Published:Updated:

ஏன்... ஏன்? தெரிவோம்... தெளிவோம்! - 4 - மழை பெய்யும்போது மா நடவு கூடாது!

ஏன்... ஏன்? தெரிவோம்... தெளிவோம்! - 4 - மழை பெய்யும்போது மா நடவு கூடாது!
பிரீமியம் ஸ்டோரி
News
ஏன்... ஏன்? தெரிவோம்... தெளிவோம்! - 4 - மழை பெய்யும்போது மா நடவு கூடாது!

கேள்வி-பதில்

பருவமழை தொடங்கும் காலம் இது. இப்பருவத்தில்தான், பயிர் நடவில் விவசாயிகள் ஆர்வம் காட்டுவார்கள். தோட்டக்கலைப் பயிர்களைச் சாகுபடி செய்யும் விவசாயிகளுக்கு இக்காலகட்டத்தில் பல்வேறு சந்தேகங்கள் எழும். இப்பகுதியில்... மா சாகுபடி செய்யும் விவசாயிகளுக்கு எழும் சந்தேகங்களுக்குத் தீர்வு சொல்கிறார், குன்றக்குடி வேளாண் அறிவியல் மையத்தின் தலைவர் மற்றும் பேராசிரியர் செந்தூர்குமரன்.

ஏன்... ஏன்? தெரிவோம்... தெளிவோம்! - 4 - மழை பெய்யும்போது மா நடவு கூடாது!

மாங்கன்றுகளை நடவு செய்ய ஏற்ற காலம் எது?

மாங்கன்றுகளை நடவு செய்ய தற்போது நிலவும் பருவம் மிகவும் சரியான காலம். வடகிழக்குப் பருவமழை பெய்வதற்கு முன்பாக  நடவு செய்ய வேண்டும். மா சாகுபடியில் லாபகரமான மகசூல் எடுக்கக் கன்று தேர்வு மிகவும் முக்கியம். நேராக வளர்ந்த கன்றுகளைத்தான் தேர்வு செய்து நட வேண்டும். கன்றுகளை நர்சரியிலிருந்து பண்ணைக்கு எடுத்து வரும்போது... மேடு, பள்ளங்களின் அதிர்வு, நாற்றுப் பைகளைப் பாதிக்காதவாறு கொண்டு செல்ல வேண்டும். வாகனத்தில் ஏற்றும் போதும், இறக்கும் போதும் கவனமாகக் கையாள வேண்டும். நர்சரியிலிருந்து, பண்ணைக்குக் கொண்டு வந்தவுடனே செடிகளை நடவு செய்யக்கூடாது. இரண்டு நாள்கள் பண்ணையில் வைத்திருந்து, அதன் பிறகு நடவு செய்ய வேண்டும். அந்த இரண்டு நாள்களில் சில கன்றுகள் இறந்து போக வாய்ப்புண்டு. இதன் மூலம் நடவுக்குப் பிறகு ஏற்படும் கன்று இழப்புகளைத் தவிர்க்கலாம். நடவு செய்வதற்கு முந்தைய நாள் வரை செடிகளுக்குத் தண்ணீர் தெளித்து வர வேண்டும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
ஏன்... ஏன்? தெரிவோம்... தெளிவோம்! - 4 - மழை பெய்யும்போது மா நடவு கூடாது!

கன்று நடவின்போது பின்பற்ற வேண்டிய தொழில்நுட்பங்கள் என்ன?

மாங்கன்றுகளை நடவு செய்ய... இரண்டு அடி சதுரம் இரண்டு அடி ஆழத்தில் குழியெடுத்து ஒரு மாதம் ஆறவிட வேண்டும். எவ்வளவு வளமான மண்ணாக இருந்தாலும் இரண்டு அடி ஆழத்தில் குழி எடுக்க வேண்டியது அவசியம். குழியில் 10 சென்டிமீட்டர் உயரத்துக்கு மணலைக்கொட்டி நிரவி... அதற்கு மேல், இரண்டு பங்கு மணல், ஒரு பங்கு குப்பை எரு, 50 கிராம் டிரைக்கோடெர்மா விரிடி, 50 கிராம் வேப்பம் பிண்ணாக்கு கலந்த கலவையைக் கொட்டி குழியை மூடி தண்ணீர் ஊற்ற வேண்டும். நடுவதற்கு முதல்நாள், ஒவ்வொரு குழியிலும் 50 கிராம் டிரைக்கோடெர்மா விரிடியை போட்டு, தண்ணீர் விட வேண்டும். மறுநாள், குழியின் மையத்தில் கையால் குழியெடுத்து கன்றுகளை நடவு செய்ய வேண்டும்.

நடவு செய்யும் கன்றுகள் அதிக ஈரமாக இருக்கக்கூடாது. அதனால், நடவுக்கு முதல் நாளே தண்ணீர் தெளிப்பதை நிறுத்தி விடவேண்டும். ஈரமாக இருந்தால் பையில் உள்ள மண் உடைந்து, செடி வேருடன் தனியாக வந்துவிடும். பைகளில் உள்ள மண் உடையாமல் நடவு செய்ய வேண்டியது, மிகவும் அவசியம். மண் உடைந்து, வேர் மட்டும் வைத்து நடவு செய்தால், நாற்பது சதவிகித செடிகள் இறந்துவிடும். நடவு செய்யும்போது, செடியில் ஒட்டுக் கட்டிய பகுதி வெளியே தெரிவதுபோல நடவு செய்ய வேண்டும். நடவு செய்த பிறகு, செடியைச் சுற்றி மண் அணைத்து காலால் மிதித்து விடவேண்டும். அப்படிச் செய்யும்போது சிலர் தாய்ச் செடியைப் பிடித்து மேலே இழுத்துக்கொண்டு மிதித்துவிடுவார்கள். அப்படிச் செய்யக்கூடாது. அப்படி இழுக்கும்போது சற்றுப் பலமாக இழுத்துவிட்டால், ஒட்டுக்கட்டிய பகுதி விலகிவிடும். மழை பெய்து கொண்டிருக்கும் போது நடவு செய்யக்கூடாது. நடவு செய்ததிலிருந்து இரண்டு நாள்கள் கழித்து மழை வந்தால் சிறப்பு. நடவு செய்த அன்று அதிக ஈரமானால், நமது நிலத்தின் மண்ணும், பையில் இருந்த மண்ணும் இறுகி, பிணைப்பாவதில் சிக்கல் ஏற்படும்.

ஏன்... ஏன்? தெரிவோம்... தெளிவோம்! - 4 - மழை பெய்யும்போது மா நடவு கூடாது!

மா மரங்களில் எப்போது கவாத்துச் செய்ய வேண்டும்?

மா மரங்களில் பருவமழைக்கு முன்பாகக் கவாத்துச் செய்ய வேண்டும். பொதுவாகக் கவாத்துப் பணியை வடகிழக்குப் பருவமழைக்கு முன்பாக... ஆகஸ்ட், செப்டம்பர் மாதங்களில் செய்ய வேண்டும். மா மரங்களுக்கு இரண்டு விதமாகக் கவாத்துச் செய்யலாம். செடிகளுக்கு வடிவம் கொடுக்கும் கவாத்து மற்றும் மகசூலுக்கான கவாத்து என இரண்டு கவாத்து முறைகள் உள்ளன. செடிகளுக்கு வடிவம் கொடுக்கும் கவாத்து முறைக்கு ‘டிரிம்மிங்’ என்று பெயர். மகசூலுக்காகச் செய்யப்படும் கவாத்துக்குப் ‘புரூனிங்’ என்று பெயர்.

கவாத்துப் பணியில் கவனிக்க வேண்டிய விஷயங்கள் என்ன?

கவாத்துப் பணிகளை ஆகஸ்ட், செப்டம்பர் தவிர மற்ற மாதங்களில் செய்யக்கூடாது. வறட்சியான காலங்கள், பூக்கும் காலங்கள், மழைநீர் தேங்கி நிற்கும் காலங்களில் கவாத்துச் செய்யக்கூடாது. கவாத்துச் செய்வதற்குச் சில விதிமுறைகள் இருக்கின்றன. அனைத்துக் கிளைகளையும் அகற்றக் கூடாது. தாழ்வாக உள்ள கிளைகள், தரையை நோக்கி வளர்ந்துள்ள கிளைகள் போன்றவற்றைத்தான் அகற்ற வேண்டும். தரையை நோக்கியுள்ள கிளைகளில் அதிகப்பூக்கள் தோன்றும். அதனால், இதை அகற்றப் பல விவசாயிகள் விரும்பமாட்டார்கள். ஆனால், அதில் கிடைக்கும் மகசூலுக்கு ஆசைப்பட்டால் எதிர்காலத்தில் தண்டுத்துளைப்பான் பாதிப்பால், மரம் பாதிக்கப்படலாம் என்பதைக் கவனத்தில் கொள்ள வேண்டும். அடுத்ததாக, குறுக்கும் நெடுக்குமாகச் செல்லும் கிளைகள், மெல்லிய கிளைகள், மேல் நோக்கி வளரும் கிளைகள், காய்ந்த கிளைகள், பூச்சி மற்றும் நோய் தாக்கிய கிளைகள் ஆகியவற்றைக் கவாத்துச் செய்ய வேண்டும். கவாத்துக்குப் பிறகு, மரத்தில் உள்ள அனைத்துக் கிளைகளிலும் சூரியஒளி படுமாறும் நல்ல காற்றோட்டம் இருக்குமாறும் பார்த்துக்கொள்ள வேண்டும்.

செடி வடிவமைப்புக்காகச் செய்யப்படும் கவாத்து, மகசூலுக்காகச் செய்யப்படும் கவாத்து முறைகள், மா சாகுபடியில் உரம், பூச்சி, நோய் மேலாண்மை குறித்து அடுத்த இதழில்…

- வளரும்

ஆர்.குமரேசன்,  படங்கள்: வீ.சிவக்குமார்