Published:Updated:

156 நெல் ரகங்கள்... விதைத் தூய்மை காக்க ஒரு முயற்சி!

 தொண்டை மண்டலம் பவுண்டேஷன் இளைஞர்கள்
பிரீமியம் ஸ்டோரி
தொண்டை மண்டலம் பவுண்டேஷன் இளைஞர்கள்

பாரம்பர்யம்

156 நெல் ரகங்கள்... விதைத் தூய்மை காக்க ஒரு முயற்சி!

பாரம்பர்யம்

Published:Updated:
 தொண்டை மண்டலம் பவுண்டேஷன் இளைஞர்கள்
பிரீமியம் ஸ்டோரி
தொண்டை மண்டலம் பவுண்டேஷன் இளைஞர்கள்

பாரம்பர்ய நெல் ரகங்களை விதைக்கிறோம். ஆனால், அதன் விதைத் தூய்மை பற்றிக் கவலைப்படுவதில்லை. பாரம்பர்ய நெல் ரகங்களில் கலப்பு நிகழ்ந்துவிட்டால், அதை எதற்குச் சாகுபடி செய்கிறோமோ அந்த நோக்கம் நிறைவேறாமல் போய்விடும். பாரம்பர்ய ரகங்களின் மருத்துவச் சிறப்பு, அதன் குணாதிசயத்தைக் காப்பது மிகவும் அவசியம். அதற்காகத்தான் 156 நெல் ரகங்களை விதைத்தூய்மைக்காகச் சாகுபடி செய்திருக்கிறோம்” உற்சாகத்தோடு பேசுகிறார்கள் தொண்டை மண்டலம் பவுண்டேஷனைச் சேர்ந்த இளைஞர்கள்.

திருவள்ளூர் மாவட்டம், பொன்னேரி தாலுகா, கந்தன்பாளையத்தில் உள்ள வயலில் பாரம்பர்ய நெல் ரகங்கள் அணிவகுத்து நிற்கின்றன. இந்த முயற்சியில் ஈடுபட்டுள்ள இளைஞர்களைச் சந்தித்துப் பொங்கல் சிறப்பிதழுக்காகப் பேசினோம்.

நாற்றுவிடும் மரப்பலகை
நாற்றுவிடும் மரப்பலகை

குழு உறுப்பினரும், இயற்கை விவசாயியுமான பார்த்தசாரதி முதலில் பேசத் தொடங்கினார். “நிறைய விவசாயிகள் பாரம்பர்ய நெல் ரகங்களைச் சாகுபடி செய்றதுல ஆர்வமா இருக்காங்க. வர்த்தகரீதியாகச் சாகுபடி செய்தாலும், அடுத்த விதைப்புக்கு அந்த விதைகளைத் தான் பயன்படுத்துறாங்க. ஆனா, அப்படிப் பயன்படுத்தும்போது அதோட தூய்மையைக் காப்பது அவசியம். இது சம்பந்தமான விழிப்புணர்வை ஏற்படுத்திட்டு வர்றாரு ஒடிசா மாநிலத்தைச் சேர்ந்த பாரம்பர்ய நெல் ரக ஆராய்ச்சியாளர் விஞ்ஞானி தேபால் தேப். அவர், 2 ஏக்கர்ல 1,400 பாரம்பர்ய நெல் ரகங்களைச் சாகுபடி செய்து, விதைத் தூய்மை யைப் பாதுகாத்து, விதை வங்கியும் வெச்சிருக்கார். விதைப்பு, அறுவடை, சேமிப்பு, பாதுகாப்புனு எல்லா விஷயங்களையும் இனக் கலப்பு நடக்காம கவனமாகச் செய்வார். இதைப்பத்தி கேள்விப்பட்டு அவர்கிட்ட பயிற்சி எடுத்துக்கிறதுக்காகத் தமிழ்நாட்டிலிருந்து 30 பேர் போன வருஷம் ஒடிசாவுக்குப் போனோம். ஒடிசா மாநிலம், ராயகடா மாவட்டம், முனிகுடா பக்கத்துல இருக்க அவருடைய பசுதா பண்ணையில் போய்ப் பயிற்சி எடுத்துகிட்டோம்.

தினேஷ்பாபு, பார்த்தசாரதி, ஹரிஹரகுமார், சீனிவாசன்
தினேஷ்பாபு, பார்த்தசாரதி, ஹரிஹரகுமார், சீனிவாசன்

பயிற்சியில கத்துக்கிட்ட விஷயங்கள் அடிப்படையில ‘மரபு விதைத்தூய்மை’ என்ற பெயரில் சோதனை வயலை அமைச்சோம். அவர், 144 பாரம்பர்ய நெல் ரகங்களைக் கொடுத்தார். அதோடு நம்ம ஊர் பாரம்பர்ய ரகங்கள் 12 சேர்த்து மொத்தம் 156 ரகங்களை விதைத் திருக்கிறோம். 156 ரகங்களையும் ஒரே இடத்துல விதைக்காம, இங்க 86 ரகங்கள், காஞ்சிபுரம் மாவட்டம் திருப்புக்குழியில் 40 ரகங்கள், விழுப்புரம் மாவட்டம் சின்னபாபு சத்திரத்தில் 30 ரகங்கள் விதைத் திருக்கிறோம்” என்றவரைத் தொடர்ந்து, குழுவைச் சேர்ந்த ஹரிஹரகுமார் பேசினார்.

நெற்பயிர் கணுக்கள்
நெற்பயிர் கணுக்கள்

“பாரம்பர்ய நெல் ரகங்களை வர்த்தக ரீதியாகச் சாகுபடி செய்யும்போது பிரச்னையில்ல. அதையே விதைக்காகச் சாகுபடி செய்றதா இருந்தா கவனமாக இருக்கணும். எப்பவும் நெல் பயிர்ல ஒரே பயிருக்குள்ளதான் மகரந்தச் சேர்க்கை நடக்கும். நெல் பயிர் பூப்பூக்கும்போது அதிலிருந்து உதிரும் மகரந்தம், அதே பயிர்ல இருக்கப் பெண் பூவில் சேர்ந்து காய்க்க ஆரம்பிக்கும். இப்படிச் சரியாக மகரந்தம் நடக்காத பயிர்கள்லதான் ‘கருக்கா’னு சொல்ற பதர்கள் அதிகமா உருவாகிடுது.

நாட்டு ரக விதைகள்
நாட்டு ரக விதைகள்

பாரம்பர்ய நெல் சாகுபடி செய்திருக்கும் வயல் பக்கத்துல ஒட்டுரக நெல் சாகுபடி செய்திருந்தா, காற்று வீசும்போது ஒரே பயிர்ல நடக்க வேண்டிய மகரந்தச் சேர்க்கை மாறி, ரெண்டு வெவ்வேறு நெல் பயிரில் நடக்க வாய்ப்பு இருக்கு. குறிப்பா புயல், அதிக காற்று வீசுற நேரங்கள்ல இதுபோல அதிகம் நடந்துவிட வாய்ப்புண்டு. அதைத் தடுப்பதற்காக நாங்க சாகுபடி செய்திருந்த பாரம்பர்ய நெல் வயல்களைச் சுற்றியும் தடுப்பு வலை சுற்றிக் கட்டியிருந்தோம். அறுவடை செய்து விதையாகச் சேமிக்காம கதிர்களாகத்தான் சேமிக்க இருக்கிறோம்.

வயல் சோதனை
வயல் சோதனை

ஒவ்வொரு ரகத்துக்கும் இருக்கிற குணாதிசயங்கள் அதை வளரும் நேரத்திலேயே, அது அந்தந்தப் பயிரில் இருக்கிறதா என்பதையும் சோதனை செய்து பார்த்துட்டோம். கையாலதான் அறுவடை செய்யப் போறோம். ‘நெல் மணியோட அளவு, நிறம், சுனைத்தன்மை, பயிரின் உயரம், கணுக்கள்’னு ஒவ்வொரு பாரம்பர்ய நெல் பயிரோட சிறப்பியல்புகளையும் தெரிஞ்சு கிட்டோம். அந்தப் பண்புகள் எங்க நெற்பயிர், நெல் மணிகளோடு ஒத்துப்போகிறதா என்பதையும் பதிவு செய்திருக்கிறோம். ஒவ்வொரு பாரம்பர்ய நெல் ரகத்தோட குணாதிசயங்கள் அடங்கிய ‘டேட்டாபேஸ்’ எங்ககிட்ட இருக்கு. அதை வெச்சு, விதையோட 100 சதவிகித தூய தன்மையை உறுதி செய்தோம்” என்றவர் அதற்கான ஆதாரங்களைக் காட்டினார்.

மகேஷ்-சுஜாதா
மகேஷ்-சுஜாதா

தொடர்ந்து விதைப் பெருக்கத்துக்கான நடவு முறைகுறித்துப் பேசிய குழுவின் உறுப்பினர் சீனிவாசன், “இந்த விதைப்பெருக்கத்துக்கான நிலத்தைக் கொடுத்தவர் டாக்டர் தினேஷ் பாபு. இது தொடர்ந்து இயற்கை விவசாயம் செய்ற நிலம்ங்கிறதால, நாங்க எந்த இடுபொருளையும் கொடுக்கல. விதைகளை உப்புத் தண்ணியில போட்டு, மிதந்து வர்ற பொக்குகளை நீக்கிட்டு, அதிலேயே ஒருநாள் ஊற வெச்சேம். லேசா முளைவிட்ட பிறகு, அதை மண், எரு கலந்த மர டிரே(பலகை)ல நாற்றுவிட்டு 15 நாள்கள் வளர்த்தோம். பிறகு, அதைப் பறிச்சு பயிருக்குப் பயிர் முக்கால் அடி இடைவெளியில நடவு செய்தோம். ஒவ்வொரு ரகத்துக்கும் 8 அடிக்கு 8 அடி இடத்தை ஒதுக்கினோம். நடவு செய்த இடத்தைச் சுற்றிலும் தடுப்பு வலை அமைச்சோம். ஒவ்வொரு ரகத்தோட வயதுக்கு ஏற்றவாறு அறுவடை செய்துட்டு வர்றோம்” என்றார்.

156 நெல் ரகங்கள்... விதைத் தூய்மை காக்க ஒரு முயற்சி!
நடவுப் பணிகள்
நடவுப் பணிகள்

நிறைவாகப் பேசிய பார்த்தசாரதி, “குழுவாகத்தான் இந்த முயற்சியில இறங்கினோம். இங்க நாலு பேர். திருப்புக்குழியில் கணபதி தமிழ்ச் செல்வன், சின்னபாபு சத்திரத்தில் மகேஷ்-சுஜாதாவும் செய்றாங்க. சில ரகங்களை இரண்டு இடத்திலும் விதைத்திருக்கிறோம். சொல்லப்போனா திருப்பக்குழி, சின்னபாபு சத்திரத்தில் தலா 90 ரகங்கள் விதைத்திருக்கிறோம். இன்னும் ஒரு வாரத்துல முழுமையா அறுவடை செய்துடுவோம். அறுவடை செய்த நெல் கதிர்களை விதைப் பெருக்கத்துக்காகச் சேமிச்சு வைக்க இருக்கிறோம். இயற்கை விவசாயம், பாரம்பர்ய நெல் ரகங் களைப் பயிர் செய்ய உண்மையான ஆர்வமுள்ளவங்களுக்கு இந்த விதைகளை 50 கிராம் அல்லது 100 கிராம் இலவசமா வழங்க இருக் கிறோம். வாங்கிட்டுப் போறவங்க பயிர் செய்து விதைகளைப் பெருக்கிக் கொள்ளலாம். இந்த மரபு விதைத் தூய்மை முயற்சியைத் தொடர்ந்து முன்னெடுக்க இருக்கிறோம். ஒவ்வோர் ஆண்டும் இது தொடர்பான முயற்சியை மேற்கொள்ள இருக்கிறோம். விதைகளோட தூயத்தன்மை பாதுகாக்கப்பட வேண்டும் என்பதே எங்கள் நோக்கம்” என்று சொல்லி விடைகொடுத்தனர்.

கணபதி தமிழ்ச்செல்வன்
கணபதி தமிழ்ச்செல்வன்

தொடர்புக்கு,

* பார்த்தசாரதி, செல்போன்: 97890 94118

* ஹரிஹரகுமார், செல்போன்: 98405 92885

பயிர் செய்துள்ள பாரம்பர்ய ரகங்கள்

சின்னார், துளசி வாசனை சீரகச் சம்பா, பர்மா பிளாக், கள்ளுருண்டையான், ரத்தசாலி, தங்கச் சம்பா, கருத்தகார், கொத்த மல்லிச்சம்பா, பூங்கார், சேலம் சன்னா, பாஸ்மதி, தூயமல்லி, சொர்ணமசூரி, கிச்சிலிச் சம்பா, குள்ளக்கார், அறுபதாம் குறுவை உள்ளிட்ட 156 ரகங்கள்...

மரபு தூய்மைத் தன்மை முக்கியம்

பயிற்சிக்குச் சென்றிருந்தபோது...தேபால் தேப்
பயிற்சிக்குச் சென்றிருந்தபோது...தேபால் தேப்

ஒடிசா மாநிலத்தில் உள்ள முனைவர் தேபால் தேப்பிடம் பேசினோம். “ஒவ்வொரு பாரம்பர்ய நெல் ரகமும் தன்னகத்தே ஒரு சிறப்பைக் கொண்டுள்ளது. அதைக் காப்பாற்றி அடுத்த தலைமுறையிடம் ஒப்படைப்பது நம் கடமை. ஒவ்வொரு விவசாயியும் பல வகையான பாரம்பர்ய ரகங்களைச் சாகுபடி செய்து வருகிறார். அப்படித் தொடர்ந்து சாகுபடி செய்து வரும்போது அதன் தூயத்தன்மை பாதிக்கப்பட வாய்ப்பிருக்கிறது. அதனால் இரண்டு ஆண்டுகளுக்கு ஒருமுறை ஒவ்வொரு நெல் ரகத்தின் மரபு தூய்மைத் தன்மையையும் சோதனை செய்து சரிபார்த்துக் கொள்வது அவசியம். மிகப்பெரிய நெல் பாரம்பர்யத்தைக் கொண்ட இந்தியாவில் நம் முன்னோர்கள் அதன் தூயத் தன்மையைப் பத்தாயிரம் ஆண்டுகளாகப் பாதுகாத்து வந்துள்ளார்கள். நாமும் அதைக் காக்க வேண்டும். நான் ஒவ்வோர் ஆண்டும் இதற்காகவே இரண்டு ஏக்கரில் பாரம்பர்ய நெல் சாகுபடி செய்து வருகிறேன். அதிக விளைச்சலைத் தரும் விதைகள் என்று சொல்லப்படும் கலப்பின வகைகளைத் தோற்கடிக்கும் எண்ணற்ற பாரம்பர்ய நெல் வகைகள் என்னிடம் உள்ளன. விதைத் தூய்மை குறித்து எந்தச் சந்தேகமென்றாலும் என்னைத் தொடர்புகொள்ளலாம்” என்றார்.

தொடர்புக்கு, தேபால் தேப், செல்போன்: 094326 74377

விதைகளின் தூய தன்மையைப் பாதுகாப்பது எப்படி?

* விதைக்காகச் சேமிக்கும்போது வயலின் நடுப்பகுதியில் உள்ள நெற்கதிர்களை அறுவடை செய்து அதிலிருந்து விதைகளைச் சேகரிக்க வேண்டும்.

* விதைகளைக் கதிர்களாக அறுவடை செய்து முனையில் துணியையோ, நூல் பையினையோ கட்டி சேமிக்க வேண்டும்.

* அருகில் உள்ள வயலிலிருந்து விதைகளைப் பாதுகாக்க வயலைச் சுற்றித் தடுப்பு வலையை அமைக்க விட வேண்டும்

* ஒவ்வொரு ரகத்தின் பண்புகளைத் தெரிந்து கொண்டு, நாம் விளைவிக்கும் ரகத்தில் அந்தத் தன்மை உண்டா என்பதைச் சோதனை செய்து வர வேண்டும். இதற்காகப் பாரம்பர்ய நெல் ரகங்கள் பண்புகள் அடங்கிய தகவல் களஞ்சியத்தை (டேட்டா பேஸ்) வைத்துக்கொள்ள வேண்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism