Published:Updated:

ஏன்... ஏன்? தெரிவோம்... தெளிவோம்! - 6 - மா... கவனிக்க வேண்டியவை எவை?

ஏன்... ஏன்? தெரிவோம்... தெளிவோம்! - 6 - மா... கவனிக்க வேண்டியவை எவை?
பிரீமியம் ஸ்டோரி
ஏன்... ஏன்? தெரிவோம்... தெளிவோம்! - 6 - மா... கவனிக்க வேண்டியவை எவை?

கேள்வி-பதில்

ஏன்... ஏன்? தெரிவோம்... தெளிவோம்! - 6 - மா... கவனிக்க வேண்டியவை எவை?

கேள்வி-பதில்

Published:Updated:
ஏன்... ஏன்? தெரிவோம்... தெளிவோம்! - 6 - மா... கவனிக்க வேண்டியவை எவை?
பிரீமியம் ஸ்டோரி
ஏன்... ஏன்? தெரிவோம்... தெளிவோம்! - 6 - மா... கவனிக்க வேண்டியவை எவை?

மா சாகுபடி குறித்த கேள்விகளுக்குக் குன்றக்குடி வேளாண் அறிவியல் மையத்தின் தலைவர் மற்றும் பேராசிரியர் செந்தூர்குமரன் கடந்த இதழ்களில் பதில்களைச் சொல்லியிருந்தார். அதன் தொடர்ச்சி இங்கே...

மா சாகுபடியில் பூச்சி மேலாண்மை குறித்துச் சொல்ல முடியுமா?

மா சாகுபடியில் இரண்டு பூச்சிகள்தான் பெரிய பாதிப்பை ஏற்படுத்துகின்றன. அவற்றில் ஒன்று, பச்சைத் தத்துப்பூச்சி. மற்றொன்று தண்டுத் துளைப்பான். முதலில் பச்சைத் தத்துப்பூச்சி குறித்துப் பார்ப்போம். மழைக்காலம் முடிந்து நவம்பர் மாதக் கடைசி அல்லது டிசம்பர் மாத முதல் வாரத்தில் மாமரங்களில் இளம் தளிர்கள் தோன்றும். முதிர்ந்த இலைகளைவிட, இந்த இளம் இலைகளில்தான் அதிகளவு சாறு இருக்கும். இளம் தளிர்கள் தோன்றும் சமயத்தில்தான் தத்துப்பூச்சிகள் கூட்டம் கூட்டமாக இலைகளைத் தாக்கும். இந்தப் பூச்சிகளின் நடமாட்டம் ஆண்டு முழுவதும் தோப்பில் இருந்தாலும், இளம் தளிர்கள் உருவாகும்போதுதான் அதிகளவில் இருக்கும். இளம் தளிர்கள் உருவாகும் வரை அருகில் உள்ள இலவம்பஞ்சு மரம் அல்லது கொய்யா மரங்களில் இந்தப் பூச்சிகள் காத்திருக்கும். அதனால்தான் மாந்தோப்பில் இலவ மரத்தை வைக்கக்கூடாது என்கிறார்கள். இந்தப் பூச்சிகள் மிகவும் சிறியதாக இருக்கும். மிக நுட்பமாக உற்றுப்பார்த்தால்தான் கண்ணுக்கே தெரியும். மைக்ராஸ்கோப் மூலமாகப் பார்க்கலாம்.

தண்டில் கைவைத்துப் பார்க்கும் போது பிசுபிசுப்புத்தன்மை இருந்தால், தத்துப்பூச்சிகள் தாக்கியுள்ளன என்று தெரிந்து கொள்ளலாம். பிசுபிசுப்புத் தன்மை இருக்கும்போது, இலையின் நுனிப்பகுதி சுருண்டிருக்கும். நவம்பர் மாதக் கடைசி அல்லது டிசம்பர் மாத துவக்கத்தில் இப்பூச்சிகள் முட்டையிடும். இலையின் பின்பக்கம், நரம்புக்கு அருகில் வரிசையாக முட்டை இட்டுவிடும். அடுத்த நான்கு நாள்களில் இந்த முட்டைகள் பொரிந்து புழுக்கள் வெளிவரும்.

ஏன்... ஏன்? தெரிவோம்... தெளிவோம்! - 6 - மா... கவனிக்க வேண்டியவை எவை?

ஒட்டுமொத்த விகடனுக்கும் ஒரே ஷார்ட்கட்!

இந்தப் புழுக்கள், அடுத்த பதினைந்து நாள்களில் இலையைக் கபளீகரம் செய்துவிடும். இலைகள் முழுவதும் சுருங்கிவிடும். ஒரு மரத்தில் பெரும்பாலான இலைகள் இப்படிச் சுருங்கிப்போனால், பூங்கொத்துகள் உருவாவது பாதியாகக் குறைந்துவிடும். ஒரு மரத்தின் மகசூலை ஐம்பது சதவிகித அளவு பாதிக்கக்கூடிய தன்மை வாய்ந்தவை தத்துப்பூச்சிகள். மகசூல் குறைவதோடு, விளையும் பழங்களுக்கும் தத்துப்பூச்சிகள் பாதிப்பை ஏற்படுத்துகின்றன. இலையில் சாற்றை உறிஞ்சிய பிறகு, தேன்பாகு போல ஒரு திரவத்தைச் சுரக்கும். இதைப் பார்க்காத மா விவசாயிகள் இருக்க முடியாது. அந்தத் திரவம், ‘கேப்னோடியன்’ என்ற பூஞ்சணத்தை உருவாக்கும். பூச்சி எச்சம் அதிகமாக இருக்கும் இடங்களில், இந்தப் பூஞ்சணம் அதிகளவில் வளரும். இந்தக் கறுப்புநிறப் பூஞ்சணம், ‘சூட்டி மோல்ட்’ என்ற நோயை உருவாக்கும். இதனால், இலைகளில் சாம்பல் பூசியதுபோலக் கறுப்பு நிறம் படர்ந்திருக்கும். இதைச் சரியாகக் கவனிக்கத் தவறினால், காய்களிலும் கறுப்பு படரத் தொடங்கும். கறுப்பு நிறம் படர்ந்த காயைச் சந்தைப்படுத்த முடியாது. இதனால், மிகப்பெரிய பொருளாதார இழப்பு ஏற்படும்.

ஏன்... ஏன்? தெரிவோம்... தெளிவோம்! - 6 - மா... கவனிக்க வேண்டியவை எவை?

பச்சைத் தத்துப்பூச்சியை எப்படிக் கட்டுப்படுத்துவது?

இந்தக் காலகட்டத்தில் (நவம்பர் மாத இறுதி மற்றும் டிசம்பர் மாதத் துவக்கம்) மா விவசாயிகள் விழிப்போடு இருந்தால், பச்சைத்தத்துப் பூச்சிகளின் தாக்குதலைக் கட்டுப்படுத்தலாம். இளம் தளிர்கள் உருவாகி பளபளப்பாகத் தெரியும்போது உஷாராகி விடவேண்டும். இல்லையெனில் பூச்சிகள் உங்களை முந்திக்கொள்ளும். இது ‘சாறு உறிஞ்சும் பூச்சி’ என்பதால், இலைகளில் ஒவ்வாமையை ஏற்படுத்த வேண்டும். 3 சதவிகித வேப்பெண்ணெய்க் கரைசல் (10 லிட்டர் தண்ணீருக்கு 300 மில்லி) தெளிக்கலாம். வேப்பங்கொட்டையை இடித்து 5 சதவிகிதம் கலந்தும் தெளிக்கலாம். மூலிகைப் பூச்சிவிரட்டி தெளித்தும் கட்டுப்படுத்தலாம். வேப்பெண்ணெய்க் கரைசல் தெளிக்கும்போது, சம அளவு புங்கன் இலைச் சாற்றையும் சேர்த்துக் கொண்டால், வேம்பின் வாசனை இலைகளில் அதிக நாள்கள் தங்கியிருக்கும்.

மஞ்சள் வண்ண அட்டை அல்லது விளக்குப்பொறி வைத்தும் கட்டுப்படுத்தலாம். சூரிய ஒளி அனைத்து இலைகளிலும் படமுடியாதபடி அடர்த்தியாக இருக்கும் மரங்களை இந்தப் பூச்சி தாக்கும். அதனால்தான், ஐந்து ஆண்டுகளுக்கொருமுறை ‘டிரெயினிங்’ என்ற கவாத்தைச் செய்ய வேண்டும் எனக் கடந்த இதழில் பார்த்தோம். தோப்பைச் சுத்தமாக வைத்துக்கொள்ள வேண்டும். தோப்பில் இலவம்பஞ்சு மரங்கள் இல்லாமல் பார்த்துக்கொள்ள வேண்டும். இளம் தளிர்கள் உருவாகும் காலத்தில் முன்னெச்சரிக்கை நடவடிக்கை எடுத்துவிட்டால், மா சாகுபடியில் மகசூல் இழப்பு மற்றும் பொருளாதார இழப்பைத் தடுக்கலாம்.

ஏன்... ஏன்? தெரிவோம்... தெளிவோம்! - 6 - மா... கவனிக்க வேண்டியவை எவை?

தண்டுத் துளைப்பான் குறித்து விரிவாகச் சொல்லுங்களேன்?

“மா மரங்களுக்கு இன்னொரு ‘வில்லன்’ தண்டுத் துளைப்பான். வெயில் காலமான மார்ச், ஏப்ரல் மாதங்களில் இதன் தாக்குதல் இருக்கும். இதன் தீவிரத் தாக்குதலுக்கு உள்ளான மரம் பட்டுப்போய்விடும். வெயில் காலம் என்பதால் வறட்சியில் பட்டுப் போனதாகப் பெரும்பாலான விவசாயிகள் நினைத்துக் கொள்வார்கள். ஆனால், நன்றாகச் சோதித்துப் பார்த்தால் தண்டுத் துளைப்பான் உள்ளே இருப்பது தெரியும். ஜூன், ஜூலை மாதங்களில் இப்பூச்சியின் செயல்பாடு அதிகளவில் இருக்கும்.

அதுதான் இவற்றுக்கு முட்டையிடும் காலம். தோப்பில் கிடக்கும் சருகுகளின் இடுக்குகளில்தான் இவற்றின் இனப்பெருக்கம் நடைபெறும். இனப்பெருக்கம் முடிந்தவுடன், முட்டைப்போட தோதான இடத்தைத் தேடும். தாழ்வான கிளைகள், ஆள்கள் நடமாட்டம் இல்லாத இடத்தில் இருக்கும் மரங்களைத் தேர்ந்தெடுத்து முட்டையிடும். அதுவும் ஏழு ஆண்டுகளிலிருந்து பத்து ஆண்டுகள் வயதுள்ள மரங்களில்தான் இவை முட்டையிடும்.

தரையிலிருந்து முதல் கிளை பிரியும் இடத்தைத்தான் முட்டையிடத் தேர்ந்தெடுக்கும். ஒன்றரை அடி உயரத்தில் பிரியும் தாழ்வான கிளைகளில் உள்ள பட்டைகளின் இடைவெளியில் முட்டையிடும். ஒரு பூச்சி ஓர் ஆண்டு வரை உயிர் வாழும்.

தனது வாழ்நாளில் பெண்பூச்சி தினமும் ஐந்து முதல் ஏழு முட்டைகள் வரை இடும். முட்டை பொரிந்தவுடன், தண்டுப் பாகத்தைச் சுரண்டி உண்ண ஆரம்பிக்கும். இப்பூச்சி, பார்ப்பதற்குப் பச்சரிசியைப்போல மிகவும் சின்னதாக இருக்கும். அப்படியே மரத்துக்குள் குகை அமைப்பதுபோலச் சுரண்டிக்கொண்டே தண்டுக்குள் பயணிக்கும். சில நேரங்களில் குகை கீழ்நோக்கி இருக்கும், பல நேரங்களில் மேல்நோக்கி இருக்கும். மரத்தின் வளர்ச்சிக்குத் தேவையான நீரையும், உரத்தையும் கடத்தும் பணியைச் செய்பவை சைலம் திசுக்கள். இவை தண்டுப் பகுதியில்தான் இருக்கும். இந்தப் புழுக்கள் சைலத்தைச் சுரண்டி தின்றுகொண்டே போகும். கீழ்நோக்கி இருந்தால் மருந்து தெளித்துச் சுலபமாகக் கட்டுப்படுத்தலாம். மேல்நோக்கி இருந்தால் அதன் இருப்பிடத்தைக் கண்டுபிடிப்பதே கஷ்டமாகிவிடும். தண்டுத்துளைப்பான் தாக்கிய மரத்தில் காது வைத்துக்கேட்டால் மர ஆலையில் வருவது போன்ற சத்தம் கேட்கும்.

இதைக் கட்டுப்படுத்த தரையிலிருந்து ஓர் அடி உயரம் வரை, மரத்தில் பட்டையைச் செதுக்கிவிட்டு, அந்தப்பகுதியில் முந்திரி எண்ணெய் அல்லது கோல்தார் பூசிவிட வேண்டும். தண்டுத்துளைப்பானைப் பொறுத்தவரை வருமுன் காப்பதுதான் சிறந்த முறை. முன்னெச்சரிக்கை நடவடிக்கையாகத் தோப்பிலுள்ள குப்பைகளை அழிக்க வேண்டும்.  ஆறு ஆண்டுகளுக்குக் குறைவான மரங்களில் தண்டுத் துளைப்பான் தாக்குதல் இருக்காது. அதனால்தான் முறையாகக் கவாத்துச் செய்ய வேண்டும் எனச் சொல்கிறோம். கவாத்து செய்த மரங்களில் தண்டுத் துளைப்பான் தாக்குதல் பெரும்பாலும் இருப்பதில்லை. முறையான கவாத்துச் செய்து தோப்பைச் சுத்தமாக வைத்துக்கொண்டாலே தண்டுத் துளைப்பானிலிருந்து மரங்களைக் காத்துக்கொள்ளலாம்.  உரம் மற்றும் அறுவடை நுட்பங்கள் குறித்து அடுத்த இதழில்…

- வளரும்

ஆர்.குமரேசன்,  படம்: வீ.சிவக்குமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism