Published:Updated:

ரெடுவீட்... படைப்புழுவை அழிக்க இயற்கைத் தீர்வு!

ரெடுவீட்... படைப்புழுவை அழிக்க இயற்கைத் தீர்வு!
பிரீமியம் ஸ்டோரி
News
ரெடுவீட்... படைப்புழுவை அழிக்க இயற்கைத் தீர்வு!

ஆலோசனை

மனிதகுலம் எதிர்கொள்ளும் அனைத்துப் பிரச்னைகளுக்கும் ஒவ்வொரு தீர்வை உருவாக்கி வைத்திருக்கிறது, இயற்கை. ஆயிரக்கணக்கான மருந்துகளும், மருத்துவர்களும் தீர்க்க முடியாத ‘டெங்கு’ காய்ச்சலை, சர்வசாதாரணமாகக் குணமாக்கியது, நிலவேம்பு கஷாயம். அதேபோல, மக்காச்சோளப் பயிரை நாசமாக்கும் படைப்புழுக்களுக்கும் ஓர் இயற்கைத் தீர்வு இருக்கிறது. 

ரெடுவீட்... படைப்புழுவை அழிக்க இயற்கைத் தீர்வு!

பயிர் சாகுபடியில் விவசாயிகள் எதிர் கொள்ளும் அனைத்துப் பிரச்னைகளுக்கும் காரணம், இயற்கைச் சமநிலை சீர்குலைந்து கிடப்பதுதான். தாவரங்களை உண்ணும் பூச்சிகளை அழிக்க, தாவர உண்ணிப்பூச்சிகளை உண்ணும் மாமிச உண்ணிப்பூச்சிகளும் உண்டு. பயிர்களை உண்ணும் பூச்சிகளை, ‘தீமை செய்யும் பூச்சிகள்’ என்றும், பூச்சிகளை உண்ணும் பூச்சிகளை ‘நன்மை செய்யும் பூச்சிகள்’ என்றும் அழைக்கப்படுகிறது.

பூச்சிக்கொல்லிகள் அதிகளவில் பயன்படுத்தப் படாத நிலையில்... நன்மை செய்யும் பூச்சிகளும், தீமை செய்யும் பூச்சிகளும் சமநிலையில் இருந்தன. அப்போது பயிர்களைச் சேதப்படுத்தும் பூச்சிகளை நன்மை செய்யும் பூச்சிகளே கட்டுப்படுத்திக் கொண்டிருந்தன. அளவுக்கதிகமாக ரசாயனப் பூச்சிக்கொல்லிகளைப் பயன்படுத்த தொடங்கியதன் விளைவு... நன்மை செய்யும் பூச்சிகள் பெருமளவில் அழிந்துவிட்டன. பொதுவாகத் தீமை செய்யும் பூச்சிகள் இலைகள், தண்டுகளுக்கிடையில் மறைந்து வாழக்கூடியவை. நன்மை செய்யும் பூச்சிகள் தனக்கான உணவைத்தேடி வெளியில் அலைபவை. அதனால்தான், பூச்சிக் கொல்லிகளால் நன்மை செய்யும் பூச்சிகள் அதிகளவில் பலியாகியுள்ளன. அதன் விளைவுதான் இன்று மக்காச்சோளத்தில் விவசாயிகள் சந்தித்து வரும் படைப்புழுப் பிரச்னை. பல நாட்டு விவசாயிகளைக் கதற வைத்த இந்தப் படைப்புழு, தற்போது தமிழகத்தில் தாண்டவம் ஆடிக் கொண்டிருக்கிறது. 

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
ரெடுவீட்... படைப்புழுவை அழிக்க இயற்கைத் தீர்வு!

இந்நிலையில், இயற்கை முறையில் படைப்புழுவைக் கட்டுப்படுத்தும் முயற்சிகள் வேகமாக முன்னெடுக்கப்பட்டு வருகின்றன. அதன் ஒரு பகுதியாக ‘ரெடுவீட்’ (Reduviid bug) என்ற பூச்சியைப் படைப்புழுவுக்கு எதிராகக் களமிறக்கியிருக்கிறார்கள், வேளாண் விஞ்ஞானிகள். ஹைதராபாத் நகரத்திலுள்ள ‘தேசிய பயிர் ஊட்ட மேலாண்மை நிறுவனம்’

(National Institute of Plant Health Management) ரெடுவீட் பூச்சிகளை வளர்ப்பதற்கான பயிற்சியை வழங்கி வருகிறது. தமிழகத்தில் முதல்முறையாக விருதுநகர் மாவட்டம் வடமலைக்குறிச்சி கிராமத்தில் இந்தப்பூச்சிகளை உற்பத்தி செய்கிறது, ‘விருதை உழவர் உற்பத்தியாளர் நிறுவனம்’. ஹைதராபாத்தில் பயிற்சி எடுத்துக்கொண்ட உழவர் ஆர்வலர் குழுவினர், இதுவரை 10 ஆயிரம் பூச்சிகளை உற்பத்தி செய்துள்ளனர். டி.கல்லுப்பட்டி வேளாண்மைத் துறையினர் இந்தப்பூச்சிகளை வாங்கி ரெங்கப்பாளையம், சின்னாம்பாளையம் ஆகிய பகுதிகளில் மக்காச்சோள வயல்களில் விட்டுள்ளார்கள். இந்தப் பூச்சிகள் சில நாள்களில் பல்கிப்பெருகி, படைப்புழுக்களை உண்டு அவற்றின் எண்ணிக்கையைக் கட்டுப்படுத்தும். 

ரெடுவீட்... படைப்புழுவை அழிக்க இயற்கைத் தீர்வு!

ரெடுவீட் பூச்சி உற்பத்தி குறித்து அருப்புக்கோட்டை வேளாண் வணிக அலுவலர் முத்தையாவிடம் பேசினோம். “வடமலைக்குறிச்சியில் உள்ள உழவர் ஆர்வலர் குழு மூலமாக உயிரியல் கட்டுப்பாட்டு மையம் அமைக்கப்பட்டுள்ளது. இந்தக் குழுவினருக்குச் சூடோமோனஸ், டிரைக்கோடெர்மாவிரிடி போன்ற பூஞ்சணக்கொல்லிகளை உற்பத்தி செய்யப் பயிற்சி அளித்திருக்கிறோம். தற்போது, இவர்கள் ரெடுவீட் பூச்சிகளை உற்பத்தி செய்யும் முறை குறித்து, ஹைதராபாத் தேசிய பயிர் ஊட்ட மேலாண்மை மையத்தில் பயிற்சி பெற்றிருக்கிறார்கள். இந்தப்பூச்சிகளை உற்பத்தி செய்யும் தொழில்நுட்பம் மிகவும் எளிதானது. இந்த நிறுவனத்தின் இணையதளத்தில் இந்தப்பூச்சிகளை ஆய்வுக்கூடங்களில் தயாரிக்கும் தொழில்நுட்ப வீடியோவை வெளியிட்டிருக்கிறார்கள். வடமலைக் குறிச்சியிலும் பயிற்சி எடுத்துக் கொள்ளலாம். தற்போது இந்தப்பூச்சிகளைச் சோதனை முயற்சியாகப் படைப்புழு தாக்கிய வயல்களில் விட்டிருக்கிறோம்” என்றார், முத்தையா.

ரெடுவீட் பூச்சி தொடர்பாகப் பூச்சியியல் வல்லுநர் நீ.செல்வத்திடம் பேசினோம். “ரெடுவீட் பூச்சி விவசாயிகளுக்கு ஏற்கெனவே பரிச்சயமான ஒன்றுதான். ‘பசுமை விகடன்’ இதழில் வெளியான ‘பூச்சிகளும் உங்கள் நண்பர்களே’ என்ற தொடரில் இதைப் பற்றி ஏற்கெனவே சொல்லியிருக்கிறேன். ரெடுவீட் என்பது ‘கொலைகார நாவாய்ப்பூச்சி’தான். நாவாய்ப்பூச்சிகள் அனைத்தும் நன்மை செய்யும் பூச்சிகள் இல்லை. சில தீமை செய்யும் நாவாய்ப்பூச்சிகளும் இருக்கின்றன. ஆனால், கொலைகார நாவாய்ப்பூச்சி நன்மை செய்யும் பூச்சி. புழுக்களைத் தின்பதுதான் இதன் முழுநேர வேலை. 

ரெடுவீட்... படைப்புழுவை அழிக்க இயற்கைத் தீர்வு!

இந்தப்பூச்சி, பெரிதும் சிறிதுமாகப் பல உருவங்களில் இருக்கும். ஒரு காலத்தில் இந்தப்பூச்சிகள் நமது வயல்களில் இருந்தவைதான். நாம் அடித்த பூச்சிக்கொல்லிகள்தான் இவற்றை அழித்துவிட்டன. இந்தப் பூச்சிகள் இருந்திருந்தால் படைப்புழு பாதிப்பு இவ்வளவு அதிகமாக இருந்திருக்காது. படைப்புழுக்களைப் பூச்சிக் கொல்லிகளால் கட்டுப்படுத்த முடியாது. ரெடுவீட் பூச்சி மாதிரியான நன்மை செய்யும் பூச்சிகளைக் கொண்டுதான் அழிக்க முடியும்” என்றார்.

ரெடுவீட் பூச்சிகளைப் படைப்புழுவுக்கு எதிராகக் பயன்படுத்துவது பற்றி வேளாண்மைத்துறை இன்னமும் அதிகாரப்பூர்வமான அறிவிப்பை வெளியிடவில்லை. படைப்புழு, மக்காச்சோளத்தைப் பெருமளவு சிதைத்து விட்டது. அடுத்தடுத்த பயிர்களை இவை தாக்குவதற்குள் ரெடுவீட் பூச்சிகள் மூலமாக அவற்றைக் கட்டுப்படுத்த வேண்டும். வேளாண்மைத் துறையினர் இது தொடர்பான சாதகப் பாதகங்களை ஆராய்ந்து வருகிறார்கள். விரைவில் இது தொடர்பான அறிவிப்பு வெளியாகலாம்.

ஆர்.குமரேசன் - படங்கள்: வீ.சிவக்குமார், ஆர்.எம்.முத்துராஜ்