Published:Updated:

சேமிப்புக் கிடங்கு... பொருளீட்டுக் கடன்... வைப்பு நிதி... முன்னோடி கூட்டுறவுக் கடன் சங்கம்!

சேமிப்புக் கிடங்கு... பொருளீட்டுக் கடன்... வைப்பு நிதி... முன்னோடி கூட்டுறவுக் கடன் சங்கம்!
பிரீமியம் ஸ்டோரி
News
சேமிப்புக் கிடங்கு... பொருளீட்டுக் கடன்... வைப்பு நிதி... முன்னோடி கூட்டுறவுக் கடன் சங்கம்!

சங்கம்

விவசாயிகளுக்குப் பல்வேறு உதவிகள் கிடைக்கும் வகையில் உருவாக்கப்பட்டவைதான், தொடக்க வேளாண்மைக் கூட்டுறவுக் கடன் சங்கங்கள். கூட்டுறவுத்துறையைச் சேர்ந்த செயலாளர் (மேலாளர்) மற்றும் சில நிரந்தரப் பணியாளர்கள் மூலம் இயங்கும் இந்தக் கடன் சங்கங்கள் 11 உறுப்பினர்களைக் கொண்ட நிர்வாகக்குழு மூலம் நிர்வகிக்கப்படுகின்றன. சங்கத்தில் உறுப்பினராக இருக்கும் விவசாயிகள்தான் நிர்வாகக் குழுவினரைத் தேர்ந்தெடுக்கிறார்கள். 

சேமிப்புக் கிடங்கு... பொருளீட்டுக் கடன்... வைப்பு நிதி... முன்னோடி கூட்டுறவுக் கடன் சங்கம்!

விதைப்பிலிருந்து அறுவடை செய்த விளைபொருளைச் சேமித்து வைப்பது வரை, விவசாயிகளுக்குத் தேவையான பணத்தைக் குறைந்த வட்டியில் கடன் கொடுக்கும் பணிதான் தொடக்க வேளாண்மைக் கூட்டுறவுக் கடன் சங்கங்களின் முக்கியச் சேவை. அரசு வகுத்துக் கொடுத்த பணிகளைத் தாண்டியும் விவசாயிகளுக்குச் சிறந்த சேவையாற்றும் கடன் சங்கங்கள் பல உண்டு. அப்படிப்பட்ட சிறந்த சேவையாற்றும் சங்கங்களுக்கு ஆண்டுதோறும் கூட்டுறவுத்துறை மூலமாக விருது வழங்கி வருகிறது, தமிழக அரசு. அந்த வகையில், சிறப்பான சேமிப்புக் கிடங்குச் சேவை மற்றும் பொருளீட்டுக்கடன் ஆகியவற்றுக்கான மாநில அளவிலான விருதைப் பெற்றுள்ளது, கோயம்புத்தூர் மாவட்டத்தில் உள்ள நரசீபுரம் தொடக்க வேளாண்மைக் கூட்டுறவுக் கடன் சங்கம்.

இச்சங்கத்தின் செயல்பாடுகள் குறித்து, செயலாளர் கே.நடராஜிடம் பேசினோம். “1962-ஆம் ஆண்டு நரசீபுரம் தொடக்க வேளாண்மைக் கூட்டுறவுக் கடன் சங்கம் தொடங்கப்பட்டது. 1996-ஆம் ஆண்டுவரை ஒரு பழைய வீட்டில் செயல்பட்டு வந்தது. தற்போது சங்கம் செயல்பட்டு வரும் இந்த இடம், சண்முகசுந்தரம் என்ற விவசாயி, கூட்டுறவுச்சங்கத்துக்காகத் தானமாகக் கொடுத்த இடம். அவர் தானமாகக் கொடுத்தது, மொத்தம் 36 சென்ட் நிலம். இதன் இன்றைய மதிப்பு, கிட்டத்தட்ட 70 லட்சம் ரூபாய். இந்த இடம், பிரதான சாலையோரம் இருப்பதால், உடனடியாகக் கட்டடம் கட்டப்பட்டு இங்கு செயல்பட்டு வருகிறது.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
சேமிப்புக் கிடங்கு... பொருளீட்டுக் கடன்... வைப்பு நிதி... முன்னோடி கூட்டுறவுக் கடன் சங்கம்!

இருப்பு வைத்து விற்பனை செய்யக்கூடிய மஞ்சள், கொப்பரை, பாக்கு, மிளகாய் வற்றல் போன்ற விளைபொருள்களைச் சேமித்து வைத்து... சந்தையில் அப்பொருளுக்கு நல்ல விலை கிடைக்கும் சமயங்களில் விற்பனை செய்தால் விவசாயிகளுக்குக் கிடைக்கும் லாபம் அதிகரிக்கும். அந்த வகையில், விவசாயிகள் பலனடையும் வகையில், எங்கள் சங்கத்தில் 200 டன் கொள்ளளவு கொண்ட ஒரு சேமிப்புக் கிடங்கை அமைத்திருக்கிறோம். கடந்த 2013-ஆம் ஆண்டிலிருந்து சேமிப்புக் கிடங்கு பயன்பாட்டில் உள்ளது. இச்சேமிப்புக்கிடங்கைக் கட்ட மத்திய அரசின், ‘விளைபொருள் சேமிப்புக் கிடங்கு வளர்ச்சி ஆணையம்’, 25,00,000 ரூபாய் நிதியுதவி செய்துள்ளது.

நரசீபுரம், ஜாகீர் நாயக்கன்பாளையம், வெள்ளிமலைப்பட்டினம் ஆகிய மூன்று கிராமங்களைச் சேர்ந்த 2,800 விவசாயிகள் எங்கள் சங்கத்தில் உறுப்பினர்களாக உள்ளனர். இந்தப்பகுதியில் மஞ்சள் மற்றும் பாக்கு ஆகியவை அதிகம் விளைகின்றன. அவற்றை இருப்பு வைக்க, எங்கள் சேமிப்புக்கிடங்கை விவசாயிகள் பயன்படுத்தி வருகின்றனர். விளைபொருளுக்குரிய விலை கிடைக்காதபட்சத்தில் ஆறு மாதங்கள்வரை இங்கு இருப்பு வைக்கலாம். எப்போது சந்தையில் விலை அதிகரித்தாலும் உடனடியாக விளை பொருள்களை எடுத்து விற்பனை செய்து கொள்ளலாம். சேமிப்புக்கிடங்கில் விளைபொருள்களை இருப்பு வைக்கும் விவசாயிகளுக்கு அதிகபட்சமாக 3,00,000 ரூபாய் வரை பொருளீட்டுக் கடன் வழங்கி வருகிறோம். ஆண்டுக்கு 250 விவசாயிகள் எங்கள் சேமிப்புக்கிடங்கு மூலம் பயனடைகிறார்கள். ஆண்டுக்கு ஆறு கோடி ரூபாய் வரை பொருளீட்டுக் கடன் வழங்கி வருகிறோம். மேலும் இங்கு விளைபொருள்களை இருப்பு வைக்கும் விவசாயிகளுக்கு ‘இ ரசீது’ வழங்குகிறோம். அந்த இ ரசீதை வைத்து இந்தியாவில் உள்ள அனைத்து வங்கிகளிலும் பொருளீட்டுக்கடன் பெற முடியும். 

சேமிப்புக் கிடங்கு... பொருளீட்டுக் கடன்... வைப்பு நிதி... முன்னோடி கூட்டுறவுக் கடன் சங்கம்!

அதேபோல விவசாயிகளிடம் வைப்பு நிதி பெறப்பட்டு, இருப்பு வைத்திருப்பதிலும் தேசியமயமாக்கப்பட்ட வங்கிகளுக்கு நிகராகச் சாதனை செய்திருக்கிறோம். 2019-ஆம் ஆண்டு மார்ச் மாத நிலவரப்படி 22 கோடி ரூபாயை வைப்பு நிதியாகப் பெற்றுள்ளோம். கோயம்புத்தூர் மாவட்டத்தின் சிறந்த 10 சங்கங்களில் ஒன்றாக எங்களது சங்கமும் திகழ்கிறது. எங்களது நாணயமான சேவைதான், விவசாயிகளின் நம்பிக்கைக்குக் காரணமாக இருக்கிறது” என்ற நடராஜ், சங்கம் மூலமாக வழங்கி வரும் கடன் திட்டங்கள் குறித்துச் சொல்ல ஆரம்பித்தார்.

சேமிப்புக் கிடங்கு... பொருளீட்டுக் கடன்... வைப்பு நிதி... முன்னோடி கூட்டுறவுக் கடன் சங்கம்!

“விவசாயிகளுக்கு ஐந்து கோடி ரூபாயை விவசாய நகைக்கடனாக வழங்கியிருக்கிறோம். அதேபோல உரிய ஆவணங்களுடன் வரும் விவசாயிகளுக்கு விண்ணப்பித்த 24 மணி நேரத்துக்குள் பயிர்க்கடன் வழங்கி வருகிறோம். கறவை மாடுகள் வாங்குவதற்காக, 28,00,000 ரூபாய் கடன் வழங்கியிருக்கிறோம். சுய உதவிக்குழுக்களுக்குச் சுழல் நிதியாக ஒரு குழுவுக்கு 10,00,000 ரூபாய் வரை கடன் வழங்கி வருகிறோம். இதுவரை 12 மகளிர் சுய உதவிக்குழுக்கள் எங்கள் சங்கத்தில் இணைந்துள்ளன. அக்குழுக்களுக்கு 19,00,000 ரூபாய் கடன் வழங்கியிருக்கிறோம். தகுதியுள்ள நபர்களுக்குத் தனிநபர்க் கடனாக 25,00,000 ரூபாய் கடன் வழங்கியிருக்கிறோம். மாற்றுத்திறனாளிகள் மேம்பாட்டுக் கடனாக 1,83,000 ரூபாய் கடன் வழங்கியிருக்கிறோம். அடமானக்கடனாக இரண்டு கோடியே ஐம்பது லட்சம் ரூபாயும், வீட்டுக்கடனாக ஒரு கோடியே ஐம்பது லட்சம் ரூபாயும் வழங்கியிருக்கிறோம்” என்ற நடராஜ் நிறைவாக,

“கடந்த 2006-ஆம் ஆண்டுவரை இச்சங்கம் நஷ்டத்தில்தான் இயங்கி வந்தது. கடந்த 12 ஆண்டுகளில் படிப்படியாக வளர்ந்துள்ளது. தற்போது 9 நிரந்தர ஊழியர்கள் இங்கு பணியாற்றுகிறார்கள். ஆண்டுக்கு 44,00,000 ரூபாய் லாபத்தில் இயங்குகிறது, எங்கள் சங்கம். எங்கள் வெற்றிக்கு முக்கியக் காரணம், எங்கள் சங்க உறுப்பினர்களின் ஆதரவும், கடந்த ஏழு ஆண்டுகளாகச் சங்கத்தின் தலைவராக இருக்கும் நடராஜனின் ஆலோசனைகளும்தான்” என்று சொல்லி விடைகொடுத்தார்.

ஜி.பழனிச்சாமி - படங்கள்: தி.விஜய்

இயற்கை இடுபொருள் விற்பனை மையம்

நர
சீபுரம் தொடக்க வேளாண்மைக் கூட்டுறவுக் கடன் சங்க அலுவலகம் முழுக்கக் குளிர்சாதன வசதி செய்யப்பட்டுள்ளது. திருமண உதவித்தொகை, விதவைச்சான்று, கணவனால் கைவிடப்பட்டவருக்கான சான்று, குடும்பத்தில் முதல் பட்டதாரி சான்று, சாதிச்சான்று... போன்றவற்றைப் பெற்றுத்தரும் இது, சேவை மையமாகவும் இச்சங்கம் செயல்படுகிறது. அதோடு இச்சங்கத்தில் இயற்கை இடுபொருள்கள் மற்றும் ரசாயன உரங்கள் ஆகியவற்றின் விற்பனை நிலையமும் செயல்படுகிறது. ஓர் ஆண்டுக்கு ஒரு கோடியே இருபத்தைந்து லட்சம் ரூபாய் மதிப்புக்கு உரங்கள் விற்பனை செய்யப்படுகின்றன. இச்சங்கம் மூலம், உழவுக்கருவிகள் இணைக்கப்பட்ட டிராக்டர் விவசாயிகளுக்கு வாடகைக்கு விடப்படுகிறது.

இச்சங்கம் மற்றும் இஃப்கோ நிறுவனம் ஆகியவை இணைந்து 200 முன்னோடி விவசாயிகளுக்கு இலவசமாக சிம்கார்டு வழங்கியுள்ளன. அந்த விவசாயிகளுக்கு அரசின் புதிய திட்டங்கள், மானியங்கள், அலுவலக நினைவூட்டல், வேளாண் தகவல்களை உள்ளிட்ட தகவல்களை இஃப்கோ குறுஞ்செய்தி மூலமாக அனுப்பி வருகிறது.

ஆன்லைன் மூலம் விற்பனை 

சேமிப்புக் கிடங்கு... பொருளீட்டுக் கடன்... வைப்பு நிதி... முன்னோடி கூட்டுறவுக் கடன் சங்கம்!

நரசீபுரம் தொடக்க வேளாண்மைக் கூட்டுறவு கடன் சங்கம் குறித்துக் கூட்டுறவுச் சங்கங்களின் மாவட்ட இணைப்பதிவாளர் பழனிசாமியிடம் பேசினோம். “கோயம்புத்தூர் மாவட்டத்தில் மொத்தம் 137 தொடக்க வேளாண்மைக் கூட்டுறவுக் கடன் சங்கங்கள் உள்ளன. அவற்றில் மிகச்சிறப்பாகச் செயல்படும் சங்கங்களில் இதுவும் ஒன்று. அடுத்த ஆண்டில் ஆன்லைன் மூலம் விளைபொருள்களை விற்பனை செய்ய இருக்கிறது, இச்சங்கம். அதன் மூலம் இப்பகுதி விவசாயிகள் தங்கள் மஞ்சள் மற்றும் பாக்கு ஆகியவற்றை இடைத்தரகு இல்லாமல் விற்பனை செய்ய முடியும்” என்றார், பழனிச்சாமி.