Published:Updated:

ஆறு வழிச்சாலை அபாயம்! திகிலில் திருவள்ளூர் மாவட்ட விவசாயிகள்...

ஆறு வழிச்சாலை அபாயம்! திகிலில் திருவள்ளூர் மாவட்ட விவசாயிகள்...
பிரீமியம் ஸ்டோரி
News
ஆறு வழிச்சாலை அபாயம்! திகிலில் திருவள்ளூர் மாவட்ட விவசாயிகள்...

பிரச்னை

சேலம்–சென்னை எட்டு வழிச்சாலை தொடர்பான சர்ச்சைகள் இன்னும் முடிவுறாத நிலையில்... ‘பாரத் மாலா’ என்ற திட்டத்தின் கீழ் சித்தூர் – தச்சூர் ஆறுவழிச்சாலைத் திட்டத்தை அறிவித்துள்ளது, மத்திய அரசு. திருவள்ளூர் மாவட்டம் வழியாக ஆந்திர மாநிலத்தில் உள்ள சித்தூர் வரை செல்லும் இந்த ஆறுவழிச்சாலைக்கு விவசாயிகள், பொதுமக்கள் எனப் பல தரப்பினரும் எதிர்ப்பு தெரிவித்து வருகின்றனர். இந்த ஆறு வழிச் சாலை அமையவுள்ள பள்ளிப்பட்டு, பொன்னேரி மற்றும் ஊத்துக்கோட்டை கிராமங்களைச் சேர்ந்த மக்கள் ஒன்றிணைந்து... ‘திருவள்ளூர் மாவட்ட உழவர்கள் மற்றும் உழைப்பாளர்கள் ஒருங்கிணைப்புக் குழு’ என்ற அமைப்பைத் தொடங்கியுள்ளனர். இந்த அமைப்பின் சார்பில், கடந்த மார்ச் 9-ஆம் தேதி சென்னையில் நடந்த பத்திரிகையாளர் சந்திப்பில் கிராமங்களைச் சேர்ந்த மக்கள், விவசாயிகள் போன்றோர் கலந்து கொண்டு, தங்களது பிரச்னைகள் குறித்த விவரங்களைத் தெரிவித்தனர்.  

ஆறு வழிச்சாலை அபாயம்! திகிலில் திருவள்ளூர் மாவட்ட விவசாயிகள்...

அந்த நிகழ்வில் பேசிய வழக்கறிஞர் சிவக்குமார், “சென்னை அடுத்த எண்ணூர் அருகே காட்டுப்பள்ளி என்கிற துறைமுகம் இருக்கிறது. அந்தத் துறைமுகத்தில் சரக்குகளைக் கையாளும் பணிகளை அதானி குழுமம்தான் மேற்கொண்டு வருகிறது. இந்தத் துறைமுகத்துக்குப் பெங்களூரு, சித்தூர் போன்ற நகரங்களிலிருந்து சரக்குகள் வருவதற்கு ஏதுவாகத்தான் இந்த உயர்மட்ட ஆறுவழிச் சாலை அமைக்கப்பட இருக்கிறது. சென்னைக்கு நீர் ஆதாரமாக இருக்கக்கூடியது திருவள்ளூர் மாவட்டம். சென்னை போன்ற ஒரு பெருநகரத்துக்கு அருகில், நகர மாசைக் குறைப்பதற்காக ஒரு குறிப்பிட்ட அளவில் பசுமைப் போர்வை இருக்க வேண்டியது அவசியம். அந்தப் பசுமைப் போர்வைக்குக் காரணமாக விளங்கக்கூடிய திருவள்ளூர் மாவட்டத்தை, இந்தப் புதிய ஆறுவழிச் சாலைத் திட்டம் சிதைத்துவிடும். திருவள்ளூர் மாவட்டத்தில் ஏற்கெனவே பல நெடுஞ்சாலைகள் உள்ளன. அவற்றைச் சீர் செய்வதை விடுத்துப் புதிதாக ஒரு உயர்மட்ட சாலை அமைக்கப்படவுள்ளது ஏன் என்கிற கேள்வி அனைவருக்கும் எழுகிறது” என்றார்.

சாலை குறித்த கள ஆய்வு மேற்கொண்ட கட்டடக் கலை நிபுணர் சுதீர், “சேலம் எட்டு வழிச்சாலை, இந்த ஆறுவழிச்சாலை ஆகிய இரண்டு சாலைத் திட்டங்களுமே அதானி குழுமத்துக்குச் சாதகமானவைதான். 126 கிலோமீட்டர் தூரம் அமையவுள்ள இந்தச் சாலையைப் போடுவதற்காக 21 நீர்நிலைகளும், 10 கிலோ மீட்டர் வனப்பகுதியும் அழிக்கப்படவுள்ளன. அதோடு, 950 ஏக்கர் பட்டா நிலங்களும், 220 ஏக்கர் பஞ்சமி நிலங்களும் கையகப்படுத்தப்பட உள்ளன. இந்தத் தகவல்கள் அரசு விளம்பரத்தில் குறிப்பிடப்பட்டுள்ளன.

ஆந்திராவில் 82 கிராமங்கள் வழியாகவும், தமிழகத்தில் 45 கிராமங்கள் வழியாகவும் இந்தச் சாலை அமைய இருக்கிறது. இந்தச் சாலை செல்லும் வழித்தடத்திலே 133 கிலோமீட்டருக்கு ஒரு இணை நெடுஞ்சாலை இருக்கிறது. இந்த உயர்மட்டச்சாலையில் ஆறே இடங்களில் மட்டும்தான் வாகனங்கள் ஏறி, இறங்க முடியும்.   

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
ஆறு வழிச்சாலை அபாயம்! திகிலில் திருவள்ளூர் மாவட்ட விவசாயிகள்...

இதிலிருந்தே இந்தச்சாலை மக்களுக்கான போக்குவரத்துக்கா, சரக்கு வாகனங்களுக்கான போக்குவரத்துக்கா என்பது தெளிவாகத் தெரியும்.இந்தச் சாலைக்காகக் கையகப்படுத்தக்கூடிய நிலங்கள், முப்போகம் விளையக்கூடிய விவசாய நிலங்கள். இந்தச்சாலையால் நீர் நிலைகள் அழியும் சூழ்நிலை இருப்பதால், கிட்டத்தட்ட 12,047 ஏக்கர் நிலங்கள் பாசனமின்றிப் பாதிப்புக்குள்ளாகும். 

ஆறு வழிச்சாலை அபாயம்! திகிலில் திருவள்ளூர் மாவட்ட விவசாயிகள்...

இதனால், 774 விவசாயக் குடும்பங்கள் நேரடியாகவும், 2,847 குடும்பங்கள் மறைமுகமாகவும் பாதிக்கப்பட வாய்ப்புண்டு. சாலை உயர்மட்டமாக அமைவதால் நீரோட்டம் தடைப்பட்டு 7,250 ஏக்கர் பரப்பு நிலங்கள் வெள்ள நீர் உட்புகவும் வாய்ப்புண்டு” என்றார். கள ஆய்வு மேற்கொண்ட பொறியாளர் ராகுல், “அரசுத் தரப்பில் இந்தத் திட்டத்தைப் பற்றிய அறிக்கை சமர்ப்பிக்கையில்... விவசாயிகள் மற்றும் பொதுமக்களின் தனிப்பட்ட இழப்புகளைத்தான் கணக்கில் கொள்கின்றனர். நீர் நிலைகள், வனப்பகுதிகளின் இழப்பால் ஏற்படக்கூடிய மறைமுகப் பாதிப்புகளைக் கவனத்தில் கொள்ளவே இல்லை” என்றார்.

இத்திட்டம் குறித்து மேலும் சில தகவல்களைப் பகிர்ந்து கொண்டார் திருவள்ளூர் மாவட்டத்தைச் சேர்ந்த பார்த்தசாரதி, “கடந்த ஜனவரி மாதம் 26-ஆம் தேதி திருவள்ளூர் மாவட்டத்தில் பாதிப்புக்குள்ளாகும் ஏழு கிராமங்களில் இந்த சாலையை எதிர்த்து தீர்மானம் நிறைவேற்றப்பட்டுள்ளது. அடுத்து பாதிக்கப்பட இருக்கும் 26 வருவாய் கிராமங்களில் உள்ள மக்கள் ஒன்றுகூடி வருகிற நாடாளுமன்றத் தேர்தல்களில் இந்தச் சாலை திட்டத்தை எதிர்க்கும் வேட்பாளர்களுக்கே எங்கள் வாக்கு என்கிற தீர்மானத்தை நிறைவேற்ற உள்ளனர். எங்களால் எந்தெந்த வழிகளில் இந்தத் திட்டத்தை எதிர்க்க முடியுமோ, அந்த வழிகளெல்லாம் முயற்சி செய்து கொண்டிருக்கிறோம்” என்றார்.

இச்சாலை திட்டத்தை எதிர்த்துத் தொடர் போராட்டங்களுக்குத் தயாராகி வருகிறார்கள், திருவள்ளூர் மாவட்ட மக்கள்.

இ.மோகன், படங்கள்: ஆ.வள்ளிசௌத்திரி