Published:Updated:

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!
பிரீமியம் ஸ்டோரி
விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

வழிகாட்டல்த.ஜெயகுமார், படங்கள்: க.தனசேகரன்

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

வழிகாட்டல்த.ஜெயகுமார், படங்கள்: க.தனசேகரன்

Published:Updated:
விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!
பிரீமியம் ஸ்டோரி
விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

யற்கை விவசாயத்தின் முதல்படியே பாரம்பர்ய விதைகளைக் கையில் எடுப்பதுதான். அதன்படி, பாரம்பர்ய விதைகளைப் பயிர் செய்யச் சொல்லி அறிவுறுத்துவதோடு இயற்கை விவசாயம் செய்வதற்கான பயிற்சி, விளைபொருள் விற்பனை போன்ற விஷயங்களிலும் உதவி, விவசாயிகளின் வாழ்வாதாரத்துக்கு வழி செய்து தருகிறது, ‘டி.வி.எஸ்’ நிறுவனத்தின் கீழ் இயங்கும் ‘டி.எஸ்.சீனிவாசன் கிராமப் பயிற்சி மையம்’ (T.S.Srinivasan Centre for Rural Training TSS-CRT).

இம்மையம், கிருஷ்ணகிரி-ஓசூர் தேசிய நெடுஞ்சாலையில் உள்ள பத்தலப்பள்ளி பகுதியில் ‘டி.வி.எஸ் அகாடமி பள்ளி’க்கு அருகே அமைந்துள்ளது.

ஒரு காலைப்பொழுதில் மையத்துக்குள் நுழைந்தோம். இயற்கைக் காய்கறிகள், பழங்களை ‘பேக்’ செய்து கொண்டிருந்தனர், பணியாளர்கள். அப்பணிகளை மேற்பார்வையிட்டுக் கொண்டிருந்த மையத்தின் ஆலோசகர் ராஜகோபாலன் நம்மை வரவேற்றுப் பேச ஆரம்பித்தார்.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

“டி.வி.எஸ் நிறுவனத்தின் ஓர் அங்கமான ‘டி.வி.எஸ் கல்வி மையம்’ சார்பில், 1997-ம் ஆண்டு இம்மையம் தொடங்கப்பட்டது. இதை நிறுவியவர், டாக்டர் மாலினி சீனிவாசன். இவர், ‘டி.வி.எஸ் மோட்டார் கம்பெனி’யை நிறுவிய டி.வி.சுந்தரம் ஐயங்காருடைய பேத்தி. ஆரம்பத்தில், நபார்டு வங்கியுடன் இணைந்து, பாசன மேம்பாடு குறித்த விஷயங்கள்தான் மையத்தின் மூலம் முன்னெடுக்கப்பட்டன.

அந்தச் சமயம், ‘இயற்கை வேளாண் விஞ்ஞானி’ நம்மாழ்வார், பாரம்பர்ய இயற்கை விவசாயம் மற்றும் பசுமைப்புரட்சியின் சீரழிவு குறித்து விழிப்பு உணர்வுப் பணிகளில் ஈடுபட்டுக் கொண்டிருந்தார். அந்த விஷயங்கள், எங்கள் மையத்தின் நிறுவனருக்கும் பிடித்துபோக... ‘மற்ற பணிகளைவிடப் பாரம்பர்ய இயற்கை விவசாயத்தைத்தான் முதலில் விவசாயிகளிடையே பரப்ப வேண்டும்’ என்று எண்ணி, அது குறித்த பணிகளில் இறங்கினார்.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

முதலில் ஓசூரைச் சுற்றியுள்ள சென்னாத்தூர், மோர்னப்பள்ளி பகுதிகளில் உள்ள விவசாயிகளுக்கு இயற்கை விவசாயம் சம்பந்தமாகப் பயிற்சி கொடுத்து, நாட்டு விதைகளைப் பயிர் செய்ய அறிவுறுத்தினோம். தொடர்ந்து சுற்றுவட்டார விவசாயிகளுக்கும் பாரம்பர்ய விதைகள், மண்புழு உரம், இயற்கைப் பூச்சிவிரட்டிகள் குறித்து விழிப்பு உணர்வு பயிற்சிகள் அளித்தோம். இப்பயிற்சிகளில் நம்மாழ்வாரின் பணி முக்கியமானது. அவரும் இந்த மையத்துக்கு வந்து பயிற்சி அளித்திருக்கிறார். எங்கள் மையம் சார்பில் உருவாக்கப்பட்ட ‘ஒருங்கிணைந்த இயற்கை வேளாண்மை’ புத்தகத்திலும் அவர் பங்களித்திருக்கிறார்” என்ற ராஜகோபாலன் விளைபொருள் விற்பனை குறித்த தகவல்களைச் சொல்ல ஆரம்பித்தார்.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

“பயிற்சிகள் மூலம் இயற்கை விவசாயத்துக்கு மாறிய விவசாயிகள், இயற்கை விளைபொருள்களை விற்பனை செய்ய மிகவும் சிரமப்பட்டனர். அதற்காக, 2013-ம் ஆண்டு ‘டி.வி.எஸ் இயற்கை விவசாயிகள் குழு’ என்ற பெயரில் ஒரு குழுவை உருவாக்கினோம். இக்குழுவில் உள்ள விவசாயிகள் உற்பத்தி செய்யும் விளைபொருள்களை, ‘டி.வி.எஸ் அக்ரோ’ என்ற பெயரில் விற்பனை செய்து வருகிறோம். இயற்கை முறையில் உற்பத்தி செய்யப்படும் பொருள்களைச் சந்தை விலையைவிடக் கூடுதல் விலை கொடுத்து வாங்குகிறோம். அவற்றைத் தரம் பிரித்து, பேக் செய்து ஓசூரில் உள்ள ‘கம்பெனி’களின் கேன்டீன்கள், விற்பனை மையங்களுக்குக் கொடுக்கிறோம். பேக்கிங் சார்ஜ், போக்குவரத்துக் கட்டணம் ஆகியவற்றையும் கணக்கில் எடுத்துக்கொண்டு பொருள்களுக்கான விலையை நிர்ணயிக்கிறோம்.

பொருள்களை அனுப்பும் விவசாயிகளுக்கு ஒவ்வொரு செவ்வாய்க்கிழமையும், பணப்பட்டுவாடா செய்கிறோம். வங்கிக் கணக்கு உள்ள விவசாயிகளுக்கு வங்கி மூலமாகவும், மற்றவர்களுக்கு நேரடியாகவும் பணப் பட்டுவாடா செய்கிறோம். மொத்தம் 200 விவசாயிகள், எங்களிடம் விளை பொருள்களை வழங்குகிறார்கள். இந்த விவசாயிகளுக்கு இயற்கை விவசாயத்தில் அவ்வப்போது ஏற்படும் சந்தேகங்களை நிவர்த்தி செய்வதற்காக ஒருவரை நியமித்திருக்கிறோம்” என்ற ராஜகோபாலன், ‘டி.வி.எஸ் இயற்கை வேளாண் நிறுவன’த்தின் ஒருங்கிணைப்பாளர் ராமஜெயத்தை நமக்கு அறிமுகப்படுத்தினார்.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

தொடர்ந்து பேசிய ராமஜெயம், “டி.வி.எஸ் இயற்கை விவசாயக் குழுவில் 50 பேர் முழு இயற்கை விவசாயிகளாகவும் 150 பேர், தங்கள் நிலத்தின் ஒரு பகுதியை மட்டும் இயற்கை விவசாயத்துக்காக ஒதுக்கி இயற்கை வேளாண்மையை செய்பவர்களாகவும் இருக்கிறார்கள். தேவைப்படும் காய்கறிகள் குறித்த விவரங்களை முன்னரே சொல்லி, சுழற்சி முறையில் விதைக்கச் சொல்வோம். அதிகளவில் காய்கறிகள் இருந்தால், நாங்களே வண்டி அனுப்பிக் கொள்முதல் செய்வோம். குறைவாக இருக்கும்பட்சத்தில் விவசாயிகளே கொண்டு வந்து விடுவார்கள்” என்றவர் நம்மைத் தருமபுரி மாவட்டம், காரிமங்கலத்தில் செயல்பட்டு வரும் கொள்முதல் நிலையத்துக்கு அழைத்துச் சென்றார்.

காரிமங்கலத்திலிருந்து மொரப்பூர் செல்லும் சாலையில் அமைந்திருக்கிறது இந்நிலையம். விவசாயிகள் வாழை, தக்காளி, வெண்டை, கத்திரி என்று மையத்துக்குக் கொண்டு வந்து, எடைபோட்டு விற்பனை செய்து கொண்டிருந்தனர். கடந்த வாரம் விற்பனை செய்த காய்கறிகளுக்குப் பணப்பட்டுவாடாவும் நடந்து கொண்டிருந்தது.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

டி.வி.எஸ் இயற்கை விவசாயக் குழுவின் தலைவர் தங்கவேலுவிடம் பேசினோம். “நாலு வருஷத்துக்கு முன்னாடி, டி.வி.எஸ்காரங்க, ஓசூர்ல இருக்கிற பயிற்சி மையத்துல எங்களுக்கு இயற்கை விவசாயப் பயிற்சி கொடுத்தாங்க. எனக்கு அஞ்சரை ஏக்கர் நிலமிருக்கு. அவங்க சொல்லிக் கொடுத்ததை வெச்சு, மண்புழு உரத்தொட்டி கட்டி மண்புழு உரம் தயாரிச்சு பயிர்களுக்குக் கொடுத்தேன். அதோட, பஞ்சகவ்யா, மீன் அமினோ அமிலம், ஐந்திலைக் கரைசல்னு தயாரிச்சுப் பயன்படுத்த ஆரம்பிச்சேன்.

யூரியாவைக் கொடுத்ததும் செடிகள் புசுபுசுனு வளர்ற மாதிரியே, பஞ்சகவ்யாவைக் கொடுத்ததும் வளர்ந்ததைப் பாத்தப்போ ஆச்சர்யமா இருந்துச்சு. முன்னாடி புடல், பாகல், பீர்க்கன்னு கொடிக் காய்கறிகளைச் சாகுபடி செஞ்சேன். இப்போ ஒன்றரை ஏக்கர் நிலத்துல ரெட்லேடி பப்பாளி போட்டிருக்கேன். மஞ்சள், அதுக்கு ஊடுபயிரா வெங்காயம் போட்டிருக்கேன். கரும்பும் நடவு செஞ்சுருக்கேன். எல்லாமே இயற்கை முறைதான். இயற்கை இடுபொருள்களைத் தயாரிக்கிறதுக்கு, ரசாயன உரம், பூச்சிக்கொல்லிக்கு ஆன செலவில் பாதிதான் செலவாகுது. ஆனா, மகசூல் கொஞ்சம் குறைவாத்தான் இருக்கு. இன்னும் கொஞ்ச நாள்ல மண் நல்ல வளமாயிடுச்சுன்னா மகசூல் அதிகமாயிடும்.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!
விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

‘அபீடா’ மூலமா கொடுக்கிற மூன்றாம் நபர் சான்றளிப்பு மூலம், எங்க இயற்கை விவசாயக் குழுவுக்குத் தரச்சான்றிதழ் வாங்கியிருக்கோம். அதனால, டி.வி.எஸ்.ஸுக்கே விளைபொருள்களைக் கொடுக்குறதால, விற்பனைக்குப் பிரச்னையில்லை. மார்க்கெட் விலையைவிடக் கூடுதல் விலை கிடைக்குது. பணமும் பிரச்னை இல்லாம, பேங்க் அக்கவுன்ட்டுக்கு வந்துடுது.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

இயற்கை விவசாயத்தைக் கையிலெடுத்ததால, இந்த அறுபது வயசுலயும் நான் ஆரோக்கியமா இருக்கேன். சரியான நேரத்துலதான் இயற்கை விவசாயத்தைக் கையில் எடுத்திருக்கோம்னு நம்பறேன். ரசாயன உரமே கதினு கிடந்த எங்களுக்கு இயற்கை விவசாயத்தை அறிமுகப்படுத்தி, விற்பனைக்கும் வழி செஞ்சு கொடுத்திருக்காங்க டி.வி.எஸ் நிறுவனத்துக்காரங்க” என்று, நன்றிப்பெருக்கோடு சொன்னார், தங்கவேலு.

தெல்லனஅள்ளி கிராமத்தைச் சேர்ந்த விவசாயி சவுந்தர ராஜனிடம் பேசினோம். “நான் எம்.பி.ஏ பட்டதாரி. வேலைக்குப் போக விருப்பமில்லாம விவசாயத்துக்கு வந்துட்டேன். 4 ஏக்கர் இறவைப் பாசன நிலம் இருக்கு. செந்தூரன் ரக மா சாகுபடி செஞ்சுருக்கேன். இந்த சீசன்ல வெளிமார்க்கெட்ல ஒரு கிலோ மாங்காய் 15 ரூபாய்ல இருந்து 18 ரூபாய் வரைதான் விற்பனையாச்சு. ஆனா, நான் ஒரு கிலோ 22 ரூபாய்னு விற்பனை செஞ்சுருக்கேன். அதுக்குக் காரணம் டி.வி.எஸ்காரங்கதான். மூணு வருஷமா டி.வி.எஸ்ஸுக்குக் காய்கறிகள், பழங்களைச் சப்ளை பண்ணிட்டு இருக்கேன். இயற்கை முறையிலதான் மா சாகுபடி செய்றேன். பஞ்சகவ்யா மட்டும் கொடுத்தாலே நல்ல மாற்றம் தெரியுது.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!
விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

இப்போ ஏலக்கி வாழை, வெள்ளரி ரெண்டையும் சாகுபடி செஞ்சுட்டுருக்கேன். பசுமைக்குடில் அமைச்சுருக்கேன். அதுல ரசாயன விவசாயம்தான் செய்றேன். ஆனா, டி.வி.எஸ் மையத்துக்கு அனுப்புற விளைபொருள்களை இயற்கை முறையிலதான் சாகுபடி செய்றேன். இயற்கை முறை சாகுபடியில எப்ப சந்தேகம்னாலும் அவங்களுக்குப் போன் பண்ணிக் கேட்டாலே, ஆலோசனை கொடுத்திடுறாங்க. பக்கத்திலேயே இருக்கிறதால, விளைபொருள்களைக் கொண்டு போறதும் சுலபமா இருக்கு. அவங்கதான் ஒரு நிலையான வருமானத்துக்கு வழிகாட்டியிருக்காங்க. இயற்கை விவசாயத்து மேல வந்த நம்பிக்கையால, இப்ப ஒரு காங்கேயம் நாட்டு மாட்டையும் வாங்கியிருக்கேன்” என்றார் உற்சாகத்தோடு.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!
விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

திண்டல் ஊராட்சியைச் சேர்ந்த சேகர், டி.வி.எஸ் இயற்கை விவசாயக் குழுவின் செயலாளராக இருக்கிறார். அவரிடம் பேசியபோது, “இங்கே வாங்குற காய்கறிகளைத் தரம் பிரிச்சு... தரமானதை மட்டும்தான் வாங்குறாங்க. அதனால, அதுக்குத் தகுந்தமாதிரி தக்காளியைச் சாகுபடி செய்றேன். இயற்கை விவசாயத்துல தரமா விளைவிக்க முடியுமானு ஆரம்பத்துல ஒரு சந்தேகம் இருந்துச்சு. அவங்க கொடுத்த தொழில்நுட்ப ஆலோசனைகளைக் கடைப்பிடிச்சா, இயற்கை முறையில தரமா சாகுபடி செய்ய முடியுது. வெளி மார்க்கெட்ல தக்காளி விலை ரொம்பக் குறைவா இருக்குற சமயத்துலயும் இவங்க கூடுதல் விலை கொடுத்து வாங்கிக்கிறாங்க. தேவைப்படுற சமயங்கள்ல பயோ பூச்சிவிரட்டிகளையும் பயன்படுத்துறேன்.

பெரும்பாலும் நல்ல மகசூல் கொடுக்கக்கூடிய நாட்டு விதைகளைத்தான் பரிந்துரை செய்றாங்க. எங்களுக்குப் பரிந்துரைக்கிறதுக்கு முன்னாடி சோதனை செஞ்சு பார்த்துடுறாங்க. அதனால, சிரமமில்லாம மகசூல் எடுக்க முடியுது. மண்புழு உரம், பஞ்சகவ்யானு இடுபொருள்களை எங்களுக்குள்ள பகிர்ந்துக்கிறோம். புதுசா குழுவுல இணையுறவங்களுக்கு வழிகாட்டுறோம். இயற்கை விவசாயம் பத்தி ஒண்ணுமே தெரியாத நாங்க, வெற்றிகரமா இயற்கை விவசாயம் செய்றதுக்குக் காரணமா இருக்கிற டி.வி.எஸ் நிறுவனத்துக்குதான் நன்றி சொல்லணும்” என்றார்.

இயற்கை விவசாயத்துக்காக இயங்கி வரும், டி.வி.எஸ் நிறுவனத்துக்கு வாழ்த்துகளைச் சொல்லி விடைபெற்றோம்.     

தொடர்புக்கு:

டி.எஸ்.சீனிவாசன்

கிராம பயிற்சி மையம்,

பத்தலப்பள்ளி, சிப்காட் பேஸ்-2,

ஒசூர்-635130

கிருஷ்ணகிரி மாவட்டம்.

தொலைபேசி: 04344 260161

ராமஜெயம்,செல்போன்: 95855 24822
முத்துக்குமார்,செல்போன்: 95855 24815

மின்னஞ்சல்:

marketing@tvsagro.com

இணையதளம்: www.tvsagro.com

“ரசாயன உரங்களைப் பயன்படுத்தக் கூடாது!”

காரிமங்கலத்தில் உள்ள கொள்முதல் நிலைய ஒருங்கிணைப்பாளர் முத்துக்குமார், “சுற்றியிருக்கிற போச்சம்பள்ளி, திப்பம்பட்டி, தருமபுரினு சுமார் 20 கிலோமீட்டர் தொலைவுல இருக்கிற கிராமங்கள்ல இருந்து காய்கறிகள் வருது. காய்கறிகள் மட்டுமில்லாமல் தேங்காய், எலுமிச்சை, வாழை, அரிசி, சிறுதானியங்கள்னும் கொள்முதல் செய்றோம்.

விதை முதல் விளைபொருள் விற்பனை வரை...வழிகாட்டும் ஓசூர் டி.வி.எஸ் நிறுவனம்!

விவசாயிகளுக்குப் பயிர்ல ஏதாவது பிரச்னைனா என்னைதான் கூப்பிடுவாங்க. இயற்கைப் பூச்சிவிரட்டிகளுக்குக் கட்டுப்படாத நோய்களுக்குத் தரமான பயோ பூச்சிவிரட்டிகளைப் பரிந்துரைக்கிறோம். எக்காரணத்தைக் கொண்டும் ரசாயனங்களைப் பயன்படுத்தக்கூடாதுங்கிறது எங்கள் நோக்கம். அதைப் புரிஞ்சுக்கிட்டு விவசாயிகளும் சாகுபடி செய்றாங்க” என்றார்.

பயிற்சி இலவசம்!

ஒசூரில் செயல்பட்டு வரும் பயிற்சி மையத்தைப் பற்றிப் பேசிய ராமஜெயம், “ஒவ்வோர் ஆண்டும் விதைத்திருவிழாவை நடத்தி வருகிறோம். புடல், பீர்க்கன், பாகல், அவரை, சுரை, வெண்டி, கொத்தமல்லி மாதிரியான பயிர்களுக்கு நாட்டு விதைகளை, விதைப் பரிமாற்றம் முறையில் விவசாயிகளுக்குக் கொடுக்கிறோம்.

நல்ல மகசூல் கொடுக்கிற சந்தை வாய்ப்புள்ள காய்கறி விதைகளை விதைக்கிறதுக்கும் வழிகாட்டுறோம். அந்த விதைகளை விதைநேர்த்தி செய்து விதைக்கிறதுக்கும் சொல்லி தர்றோம். பீட்ரூட், காலிஃபிளவர், ரோஸ்மேரி, நூக்கல், கேரட்னு தோட்டக்கலைப் பயிர்களுக்கான சாகுபடி ஆலோசனைகளையும் கொடுக்கிறோம். மரப்பயிர்கள் சாகுபடிக்கான ஆலோசனைகளும் கிடைக்கும்.

இந்த மையம் 10 ஏக்கர் பரப்பளவு கொண்டது. மண்புழு உரத்தொட்டி, பஞ்சகவ்யா, அமுதக்கரைசல், மூலிகைப் பூச்சிவிரட்டி என இயற்கை விவசாயத்தோடு தொடர்புடைய அனைத்துக்கும் பயிற்சியளிக்கிறோம். நபார்டு வங்கியோடு இணைந்து இலவசப் பயிற்சி கொடுக்கிறோம். ஓசூர் நகர மக்களுக்கு இயற்கைக் காய்கறிகளை நேரடியாகவும், ஆன்லைன் வழியாகவும் விற்பனை செய்கிறோம்” என்றார்.

விதைநேர்த்தி

10 லிட்டர் தண்ணீரில் ஒரு லிட்டர் பஞ்சகவ்யாவை ஊற்றி, அதில் 30 கிலோ விதைநெல்லைக் கொட்டி சிறிதுநேரம் ஊறவிட வேண்டும். ஊறிய விதைநெல்லை எடுத்து நிழலில் அரைமணி நேரம் உலர்த்தி விதைக்கலாம்.

தலா 5 கிராம் டிரைகோடெர்மா விரிடி, சூடோமோனஸ் ஆகியவற்றை 100 மில்லி நாட்டுமாட்டுச் சிறுநீரில் கலந்து, நன்றாகக் கலக்க வேண்டும். அதில் ஒரு கிலோ காய்கறி விதைகளைக் கொட்டிக் கலக்க வேண்டும். பிறகு அரைமணி நேரம் நிழலில் உலர்த்தி விதைக்கலாம். இதே கலவையில் தக்காளி, மிளகாய், கத்திரி நாற்றுகளையும் தோய்த்து நடவு செய்யலாம். இதன்மூலம் பூஞ்சண நோய்கள் தடுக்கப்படும்.

விவசாயிகள் கற்றுக்கொண்ட பாடங்கள்!

டி.வி.எஸ் இயற்கை விவசாயக் குழுவில் உள்ள அனைவருமே ரசாயன விவசாயத்திலிருந்து இயற்கை விவசாயத்துக்கு மாறியவர்கள். இயற்கை முறையில் கற்றுக்கொண்ட விஷயங்கள் குறித்துப் பேசிய அக்குழுவைச் சேர்ந்த விவசாயிகள், “ஆரம்பத்தில் மண்புழு உரத்தொட்டி கட்டி மண்புழு உரம் தயார் செய்தேன். ஆனா, இப்போ தோட்டத்திலேயே நிழல்பாங்கான இடத்துல மண்புழு உரம் தயாரிக்கிறேன். இதுவே வசதியாகத்தான் இருக்கு. சாணம், சிறுநீரை மட்டும் சேகரிச்சு வெச்சுகிட்டா போதும். பண்ணையிலுள்ள இலைதழைகளைக் கொட்டி அதுமேல தண்ணீர், சாணம், சிறுநீர் கலந்த சாணிப்பாலைத் தெளிச்சு மக்கவிட்டு, மண்புழு உரம் தயாரிக்கிறேன். இப்படிச் செய்வது மூலமா மண்புழு உரத்தொட்டி கட்டுறதுக்கு ஆகுற செலவு மிச்சமாகுது.

புதிதாக மண்புழு உர தயாரிப்புல இறங்குறவங்க, தனியார்கிட்ட மண்புழுக்களை வாங்கினால் விலை அதிகம். தருமபுரி மாவட்ட விவசாயிகள், பாப்பாரப்பட்டி கே.வி.கே மூலமா மண்புழு உரத்தை ஒரு கிலோ 8 ரூபாய்னு விற்பனை செய்றாங்க. ஒரு கிலோ மண்புழுவை 250 ரூபாய்னு விற்பனை செய்றாங்க. அங்கே வாங்கினா செலவு குறையுது.

இயற்கை விவசாயத்துக்கு வர்றவங்க பஞ்சகவ்யா, ஜீவாமிர்தம், மீன் அமினோ அமிலம், பூச்சிவிரட்டினு கத்துக்கிட்டதையெல்லாம் தயார் செஞ்சு, பயிர்களுக்குக் கொடுக்கணும்னு ஆசை இருக்கும். இப்படிக் கொடுக்க விரும்புறவங்க, வாரத்துக்கு ஒரு இடுபொருள்னு கொடுக்கலாம். இதனால, பயிர்களுக்கும் எந்தப் பிரச்னையும் இருக்காது. நிலத்தோட வளமும் மேம்படும்” என்றனர்.

“லாபத்துக்கு ஒரேவழி இயற்கை விவசாயம்தான்!”

கிராமப் பயிற்சி நிறுவனத்தின் நிறுவனர் டாக்டர் மாலினி சீனிவாசன், “ரசாயன உரப்பயன்பாட்டால், நம்முடைய மண், நீர், காற்று, நுண்ணுயிர்கள் அனைத்தும் மாசுபட்டுக் கிடக்குது. இதனால, நம் உடல் நலமே கெட்டுபோய் இருக்கு. இதைத் தடுக்கிறதுக்கான ஒரேவழி இயற்கை விவசாயம்தான். இயற்கை விவசாயத்தால் மட்டுமே நஞ்சில்லா உணவைப் பெற முடியும். இதை உணர்ந்து, இந்த மையத்தைத் தொடங்கி நம்மாழ்வார் உள்ளிட்ட சிலபேரோட முயற்சியால இயற்கை விவசாயம் சம்பந்தப்பட்ட விழிப்பு உணர்வு பணிகள்ல ஈடுபட்டோம். அதில் ஓரளவுக்கு வெற்றியும் பெற்றிருக்கிறோம்.

ரசாயன உரங்களைப் பயன்படுத்துறதால, உற்பத்திச் செலவு அதிகரிச்சு நாளடைவில் லாபம் குறையும். ஆனால், இயற்கை விவசாயத்தில் உற்பத்திச்செலவு குறைந்து, நாளடைவில் லாபம் அதிகரிக்கும். லாபகரமான விவசாயம் செய்ய வேண்டுமென்றால், அதற்கு இயற்கை விவசாயம்தான் ஒரேவழி” என்றார் நம்பிக்கையுடன்.