Published:Updated:

கூடுதல் லாபம் தரும் ‘சேலம்’ குண்டு வெல்லம்!

கூடுதல் லாபம் தரும் ‘சேலம்’ குண்டு வெல்லம்!
பிரீமியம் ஸ்டோரி
News
கூடுதல் லாபம் தரும் ‘சேலம்’ குண்டு வெல்லம்!

மதிப்புக்கூட்டல்

சேலம் விமான நிலையத்தைச் சுற்றியுள்ள கருப்பூர், வெள்ளாளப்பட்டி, பொட்டிபுரம், காமலாபுரம், சக்கரை செட்டிப்பட்டி, வட்டக்காடு, நாலுக்கால் பாலம், ஒட்டர்தெரு... எனப்பல கிராமங்களில் கரும்புதான் பிரதானப் பயிர். இப்பகுதி விவசாயிகளில் பெரும்பாலானோர், கரும்பை ஆலைக்கு அனுப்பாமல், கரும்பை மதிப்புக்கூட்டி வெல்லம் தயாரித்து விற்பனை செய்து வருகிறார்கள்.

கூடுதல் லாபம் தரும் ‘சேலம்’ குண்டு வெல்லம்!

ஆண்டு முழுவதும் இப்பகுதியில் வெல்லம் காய்ச்சும் தொழில் நடைபெறுகிறது. இதனால், விமான நிலையம் அமைந்திருக்கும் இந்தப் பகுதியைச் சாலை வழியாகக் கடக்கும்போது வெல்லம் காய்ச்சும் மணம் மூக்கைத்துளைக்கும். இதனாலேயே இப்பகுதி ‘தேன் கிண்ணம்’ என அழைக்கப்படுகிறது. ஆயுத பூஜை, தீபாவளி, பொங்கல்... என அடுத்தடுத்து வரும் பண்டிகைகளைக் குறிவைத்து மும்முரமாக வெல்லம் காய்ச்சும் பணிகள் நடந்து வந்த சூழ்நிலையில், இப்பகுதியில் உள்ள கருப்பூரைச் சேர்ந்த செல்லமுத்துவைச் சந்தித்துப் பேசினோம்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
கூடுதல் லாபம் தரும் ‘சேலம்’ குண்டு வெல்லம்!

“வெல்லம் காய்ச்சுறது எங்களோட குலத்தொழில். இந்தப்பகுதியில பெரும்பாலும் கரும்பு விவசாயம்தான். கரும்புச் சாகுபடி செய்ற எல்லாருமே வீட்டுல வெல்லம் காய்ச்சுற ஆலையை அமைச்சுருப்பாங்க. இந்தப் பகுதி சேர்வராயன் மலை அடிவாரத்துல இருக்குது. அதனால, நல்ல மண் வளம் இருக்கு. மலையிலைருந்து வர்ற ஓடைகள் மூலமா சுத்தியிருக்குற அஞ்சு ஏரிகளுக்குத் தண்ணி கிடைக்குது. அதனால, எங்களுக்குத் தண்ணிக்கும் பஞ்சமில்லை. 200 அடியிலேயே தண்ணி கிடைச்சுடுறதால, வருஷம் முழுசுமே எங்க பகுதியில செழிப்பா விவசாயம் நடக்கும். கரும்பை அப்படியே ஆலைக்குக் கொடுக்காம நாங்களே வெல்லம் காய்ச்சி விற்பனை செய்றப்போ கூடுதல் லாபம் கிடைக்குது. அதோட உள்ளூர் மக்களுக்கு வேலைவாய்ப்பும் கிடைக்குது.

எங்களுக்கு அஞ்சு ஏக்கர் பூர்வீக நிலம் இருக்கு. அதுல ஒரு ஏக்கர் நிலத்துல காய்கறிச் சாகுபடி செய்றோம். மீதி நாலு ஏக்கர் நிலத்துலயும் கரும்புதான் சாகுபடி செய்றோம். இங்க சாகுபடி செய்றதெல்லாம் கரும்பு ஆராய்ச்சி நிறுவனம் வெளியிட்ட ரகங்கள்தான். நாங்க தயாரிக்கிற குண்டு வெல்லத்தை மிட்டாய் கம்பெனிகள், பேக்கரிகள்ல அதிகமா வாங்குறாங்க. பொங்கல் வைக்க இந்த வெல்லத்தைத்தான் பயன்படுத்துவாங்க. அதனால, எங்க பகுதியில தயாரிக்கிற குண்டு வெல்லத்துக்கு எப்பவுமே சந்தை வாய்ப்பு இருக்கு. நாங்க எங்க நிலத்துல விளையுற கரும்பு மட்டுமில்லாம, வெளியில மத்த விவசாயிகள்ட்ட இருந்தும் கரும்பை வாங்கி வெல்லம் உற்பத்தி செய்றோம்.

கூடுதல் லாபம் தரும் ‘சேலம்’ குண்டு வெல்லம்!
கூடுதல் லாபம் தரும் ‘சேலம்’ குண்டு வெல்லம்!
கூடுதல் லாபம் தரும் ‘சேலம்’ குண்டு வெல்லம்!
கூடுதல் லாபம் தரும் ‘சேலம்’ குண்டு வெல்லம்!

இந்தக் குண்டு வெல்லத்தைத்தான் மற்ற பகுதிகள்ல ‘மண்டை வெல்லம்’னு சொல்வாங்க. தமிழகத்திலேயே வெல்லத்துக்கான பெரிய சந்தை சேலத்துலதான் இருக்கு. தமிழகம் முழுக்க இருந்து வியாபாரிகள் இங்க வருவாங்க. அதோட கேரளா, ஆந்திரா, கர்நாடகா மாநிலங்கள்ல இருந்தும் வெல்லம் வாங்க வியாபாரிகள், சேலம் மார்க்கெட்டுக்கு வர்றாங்க” என்ற செல்லமுத்து வெல்லம் தயாரிக்கும் ஆலைக்குள் அழைத்துச் சென்று காட்டியபடியே பேசினார். “ஒரு டன் கரும்பைச் சர்க்கரை ஆலைக்கு அனுப்பினா, அதிகபட்சமா 2,650 ரூபாய்தான் கிடைக்கும். நாங்களே வெல்லம் காய்ச்சி விற்பனை செய்யும்போது ஒரு டன் கரும்பு மூலமா 3,850 ரூபாய் சம்பாதிக்க முடியுது. ஒரு டன் கரும்பு மூலமா 110 கிலோவில் இருந்து 130 கிலோ வெல்லம் வரை கிடைக்கும். ஒரு கிலோ வெல்லம் 35 ரூபாய்னு விற்பனை செய்றோம்” என்றார் நம்பிக்கையுடன்.

கூடுதல் லாபம் தரும் ‘சேலம்’ குண்டு வெல்லம்!

வெல்லம் காய்ச்சும் ஆலையில் வேலை செய்து கொண்டிருந்த பணியாளர் கவிதா, “நான் ரங்கன்பூசாரி காட்டுவலசுங்கிற கிராமத்துல இருந்து இங்க வேலைக்கு வர்றேன். என் கணவர் ரவி கரும்பு வெட்டுற வேலை செய்றார். எங்க ரெண்டு பேருக்கும் சேர்த்து ஒரு நாளைக்கு 700 ரூபாய் வரை சம்பளம் கிடைக்குது. வருஷம் முழுக்க எங்களுக்கு வேலை கிடைக்குது” என்றார் மகிழ்ச்சி பொங்க. இன்னொரு பணியாளரான தங்கதுரை, “நான் இந்தத் தொழிலுக்கு வர்றப்போ 30 ரூபாய் கூலி. இன்னிக்கு 500 ரூபா கூலி வாங்குறேன். எங்களுக்குக் கரும்பு ஆலைதான் நிரந்தர வேலைவாய்ப்பைக் கொடுத்துருக்கு. விவசாயிகள் கரும்பை அப்படியே ஆலைக்கு அனுப்பிட்டா எங்களுக்கு வேலை கிடைக்காது. அவங்களே சொந்தமா வெல்லம் காய்ச்சுறதால எங்களுக்கு வாழ்வாதாரம் கிடைக்குது. இந்தத்தொழிலை நம்பி ஆயிரக்கணக்கான பேர் இங்க இருக்கோம்” என்றார்.

கூடுதல் லாபம் தரும் ‘சேலம்’ குண்டு வெல்லம்!

வெல்லம் உற்பத்தியாளர்கள் சங்கத் தலைவர் ரமேஷ்குமாரிடம் பேசியபோது, “எங்க பகுதியில இருநூற்றுக்கும் மேற்பட்ட ஆலைகள் இருக்கு. நேரடியா ஐயாயிரத்துக்கும் மேற்பட்டவர்கள் இந்தத்தொழில்ல இருக்குறாங்க. தமிழகத்திலேயே இந்தப்பகுதியிலதான் அதிகளவு குண்டு வெல்லம் உற்பத்தி செய்யப்படுது. தமிழ்நாட்டுல வெல்லத்துக்கான விலை சேலம் மார்க்கெட்ல நிர்ணயம் செய்யப்படுகிறது. இந்தத்தொழிலுக்கு அரசு மானியம் கொடுக்கணும்னு விவசாயிகள் ரொம்ப நாளா கோரிக்கை வெச்சுட்டு இருக்கோம். ஆனா, நடவடிக்கை இல்லை. இப்போ விமான நிலையத்தை விரிவாக்கம் செய்றதுக்காக எங்க பகுதியில நிலங்களை எடுக்கப்போறதா சொல்றாங்க. அப்படி எங்க நிலத்தை எடுத்தா ஆயிரக்கணக்கான மக்கள் பாதிக்கப்படுவாங்க. அதனால, அரசாங்கம் இதை மறுபரிசீலனை செய்யணும்” என்றார்.

- வீ.கே.ரமேஷ், படங்கள்: எம்.விஜயகுமார்

இப்படித்தான் வெல்லம் தயாரிக்கிறோம்...

வயலில் கரும்பை வெட்டி சுத்தம் செய்ய வேண்டும். பிறகு ஆலையில் உள்ள கிரஷர் மெஷினில் கரும்பைக் கொடுத்தால், கரும்புச்சக்கைத் தனியாகவும், கரும்பு பால் தனியாகவும் வரும். கரும்பு பாலை ஆலையில் உள்ள கொப்பரையில் ஊற்றி கொதிக்கும் அளவுக்கு சூடாக்க வேண்டும். கொதிக்கும்போது  அழுக்குகள் வருவதற்காக சோடாவைச் சேர்க்கிறோம்.

சோடாவை சேர்க்கும்போது கரும்புப் பாலில் அதிகளவு அழுக்குகள் வரும். அதை நீக்க வேண்டும். பிறகு நிறத்திற்காக ஹைட்ரோஸ் பவுடர் சேர்த்து கரும்புபாலைச் சுண்ட காய்ச்ச வேண்டும். பதம் வந்ததும் அகலமான மரத்தொட்டியில் ஊற்றி உலர வைக்க வேண்டும். கை சுடும் அளவுக்குத் துணியைப் பயன்படுத்தி கை அளவு உருண்டை பிடிக்க வேண்டும். ஓர் உருண்டை தோராயமாக 250 கிராம் (கால் கிலோ) இருக்கும்.

இயற்கை முறையில் வெல்லம் தயாரிப்பு

இயற்கை முறையில் வெல்லம் தயாரிப்பில் அனுபவம் வாய்ந்தவர் விழுப்புரம் மாவட்டத்தைச் சேர்ந்த ரவிச்சந்திரன். இயற்கை முறையில் வெல்லம் தயாரிப்பில் அவர் கூறிய நுட்பங்கள், இங்கே இடம் பிடிக்கின்றன...

‘‘ஒரு டன் அளவு கரும்புகளைச் சாறு பிழியும் இயந்திரத்தில் போட்டுச் சாறு எடுத்துக்கொள்ள வேண்டும். சாற்றை 550 லிட்டர் கொள்ளளவு கொண்ட தாச்சுவில் ஊற்றி நெருப்பைப் பற்ற வைக்க வேண்டும். காய்ந்த கரும்புச்சக்கைகளை எரிபொருளாகப் பயன்படுத்திக்கொள்ளலாம். கரும்புச்சாறு சூடேற ஆரம்பித்தவுடன் கசடுகள் மேல்நோக்கி மிதக்க ஆரம்பிக்கும். அவற்றை வடிகட்டி மூலம் அகற்றிவிட்டு 4 கரண்டி ஆப்ப சோடாவைச் சேர்த்துக் கலக்கி விட வேண்டும்.

கூடுதல் லாபம் தரும் ‘சேலம்’ குண்டு வெல்லம்!

நன்றாகக் கொதிக்க ஆரம்பித்தவுடன், 200 மில்லி தேங்காய் எண்ணெயை ஊற்ற வேண்டும். பாகு கெட்டியாகத் திரள ஆரம்பிக்கும் சமயத்தில், அதைப் பலகையில் கொட்டிக் கிளறி கால் மணிநேரம் ஆறவிட வேண்டும். மிதமான சூட்டில் உருண்டைகளாகப் பிடித்து ஆற விட வேண்டும். நன்றாகக் காய்ந்ததும் மரப்பெட்டியில் அடுக்கி வைக்க வேண்டும். எறும்பு ஏறாமலும், ஈரக்காற்றுப் படாமலும் சேமித்து வைத்தால், பல ஆண்டுகள் ஆனாலும் வெல்லம் கெட்டுப்போகாது.’’

ஒரு டன் கரும்பில் 3,850 ரூபாய் வருமானம்...

இந்தப் பகுதியில் ஆலை நடத்துபவர்கள் பெரும்பாலும் கரும்புச் சாகுபடி செய்பவர்கள்தான். அவர்கள் சர்க்கரை ஆலையில் ஒரு டன் கரும்புக்கு 2,650 ரூபாய்தான் கிடைக்கும். ஆனால், நாங்களே வெல்லம் காய்ச்சு விற்பனை செய்வதால் ஒரு டன்னுக்கு 3,850 ரூபாய் சம்பாதிக்க முடிகிறது என்கிறார்கள். அதற்கான கணக்கு செலவு வரவு கணக்கு இங்கே இடம் பெறுகிறது.

ஒரு ஏக்கருக்கு சுமார் 30 முதல் 40 டன் கரும்பு விளையும். அதை வெட்டி நேரடியாக கரும்பாக விற்கும்போது ஒரு டன் கரும்புக்கு 2,000 ரூபாய் விலை கிடைக்கிறது. அதே ஒரு டன் கரும்பை ஆலையில் பால் எடுத்து காய்ச்சி வெல்லமாக்கி விற்பனை செய்தால் ஒரு டன் கரும்புக்கு 110 முதல் 130 கிலோ வெல்லம் கிடைக்கும். ஒரு கிலோ வெல்லம் 35 ரூபாய் என்றால் சுமார் 110 கிலோவிற்கு 3,850 ரூபாய் கிடைக்கிறது. ஆக ஒரு டன் கரும்புக்கு 1,850 ரூபாய் கூடுதலாகக் கிடைக்கிறது.

இதில் கரும்பு வெட்டுக்கூலி, எரிபொருள் செலவு, ஆலை ஊழியர்கள் கூலி, போக்குவரத்து செலவுகள் போக ஒரு டன்னுக்கு 500 ரூபாய் நிற்கும், ஒரு நாளைக்குக் குறைந்தது எங்க ஆலையில் 5 டன் கரும்பிலிருந்து சுமார் 550 கிலோ வெல்லம் தயாரிக்கிறோம். ஆக ஒரு டன்னுக்கு 500 ரூபாய் லாபம் வீதம் 5 டன்னுக்கு, ஒரு நாளைக்கு 2,500 ரூபாய் லாபம் கிடைக்கிறது. ஒரு கரும்பு ஆலை மூலம் ஆண்டு முழுவதும் 25 பேருக்கு வேலை கொடுக்க முடிகிறது என்கிறார்கள் இப்பகுதி விவசாயிகள்.