Published:Updated:

நல்ல லாபம் தரும் நாட்டு ரகத் தட்டைப்பயறு... பாரம்பர்ய முறையில் விதை உற்பத்தி!

நல்ல லாபம் தரும் நாட்டு ரகத் தட்டைப்பயறு... பாரம்பர்ய முறையில் விதை உற்பத்தி!
பிரீமியம் ஸ்டோரி
நல்ல லாபம் தரும் நாட்டு ரகத் தட்டைப்பயறு... பாரம்பர்ய முறையில் விதை உற்பத்தி!

மகசூல்ஜி.பழனிச்சாமி, படங்கள்: தி.விஜய்

நல்ல லாபம் தரும் நாட்டு ரகத் தட்டைப்பயறு... பாரம்பர்ய முறையில் விதை உற்பத்தி!

மகசூல்ஜி.பழனிச்சாமி, படங்கள்: தி.விஜய்

Published:Updated:
நல்ல லாபம் தரும் நாட்டு ரகத் தட்டைப்பயறு... பாரம்பர்ய முறையில் விதை உற்பத்தி!
பிரீமியம் ஸ்டோரி
நல்ல லாபம் தரும் நாட்டு ரகத் தட்டைப்பயறு... பாரம்பர்ய முறையில் விதை உற்பத்தி!

ல இயற்கை ஆர்வலர்கள், இயற்கை விவசாயத்தை முன்னெடுப்பதோடு... அழியும் நிலையில் உள்ள பாரம்பர்ய விதைகளைச் சேகரித்துப் பாதுகாப்பது, அவற்றைப் பெருக்குவது போன்ற முயற்சிகளிலும் ஈடுபட்டு வருகிறார்கள். அந்த வகையில், தட்டைப்பயறு, உளுந்து, எள் ஆகிய பயிர்களில் பாரம்பர்ய ரகங்களைப் பல ஆண்டுகளாகச் சாகுபடி செய்வதோடு, விதை உற்பத்தியும் செய்து வருகிறார், கோயம்புத்தூர் மாவட்டத்தைச் சேர்ந்த ‘முன்னோடி இயற்கை விவசாயி’ பி.ஆர்.சுப்பிரமணியம்.

அன்னூர் அடுத்துள்ள பட்டக்காரன்புதூர் கிராமத்தில்தான் சுப்பிரமணியத்தின் தோட்டம் உள்ளது. ஒரு முற்பகல் வேலையில் அவரது வீட்டுக்குச் சென்றோம். வீட்டு வாசலில் தட்டைப்பயறைப் பரப்பித் தரம் பிரித்துக் கொண்டிருந்தார், சுப்பிரமணியம். விதைகள் சிறப்பிதழுக்காக அவரிடம் பேசினோம்.

நல்ல லாபம் தரும் நாட்டு ரகத் தட்டைப்பயறு... பாரம்பர்ய முறையில் விதை உற்பத்தி!

“எனக்குப் பூர்வீகமே இந்த ஊருதான். பரம்பரையான விவசாயக்குடும்பம். நாலு ஏக்கர் மானாவாரி நெலம் இருக்கு. வானம் பார்த்த பூமி. தட்டைப்பயறு, உளுந்து, எள், துவரைனு மாத்தி மாத்தி பட்டம் தவறாமல் விதைக்கிறோம். அதிக விளைச்சல் கொடுக்குற வீரிய ரக விதைகள், புதுசு புதுசா வந்திருக்கு. நிறைய விவசாயிங்க அதைத்தான் விதைக்கிறாங்க. அந்த விதைகளைச் சாகுபடி செஞ்சா ஒவ்வொரு போகத்துக்கும் விதையை விலை கொடுத்து வாங்க வேண்டியிருக்கும். நான், எங்க பாட்டன் பூட்டன் பயன்படுத்தின பாரம்பர்ய விதைகளைத்தான் பட்டம் தவறாமல் விதைக்கிறேன். ஒவ்வொரு தடவையும் விளையுற பயிர்கள்ல இருந்து, அடுத்த போக விதைப்புக்குத் தேவையான விதைகளை எடுத்து வெச்சுக்குறேன். எந்தக்காலத்திலும் விதைகளை வெளியில இருந்து விலை கொடுத்து வாங்குறதே இல்லை. இப்ப பாரம்பர்ய விவசாயம் பத்தின விழிப்பு உணர்வு அதிகரிச்சுட்டு இருக்குறதால நிறைய விவசாயிகள் தேடி வர ஆரம்பிச்சிருக்காங்க. நான், விளைய வெக்கிறதுல பெரும்பகுதியை விதைக்காகத்தான் விற்பனை செஞ்சுட்டுருக்கேன்.

அறுவடை முடிஞ்சதும் அடிச்சு தூத்தி, மூட்டை பிடிச்சு சுடச்சுட ஏவாரம் செஞ்சா உடனடியா விலை கிடைச்சுடும்தான். ஆனா, நான் கொஞ்சம் பொறுமையா இருந்து விதைகளைக் காயவெச்சுச் சுத்தப்படுத்தி, பக்குவப்படுத்தி மூட்டை பிடிச்சு வெச்சுடுவேன். ‘விதை உறங்கும் காலம்’ முடிஞ்சதும், என்னோட விதைப்புக்கு எடுத்து வெச்சதுபோக, மீதியை விதைக்காக விற்பனை செய்றேன்” என்ற சுப்பிரமணியம் தனது விவசாயம் குறித்துச் சொல்ல ஆரம்பித்தார்.

“போன பங்குனிப்பட்டத்துல ‘குத்துக்காராமணி’ங்கிற நாட்டு ரகத் தட்டைப்பயறை ரெண்டரை ஏக்கர் நிலத்துல விதைச்சுருந்தேன். அதை அறுவடை பண்ணி எடுத்து வெச்சுருக்கேன். அதே வயல்ல இப்போ எள் விதைச்சுருக்கேன். அது காய்ப்புப் பருவத்துல இருக்கு. இதோடு ரெண்டு ஏக்கர் நிலத்துல உளுந்து போட்டு அறுவடை பண்ணி, அதையும் மூட்டை பிடிச்சு வெச்சுருக்கேன். ரெண்டரை ஏக்கர் நிலத்துல 1,000 கிலோ தட்டைப்பயறு கிடைச்சது. இப்போ சுத்தப்படுத்தி மூட்டை பிடிச்சு வெச்சுருக்கேன். நல்லாக் காய வெச்சு எடுத்த பயறை 45 நாள் விதை உறக்கத்துல வெச்சுருந்து, அதுக்குப் பிறகு விற்பனை செய்யலாம். இப்போதைக்கு தட்டைப்பயறு விதை ஒரு கிலோ 80 ரூபாய் அளவுக்கு விலை போகுது. அந்தக் கணக்குபடி ரெண்டரை ஏக்கருக்கு 80 ஆயிரம் ரூபாய் வருமானம். இதுல உழவு, அறுவடைனு எல்லாச் செலவும் போக 50,000 ரூபாய் லாபமாகக் கிடைக்கும்” என்ற சுப்பிரமணியம் நிறைவாக,

“நாட்டு ரகங்களை விதைச்சா விதைக்காக யார்கிட்டயும் கையேந்த வேண்டியதில்லை. நான், நிலக்கடலை, பாசிப்பயறு, தட்டைப்பயறு, எள், துவரைனு மாத்தி மாத்தி மானாவாரியில் சாகுபடி செய்றேன். வருஷக்கணக்கா அந்த விதைகளையேத்தான் எடுத்து வெச்சுட்டுருக்கேன். நாட்டு ரக விதைகளை மத்தவங்களுக்குக் கொடுக்குறதுல எனக்கு ஆத்ம திருப்தி கிடைக்குது” என்று சொல்லிவிட்டுத் தட்டைப்பயறைத் தரம் பிரிக்கும் பணிகளில் மும்முரமானார்.  

தொடர்புக்கு,

பி.ஆர்.சுப்பிரமணியம்,

செல்போன்:98945 05188.

வேப்பங்கொட்டைக் கரைசல்

5 கிலோ வேப்பங்கொட்டையை நன்றாக இடித்து 100 லிட்டர் தண்ணீரில் போட்டு 3 நாள்கள் ஊற வைக்க வேண்டும். பிறகு அக்கரைசலை வடிகட்டி 10 லிட்டர் தண்ணீருக்கு 1 லிட்டர் வீதம் கலந்து பனிப்புகைபோலத் தெளித்தால், சாறு உறிஞ்சும் பூச்சிகள் அண்டாது.

இப்படித்தான் சாகுபடி செய்யணும்!

ஒரு ஏக்கர் பரப்பில் மானாவாரியாகத் தட்டைப்பயறுச் சாகுபடி செய்யும் முறை குறித்துச் சுப்பிரமணியம் சொன்ன விஷயங்கள் இங்கே...

தேர்வு செய்த ஒரு ஏக்கர் நிலத்தில் கோடை உழவு செய்து காயவிட வேண்டும். இதனால், மண்ணில் உள்ள புழு, பூச்சிகள் அழிந்துவிடும். மூன்று சதவிகித பஞ்சகவ்யா கரைசலில் நனைத்துச் செறிவூட்டப்பட்ட 1,000 கிலோ தென்னைநார்க் கழிவுத்துகளை, நன்றாகச் சலித்த 5 டன் தொழுஉரத்துடன் கலந்து நிலத்தில் கொட்டிப்பரப்பி, இரண்டு முறை உழ வேண்டும். தென்னை நார்க்கழிவு, மண்ணில் ஈரப்பதத்தை நிலைநிறுத்தும். பிறகு, மழை அறிகுறியை வைத்து 8 கிலோ அளவு விதைநேர்த்தி செய்யப்பட்ட தட்டைப்பயறு விதையைத் தூவி ‘உழவு சால்’ முறையில் விதைக்க வேண்டும். அடுத்து கிடைக்கும் மழையைக்கொண்டு விதைகள் முளைவிடும்.

நல்ல லாபம் தரும் நாட்டு ரகத் தட்டைப்பயறு... பாரம்பர்ய முறையில் விதை உற்பத்தி!

விதைத்த 15 மற்றும் 30-ம் நாள்களில் களைகளை அப்புறப்படுத்த வேண்டும். 20, 35 மற்றும் 50-ம் நாள்களில்... 10 லிட்டர் தண்ணீருக்கு 300 மில்லி பஞ்சகவ்யா என்ற விகிதத்தில் கலந்து கைத்தெளிப்பான் மூலம் செடிகள் முழுவதும் நனையும்படி தெளிக்கவேண்டும்.

காய்பிடிக்கும் பருவத்தில், சாறு உறிஞ்சும் பூச்சிகளின் தாக்குதல் இருக்கும் என்பதால், வேப்பங்கொட்டை கரைசலைத் தெளிக்க வேண்டும்.

குறித்த நேரத்தில் மழை கிடைக்காவிடில், செடிகள் வாடிப் பயிர் வளர்ச்சி பாதிக்கப்படும். அதுபோன்ற சமயங்களில் குளிர்நீர்ப் பாசனம் செய்தால், பயிர்கள் வறட்சியைத் தாக்குப்பிடித்து வளரும். 100 லிட்டர் தண்ணீரில் 10 கிலோ அளவு ஐஸ்கட்டியை போட்டு, நிழலில் ஒரு மணிநேரம் வைத்திருந்தால், ஐஸ்கட்டிகள் முழுவதும் கரைந்து தண்ணீர் குளிர்ந்துவிடும். இந்த நீரை, வெயில் நேரத்தில் கைத்தெளிப்பான் மூலம் தெளித்தால் வாடியிருக்கும் செடிகள் செழிப்பாக மாறும்.

விதைத்த 70-ம் நாளுக்கு மேல் செடிகளில் உள்ள காய்கள் பச்சை நிறத்தில் இருந்து பழுப்பு நிறத்துக்கு மாறும். அந்தச் சமயத்தில், செடிகளில் உள்ள காய்களைப் பறித்து, மூன்று நாள்கள் காய வைத்து... கம்புகள் கொண்டு தட்டினால், பயறு பிரிந்துவிடும். பிறகு நன்றாகத் தூற்றிப் புடைத்துச் சேகரிக்க வேண்டும். தட்டைப்பயறை மூட்டை பிடித்து, ஒரு கொத்து வேப்பிலையும் கைப்பிடி வரமிளகாயும் போட்டு மூட்டைகளைத் தைத்துப் பாதுகாக்கலாம். தட்டைப்பயறின் தோலை மாடுகளுக்குத் தீவனமாகக் கொடுக்கலாம்.

விதைநேர்த்தி

அரைக்கிலோ பாஸ்போ பாக்டீரியாவை, அரைலிட்டர் ஆறிய அரிசிக்கஞ்சியில் கலந்து, அக்கலவையில் விதைகளை மூழ்க வைத்து எடுத்து 30 நிமிடங்கள் நிழலில் உலர்த்தி விதைக்க வேண்டும். இது, ஒரு கிலோ விதைக்கான அளவு.