தப் பகுதிக்குள் வந்தால் அது சிக்கலுக்குரிய வீட்டுமனைப் பகுதியாகும். ஒரு பகுதி நீர்ப் பிடிப்புப் பகுதியாக இருக்கும்பட்சத்தில், அந்தப் பகுதியில் வீடு கட்டுவதற்கு சி.எம்.டி.ஏ அனுமதி தராது.

சி.எம்.டி.ஏ அமைப்பின் கண்காணிப்புக்குள் வராத பகுதியில் வீட்டுமனை அமைந்திருந்தால், நகர் ஊரமைப்பு இயக்ககத்தை (டி.டி.சி.பி)  அணுக வேண்டும். அங்கு உங்கள் வீட்டுமனை குறித்த விவரங்களைக் கொடுத்துச் சரிபார்க்கவும். கிராமப்பகுதி எனில், ஊராட்சி, பஞ்சாயத்து அலுவலகங்களை அணுகி சரிபார்த்துக் கொள்ளலாம்.’’

கார்ப்பரேட் நிறுவனமொன்றில் பணியாற்றும் எனக்கு 35 வயது. நான் ரூ.3 லட்சத்தை ஒரே தவணையிலும், எஸ்.ஐ.பி மூலம் மாதம் ரூ.10 ஆயிரத்தைப் பத்து ஆண்டுகளுக்கும் முதலீடு செய்யலாமென இருக்கிறேன். அடுத்த மூன்று ஆண்டுகளுக்குப் பிறகு கூடுதல் தொகையை முதலீடு செய்யலாம் என்கிற எண்ணம் இருக்கிறது. நல்லதொரு லாபத்தை எதிர்பார்க்கும் திட்டத்தைக் குறிப்பிடுங்கள்.

- மதிவாணன், நங்கநல்லூர், சென்னை

பாரதிதாசன், நிதி ஆலோசகர்

‘‘மூன்று லட்ச ரூபாயை இரண்டாகப் பிரித்து, ஹெச்.டி.எஃப்.சி டாப் 200 ஃபண்ட், ஆதித்ய பிர்லா ஃப்யூர் வேல்யூ ஃபண்டில் முதலீடு செய்யுங்கள். அதேபோல், எஸ்.ஐ.பி-யிலும் ஒரே ஃபண்டில் 10,000 ரூபாயையும் முதலீடு செய்யாமல் இரண்டாகப் பிரித்து, ஆதித்ய பிர்லா ஃப்ரன்ட் லைன் ஈக்விட்டி / ஹெச்.டி.எஃப்.சி டாப் 200 ஃபண்டில் 5,000 ரூபாயை மாதாமாதம் முதலீடு செய்யுங்கள். மேலும், முதலீடு செய்வதாக இருந்தால், ரிலையன்ஸ் ஸ்மால்கேப் ஃபண்டில் முதலீடு செய்யுங்கள்.’’

மாநில அரசுப் பணியிலிருந்து ஓய்வு பெற்றுள்ள எனக்கு பி.எஃப் உள்ளிட்ட பென்ஷன் தொகை ரூ.5 லட்சம் உள்ளது. அடுத்த ஐந்தாண்டுகளில் வங்கி வைப்பு நிதியைவிட சற்றுக் கூடுதல் லாபம் பெறும் கிடைக்கும்படியான முதலீட்டுத் திட்டங்களைப் பரிந்துரை செய்யுங்கள். 

- ராஜாராமன், தஞ்சாவூர்.

 ச.ராமலிங்கம், நிதி ஆலோசகர்

‘‘கடந்த 3-5 ஆண்டுகளாக வங்கி வைப்பு நிதி வட்டிவிகிதம் குறைந்துவருவதால் உங்களைப் போன்றோரின் கவனம் மியூச்சுவல் ஃபண்ட் பக்கம் திரும்பியுள்ளது. பங்கு, கடன் சார்ந்த மியூச்சுவல் ஃபண்ட் திட்டங்களில் முதன்முதலாக முதலீடு செய்ய முற்படும்போது நீங்கள் சில விஷயங்களைக் கவனத்தில்கொள்வது அவசியம். 

உங்கள் அவசரத் தேவைக்காக (Contingency fund - அவசர நிதி) ரூ.50,000 குறைந்த ரிஸ்க்  கொண்ட  அதே நேரத்தில் எளிதில் பணமாக்கக் கூடிய லிக்விட் ஃபண்டில் (ஹெச்.டி.எஃப்.சி லிக்விட்/எல் & டி லிக்விட் ஃபண்டில்) முதலீடு செய்யலாம். இதன்மூலம் வருடத்திற்கு 7% வருமானம் எதிர்பார்க்கலாம். ரூ.1 லட்சத்தை ஈக்விட்டி சேவிங்ஸ் பண்டில் (30% பங்கு, 40% ஆர்பிட்ரேஜ் பங்கு, 30% கடன் சார்ந்த பங்குகள்) முதலீடு செய்தால், ஆண்டுக்குச் சுமார் 9% வருமானம் கிடைக்க வாய்ப்புண்டு. ரிலையன்ஸ் ஈக்விட்டி சேவிங்ஸ், ஹெச்.டி.எஃப்.சி ஈக்விட்டி சேவிங்ஸ் ஃபண்டில் பிரித்து முதலீடு செய்யுங்கள். ரூ.2 லட்சத்தை பேலன்ஸ்டு ஃபண்ட் (ஈக்விட்டி முதலீடு 65%, கடன் சார்ந்த முதலீடு் 35%), ரூ.1 லட்சம் வீதம் எல் & டி இந்தியா புரூடன்ஸ் மற்றும் பிரின்சிபல் பேலன்ஸ்டு ஃபண்டுகளில் முதலீடு செய்தால் ஆண்டுக்கு 10-12% வருமானம் கிடைக்க வாய்ப்புள்ளது.

ரூ.1.5 லட்சத்தை ஒரு லிக்விட் பண்டில் (எல்& டி லிக்விட் ஃபண்ட்) முதலீடு செய்து, எஸ்.டி.பி மூலம் மாதம் ரூ.2,500 வீதம், 60 மாதங்களுக்கு அதே ஃபண்ட் நிறுவனத்தின் லார்ஜ் கேப் (எல்&டி எமர்ஜிங் பிசினஸஸ் ஃபண்ட்) ஃபண்டுக்கு மாற்றி வந்தால், கணிசமான தொகை லிக்விட் ஃபண்டின் (7%) வருமானத்தைக் கொடுத்து, மாதமொரு முறை 60 மாதங்கள் ரூ.2,500 ஈக்விட்டி லார்ஜ்கேப் ஃபண்டின் (சுமார் 12%) லாபம் கிடைக்கும்.’’

என் குடும்பத்தில் சொத்து பிரித்ததில் என் பங்காக 20 லட்ச ரூபாய் கிடைத்துள்ளது. இதனை 20 ஆண்டுகளுக்கு இடையில் எடுக்க முடியாத வகையில் நீண்ட கால முதலீடு செய்ய விரும்புகிறேன்.  

ரஞ்சித், திண்டிவனம்

 அபுபக்கர் சித்திக், நிதி ஆலோசகர்

‘‘நீண்ட கால முதலீடாக, இடையில் எடுக்க முடியாதபடி கட்டுப்பாடுடைய முதலீட்டுத் திட்டங்கள் சில மட்டும் இருக்கின்றன. அதில், பி.பி.எஃப் முதலீடு ஓரளவு லாபகரமானதாக இருக்கும். இதில் முதலீடு செய்தால், 15 ஆண்டுகளுக்குப் பணத்தை எடுக்க முடியாது.

இந்தத் திட்டத்தில், ஒருவரின் பெயரில் ஆண்டுக்கு ரூ.1.5 லட்சம் மட்டுமே முதலீடு செய்ய முடியும். எனவே, வரும் மார்ச் மாதத்திற்கு முன் ரூ.1.5 லட்சத்தையும், ஏப்ரலில் இன்னொரு ரூ.1.5 லட்சத்தையும் நீங்கள் முதலீடு செய்யலாம். மிச்சமிருக்கும் ரூ.17 லட்சத்தை மியூச்சுவல் ஃபண்டில் முதலீடு செய்யலாம். அதாவது, லிக்விட் ஃபண்டில் முதலீடு செய்துவிட்டு, அதனை பேலன்ஸ்டு / ஈக்விட்டி ஃபண்டுகளுக்கு மாற்றி வருவது லாபகரமாக இருக்கும்.’’

தனியார் நிறுவனம் மூலம் வீட்டுக் கடன் பெற்று வீடு வாங்கி, கடந்த நான்கு ஆண்டுகளாக மாதத் தவணை கட்டி வருகிறேன். தற்போது அந்தக் கடனைப் பொதுத்துறை வங்கிக்கு மாற்றலாமென்று நினைக்கிறேன். இதற்கான வழிமுறைகள் என்ன?

நேதாஜி, திண்டுக்கல்

ஆர்.செல்வமணி, கனரா வங்கி உதவி பொது மேளாலர் (ஓய்வு) 

‘‘இதற்கு சில நிபந்தனைகளும், வழிமுறைகளும் உண்டு. ஏற்கெனவே கடன் வாங்கியிருக்கும் நிறுவனம், நேஷனல் ஹவுஸிங் பேங்கினால்  அனுமதிக்கப்பட்டிருக்கவேண்டும்.  ஏற்கெனவே வாங்கிய கடன், ஆரம்பம் முதல் நடப்பு மாதம் வரை கட்டப்பட்டு வந்திருக்க வேண்டும். கடன் வாங்கிய வீடு, அப்ரூவ்டு மனையில், அப்ரூவ்டு பிளானில் கட்டப்பட்டிருக்க வேண்டும்.

வீட்டின் பேரில்,  வீட்டுக் கடன் அல்லாமல், டாப் அப் லோனும் வாங்கியிருந்தால், இரண்டுக்கும் சேர்த்தே, புதிய கடனுக்கு விண்ணப்பிக்க வேண்டும். சிபில் ஸ்கோர் 700-க்கு மேற்பட்டதாக இருக்கவேண்டும். ஏற்கெனவே கடன் கட்டுவதற்கான கால அளவில், மீதம் உள்ள கால அளவுக்கு, புதிய கடன் வழங்கப்படும்.  

கடன் ஒப்புதல் கடிதம் ஒரிஜினல், லோன் ஸ்டேட்மென்ட், ஏற்கெனவே கடன் வாங்கியுள்ள நிறுவனத்திடமிருந்து ஒரு கடிதம் வாங்க வேண்டும். அந்தக் கடிதத்தில், அங்கு டெபாசிட் செய்துள்ள டாக்குமென்ட் லிஸ்ட் மற்றும் இன்றைய தேதியில் நிலுவையில் உள்ள கடன் தொகை குறிப்பிடப்படவேண்டும்.

முகவரிச் சான்றிதழ், புகைப்படத்துடன்கூடிய அடையாள அட்டை மற்றும் இரண்டு பாஸ்போர்ட் சைஸ் புகைப்படம், கடந்த ஆறுமாத பே-சிலிப், (வியாபாரம் செய்பவராக இருந்தால், மூன்று வருடத்துக்கான இன்கம் டாக்ஸ் ரிட்டர்ன்), கணவன்/மனைவியின்  வருமானத்தை யும் கூடுதலாகக் கணக்கில் எடுக்கலாம்.

ஒரு வருட பேங்க் ஸ்டேட்மென்ட்,  கடைசியாக வீட்டுவரி கட்டிய ரசீது, 13 வருடத்துக்கான வில்லங்கச் சான்றிதழ், வீடு வாங்கியதற்கான பத்திரம் மற்றும் தாய்ப்பத்திர நகல் ஆகியவற்றைத் தரவேண்டும்.

தனியார் நிறுவனத்திலிருந்து முன்னதாகவே முடிவுக்குக் கொண்டுவருவதற்கு எந்தக் கட்டணமும் இல்லை. ஆனால், புதிதாகக் கடன் வாங்கும் வங்கிக்கு, லோன் பிராசஸிங் கட்டணம், வீட்டின் மதிப்பீட்டுக் கட்டணம்.  சட்ட ஆலோசனைக் கட்டணம் போன்றவற்றைக் கொடுக்க வேண்டியிருக்கும்.

தொகுப்பு : தெ.சு.கவுதமன்