வெளியிடப்பட்ட நேரம்: 11:27 (24/09/2013)

கடைசி தொடர்பு:10:49 (24/09/2013)

குரூப் இன்ஷூரன்ஸ், முதலாளியோ, தொழிலாளியோ... எல்லோருக்கும் லாபம்!

(நாணயம் விகடன்: 16-30 நவம்பர், 2007)

ன்ஷூரன்ஸ் என்பதே பொருளாதார ரீதியாக ஏற்படும் இழப்பைச் சரிசெய்வதற்குத்தான். அதனால் வசதியானவர்களை விட குறைந்த வருமானம் உள்ளவர்களுக்கு அது மிகவும் அவசியமானதாக இருக்கிறது. இருப்பினும் வசதி குறைவானவர்களில் எத்தனை பேருக்கு இன்ஷூரன்ஸ் இருக்கிறது என்று பார்த்தால், கிடைக்கும் பதில் அதிர்ச்சியூட்டுவதாகத்தான் இருக்கிறது. இந்நிலைக்கு மாற்றாகத்தான் நிறுவனங்கள் பலவும் தங்கள் ஊழியர்களுக்கு குரூப் பாலிசிகள் மூலம் காப்பீட்டு வசதியை வழங்குகின்றன.

குரூப் பாலிசிகளிலும் ஆயுள் காப்பீட்டு பாலிசிகள், பொதுக் காப்பீட்டு பாலிசிகள் என இரு பிரிவுகள் உள்ளன. பொதுக் காப்பீட்டில் மருத்துவக் காப்பீடுகளே அதிகமாக எடுத்துக்கொள்ளப்படுகின்றன.

ஆயுள் காப்பீட்டில் குரூப் பாலிசிகள் என்பது நிறுவனங்கள் தங்களிடம் வேலைபார்க்கும் ஊழியர்கள் அத்தனை பேருக்கும் மொத்தமாகச் சேர்த்து ஒரு பாலிசியாக எடுத்துக்கொள்வதுதான். இதன் மூலம் ஊழியர்களுக்கு ஏதாவது இழப்பு ஏற்படும்போது, நிறுவனங்கள் அதற்கான இழப்பீட்டை வாங்கித் தருகின்றன.

இப்படி நிறுவனங்கள் தங்கள் ஊழியர்களுக்காக எடுத்துத்தரும் பாலிசி எம்ப்ளாயர் - எம்ப்ளாயி குரூப் பாலிசி என்றழைக்கப்படுகிறது. இதனை தனிநபர்கள் எடுத்துக்கொள்ள முடியாது. நிறுவனத்தின் பெயரில் அனைவருக்கும் சேர்த்து ஒரே ஒரு பாலிசிதான் வழங்கப்படும். எனவே இதனை மாஸ்டர் பாலிசி என்பார்கள். இந்த பாலிசிக்கான பிரீமியத் தொகையை நிறுவனமே செலுத்திவிடும். இதைப்போல் கல்விக் கடன், வீட்டுக் கடன், தனிநபர் கடன்கள் பெறுபவர்களுக்கான குரூப் பாலிசிகளும் உள்ளன.

 இதுபோன்ற பாலிசிகள் ஊழியர்களுக்கு வேறு எந்தெந்த வகையில் எல்லாம் உதவியாக இருக்கிறது என்று எல்.ஐ.சி. நிறுவனத்தின் தென் பிராந்திய மேலாளரான மணிவண்ணனிடம் கேட்டோம்...

எம்ப்ளாயர் - எம்ப்ளாயி குரூப் பாலிசிகள்

''ஊழியர் ஏற்கெனவே தனிநபர் பாலிசி வைத்திருந்தாலும், இதனைக் கூடுதல் பாதுகாப்பாக எடுத்துக்கொள்ளலாம். பெரும்பாலானவர்கள் தங்களுக்குத் தேவையான அளவில் இன்ஷூரன்ஸ் எடுத்துக்கொள்வதில்லை. குறைவான இன்ஷூரன்ஸ் கவரேஜ்தான் அவர்களிடம் இருக்கும். இந்நிலையில் குரூப் பாலிசியை கூடுதல் வரப்பிரசாதமாக எடுத்துக்கொள்ளலாம். வருடத்துக்கு வருடம் வருமானம் அதிகரிக்கும்போது அதற்கு ஏற்ப இன்ஷூரன்ஸ் பாலிசித் தொகையையும் அதிகரித்துக்கொள்ள முடியும். ஆனால், அந்த முடிவை நிறுவனம்தான் எடுக்க முடியும்.

தனிநபர் பாலிசி எடுக்கும்போது இருக்கும் பல சிரமங்கள், குரூப் பாலிசி எடுக்கும்போது இருக்காது. ஆரோக்கியம் குறித்த விவரங்களால் தனிநபர் பாலிசியில் பிரீமியம் அதிகமாகக்கூடும். அல்லது பாலிசியே எடுக்க முடியாமல்கூடப் போய்விடலாம். ஆனால், குரூப் பாலிசிகளில் இவை எல்லாம் தேவை இல்லை. இந்த பாலிசியை எடுக்கும்போது நல்ல உடல் நிலையோடு இருக்கிறாரா என்று மட்டுமே பார்ப்பார்கள். இதற்கு மருத்துவப் பரிசோதனைகள் கிடையாது. சர்க்கரை நோய், ரத்தக் கொதிப்பு, பால்வினை நோய்கள், உடல் பருமன் போன்ற பிரச்னைகள் இருந்தாலும் குரூப் பாலிசியில் இன்ஷூரன்ஸ் எடுத்துக்கொள்ள முடியும்!

அதுமட்டுமல்ல, நிறுவனம் எடுத்துள்ள மெயின் பாலிசியுடன் கூடுதல் பிரீமியம் செலுத்தி, ரைடர்களையும் பெற்றுக்கொள்ள முடியும். இதனால் இரட்டைத் தொகை கிடைக்கும். அதேபோல் குறிப்பிட்ட பெரிய நோய் ஏதாவது இருப்பது தெரிந்தால், சிகிச்சை எடுப்பதற்கு கிரிட்டிக்கல் இல்னஸ் பாலிசித் தொகையையும் பெறமுடியும்'' என்றார் மணிவண்ணன்.

அடுத்து அவரிடம், ''நீண்ட விடுமுறையில் இருந்தாலும் காப்பீடு தொடருமா?'' என்று கேட்டோம்...

''மருத்துவ சிகிச்சை அல்லது வேறு ஏதாவது தவிர்க்க முடியாத காரணத்தால் நீண்டநாள் விடுமுறை எடுக்க நேரிடலாம். அப்போது நிறுவனம் அனுமதி அளித்து, பிரீமியத்தையும் செலுத்தும்பட்சத்தில் ஊழியர் மீதான இன்ஷூரன்ஸ் கவரேஜ் நடைமுறையில் இருக்கும். அவ்வாறு செலுத்தாதபோது அவை காலாவதியாகிவிடும்.

அப்படி காலாவதியாகிவிட்டால் பிறகு எப்போது வேலைக்குச் சேருகிறோமோ, அப்போது மறுபடியும் விண்ணப்பித்து, இன்ஷூரன்ஸ் கவரேஜ் பெற்றுக்கொள்ள முடியும். மேலும் நிறுவனங்கள் விரும்பினால் ஊழியரின் லீவ் சேலரியை ரொக்கமாக வழங்காமல், அந்தத் தொகைக்கு ஊழியரின் பெயரில் 'குரூப் லீவ் என்கேஷ்மென்ட் பாலிசி’ எடுத்துக் கொள்ளலாம். இதனால் அந்த ஊழியர் ஓய்வு பெறும் முன்னரே இறந்துவிட்டால், அவருடைய மீதமுள்ள வேலை நாட்களைக் கணக்கிட்டு அதற்கு உண்டான தொகையை அவருடைய குடும்பத்துக்கு வழங்கிவிடுவார்கள்'' என்ற மணிவண்ணன், குரூப் பாலிசி குறித்து மேலும் சில தகவல்களையும் சொன்னார்.

ஊழியர்கள் குரூப் பாலிசி எடுத்துக்கொடுத்த நிறுவனத்தில் வேலை செய்யும் வரைதான் காப்பீடு கிடைக்கும். ஆனால், அந்த நிறுவனத்தை விட்டு வேறு நிறுவனத்துக்கு மாறிவிட்டால், இந்த பாலிசியினால் எந்த விதப் பலனும் கிடைக்காது.

குரூப் பாலிசியை தனிநபர் பாலிசியாக மாற்றிக்கொள்ள முடியாது.

பெரும்பாலும் இவ்வகை பாலிசிகள் அனைத்தும் ரிஸ்க்கை மட்டும் கவரேஜ் செய்வதாக இருக்கும்.

நாமினியாக மனைவியை நியமித்துக்கொள்ளலாமே தவிர, குரூப் மெடிக்ளைம் பாலிசிகளில் உள்ளது போல் மனைவி, குழந்தைகளை இதில் சேர்த்துக்கொள்ள முடியாது.

அதிகபட்சமாக அறுபத்தைந்து வயது வரை இந்தக் காப்பீட்டைப் பெறமுடியும். ஓய்வு பெற்றபிறகு தொடர முடியாது. ஓய்வு பெறும்போதும் எந்தப் பலனும் கிடைக்காது.

விபத்தினால் தற்காலிக ஊனம் அல்லது நிரந்தர ஊனம் ஏற்பட்டாலும் இந்த குரூப் பாலிசிகள் மூலம் எந்த இழப்பீடும் ஓய்வு ஊதியப் பாலிசிகளில் வழங்கப்படுவதில்லை. ஆனால், நிறுவனம் தொடர்ந்து அவரை பணியில் வைத்திருந்து பாலிசிக்கான பிரீமியம் செலுத்தினால் இன்ஷூரன்ஸ் கவரேஜ் மட்டும் இருக்கும். மேலும் இப்போது குருப் டேர்ம் பாலிசிகளில் அந்தக் காப்பீடுகள் கிடைக்கின்றன.

கடன் வாங்குபவர்களுக்கான குரூப் பாலிசிகள்!

ங்கிக் கடன், தனிநபர் கடன், கல்விக் கடன் பெறுபவர்களுக்கு என குரூப் பாலிசிகள் உள்ளன.

வீட்டுக் கடனை வங்கியில் பெறும்போது, அந்த வங்கிகள் வீட்டுக் கடன் பெறுபவர்களை ஒரு குரூப் ஆக்கி பாலிசி பெற்றுக்கொள்கிறது. இதற்கான பிரீமியத் தொகையைக் கடன் பெற்றவர்களிடம் இருந்து பெற்றுச் செலுத்தும். வீட்டுக்கடன் தரும் பெரும்பாலான வங்கிகள் இந்தக் காப்பீட்டைப் பெற்றுத் தருகின்றன.

தனிநபர் கடன்கள் வழங்கும் வங்கிகளும் இதே முறையைப் பின்பற்றி இன்ஷூரன்ஸ் நிறுவனங்களின் மூலம் காப்பீட்டைப் பெற்றுக்கொள்கின்றன. கடன் பெறும்போது, இதுபோன்ற காப்பீடுகள் உள்ளதா எனத் தெரிந்துகொள்வது நல்லது. இப்போது தனியார் நிறுவனங்களும் இதே பாணியைப் பின்பற்ற ஆரம்பித்துள்ளன. இதனால் நிறுவனத்தில் கடன் பெற்ற ஊழியர் இறந்து விடும்போது நிறுவனங்களுக்குக் காப்பீடு மூலமாக கடன் தொகை கிடைத்துவிடுகிறது. ஊழியர்களின் குடும்பத்துக்கும் கடன் சுமை இல்லாமல் போய்விடுகிறது. இதேபோல் கல்விக் கடனுக்கும் குரூப் பாலிசி எடுத்துக்கொள்ள வழியிருக்கிறது.

ஆர்.ரெங்கராஜ், படம்: உசேன்

நீங்க எப்படி பீல் பண்றீங்க


டிரெண்டிங் @ விகடன்