Published:Updated:

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 3

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 3
பிரீமியம் ஸ்டோரி
News
அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 3

2,000 ரூபாயில் ஏற்றுமதி ஆவணங்கள்... வழிகாட்டும் அமைப்புகள்...ஏற்றுமதி

விவசாயிகள் தங்களது விளைபொருள்களை அருகிலுள்ள சந்தை அல்லது கமிஷன் கடைகள் ஆகியவற்றில்தான் விற்பனை செய்கிறார்கள். பொருளின் தேவையைப் பொறுத்து வியாபாரிகள் மற்றும் இடைத்தரகர்கள் நிர்ணயிக்கும் விலை அல்லது தர வாரியாகப் பிரித்து ஏல முறையில் கிடைக்கும் விலைதான் விவசாயிகளுக்குக் கிடைக்கும். பல நேரங்களில் உற்பத்திச் செலவுக்குக்கூடக் கட்டுபடியாகாத விலைதான் விவசாயிகளுக்குக் கிடைக்கிறது. இந்தக் காய்க்கு இந்தத் தேதியில் இன்ன விலைதான் கிடைக்கும் என விவசாயியால் அறிந்துகொள்ளவே முடியாது. அதனால், வருமானம் குறித்தோ, செலவு குறித்தோ விவசாயிகளால் முன்கூட்டியே திட்டமிட முடியாத சூழ்நிலைதான் நிலவுகிறது. ஆனால், விளைபொருள்களை ஏற்றுமதி செய்ய முடிவெடுத்தால்... முன்கூட்டியே பொருளின் விலையைத் தெரிந்துகொள்ள முடியும். நாமே விலையை நிர்ணயம் செய்யவும் முடியும். அதனால், வருமானம் குறித்து விற்பனைக்கு முன்பே திட்டமிட முடியும்.

“கேட்க நன்றாகத்தான் இருக்கிறது. எங்களைப்போலச் சாமானியர்களால் உடனடியாக ஏற்றுமதியில் இறங்க முடியுமா... அதற்கு என்னென்ன தேவைப்படும்... யார் வழிகாட்டுவார்கள்... எவ்வளவு முதலீடு செய்ய வேண்டும்” என்ற கேள்விகள் உங்களுக்குள் எழலாம். அவை குறித்துத்தான் விரிவாகப் பார்க்க இருக்கிறோம்.

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 3

ஏற்றுமதி செய்ய முடிவெடுத்துவிட்டால்... உடனடியாக ஏற்றுமதிக்கான உரிமம் பெற வேண்டும். வெளிநாடுகளுக்கு ஏற்றுமதி செய்ய ‘எக்ஸ்போர்ட் லைசன்ஸ்’ எனப்படும் உரிமம் அவசியம். உரிமம் பெற நாம் ஒரு நிறுவனத்தைத் (கம்பெனி) தொடங்க வேண்டும். சந்தைக்கு நாம் காய்கறிகளை அனுப்பும் மூட்டையின் மீது நமது இன்ஷியலை எழுதி விடுவோமல்லவா. அதுபோலத்தான் நமது நிறுவனத்துக்கு ஒரு பெயர் வைக்க வேண்டும். சந்தைக்கு இன்ஷியல் மட்டும் போதுமானது. ஆனால், ஏற்றுமதிக்குப் பெயருடன் ஒரு நிறுவனம் (Company) அவசியம்.

இங்கு நிறுவனத்துக்கு நமது சொந்தப்பெயர், குடும்பப்பெயர் ஆகியவற்றைத் தவிர்த்து சர்வதேச அளவில் புரியும்படியான ஒரு பெயர் வைப்பது நல்லது. ‘புளூ பாரத்’, ‘புளூ ஆப்பிள்’ ஆகியவை எனது ஏற்றுமதி நிறுவனங்களின் பெயர்கள். இந்தப் பெயருக்கும் நாம் ஏற்றுமதி செய்யும் பொருளுக்கும் எந்தச் சம்பந்தமும் இருக்க வேண்டியதில்லை. புளு ஆப்பிள் என்று பெயரிருப்பதால் ஆப்பிளை மட்டும்தான் ஏற்றுமதி செய்ய முடியும் என நினைக்கக்கூடாது. நான் இந்த நிறுவனத்தின் மூலமாகத்தான் புளியை ஏற்றுமதி செய்து கொண்டிருக்கிறேன். அதனால், ஒரு பொதுவான பெயரைத் தேர்ந்தெடுத்து வைக்க வேண்டியது அவசியம்.

அடுத்து நிறுவனத்துக்கான முகவரி. முடிந்தவரை வீட்டு முகவரியைத் தவிர்ப்பது நல்லது. பண்ணை முகவரியைக்கூட உபயோகப்படுத்தலாம். அல்லது நகரத்தில் ஒரு அலுவலகத்தை அமைத்துக் கொள்ளலாம். சொந்த இடமாக இருந்தால் சொத்துவரி அல்லது நிலவரி ரசீதும், வாடகை இடமாக இருந்தால் வாடகை ஒப்பந்தப் பத்திரமும் அவசியம்.

நமது நிறுவனத்துக்கு ஒரு இமெயில் முகவரியும், வியாபாரத்துக்கென்று ஒரு தனிச் செல்போன் நம்பரும், இதோடு விசிட்டிங் கார்டும் அவசியம்.

அதேபோல நாம் மட்டும் தனியாக (Sole Proprietor) இந்தத் தொழிலைச் செய்யப்போகிறோமா அல்லது மற்றவருடன் கூட்டு (Partnership) சேர்ந்து செய்யப்போகிறோமா என்பதையும் முடிவு செய்ய வேண்டும். கூட்டாக வியாபாரம் செய்ய முடிவெடுத்தால், 300 ரூபாய் பத்திரத்தில் ‘பார்ட்னர்ஷிப் டீட்’ (Partenership Deed) எழுதிக் கையெழுத்திட்டுப் பதிவு செய்துகொள்ள வேண்டும். இதை வழக்கறிஞர்கள் அல்லது ஆடிட்டர்கள் மூலம் எழுதிக்கொள்ளலாம்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 3

தனியாக ஏற்றுமதி செய்பவர்களுக்குத் தங்களுடைய நிரந்தரக் கணக்கு எண்ணே (பேன் கார்டு) போதுமானது. கூட்டாகச் செய்பவர்கள், நிறுவனத்தின் பெயரில் பேன் கார்டு எடுக்க வேண்டும். www.tin.nsdl.com என்ற இணையதளத்தின் மூலம் விண்ணப்பித்துப் பேன் கார்டு பெற்றுக் கொள்ளலாம். இதற்கு 150 ரூபாய்க்குள்தான் ஆகும்.

அடுத்ததாக, ‘ஃபாரக்ஸ்’ (அந்நிய செலவாணி) வசதிகொண்ட நடப்புக்கணக்கை (Current Account) தேசிய மயமாக்கப்பட்ட வங்கியில் தொடங்க வேண்டும். இந்த வசதி, கிராமப்புற வங்கிகளில் இல்லையென்றால், நகர்ப்புற வங்கிகளில் கணக்கு ஆரம்பித்துக் கொள்ளலாம். ஃபாரக்ஸ் வசதி இருந்தால்தான் வெளிநாட்டிலிருந்து அனுப்பும் பணம் நமது வங்கிக் கணக்குக்கு விரைவில் வந்து சேரும். ஆரம்பத்தில் நான் ஃபாரக்ஸ் வசதி இல்லாத வங்கியில் கணக்கு ஆரம்பித்து அந்தக் கணக்கு எண்ணை எனது வாடிக்கையாளருக்குக் கொடுத்துவிட்டேன். பொருளை ஏற்றுமதி செய்த பிறகு அவர் பணம் அனுப்பிவிட்டார். ஆனால், அது கணக்குக்கு வருவது தாமதமானது. பிறகுதான் விசாரித்து ஃபாரக்ஸ் வசதியுள்ள வங்கியில் கணக்கு ஆரம்பித்துப் பணத்தைப் பெற முடிந்தது. அதனால், கணக்கு ஆரம்பிக்கும் முன்பு இந்த வசதி இருக்கிறதா என்பதை உறுதி செய்ய வேண்டியது அவசியம்.

அடுத்தது ஜி.எஸ்.டி. உள்நாட்டில் ஒரு விவசாயி தன்னுடைய விளை பொருள்களை  விற்பனை செய்வதற்கு ஜி.எஸ்.டி எண் தேவையில்லை. ஆனால், ஏற்றுமதிக்குக் கண்டிப்பாக ஜி.எஸ்.டி எண் வேண்டும். ஜி.எஸ்.டி கணக்கு எண் பெற www.gst.gov.in என்ற இணையதளத்தில் பதிவு செய்ய வேண்டும். இதற்குக் கட்டணம் கிடையாது.

அடுத்தாக, ‘ஐ.இ கோடு’ (Import Export Code). மேற்சொன்ன ஆவணங்கள் அனைத்தும் தயாரான பிறகு, ஐ.இ கோடு பெற விண்ணப்பிக்க வேண்டும். இதையும் ஆன்லைன் மூலமாக www.dgft.gov.in என்ற இணையதளத்தில் பதிவு செய்ய வேண்டும். இது வெளிநாட்டு வர்த்தகப் பொது இயக்குநரகத்தின் (DGFT-Director General of Foreign Trade) கீழ் வருகிறது. இதில் பதிவு செய்யும்போது அக்கவுண்ட் ஹோல்டர் பெயர் என்ற இடத்தில் நிறுவனத்தின் பெயரைத்தான் குறிப்பிட வேண்டும். உங்களின் பெயரைக் குறிப்பிடக் கூடாது. பெயர் என்று கேட்குமிடத்திலும் நிறுவனத்தின் பெயரைத்தான் குறிப்பிட வேண்டும். இதில் பதிவு செய்வதற்கான கட்டணம் 500 ரூபாய். ஐ.இ கோடு பெற்ற பிறகு, ஏ.டி.கோடு (Authorised Dealer Code) பெற வேண்டும். ஐ.இ.கோடை, நீங்கள் கணக்குத் தொடங்கியிருக்கும் வங்கியில் கொடுத்தால் ஏ.டிகோடை வங்கி வழங்கும். இது இருந்தால்தான் சுங்கத்தில் சிரமமில்லாமல் பொருள்கள் கப்பலில் ஏறும்.

நடப்பு வங்கிக் கணக்கு எண், நிரந்தரக்கணக்கு எண், ஜி.எஸ்.டி எண், ஐ.இ.கோடு மற்றும் ஏ.டி.கோடு ஆகியவைதான் ஏற்றுமதிக்கான அடிப்படை ஆவணங்கள். ஆன்லைன் மூலமாகப் பெறக்கூடிய ஆவணங்களை நாமே முயற்சி எடுத்துப் பதிவு செய்து பெற்றால், 2,000 ரூபாய்க்குள்தான் செலவாகும். ஒவ்வோர் ஆவணத்தையும் விண்ணப்பிப்பது குறித்த விவரங்களை இணையத்திலேயே தேடிக்கொள்ளலாம்.

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 3

இறுதியாக நாம் ஏற்றுமதி செய்ய இருக்கும் பொருளுக்கான அமைப்பில் மேற்சொன்ன ஆவணங்களைச் சமர்ப்பித்துப் பதிவு செய்து, ஆர்.சி.எம்.சி (RCMC-Registration Cum Membership Certificate) சான்றிதழ் பெற வேண்டும். அச்சான்றிதழ் பெற்றவுடன் ஏற்றுமதியைத் தொடங்கலாம். இந்த ஆர்.சி.எம்.சியில்... அத்தாரிட்டி, போர்டு, கவுன்சில் ஆகிய பெயர்களில் 37 அமைப்புகள் இருக்கின்றன.

இவற்றில் விவசாய விளைபொருள்களுக்கு அபீடா அமைப்பிலும்; கடல்சார் பொருள்களுக்கு எம்பீடா அமைப்பிலும்; காபிக்குக் காபி போர்டிலும்; தேயிலைக்கு டீபோர்டிலும்; கயிறு பொருள்களுக்குக் காயர் போர்டிலும்; தேங்காய்களுக்கு கோகோனட் போர்டிலும் (தேங்காய், தேங்காய்ச் சம்பந்தப்பட்ட பொருள்கள் விவசாயப் பொருள்கள் பட்டியலில் வராது); நறுமணப் பொருள்களுக்கு ஸ்பைசஸ் போர்டிலும், பிற பொருள்களுக்கு எஃப்.ஐ.இ.ஒ (இந்திய ஏற்றுமதி அமைப்புகளின் கூட்டமைப்பு)விலும் சான்றிதழ் வாங்க வேண்டும்.

ஒவ்வொரு பொருளுக்கும் அந்தந்தப் பொருள்களுக்கு உரிய அமைப்பில்தான் சான்றிதழ் பெற வேண்டும் என்பதை நினைவில் கொள்ள வேண்டும். சான்றிதழ் பெறுவதற்கு ஆன்லைன் மூலமாகத்தான் விண்ணப்பிக்க வேண்டும். நேரடியாக எதற்கும் செல்ல தேவையில்லை. கேட்கும் விவரங்களுக்குச் சரியான தகவல்களை அளித்து எளிதாகச் சான்றிதழ் பெறலாம். இதற்கு ஆவணங்களை ஸ்கேன் செய்து வைத்துக் கொள்வது நல்லது. சிலவற்றில் விண்ணப்பம் இருக்கும், அதை டவுன்லோடு செய்து பூர்த்திச் செய்து, பிறகு கூரியர் மூலமாகவும் அனுப்பி வைக்கலாம். உங்களுக்கு எது எளிமையாகத் தெரிகிறதோ அந்த வழியில் முயற்சி செய்யுங்கள்.

- ஏற்றுமதி பெருகும்.

கே.எஸ்.கமாலுதீன்,

தொகுப்பு. த.ஜெயகுமார்

அபீடா

 பாஸ்மதி அரிசி, பாஸ்மதி அல்லாத அரிசி, ஃபிரஷ் காய்கறிகள், மலர்கள், பழங்கள், வெங்காயம், வெல்லம், நிலக்கடலை உள்ளிட்ட விவசாயம் சம்பந்தப்பட்ட விளைபொருள்களுக்குச் சான்றிதழ் வழங்குவது வேளாண் மற்றும் பதப்படுத்தப்பட்ட உணவுப் பொருள் ஏற்றுமதி வளர்ச்சி ஆணையம் என்றும் அழைக்கப்படும் அபீடா (Agricultural and Processed Food Products Export
Development Authority)தான். இதன் அலுவலகம் தென்னிந்தியாவுக்குப் பெங்களூருவில் உள்ளது.

ஆனால், அங்கெல்லாம் போகத் தேவையில்லை. www.apeda.gov.in என்ற இணையதளத்தில் சென்று விண்ணப்பிக்கலாம். விண்ணப்பித்த ஒரு வாரத்தில் சான்றிதழ் கிடைத்துவிடும். இதற்கான பதிவுக் கட்டணம் 5,900 ரூபாய். மீன், மீன் பொருள்கள் உள்ளிட்ட கடல் சார்ந்த பொருள்களுக்கு www.mpeda.gov.in என்ற இணையதளத்தில் சென்று விண்ணப்பிக்க வேண்டும்.

முகவரி: Agricultural and Processed Food Products Export Development Authority, 1st Floor, Beeja Bhavan, Bellary Road, Hebba, Bengaluru.

Ph.No 080 29731200/080, 29731206, 080-23419272

எஃப்.ஐ.இ.ஓ (இந்திய ஏற்றுமதி அமைப்புகளின் கூட்டமைப்பு)

இந்திய ஏற்றுமதி அமைப்புகளின் கூட்டமைப்பு என்று அழைக்கப்படும் எஃப்.ஐ.இ.ஓ (Federation of India Export Organization) அமைப்புதான் மிகவும் முக்கியமானது. பெரும்பான்மையான பொருள்கள் இந்த அமைப்பின் கீழ்தான் வருகின்றன. கைவினைப் பொருள்கள், முந்திரி, எண்ணெய் வித்துகள், பட்டு, பருத்தித் துணிகள், டெக்ஸ்டைல்ஸ், தரை விரிப்புகள், மரத்தால் செய்யப்பட்ட பொருள்கள் எனப் பெரும்பான்மையான பொருள்களுக்கு இந்த அமைப்புதான் சான்றிதழ் வழங்குகிறது.

இந்தப் பொருள்களுக்கு விண்ணப்பிக்க www.fieo.org என்ற இணையதளத்தில் பார்க்கவும். இதன் அலுவலகம் சென்னையில்தான் உள்ளது. கிளை அலுவலகம் கோயம்புத்தூரில் உள்ளது. ஏற்றுமதி குறித்து மாதமொருமுறை பயிற்சி வழங்கி வருகிறது, இந்த அமைப்பு.

முகவரி: இந்திய ஏற்றுமதி அமைப்புகளின் கூட்டமைப்பு 706, ஸ்பென்ஸர் பிளாசா, 7-வது தளம், 769, அண்ணா சாலை, சென்னை-600 002,

தொலைபேசி: 044 28497766/28497755/28493333,

Email: fieosr@fieo.org;

தென்னை வாரியம்

தென்னை வளர்ச்சி வாரியம், நறுமணப் பொருள்கள் வாரியம், கயிறு வாரியம் போன்ற அமைப்புகள் கேரள மாநிலத்தில் உள்ள கொச்சி நகரத்தில் உள்ளன. மஞ்சள், மிளகு, ஏலக்காய் உள்ளிட்ட நறுமணப் பொருள்களுக்கு www.indianspices.com என்ற இணையதளத்தில் விண்ணப்பிக்க வேண்டும். இதற்கான கட்டணம் 11,800 ரூபாய் (ஜி.எஸ்.டியுடன்). இளநீர், தேங்காய், தேங்காய் மட்டைகள் உள்ளிட்ட பொருள்களுக்கு www.coconutboard.gov.in என்ற இணையதளத்தில் விண்ணப்பிக்க வேண்டும். தென்னைப் பொருள்களுக்கான கட்டணம் 5,000 ரூபாய் (ஜி.எஸ்.டி சேர்க்காமல்).

Coconut Development Board,
(Government of India, Ministry of Agriculture & Farmers Welfare),
P.B. No.1021, Kera Bhavan,
SRV Road (Near SRV High School),
Kochi – 682 011, Ernakulam District,
Kerala State. 0484 2376265, 2377267, 2377266, 2376553.

Spices Board
(Ministry of Commerce & Industry, Govt. of India) Sugandha Bhavan
N.H.By Pass, Palarivattom.P.O
Cochin - 682025
Kerala, India
Phone: 0484 2333610/616