Published:Updated:

பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!

பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!
பிரீமியம் ஸ்டோரி
பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!

பூச்சி மேலாண்மை - 8

பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!

பூச்சி மேலாண்மை - 8

Published:Updated:
பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!
பிரீமியம் ஸ்டோரி
பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!

யார் பெரியவர்… உருவத்தில் சிறிய பூச்சிகளா… அறிவில் பெரிய மனிதர்களா எனப் பன்னெடுங்காலமாக நடக்கும் போட்டியில் பூச்சிகளே வெற்றிக் கோப்பையை வென்று வருகின்றன.

பூச்சிகளுக்கு எதிராக மனித இனம் கண்டுபிடித்த பூச்சிக்கொல்லிகள், பூச்சிகளைக் கொல்லவோ வெல்லவோ முடியவில்லை. ஆயிரக்கணக்கான விஞ்ஞானிகள் ஆய்வுக்கூடங்களில் பல ஆண்டுகள் ஆராய்ந்து பூச்சிக்கொல்லிகளைக் கண்டுபிடிக்கிறார்கள். ஆனால், அவற்றுக்கு எதிரான எதிர்ப்பு சக்தியைத் தங்கள் உடலிலேயே உருவாக்கிக் கொள்கின்றன, பூச்சிகள்.

பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!

இதை உலகில் உள்ள அனைத்து பூச்சிக்கொல்லி தயாரிப்பு நிறுவனங்களும் ஒப்புக்கொண்டுள்ளன. 500 வகையான பூச்சிகள், நவீன பூச்சிக்கொல்லிகளுக்கு எதிரான எதிர்ப்பு சக்தியை உருவாக்கிக் கொண்டுள்ளன என ஆதாரபூர்வமாக நிரூபிக்கப்பட்டுள்ளது. இன்னும் சில வகைப் பூச்சிகளுக்கு என்னவிதமான பூச்சிக்கொல்லிகளைத் தெளிப்பது என்பது பற்றியே தெரியாமல் குழம்பிக் கிடக்கிறார்கள், விஞ்ஞானிகள்.

பூச்சிக்கொல்லி தெளிக்கும் விவசாயிகள், அதைப்பற்றிப் புரிந்துகொள்ள வேண்டும். பூச்சிக்கொல்லிக்கான எதிர்ப்புத்திறனைப் பூச்சிகள் எவ்வாறு உருவாக்கிக் கொள்கின்றன என்பதையும் தெரிந்துகொள்ள வேண்டும். பூச்சிக்கொல்லி, உயிர்க்கொல்லி, நஞ்சு எனப் பல்வேறு பெயர்களில் அழைக்கப்படும் பூச்சிக்கொல்லி ஒவ்வொரு காலகட்டத்திலும் ஒவ்வொரு விதமாக அறிமுகப்படுத்தப்பட்டது.

இந்தியாவில் 1968-ஆம் ஆண்டின் பூச்சிக்கொல்லிச் சட்டப்படி இவை தயாரிக்கப்படுகின்றன. 1971-ஆம் ஆண்டுக்கான விதிமுறைகளைக் கடைப்பிடித்துத் தயாரிக்கவும் பயன்படுத்தவும் செய்ய வேண்டும் என்கிறது, சட்டம். பூச்சிக்கொல்லி டப்பா மீது ஒரு லேபிள் ஒட்டப்பட்டிருக்கும். அதில் பூச்சிக்கொல்லிகளின் தன்மை, பூச்சிக்கொல்லி விஷத்தின் பெயர், நிறுவனத்தின் பெயர், எந்தெந்தப் பூச்சிகளுக்கு எதிராகச் செயல்படும் போன்ற விவரங்கள், பூச்சிகளின் படம், தயாரிப்புத் தேதி, காலாவதித்தேதி உள்ளிட்ட விவரங்கள் எழுதப்பட்டிருக்க வேண்டும். குறிப்பாக அந்த விஷத்துக்கு எதிரான விஷ முறிவு மருந்து பெயரும் குறிப்பிடப்பட்டிருக்க வேண்டும். அதை இந்தி, ஆங்கிலம் மற்றும் பூச்சிக்கொல்லி விற்பனை செய்யப்படும் மாநிலத்தின் மொழி, பக்கத்து மாநிலத்தின் மொழி என நான்கு மொழிகளில் விவரங்கள் அச்சிடப்பட்டிருக்க வேண்டும்.

பூச்சிக்கொல்லி டப்பா மீது நான்கு அடையாளச் சின்னங்கள் குறிப்பிடப்பட்டிருக்கும். முக்கோணப் படம் ஒன்று இருக்கும், அதில் இரண்டாகப் பிரிக்கப்பட்டு மேல் முக்கோணம், கீழ் முக்கோணம் என இரண்டு பகுதிகள் இருக்கும். மேல் பகுதியில் குறியீடுகள் மற்றும் வார்த்தைகள் இருக்கும். கீழ் முக்கோணத்தில் நிறங்கள் குறிப்பிடப்பட்டிருக்கும். இந்த நிறங்கள் மிகவும் முக்கியமானவை. விஷத்தின் வீரியத்தன்மை மற்றும் அதனால் ஏற்படும் தீங்கு போன்றவற்றை விவசாயிகளுக்குப் புரிய வைக்க உருவாக்கப்பட்டவை. ஆனால், விவசாயிகள் இதைப் புரிந்துகொண்டார்களா என்பது கேள்விக்குறிதான். பச்சை, நீலம், மஞ்சள் மற்றும் சிவப்பு என நான்கு நிறங்களில் ஏதாவது ஒன்று இருக்கும்.

ஒட்டுமொத்த விகடனுக்கும் ஒரே ஷார்ட்கட்!

பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!

பச்சை நிறம் இருந்தால் அது நச்சுத் தன்மையுள்ள பொருள். அபாயகரமானது. எச்சரிக்கையாகக் கையாள வேண்டும். நீல நிறம் இருந்தால், நடுத்தர நச்சுப்பொருள் என்று அர்த்தம். மஞ்சள் நிறம் இருந்தால், அதிக விஷமுள்ள பொருள் என்று அர்த்தம். சிவப்பு நிறம் இருந்தால், மிக அபாயகரமான நச்சுப் பொருள் என்று அர்த்தம். அதைப் பயன்படுத்தும் முறை பற்றியும் நான்கு மொழிகளில் குறிப்பிடப்பட்டிருக்கும். நச்சுகளைத் தெளித்தாலும் அவற்றுக்கான எதிர்ப்புத் தன்மையைப் பூச்சிகள் உருவாக்கிக் கொள்கின்றன. இதற்காகப் பல வழிமுறைகளை வைத்திருக்கின்றன, பூச்சிகள். பூச்சிகளின் வளர்சிதை மாற்றத்தில் எதிர்ப்புத் தன்மையை உருவாக்கிக் கொள்கின்றன. தொடு நஞ்சு, குடல் நஞ்சு, ஊடுருவிப் பாயும் நஞ்சு, புகை நஞ்சு, நரம்பு நஞ்சு என அறிவியல் ஆறடி பாய்ந்தால் பூச்சிகள் ஆறாயிரம் அடி பாய்கின்றன. தொடு நஞ்சு, குடல் நஞ்சு ஆகியவற்றைப் பயன்படுத்தும்போது நாம் பூச்சிகளைத்தான் குறி வைத்தோம். ஆனால், நேரடியாகக் குறிவைக்காமல் பயிர்களைக் குறிவைத்தே பூச்சிக்கொல்லிகளைத் தெளித்தோம். பூச்சிகளுக்கு என்ற பெயரில் நமக்கு நாமே விஷம் வைத்துக் கொண்டோம். முன்பு, நாம் தெளிக்கும் நஞ்சு, செடியின் எந்தப் பகுதியில் படுகிறதோ, அந்தப் பகுதி மட்டுமே விஷமாக மாறி இருக்கும். ஆனால், தற்போது பயன்படுத்தப்படும் ஊடுருவிப் பாயும் நஞ்சால், செடியின் அனைத்து இடங்களும் விஷமாகி விடுகின்றன. இந்த வகையான பூச்சிக்கொல்லிகள் பயன்பாட்டுக்கு வந்த பிறகுதான், மனிதர்களுக்கான நோய்கள் அதிகரித்திருக்கின்றன. ஐந்து தலைமுறை பூச்சிக்கொல்லிகள், அவற்றில் பத்து ஆயிரத்துக்கும் மேற்பட்ட மருந்துகள் என இருந்தாலும் பூச்சிகளுக்கு இதுவரை எந்தப் பிரச்னையும் இல்லை. ஆனால், நாம் தெளிக்கும் அதிக விஷத்தன்மை வாய்ந்த பூச்சிக்கொல்லிகளால் மண், நீர், காற்று என அனைத்தும் நஞ்சாக மாறுகின்றன.

செடிக்குத் தெளிக்கும் பூச்சிக்கொல்லிகள் மண்ணில் விழுகின்றன. இதனால், மண்ணுக்குள் இருக்கும் கோடிக்கணக்கான நுண்ணுயிர்கள் இறக்கின்றன. மட்க வைக்கும் வேலையைச் செய்யும் இந்த இயற்கை பணியாளர்களைச் செயற்கை மருந்து மூலமாகக் கொலை செய்கிறோம். நெல் வயலில் தெளிக்கும் பூச்சிக்கொல்லிகள் தண்ணீரில் கலக்கின்றன. தண்ணீர் மாசுபட்டு நஞ்சாக மாறுகிறது. பூச்சிக்கொல்லிகளைத் தெளிக்கும்போது செடிகளில் படுவதைவிடக் காற்றில் பரவும் சதவிகிதம்தான் அதிகம். அந்த வகையில் காற்றும் நஞ்சாகிறது. பூச்சிக்கொல்லி, எந்த வேலைக்காகப் பயன்படுத்தப்படுகிறதோ அந்த வேலையைச் சரியாகச் செய்யாமல், அதற்கு எதிரான வேலைகளைப் பல மடங்கு செய்கிறது.

பூச்சிகளில் நான்கு பருவங்கள் இருக்கின்றன என்பதை ஏற்கெனவே பார்த்தோம். அதில் புழுப் பருவம் முக்கியமானது. புழுக்களின் வேலை சாப்பிடுவது மட்டுமே… அவை சாப்பிடும் பொருள்கள், செரிமானம் ஆவதற்காக அவற்றின் எச்சிலிலும், வயிற்றுக்குள்ளும் சில என்சைம்கள் உருவாகும். அப்படி உருவாகும் என்சைம்கள், புழுக்கள் உண்ணும் பொருள்களை மட்டும் அல்லாமல், நாம் பூச்சியை அழிப்பதற்காகத் தெளிக்கும் பூச்சிக்கொல்லிகளையும் ஜீரணிக்கும் தன்மையை உருவாக்கிக் கொள்கின்றன.

பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!

இதைத்தாண்டி நாம் தெளிக்கும் நஞ்சுகள் பூச்சிகளின் உடலில் எந்த இடத்தில் படுகிறதோ அதிலிருந்து தற்காத்துக் கொள்கின்றன பூச்சிகள். பூச்சிக்கொல்லிகள் தெளிக்கப்பட்ட பயிர்களையும்  அவற்றின் பாகங்களையும் பூச்சிகள் உணர்ந்து கொள்கின்றன. உடலில் படும் நஞ்சுகளால் பாதிப்பு ஏற்படாமல் காத்துக் கொள்கின்றன. பாம்புச் சட்டையை உரிப்பதுபோலப் புழு தனது வாழ்நாளில் நான்கைந்து முறை சட்டையை உரிக்கும். பூச்சிக்கொல்லி, தன் மேல் பட்டவுடனே சட்டையை உரித்துவிடும். காற்றில் உள்ள நஞ்சு, சுவாசம் மூலமாக உள்ளே போய் விடாமல் இருக்க, உடலில் உள்ள துளைகளை அடைத்துக் கொள்கின்றன. இன்னும் பல பூச்சிகள் பூச்சிக்கொல்லி தெளிக்கப்பட்ட பயிர்களை உண்ணாமல் உண்ணா நோன்பு இருக்கின்றன. இரண்டு நாள்களுக்குப் பிறகு வீரியம் குறைந்ததும் உண்கின்றன.

எல்லா உயிர்களுக்கும் அதற்கு எதிரான சூழல் வரும்போது எதிர்ப்புத் தன்மை உருவாக்கிக்கொள்வதற்கான மரபியல் மாற்றம் உடலில் ஏற்படுவது இயற்கை. இது சார்லஸ் டார்வினின் பரிணாமக் கொள்கை. எதிர்ப்புக்கு ஏற்ப எதிர்ப்புத் தன்மை உருவாகும். பூச்சிகளிலும் அதுதான் நடக்கிறது. பயிர்களில் பூச்சிக்கொல்லி தெளிக்கும்போது, அங்கு 100 பூச்சிகள் இருந்தால் 20 பூச்சிகள் தப்பித்துவிடும். அப்படித் தப்பிக்கும் பூச்சிகளின் மரபணுவில் அந்தப் பூச்சிக்கொல்லிக்கான எதிர்ப்புத் தன்மை உருவாகிவிடும். அந்தப் பூச்சிகள் அடுத்தப் பயிருக்குப் போகும். அங்குள்ள பூச்சிகளுடன் உடலுறவு வைத்துக்கொள்ளும். இதனால், உருவாகும் புதிய பூச்சிகளில் 50 சதவிகித எதிர்ப்புத் தன்மை இருக்கும். இந்த மரபணு மாற்றுத் தன்மையால், தற்போது பயன்பாட்டில் உள்ள பெரும்பாலான பூச்சிக்கொல்லிகளுக்கு எதிரான எதிர்ப்பு சக்தியைப் பூச்சிகள் பெற்றுவிட்டன. இதை ஐ.ஆர்.ஏ.சி என்ற அமைப்பு (Insecticides Resistance Action Committee) ஒப்புக்கொண்டுள்ளது. உலகம் முழுவதிலும் உள்ள பூச்சிக்கொல்லி நிறுவனங்கள் உருவாக்கிய அமைப்புதான் இந்த அமைப்பு.

உலக அளவில் பயன்பாட்டில் உள்ள பூச்சிக்கொல்லிகள், பூச்சிகளின் மீது செயல்படும் தன்மையை வைத்து 32 வகைகளாகப் பிரித்திருக்கின்றனர் ஆராய்ச்சியாளர்கள். பத்தாயிரத்துக்கும் மேற்பட்ட பூச்சிக்கொல்லிகள் இந்த 32 வகைகளில் வருகின்றன. ‘ஒரே பூச்சிக்கொல்லியைத் தொடர்ந்து பயன்படுத்தும்போது பூச்சிகள் சுலபமாக எதிர்ப்பு சக்தியை உருவாக்கிவிடுகின்றன. அதனால்தான், ஒருமுறை பயன்படுத்திய பூச்சிக்கொல்லியை அடுத்த முறை பயன்படுத்தக் கூடாது’ என்கிறார்கள். ஆனால், எந்த வகையான பூச்சிகளை அழிப்பதற்காகப் பூச்சிக்கொல்லிகளைத் தெளிக்கிறோமோ, அடுத்த முறை அதே ரசாயனம் உள்ள வேறு பூச்சிக்கொல்லியைத் தெளிக்கிறோம்.

பூச்சிக்கொல்லி வேறுபடுவது நமக்குத்தான் தெரியும். ஆனால், பூச்சிகளைப் பொறுத்தவரை ரகங்களோ வகைகளோ தேவையில்லாத விஷயம். ரசாயனம்தான் கணக்கு. நாம் தெளிக்கும் ரசாயனம் ஒரே வகையாக இருந்தால், சுலபமாக எதிர்ப்புத் தன்மையை உருவாக்கிக்கொள்ளும். ஐ.ஆர்.ஏ.சி அமைப்பு, ஒரே தன்மையுள்ள வெவ்வேறு ரசாயனங்களுக்கும் பூச்சிகள் எதிர்ப்புத் தன்மையை உருவாக்கியிருப்பதை உறுதிப்படுத்தியிருக்கிறது.

பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!

இதற்கு உதாரணம், கொசு. உலகில் முதன் முதலில் பூச்சிக்கொல்லி கொசுவுக்கு எதிராகத்தான் கண்டுபிடிக்கப்பட்டது. ஆனால், தற்போது 250 வகையான கொசு ஒழிப்பு நஞ்சுகள் பயன்படுத்தப்பட்டு வருகின்றன. ஆனாலும் கொசுக்களை அழிக்க முடியவில்லை. சமீபத்தில் பிரேசில் நாட்டில் நடந்த ஒலிம்பிக் போட்டியின்போது ‘ஜிகா வைரஸ்’ பரவும் என நினைத்து, கொசுக்களை ஒழிப்பதற்காக ஆண்மை நீக்கம் செய்யப்பட்ட கொசுக்களைப் பறக்கவிட்டார்கள், விஞ்ஞானிகள். ஆனால் கொசு இரண்டொரு நாள்களிலேயே அதைக் கண்டுபிடித்துவிட்டது. வெளியூர் ஆள்கள் நம் ஊருக்கு வந்தால் சுலபமாகக் கண்டுபிடித்து விடுகிறோமே அதுபோல, விஞ்ஞானிகளின் கொசுக்களை இயற்கைக் கொசுக்கள் சுலபமாகக் கண்டுபிடித்துவிட்டன. அவற்றைக் கூட்டத்தில் சேர்க்காமல் விலக்கி வைத்துவிட்டன. அந்தக் கொசுக்களோடு இயற்கைக் கொசுக்கள் இனப்பெருக்கம் செய்யவே இல்லை. அங்கும் தோல்வியைச் சந்தித்தது, அறிவியல்.

கொசுக்களின் உடம்பில் உள்ள நோய் பரப்பும் வைரஸ் கிருமிகளை அழிப்பதற்காக ஒரு வகையான பூஞ்சணத்தை உருவாக்கி, செயற்கை முறையில் கொசுக்கள் உருவாக்கப்பட்டது. அந்தக் கொசு, மனிதனைக் கடித்தால் நோய் வராது. அந்தக் கொசுக்களும் இயற்கைக் கொசுக்களும் கலந்தால் கொசுக்களின் நோய் பரப்பும் தன்மையில் மாற்றம் வரும் எனக் கொலம்பியாவில் முடிவு செய்தார்கள். அதற்காகக் கொசுக்களை உருவாக்கி உலவவிட்டார்கள் விஞ்ஞானிகள். ஆனால், அதற்கு எதிராகவும் எதிர்ப்புத் தன்மையை உருவாக்கி வருகின்றன, கொசுக்கள்.

இப்படி விஞ்ஞானத்துக்கு எதிரான திறனை வளர்த்துக்கொண்டே இருக்கின்றன, பூச்சிகள். இப்படியே போனால் என்னதான் வழி. கவலையே தேவையில்லை. அனைத்து பிரச்னைக்கும் தீர்வு வைத்துள்ள இயற்கையே இதற்கும் தீர்வு வைத்துள்ளது. இயற்கைக்கு முன்பாக யாரும் பெரிய ஆள் இல்லை.

இயற்கை வைத்திருக்கும் வழிதான், இயற்கை வழி வேளாண்மை. இதில் பல்வேறுவிதமான பொருள்கள் பயன்பாட்டில் இருக்கின்றன. இவற்றை விவசாயிகளே உருவாக்கிக்கொள்ள முடியும் என்பது சிறப்பு. இதை விவசாயிகள் உணர்ந்துகொண்டு மாற வேண்டிய தருணம் இது.

‘நீங்கள் எத்தனை விதமான மருந்துகளைத் தெளித்தாலும், எங்களை எதுவும் செய்துவிட முடியாது’ எனச் சவால்விடும் பூச்சிகளை, ‘அவற்றை வைத்தே அழிக்கும் வழிமுறைகளை வைத்திருக்கிறது, இயற்கை வழி வேளாண்மை. அவற்றைப் புரிந்துகொண்டு செயல்படத் தொடங்க வேண்டும். ‘முள்ளை முள்ளால் எடுக்க வேண்டும்’ என்பது முதுமொழி. அதுதான் பூச்சிகளை அழிப்பதற்கான சூத்திரம். பயிர்களுக்குத் தீமை செய்யும் பூச்சிகளுக்கு எதிராக நன்மை செய்யும் பூச்சிகளும் இருக்கின்றன. அவற்றைப் பூச்சிக்கொல்லிகளால் தொடர்ந்து அழித்து வருகிறோம். இந்நிலை மாற வேண்டும். இயற்கை வழி விவசாயத்தை அனைவரும் கைக்கொள்ள வேண்டும். மாறாக ரசாயனங்களைப் பயன்படுத்துவதால் சுற்றுச்சூழல் மட்டுமல்லாது மனிதர்களும் ஆரோக்கியத்தை இழக்கும் நிலை அதிகரிக்கும்.

பூச்சிகள் பற்றிய இன்னும் பல அதிர்ச்சித் தகவல்களை அடுத்த இதழில்…

-நீ.செல்வம்,  தொகுப்பு: ஆர்.குமரேசன்

பூச்சிகளும் நம் நண்பர்களே..! - 2.0 - பூச்சிக்கொல்லிகளுக்குப் பெப்பே... விஞ்ஞானத்தை விஞ்சும் பூச்சிகள்!

‘பூச்சி’ நீ.செல்வம், பூச்சிகளைப் பற்றி விளக்கும் காணொளியைப் பார்க்க இந்த QR Code-யை ஸ்கேன் செய்யவும்.

பூச்சிகொல்லி… கவனம்!

சாயன பூச்சிக்கொல்லிகளைப் பயன்படுத்தும் விவசாயிகள் எச்சரிக்கையுடன் பயன்படுத்த வேண்டும். எத்தனை மில்லி பயன்படுத்த வேண்டும் எனக் குறிப்பிடப்பட்டிருக்கிறதோ, அந்த அளவு மட்டுமே பயன்படுத்த வேண்டும். அதைவிட அதிகமாகப் பயன்படுத்தவே கூடாது. தெளிக்கும்போது பாதுகாப்பு உபகரணங்களை அணிந்துகொள்ள வேண்டும். காற்றுக்கு எதிர்பக்கமாகத் தெளிக்கக் கூடாது. காற்றின் திசையில்தான் தெளிக்க வேண்டும். பயிர்களின் உயரத்தைவிட ஒரு அடி மேலே இருந்து தெளிக்க வேண்டும். பயிர்களின் வளர்ச்சி, தாக்கியுள்ள பூச்சிகளின் தன்மைக்கு ஏற்றவாறு, பூச்சிக்கொல்லிகளைப் பயன்படுத்த வேண்டும்.