Published:Updated:

பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!

பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!
பிரீமியம் ஸ்டோரி
பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!

விற்பனை

பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!

விற்பனை

Published:Updated:
பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!
பிரீமியம் ஸ்டோரி
பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!

விவசாயத்தில் இருக்கும் முக்கியப் பிரச்னை விற்பனைதான். இதற்கு அரசு அமைப்புகள் பல வகைகளில் உதவி வருகின்றன. பால் வளத்துறையின் மூலம் பால் கொள்முதல் செய்யப்பட்டு ‘ஆவின்’ என்ற பெயரில் விற்பனை செய்யப்பட்டு வருகிறது.

விவசாயிகள் நேரடியாகவே விற்பனை செய்ய வேளாண் துறையின் மூலமாக உழவர் சந்தைகள், உழவர் உற்பத்தியாளர் கம்பெனி என்று அமைக்கப்பட்டுள்ளன. சுயஉதவிக் குழுக்கள் மூலம் மாவட்ட ஆட்சியர் அலுவலகங்கள், அரசு அலுவலகங்களில் விளைபொருள்களை மதிப்புக்கூட்டி விற்பனை செய்ய ஏற்பாடு செய்யப்பட்டுள்ளது. அந்த வரிசையில், தோட்டக்கலைத் துறை மூலம் தோட்டக்கலைப் பொருள்களை மலிவு விலையில் விற்பனை செய்யும் வகையில் சென்னையில் விற்பனை அங்காடி ஒன்று தொடங்கப்பட்டுள்ளது.

தோட்டக்கலை மற்றும் மலைப்பயிர்கள் துறையின் கீழ் இயங்கும், ‘தமிழ்நாடு தோட்டக்கலை வளர்ச்சி முகமை’ என்கிற அமைப்பின் மூலமாக இது தொடங்கப் பட்டுள்ளது. சென்னையின் மையப்பகுதியான அண்ணா மேம்பாலத்துக்கு அருகேயுள்ள செம்மொழிப் பூங்காவில் கடந்த அக்டோபர் 24-ம் தேதி விற்பனை அங்காடி தொடங்கப்பட்டுள்ளது. இந்த விற்பனை அங்காடியை வேளாண்மைத்துறை முதன்மைச் செயலாளர் ககன்தீப்சிங் பேடி தொடங்கி வைத்தார். சென்னை மாநகர மக்களிடையே மிகுந்த வரவேற்பைப் பெற்றிருக்கிறது, இந்த விற்பனை அங்காடி.

பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!

விற்பனை அங்காடி குறித்துச் செம்மொழிப் பூங்காவின் மேலாளர் ஷாகுல் ஹமீதிடம் பேசினோம். “செம்மொழிப் பூங்காவில் தற்போது வரையில் ஒரு நாளைக்கு ஐந்தாயிரம் ரூபாய் அளவில் பொருள்கள் விற்பனையாகின்றன. விரைவில் தமிழகமெங்கும் இதை விரிவுபடுத்துவதற்கான திட்டம் உள்ளது. அடுத்ததாக மாதவரம் தோட்டக்கலைப் பூங்காவில் புதிய கிளை தொடங்கப்பட உள்ளது. இங்கு விற்பனை செய்யப்படுகிற பொருள்கள் குன்னூர், ஓசூர் மற்றும் திண்டுக்கல் மாவட்டத்திலுள்ள ரெட்டியார்சத்திரம் ஆகிய இடங்களில் உள்ள தோட்டக்கலைத்துறைப் பண்ணைகளிலிருந்து வருகின்றன. இவை அனைத்துமே இயற்கையான முறையில் உற்பத்தி செய்யப்படுபவை.

ஏலக்காய், மிளகு, கிராம்பு, ஜாதிக்காய், லவங்கப்பட்டை, ஜாதிபத்திரி ஆகியவை 50 கிராம், 30 கிராம், 20 கிராம் பாக்கெட்களாக விற்பனை செய்யப்படுகின்றன. இவையனைத்தும் மொத்தமாக அடங்கிய பாக்கெட் 300 ரூபாய்க்கு விற்பனை செய்யப்படுகிறது. மதிப்புக்கூட்டப்பட்ட பலா, நெல்லி, அன்னாசி, மாம்பழம், முந்திரி ஆகியவை இங்கு விற்பனை செய்யப்படுகின்றன. தென்னை உற்பத்தியாளர் நிறுவனம் மூலம் தயாரிக்கப்படுகிற நீரா சர்க்கரை, நீரா கருப்பட்டி போன்ற மதிப்புக்கூட்டப்பட்ட பொருள்களும் இங்கு கிடைக்கின்றன.

பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!

தமிழகம் முழுவதும் உள்ள விவசாய உற்பத்தியாளர் குழுக்கள் மூலமாக உற்பத்தி செய்யப்படுகிற பொருள்களைத் தமிழ்நாடு தோட்டக்கலை வளர்ச்சி முகமையின் சார்பில் கொள்முதல் செய்து விற்பனை செய்யும் வகையில் ஏற்பாடு செய்யப்பட்டுள்ளது. இது விவசாயிகளுக்கான சந்தை வாய்ப்பாக அமையும்” என்றார், ஷாகுல் ஹமீது.

தோட்டக்கலைத்துறை கூடுதல் இயக்குநர் தமிழ்வேந்தன், “இந்த அங்காடியில் மலர் கொத்துகள் போன்ற அலங்காரப் பொருள்கள், பிராக்கோலி, முட்டைக்கோஸ் போன்ற தோட்டக்கலைக் காய்கறிகள் ஆகியவையும் விற்பனை செய்யப் படுகின்றன. இந்த விற்பனை மையத்தின் முதன்மையான நோக்கம் மக்களுக்கு இயற்கையான முறையில் உற்பத்தி செய்யப்படுகிற பொருள்கள் அனைத்தும் மலிவான விலையில் கிடைக்க வேண்டும் என்பதுதான். அதற்காக மக்கள் அதிகம் கூடுகிற ஊட்டி தாவரவியல் பூங்கா, கொடைக்கானல் மலர் பூங்கா, கன்னியாகுமரியில் உள்ள தோட்டக்கலைப் பூங்கா, மாதவரம் தோட்டக்கலைப் பூங்கா எனப் பல இடங்களில் விற்பனை அங்காடிகளைத் தொடங்க திட்டமிட்டு உள்ளோம்.

பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!

விவசாயிகள் தங்களுடைய பொருள்களை இடைத் தரகர்கள் இன்றி நேரடியாக விற்பனை செய்வதற்கான சந்தையை உருவாக்கித் தர வேண்டும் என்பதே தோட்டக்கலைத் துறையின் பிரதான நோக்கம். பூங்காக்கள் மட்டுமில்லாமல் தமிழகம் முழுவதிலுமுள்ள தோட்டக்கலைப் பண்ணைகள் மற்றும் தோட்டக்கலை இணை இயக்குநர் அலுவலகங்கள் ஆகியவற்றிலும் சில்லறை விற்பனை அங்காடிகளை அமைக்கவுள்ளோம். தோட்டக் கலைத்துறைக்கு விற்பனை செய்ய ஆர்வமுள்ள விவசாயிகள், அந்தந்த மாவட்டத்தில் உள்ள தோட்டக்கலை உதவி அலுவலர், தோட்டக்கலை இணை இயக்குநர் அலுவலகங்களை அணுகலாம்” என்று வழிகாட்டினார்.

தொடர்புக்கு: தோட்டக்கலை மற்றும் மலைப்பயிர்கள் துறை,
எழிலகம், சேப்பாக்கம், சென்னை-600005
தொலைபேசி: 044 28524643.
தமிழ்வேந்தன், செல்போன்: 89038 51830

இ.மோகன் - படங்கள்: ப.பிரியங்கா, ஆ.வள்ளிசௌத்திரி

பூங்காக்களில் விளைபொருள்கள் அங்காடி... தோட்டக்கலைத்துறையின் ‘விற்பனை’ முயற்சி!

“நியாயமான விலை!”

கதீட்ரல் சாலையில் இருக்கும் செம்மொழிப் பூங்காவின் நுழைவு வாயிலில் அமைந்திருக்கும் இந்த விற்பனை அங்காடியில் பொருள்களை வாங்கிக் கொண்டிருந்த வட சென்னையைச் சேர்ந்த விஜயனிடம் பேசினோம். “இந்த அங்காடி பத்தி நியூஸ் பேப்பர் மூலமாத் தெரிஞ்சுக்கிட்டு வந்தேன். பொருள்களோட விலை நியாயமா இருக்கு. மிளகு, லவங்கம் மாதிரியான நறுமணப் பொருள்கள், காய்கறிகள் வெளிச்சந்தையைவிடக் குறைவான விலைக்கு இங்க கிடைக்குது. அதே சமயத்துல, உலர் பழங்கள், மதிப்புகூட்டப்பட்ட பொருள்களோட விலை கொஞ்சம் அதிகம்தான்” என்றார்.