Published:Updated:

செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!

செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!
பிரீமியம் ஸ்டோரி
செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!

பணம் குவிக்கும் பண்ணைத்தொழில்கள் - 8பண்ணைத்தொழில்

செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!

பணம் குவிக்கும் பண்ணைத்தொழில்கள் - 8பண்ணைத்தொழில்

Published:Updated:
செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!
பிரீமியம் ஸ்டோரி
செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!

யற்கைச்சீற்றம், விலையின்மை, ஆள் பற்றாக்குறை... எனப்பல காரணங்களால் விவசாயத்தில் வருமானம் குறைகிறபோது, அதை ஈடுகட்டுபவை விவசாயம் சார்ந்த உபதொழில்கள்தான். ஆடு வளர்ப்பு, கோழி வளர்ப்பு, மாடு வளர்ப்பு, பன்றி வளர்ப்பு, முயல் வளர்ப்பு, காடை வளர்ப்பு, தேனீ வளர்ப்பு, பட்டுப்புழு வளர்ப்பு, மீன் வளர்ப்பு, காளான் வளர்ப்பு... என ஏகப்பட்ட பண்ணைத்தொழில்கள் உள்ளன.

நமது பண்ணை அமைந்திருக்கும் சூழல், இடவசதி, தண்ணீர் வசதி... போன்ற முக்கியமான காரணிகளை வைத்துச் சரியான பண்ணைத் தொழிலைத் தேர்ந்தெடுத்து ஈடுபட்டால், கண்டிப்பாக நல்ல லாபம் ஈட்ட முடியும். சொல்லப்போனால் இதுபோன்ற விவசாய உபதொழில்கள் மூலம் விவசாயத்தில் எடுக்கும் வருமானத்தைவிட அதிகமாக வருமானம் ஈட்ட முடியும். அது போன்ற பண்ணைத்தொழில்களை வெற்றிகரமாகச் செய்து வரும் விவசாயிகளை அடையாளப்படுத்தி அவர்களின் வெற்றிச்சூத்திரத்தை அனைவருக்கும் கொண்டு சேர்ப்பதுதான் இத்தொடரின் நோக்கம்.

இந்த இதழில் செம்மறி ஆடுகள் மற்றும் கடக்நாத் கோழிகள் வளர்ப்பில் ஈடுபட்டு, நல்ல வருமானம் எடுத்து வரும் சாதனைப் பெண் விவசாயி அழகு குறித்துப் பார்ப்போம்.

சிவகங்கை மாவட்டம், சிங்கம்புணரி-காரைக்குடி சாலையிலிருந்து பொன்னமராவதி செல்லும் சாலையில் இருக்கிறது, நெற்குப்பை. நெற்குப்பை கிராமத்தை அடுத்த தோழன்களம் எனும் பகுதியில்தான் அழகுவின் தோட்டம் இருக்கிறது. ஒரு மதிய வேளையில் நெல் நாற்று நடவு பணியிலிருந்த அழகுவைச் சந்தித்தோம்.

செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!

“எங்களுக்கு இதுதான் சொந்த ஊர். இங்க பூர்வீக நிலம் 10 ஏக்கர் இருக்கு. நான், என் கணவர் சுப்பிரமணி ரெண்டு பேருமே விவசாயக்குடும்பத்துல பிறந்தவங்கதான். எனக்குக் கல்யாணம் ஆன பிறகு சென்னைக்குப் போயிட்டோம். அங்க மாதவரம் பகுதியில என் கணவர் வேலை பார்த்துட்டுருந்தார்.

அவருக்குக் குறைவான சம்பளம்தான் அங்க கிடைச்சது. ஊருல நிலத்தை வெச்சுக்கிட்டு இப்படி வெளியூர்ல வந்து கஷ்டப்படுறோமேனு எங்களுக்கு வருத்தமா இருந்துச்சு. ரெண்டு குழந்தைகள் பிறந்தவுடன் இனிமேல் சென்னை வேணாம்னு முடிவு பண்ணி சொந்த ஊர் திரும்பிட்டோம். இங்க வந்து கடலை, உளுந்து, நெல், சோளம்னு சாகுபடி செய்ய ஆரம்பிச்சோம். இது இல்லாம 100 மாமரங்களும் இருக்கு. அதுக்கப்புறம் இங்க பக்கத்துலேயே 5 ஏக்கர் நிலம் வாங்கினோம்.

பிறகு குன்றக்குடி வேளாண் அறிவியல் நிலையத்துல ஏற்பாடு பண்ற பயிற்சிகள்ல தொடர்ந்து கலந்துக்க ஆரம்பிச்சேன். அங்கதான், அறிவியல் ரீதியா ஆடு வளர்ப்பு, மாடு வளர்ப்பு, கோழி வளர்ப்புப் பத்தியெல்லாம் தெரிஞ்சுக்கிட்டேன். அதுக்கப்புறம் பால் மாடுகள், செம்மறி ஆடுகளை வளர்க்க ஆரம்பிச்சேன். எங்க ஊர்க் கட்டுப்பாடுபடி வெள்ளாடு வளர்க்கக் கூடாது. அதனாலதான் செம்மறி ஆடுகளை வளர்க்குறேன். எல்லாமே ‘பட்டணம்’ ரகச் செம்மறி ஆடுகள். இப்போ பட்டியில மொத்தம் 65 ஆடுகள் இருக்கு. 10 பால் மாடுகள் இருக்கு” என்ற அழகு, கடக்நாத் கோழி வளர்ப்புக் குறித்துச் சொல்ல ஆரம்பித்தார்.

“கோழி வளர்ப்பு பயிற்சிக்குப் போயிருந்தப்போ, கடக்நாத் ரகக் கோழிகளுக்கு நல்ல விற்பனை வாய்ப்பு இருக்குனு தெரிஞ்சுக்கிட்டேன். உடனே நாமக்கல்ல இருந்து 150 குஞ்சுகளை வாங்கிட்டு வந்து வளர்க்க ஆரம்பிச்சேன். அந்த ரகக் கோழிகள் அடை படுக்குறதில்லை. அதனால, அந்தக் கோழிகள் இடுற முட்டைகளை நாட்டுக்கோழிகள் மூலமா அடை காத்து பொரிக்க வெச்சுக் குஞ்சுகளைப் பெருக்குனேன்.

அந்தக் கோழிகளுக்குனு தனியா எந்தப்பராமரிப்பும் பாக்குறதில்லை. ஆரம்பத்துல தடுப்பூசி போட்டதுதான். அதுக்கப்புறம் எந்த மருத்துவமும் பார்க்கலை. அதுக பாட்டுக்கு வளருது. ஒரு நோய் நொடி வர்றதில்லை. திறந்தவெளி மேய்ச்சல்தான். காலையில திறந்துவிட்டா அதுக பாட்டுக்குத் தோட்டம் முழுக்கச் சுத்தி மேய்ஞ்சுக்கும்.

ஒட்டுமொத்த விகடனுக்கும் ஒரே ஷார்ட்கட்!

செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!

சாயங்கால நேரத்துல அரிசி, சோளம், கம்பு எல்லாத்தையும் உடைச்சு கலந்து தூவி விட்டா சாப்பிட்டுக்கும். அதுக்கப்புறம் தானா கொட்டகைக்குள்ள போயிடும்” என்ற அழகு சிறிது தீவனத்தை எடுத்து வீசிவிடக் கோழிகள் அனைத்தும் ஓடிவந்தன.

“எங்ககிட்ட கடக்நாத் கோழிகள் இருக்குறதைத் தெரிஞ்சுக்கிட்டு நிறைய பேர் தேடி வந்து கேட்டாங்க. வர்றவங்களுக்கு ஒருத்தருக்கு ஒரு ஜோடி கோழிகள்னு விற்பனை செஞ்சோம். நிறையபேர் கேட்டு வரவும் எங்ககிட்ட கோழிகள் குறைய ஆரம்பிச்சுடுச்சு. அதனால, இப்போ கோழி விற்பனையை நிறுத்தி வெச்சுட்டோம். ரொம்ப விரும்பிக் கேக்குறவங்களுக்கு மட்டும் கோழிகளை விற்பனை செய்றோம். கடக்நாத் கோழிகள் இடுற முட்டைகள்ல, இங்க பொரிக்கிற அளவு மட்டும் எடுத்து வெச்சுக்கிட்டு, முட்டைகளை மட்டும் இப்போ விற்பனை செஞ்சுட்டுருக்கோம். முட்டை வாங்கிட்டுப் போறவங்க பொரிச்சு குஞ்சு எடுத்து வளத்துக்குறாங்க.

கோழிகள் கேட்டு வர்றவங்ககிட்ட எடுத்துச் சொல்லி முட்டைகளைக் கொடுத்துட்டுருக்கோம். எங்ககிட்ட இப்போ கையில 250 வளர்ந்த கோழிகளும் 150 வளர்ற குஞ்சுகளும் இருக்கு.ஆடுகளுக்குப் பெரிய பராமரிப்பெல்லாம் கிடையாது. காலையில மேய்ச்சலுக்கு அனுப்புனா இங்கேயே சுத்தி மேய்ஞ்சுட்டுச் சாயங்காலம் பட்டிக்கு வந்துடும். மாடுகளும் அதேமாதிரிதான்.

முன்னாடி நிறைய மாடுகள் இருந்துச்சு. இப்போ ரொம்ப வறட்சியா இருக்குறதால, மாடுகளைக் குறைச்சாச்சு.கன்னுக்குட்டி, மாடுகள் எல்லாம் சேர்த்து மொத்தம் 10 உருப்படிகள்தான் இருக்கு. ஆடு, மாடுகளுக்குப் பசுந்தீவனத்துக்காகத் தீவனப்புல்லையும் வளர்த்துட்டுருக்கோம்.

செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!

இங்க இருக்குற விவசாயிகளை இணைச்சு ‘தோழன்களம் பால் உற்பத்தியாளர் கூட்டுறவுச் சங்கம்’னு ஆரம்பிச்சுருக்கேன். அதுக்கு நான்தான் தலைவி. எல்லார்கிட்டயும் பால் சேகரிச்சு தினமும் 250 லிட்டர் அளவுக்குக் காரைக்குடி ஆவினுக்குப் பால் அனுப்புறேன். எங்களுக்குக் குன்றக்குடி கே.வி.கே விஞ்ஞானிகள்தான் இப்போ வரைக்கும் தேவையான ஆலோசனைகளை வழங்கிட்டுருக்காங்க” என்ற அழகு, வருமானம் குறித்துச் சொல்ல ஆரம்பித்தார்.

“கடக்நாத் கோழிகளை வயசைப் பொறுத்து ஒரு ஜோடி 1,000 ரூபாய்ல இருந்து 4,000 ரூபாய் வரை விற்பனை செய்றேன். முன்னாடி ஒரு மாசத்துக்கு 40-50 ஜோடிவரை விற்பனை செஞ்சேன். இப்போ மாசத்துக்கு 10 ஜோடி வரைக்கும்தான் விற்பனை செய்றேன். இப்போ பெரும்பாலும் ஓரளவுக்கு வளர்ந்த கோழிகளைத்தான் விற்பனை செய்றேன்.

எங்ககிட்ட இருக்குற தாய்க்கோழிகள்ல இருந்து தினமும் 20 முட்டைகள்ல இருந்து 60 முட்டைகள்வரை கிடைக்குது. அதுல எங்களுக்குத் தேவையானதை எடுத்து வெச்சுக்கிட்டதுபோக மீதியை விற்பனை செய்றோம். ஒரு முட்டை 20 ரூபாய்னு மாசம் 400 முட்டைகள்வரை விற்பனை செய்றேன். முன்னாடி ஒரு முட்டை 50 ரூபாய்னுதான் கொடுத்தோம். அப்புறம் நாங்களா விலையைக் குறைச்சுக்கிட்டோம். கோழிகள், முட்டை விற்பனை மூலமா மாசத்துக்கு 40,000 ரூபாய் வரை வருமானம் கிடைக்குது. ஆடுகள்ல கிடாவை மட்டும்தான் விற்பனை செய்றேன். பெட்டையை வளர்ப்புக்கு வெச்சுக்குவேன். கிடாவை 7 மாசம் வரைக்கும் வளர்த்து விற்பனை செய்றப்போ ஒரு கிடா 6,000 ரூபாய்ல இருந்து 7,000 ரூபாய் வரை விலை போகும். ஒரு மாசத்துக்கு 2 அல்லது 3 கிடாக்கள் விற்பனையாகும்.

செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!

அதில்லாம வயசான பெட்டை ஆடுகள், ஒழுங்கா ஈனாத ஆடுகளையும் அப்பப்போ கழிச்சுடுவேன். அந்த வகையில பார்த்தா ஆடுகள் மூலமா மாசம் 20,000 ரூபாய் வரை வருமானம் கிடைச்சுடுது.

பால் மாடுகள் மூலமா தினமும் 25 லிட்டர் அளவுக்கு மேல பால் கிடைக்குது. ஒரு லிட்டர் 25 ரூபாய்னு ஆவினுக்குக் கொடுக்குறது மூலமா, மாசம் 20,000 ரூபாய் அளவுக்கு வருமானம் கிடைக்குது. மொத்தமாகப் பார்த்தா, ஆடு, மாடு, கோழிகள் மூலமா மாசம் 80,000 ரூபாய்க்கு மேல வருமானம் கிடைச்சுடுது. இதுல எங்களுக்குச் செலவே கிடையாது. ஆடு, கோழி, மாடு மூணுக்குமே மேய்ச்சல்தான் பிரதானம். பசுந்தீவனம் இங்கேயே இருக்கு. ஆடு, மாடுகளுக்குத் தேவையான உளுந்தம்பொட்டு, கடலைக்கொடி, வைக்கோல் எல்லாமே எங்ககிட்டயே இருக்கும். கோழிக்குத் தேவையான அரிசியும் இங்க விளையுறதுதான். அதனால, கால்நடை வளர்க்குறதுக்கு எங்களுக்குச் செலவே கிடையாது. கால்நடைகள் இல்லாம பத்து ஏக்கர் அளவுல இயற்கை விவசாயம் செய்றோம். அது மூலமாக் கிடைக்கிற வருமானம் தனி” என்ற அழகு நிறைவாக,

“தண்ணி வசதி மட்டும் இருந்ததுனா, இதுமாதிரி ரெண்டு மடங்கு வருமானம் எடுத்துடுவேன். நான் தூய கடக்நாத் கோழிகளை வளர்க்குறதால விற்பனைக்குப் பிரச்னையே இல்லை. தேடிவந்து வாங்கிட்டுப் போறாங்க. இங்க 500 கடக்நாத் தாய்க்கோழிகள் வெச்சு ஒரு பண்ணை வைக்கணும்னு எனக்கு ஆசை. அதுக்காகத்தான் கோழி விற்பனையைக் குறைச்சுக்கிட்டேன். சீக்கிரம் பெரிய அளவுல கடக்நாத் கோழிப்பண்ணை அமைச்சுடுவேன்” என்று கண்களில் நம்பிக்கை பொங்க விடைகொடுத்தார்.

தொடர்புக்கு, அழகு,
செல்போன்: 96001 02366

மகிளா கிஷான் விருது

த்திய அரசு ஒவ்வோர் ஆண்டும் வழங்கிவரும் ‘மகிளா கிஷான்’ விருது கடந்த ஆண்டுப் பெண் விவசாயி அழகுக்கு வழங்கப்பட்டுள்ளது. சிறந்த பெண் விவசாயிகள் என இந்திய அளவில் தேர்வு செய்யப்பட்ட ஐந்து பெண்களை நேர்காணல் நடத்தி… நிறைவாக அழகுவை அவ்விருதுக்காகத் தேர்ந்தெடுத்துள்ளனர். ‘மகிளா கிஷான்’ விருதுடன் 2,00,000 ரூபாய் ரொக்கமும் வழங்கப்பட்டுள்ளது.

“அழகு மூலமா அறுபது குடும்பங்கள் பிழைக்கிறாங்க”

ழகு, குன்றக்குடி வேளாண் அறிவியல் மையத்தில்தான் கால்நடை வளர்ப்பு குறித்த பயிற்சிகளை எடுத்துள்ளார். அதுகுறித்து, குன்றக்குடி வேளாண் அறிவியல் மையத்தின் தலைவர் மற்றும் பேராசிரியர் செந்தூர்குமரனிடம் பேசினோம்.

“மூணு வருஷத்துக்கு முன்னாடி எங்க கே.வி.கேவில் நடந்த ஒரு பயிற்சியில், எதேச்சையா அழகு கலந்துக்கிட்டாங்க. அப்போ அவங்க மா சாகுபடி செஞ்சுட்டுருந்தாங்க. நாலு மாடுகள் வெச்சுருந்தாங்க. மாமரங்களில் கவாத்து செய்ற தொழில்நுட்பங்களைக் கத்துக்கொடுத்தோம். அப்போதான் அவங்க, கே.வி.கேவில் கால்நடைகள் வளர்ப்பு பத்தியும் பயிற்சிகள் கொடுக்குறதைத் தெரிஞ்சுக்கிட்டாங்க. அதுக்கப்புறம் கறவை மாடு வளர்ப்புப் பயிற்சியில் கலந்துக்கிட்டு வெளிநாட்டுக் கலப்பின மாடுகளை வாங்குனாங்க. அதுல அதிகமாகப் பால் கிடைச்சுக் கொஞ்சம் லாபகரமா இருந்ததும், பேங்க் லோன் போட்டு மாடுகளை அதிகப்படுத்துனாங்க. பேங்க் லோனுங்கு நாங்கதான் புராஜெக்ட் போட்டுக் கொடுத்தோம். அடுத்து மாடுகளைப் பெருக்கி பால் உற்பத்தியை அதிகப்படுத்துனாங்க. ஆடுகள், கோழிகளுக்கான தடுப்பு ஊசிகள் பத்தியும் எங்ககிட்ட பயிற்சி எடுத்துருக்காங்க. அடுத்து ஆவின் சொசைட்டி அமைக்கலாம்னு நாங்க யோசனை சொன்னோம். அவங்க 20 பெண்களைப் பயிற்சிக்கு அழைச்சுட்டு வந்தாங்க. எல்லோருமே பொருளாதாரத்துல பின்தங்குன ஆளுங்கதான்.

செம்மறி ஆடுகள்... கடக்நாத் கோழிகள்... கறவை மாடுகள்... மாதம் ரூ.80,000 வருமானம்!

அப்புறம் அவங்களுக்கு ஆளுக்கொரு மாடு வாங்குறதுக்கு நாங்க புராஜெக்ட் போட்டுக்கொடுத்தோம். ஆனா, லோன் கேட்டுப் போனப்போ, பேங்க்ல ஸ்யூரிட்டி கேட்டாங்க. அப்போ, அழகுவே 20 பேரோட கடனுக்கும் தானே பொறுப்பேத்துக்குறதா ஸ்யூரிட்டி கையெழுத்துப் போட்டு, அந்தப் பெண்களுக்கு மாடு கொடுக்க ஏற்பாடு பண்ணுனாங்க. அதுக்கப்புறம் கூட்டுறவு சொசைட்டி ஆரம்பிச்சு, அந்தப் பெண்கள்கிட்ட பாலை வாங்கி ஆவினுக்குக் கொடுக்க ஆரம்பிச்சாங்க. இன்னைக்கு அவங்க கிராமத்துல 60 பேருக்கு அழகுவே ஸ்யூரிட்டி போட்டு பேங்க் லோன் மூலமா மாடு வாங்கிக் கொடுத்துருக்காங்க.கே.வி.கே சார்பா, புது ரக விதைகளைச் சோதனை அடிப்படையில விதைச்சுப் பார்க்குறதுக்கு, ஒவ்வொரு மாவட்டத்துலயும் சில முன்னோடி விவசாயிகளைத் தேர்வு செஞ்சு வெச்சுருப்பாங்க. சிவகங்கை மாவட்டத்துல எங்க கே.வி.கே மூலமா பரிசோதனை செய்யணும்னா அழகு மூலமாத்தான் பரிசோதனை செய்வோம்.அடுத்து கடக்நாத் கோழி வளர்ப்புல இறங்குனாங்க. சிவகங்கை மாவட்டத்துல கடக்நாத் கோழிகள் பெருகுனதுக்கு அழகுவும் ஒரு காரணம். இந்தக்கோழி இறைச்சி நல்ல மருத்துவக் குணம் உடையது. அதனால, நிறைய பேர் அந்தக் கோழி இறைச்சியை விரும்பிச் சாப்பிடுவாங்க. கடக்நாத் கோழிகளை அவங்க நல்ல முறையில வளர்க்குறாங்க.

அந்த ரகக் கோழி ரகத்தைப் பெருக்குறதுக்கு நாங்க அவங்களை உபயோகப்படுத்திக்கிட்டோம். கறிக்கான நாட்டுக்கோழிகள்ல, அதிக விலைக்கு விற்பனையாகுறது, இந்தக் கடக்நாத் கோழிகள்தான். அதுமூலமா அவங்க நிறைவான வருமானம் பார்த்துட்டு இருக்காங்க. இப்போ அவங்களுக்குக் கடக்நாத் கோழி முட்டை நல்லா விற்பனையாகுது.அஞ்சு வருஷத்துக்கு முன்னாடி பொருளாதாரச் சூழ்நிலையில கொஞ்சம் பின்தங்கிதான் இருந்தாங்க. இன்னிக்குத் தன்னோட கடும் உழைப்பால, பொருளாதாரத்துல நல்ல முறையில வளர்ந்துட்டாங்க. ஆனாலும் நமக்குப் பணம் வந்துடுச்சுனு அப்படியே ஒதுங்கிக்காம, எல்லோரையும் முன்னேத்தணும்னு நினைக்கிறாங்க. நாங்க அவங்களை அழைச்சுட்டுப்போய் நிறைய விவசாயிகளுக்குப் பயிற்சி கொடுக்க வெச்சுட்டுருக்கோம்.

அவங்களோட வெற்றிக்கதையைக் கேட்டே நிறைய பேர் கால்நடை வளர்ப்புல இறங்கியிருக்காங்க. நல்ல முறையில விவசாயம், கால்நடை வளர்ப்புல ஈடுபடுறதோடு மற்ற விவசாயிகளுக்கு விதை கொடுக்குறது, பயிற்சி கொடுக்குறது மாதிரியான பணிகளையும் அவங்க செய்றாங்க. இன்னிக்கு அவங்க கிராமத்துல 60 குடும்பங்கள் அழகுவால பிழைச்சுட்டுருக்காங்க. அதனாலதான் நாங்க அவருக்கு மகிளா கிஷான் விருதுக்குப் பரிந்துரை செஞ்சோம்” என்றார்.

தொடர்புக்கு, குன்றக்குடி வேளாண் அறிவியல் நிலையம், தொலைபேசி: 04577 264288

- ஜி.பிரபு, படங்கள்: எஸ்.சாய் தர்மராஜ், வீ.சிவக்குமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism